ಬರ್ನ್: 20 ಗ್ರ್ಯಾಂಡ್ ಸ್ಲಾಮ್ ಪ್ರಶಸ್ತಿಗಳನ್ನು ಗೆದ್ದ ಮೊದಲ ಪುರುಷ ಆಟಗಾರನೆಂಬ ಖ್ಯಾತ ಪಡೆದ ಟೆನಿಸ್ ದಂತಕಥೆ, ಸ್ವಿಟ್ಜರ್ಲ್ಯಾಂಡ್ ನ ರೋಜರ್ ಫೆಡರರ್, ಲೇವರ್ ಕಪ್ 2022 ರ ನಂತರ ನಿವೃತ್ತಿಯಾಗುವುದಾಗಿ ಪ್ರಕಟಿಸಿದ್ದಾರೆ.
ಫೆಡರರ್ ತಮ್ಮ ಟ್ವಿಟ್ಟರ್ ನಲ್ಲಿ ಪೋಸ್ಟ್ ಮೂಲಕ ನಿರ್ಧಾರವನ್ನು ಪ್ರಕಟಿಸಿದ್ದಾರೆ. ಫೆಡರರ್ ಅವರು 2003 ರಲ್ಲಿ ವಿಂಬಲ್ಡನ್ ಮೂಲಕ ಮೊದಲ ಗ್ರಾಂಡ್ ಸ್ಲಾಮ್ ಗೆದ್ದರು. ಅಂದಿನಿಂದ ಅವರು 6 ಆಸ್ಟ್ರೇಲಿಯನ್ ಓಪನ್, 1 ಫ್ರೆಂಚ್ ಓಪನ್, 8 ವಿಂಬಲ್ಡನ್ ಮತ್ತು 5 ಯುಎಸ್ ಓಪನ್ ಪ್ರಶಸ್ತಿಗಳನ್ನು ಗೆದ್ದಿದ್ದಾರೆ. ಫೆಡರರ್ ತನ್ನ ಪ್ರಮುಖ ಪ್ರತಿಸ್ಪರ್ಧಿಗಳಾದ ರಾಫೆಲ್ ನಡಾಲ್ ಮತ್ತು ನೊವಾಕ್ ಜೊಕೊವಿಕ್ ನಂತರ ಗ್ರ್ಯಾಂಡ್ ಸ್ಲಾಮ್ ಪ್ರಶಸ್ತಿಗಳ ಪ್ರಕಾರ ಮೂರನೇ ಸ್ಥಾನದಲ್ಲಿದ್ದಾರೆ.
ನನ್ನ ಟೆನಿಸ್ ಕುಟುಂಬಕ್ಕೆ ಮತ್ತು ಟೆನ್ನಿಸ್ ನನಗೆ ನೀಡಿದ ಎಲ್ಲಾ ಉಡುಗೊರೆಗಳಲ್ಲಿ, ನಿಸ್ಸಂದೇಹವಾಗಿ, ನಾನು ದಾರಿಯುದ್ದಕ್ಕೂ ಭೇಟಿಯಾದ ಜನರೇ ಶ್ರೇಷ್ಠ, ನನ್ನ ಸ್ನೇಹಿತರು, ನನ್ನ ಪ್ರತಿಸ್ಪರ್ಧಿಗಳು ಮತ್ತು ಕ್ರೀಡೆಗೆ ಅದರ ಜೀವನವನ್ನು ನೀಡುವ ಎಲ್ಲ ಅಭಿಮಾನಿಗಳಿಗೆ ಇಂದು, ನಾನು ಸುದ್ದಿಗಳನ್ನು ಹಂಚಿಕೊಳ್ಳಲು ಬಯಸುತ್ತೇನೆ ಎಂದು 41 ರ ಹರೆಯದ ಫೆಡರರ್ ವೃತ್ತಿಪರ ಟೆನಿಸ್‌ಗೆ ವಿದಾಯ ಪ್ರಕಟಿಸಿದ್ದಾರೆ.
ಕಳೆದ ಮೂರು ವರ್ಷಗಳು ನನಗೆ ಗಾಯಗಳು ಮತ್ತು ಶಸ್ತ್ರಚಿಕಿತ್ಸೆಗಳ ರೂಪದಲ್ಲಿ ಸವಾಲುಗಳನ್ನು ನೀಡಿವೆ. ನಾನು ಸಂಪೂರ್ಣ ಸ್ಪರ್ಧಾತ್ಮಕ ರೂಪಕ್ಕೆ ಮರಳಲು ಶ್ರಮಿಸಿದ್ದೇನೆ. ಆದರೆ ನನ್ನ ಸಾಮರ್ಥ್ಯವೂ ನನಗೆ ತಿಳಿದಿದೆ. ನನಗೆ 41 ವರ್ಷ. ನಾನು 24 ವರ್ಷಗಳಲ್ಲಿ 1500 ಕ್ಕೂ ಹೆಚ್ಚು ಪಂದ್ಯಗಳನ್ನು ಆಡಿದ್ದೇನೆ. ಈಗ ನನ್ನ ಸ್ಪರ್ಧಾತ್ಮಕ ವೃತ್ತಿಜೀವನವನ್ನು ಕೊನೆಗೊಳಿಸುವ ಸಮಯ ಬಂದಿದೆ ಎಂದು ಅವರು ಟ್ವಿಟ್ಟರಿನಲ್ಲಿ ಬರೆದಿದ್ದಾರೆ.
ಪ್ರತಿ ನಿಮಿಷವೂ ತನ್ನ ಪರವಾಗಿ ನಿಂತಿದ್ದ ಪತ್ನಿ ಮಿರ್ಕಾಗೆ ಧನ್ಯವಾದ. 8 ತಿಂಗಳ ಗರ್ಭಿಣಿಯಾಗಿಯೂ ಸಹ ಲೆಕ್ಕವಿಲ್ಲದಷ್ಟು ಪಂದ್ಯಗಳನ್ನು ವೀಕ್ಷಿಸಿದ್ದಾಳೆ ಮತ್ತು 20 ವರ್ಷಗಳಿಂದ ನನ್ನನ್ನು ಸಹಿಸಿಕೊಂಡಿದ್ದಾಳೆ ಎಂದು ಬರೆದಿದ್ದಾರೆ. ತನ್ನ ಹೆತ್ತವರು ಮತ್ತು ಸಹೋದರಿಗೆ ಧನ್ಯವಾದ ಹೇಳಿದ್ದಾರೆ, ಪ್ರಸ್ತುತ ಮತ್ತು ಹಿಂದಿನ ಎಲ್ಲಾ ತರಬೇತುದಾರರಿಗೆ ಧನ್ಯವಾದ ಹೇಳಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ