ಅಮೆರಿಕದ ಏರ್ ಫೋರ್ಸ್ ಬ್ರಿಗೇಡಿಯರ್ ಜನರಲ್ ಹುದ್ದೆಗೆ ಭಾರತೀಯ ಮೂಲದ ನಾಸಾ ಗಗನಯಾತ್ರಿ ರಾಜಾ ಚಾರಿ ನಾಮನಿರ್ದೇಶನ: ರಾಜಾ ಚಾರಿ ಯಾರು?

ವಾಷಿಂಗ್ಟನ್ : ಅಮೆರಿಕದ ಅಧ್ಯಕ್ಷ ಜೋ ಬೈಡನ್‌ ಅವರು ಗುರುವಾರ ಭಾರತೀಯ ಮಞುಲದ ಅಮೆರಿಕನ್ ಗಗನಯಾತ್ರಿ ರಾಜಾ ಚಾರಿ ಅವರನ್ನು ಅಮೆರಿಕದ ಏರ್ ಫೋರ್ಸ್ ಬ್ರಿಗೇಡಿಯರ್ ಜನರಲ್ ಆಗಿ ಬಡ್ತಿ ನೀಡಿ ನಾಮನಿರ್ದೇಶನ ಮಾಡಿದ್ದಾರೆ. ಬ್ರಿಗೇಡಿಯರ್ ಜನರಲ್ (BG) ಅಮೆರಿಕದ ಏರ್ ಫೋರ್ಸ್‌ನ ಒಂದು-ಸ್ಟಾರ್ ಜನರಲ್ ಆಫೀಸರ್ ಶ್ರೇಣಿಯಾಗಿದೆ. ಇದು ಕರ್ನಲ್ ಮೇಲೆ ಮತ್ತು ಮೇಜರ್ ಜನರಲ್ ಕೆಳಗಿನ ಹುದ್ದೆಯಾಗಿದೆ. ರಾಜಾ ಚಾರಿ ಪ್ರಸ್ತುತ ಆರ್ಟೆಮಿಸ್ ಗಗನಯಾತ್ರಿಗಳ ತಂಡದ ಸದಸ್ಯರಾಗಿದ್ದಾರೆ, ಅವರು ಚಂದ್ರನ ಮೇಲೆ ಹೋಗಿ ಬರುವ ಅಮೆರಿಕದ ಯಾನಕ್ಕಾಗಿ ತಯಾರಿ ನಡೆಸುತ್ತಿದ್ದಾರೆ. ಈ ನಾಮನಿರ್ದೇಶನವನ್ನು ಸೆನೆಟ್‌ ದೃಢೀಕರಿಸಬೇಕಿದೆ.
ಚಾರಿ ಪ್ರಸ್ತುತ ಟೆಕ್ಸಾಸ್‌ನ ಜಾನ್ಸನ್ ಸ್ಪೇಸ್ ಸೆಂಟರಿನ ಕ್ರೂ-3 ಕಮಾಂಡರ್ ಮತ್ತು ಗಗನಯಾತ್ರಿಯಾಗಿ ಹಾಗೂ ನ್ಯಾಷನಲ್ ಏರೋನಾಟಿಕ್ಸ್ ಮತ್ತು ಸ್ಪೇಸ್ ಅಡ್ಮಿನಿಸ್ಟ್ರೇಷನ್ ಆಗಿ ಸೇವೆ ಸಲ್ಲಿಸುತ್ತಿದ್ದಾರೆ.
ರಾಜಾ ಜಾನ್ ವುರ್ಪುತ್ತೂರ್ ಚಾರಿ ಅವರು ಭಾರತೀಯ-ಅಮೆರಿಕನ್ ಪರೀಕ್ಷಾ ಪೈಲಟ್ ಮತ್ತು NASA ಗಗನಯಾತ್ರಿಯಾಗಿದ್ದು, ಆಪರೇಷನ್ ಇರಾಕಿ ಫ್ರೀಡಂನಲ್ಲಿ F-15E ಯುದ್ಧ ಕಾರ್ಯಾಚರಣೆಗಳು ಮತ್ತು ಕೊರಿಯನ್ ಪರ್ಯಾಯ ದ್ವೀಪಕ್ಕೆ ಬೆಂಬಲವಾಗಿ ನಿಯೋಜನೆಗಳನ್ನು ಒಳಗೊಂಡಂತೆ 2,000 ಗಂಟೆಗಳ ಯುದ್ಧ ವಿಮಾನದ ಹಾರಾಟದ ಅನುಭವ ಹೊಂದಿದ್ದಾರೆ.

ಅವರು ಮ್ಯಾಸಚೂಸೆಟ್ಸ್ ಇನ್‌ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿಯಿಂದ ಏರೋನಾಟಿಕ್ಸ್‌ನಲ್ಲಿ ಸ್ನಾತಕೋತ್ತರ ಪದವಿಯನ್ನು ಪಡೆದರು ಮತ್ತು ಮೇರಿಲ್ಯಾಂಡ್‌ನ ಪ್ಯಾಟುಕ್ಸೆಂಟ್ ನದಿಯಲ್ಲಿರುವ ಅಮೆರಿಕದ ನೇವಲ್ ಟೆಸ್ಟ್ ಪೈಲಟ್ ಸ್ಕೂಲ್‌ನಿಂದ ಪದವಿ ಪಡೆದರು.
ಚಾರಿ ಅವರು 461ನೇ ಫ್ಲೈಟ್ ಟೆಸ್ಟ್ ಸ್ಕ್ವಾಡ್ರನ್‌ನ ಕಮಾಂಡರ್ ಆಗಿ ಮತ್ತು ಕ್ಯಾಲಿಫೋರ್ನಿಯಾದ ಎಡ್ವರ್ಡ್ಸ್ ಏರ್ ಫೋರ್ಸ್ ಬೇಸ್‌ನಲ್ಲಿ F-35 ಇಂಟಿಗ್ರೇಟೆಡ್ ಟೆಸ್ಟ್ ಫೋರ್ಸ್‌ನ ನಿರ್ದೇಶಕರಾಗಿ ಸೇವೆ ಸಲ್ಲಿಸಿದರು.
ಹೈದರಾಬಾದಿನಿಂದ ಇಂಜಿನಿಯರಿಂಗ್ ಪದವಿ ಪಡೆಯಲು ಚಿಕ್ಕವಯಸ್ಸಿನಲ್ಲಿ ಅಮೆರಿಕ್ಕೆ ಹೋದ ತಂದೆ ಶ್ರೀನಿವಾಸ್ ಚಾರಿ ಅವರಿಂದ ಪ್ರೇರಿತರಾಗಿ ಉನ್ನತ ಶಿಕ್ಷಣ ಪಡೆದು ವೃತ್ತಿಜೀವನದಲ್ಲಿ ಯಶಸ್ವಿಯಾದರು.
2020 ರಲ್ಲಿ, ಚಾರಿ ಅವರನ್ನು ನಾಸಾ ಮತ್ತು ಯುರೋಪಿಯನ್ ಬಾಹ್ಯಾಕಾಶ ಸಂಸ್ಥೆಯು ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣಕ್ಕೆ (ISS) ಸ್ಪೇಸ್‌ಎಕ್ಸ್ ಕ್ರ್ಯೂ -3 ಮಿಷನ್‌ನ ಕಮಾಂಡರ್ ಆಗಿ ಆಯ್ಕೆ ಮಾಡಿತು. ಚಾರಿ ಅವರು ಪರೀಕ್ಷಾ ಪೈಲಟ್ ಆಗಿ ವ್ಯಾಪಕ ಅನುಭವದೊಂದಿಗೆ ಈ ಕಾರ್ಯಾಚರಣೆಗೆ ಸೇರುತ್ತಾರೆ. ಅವರು ತಮ್ಮ ವೃತ್ತಿಜೀವನದಲ್ಲಿ 2,500 ಗಂಟೆಗಳ ಹಾರಾಟದ ಅವಧಿ ಹೊಂದಿದ್ದಾರೆ.
ಚಾರಿ ಅವರು ನವೆಂಬರ್ 10, 2021 ರಂದು ಪ್ರಾರಂಭವಾದ ISS ಗೆ NASA ಸ್ಪೇಸ್‌ಎಕ್ಸ್ ಕ್ರ್ಯೂ-3 ಮಿಷನ್‌ನ ಕಮಾಂಡರ್ ಆಗಿ ಸೇವೆ ಸಲ್ಲಿಸಿದರು. ಅವರು ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣದಲ್ಲಿ ಕಕ್ಷೆಯಲ್ಲಿ 177 ದಿನಗಳ ಕಾಲ ಫ್ಲೈಟ್ ಇಂಜಿನಿಯರ್ ಆಗಿ ಸೇವೆ ಸಲ್ಲಿಸಿದರು. ಅವರು ಬಾಹ್ಯಾಕಾಶ ನಿಲ್ದಾಣದಲ್ಲಿದ್ದ ಸಮಯದಲ್ಲಿ, ಅವರು ಎರಡು ಬಾಹ್ಯಾಕಾಶ ನಡಿಗೆಗಳನ್ನು ಮಾಡಿದರು ಮತ್ತು ಮೂರು ಸ್ಪೇಸ್‌ಎಕ್ಸ್ ಡ್ರ್ಯಾಗನ್ ಬಾಹ್ಯಾಕಾಶ ನೌಕೆ ಮತ್ತು ಎರಡು ಸಿಗ್ನಸ್ ಕಾರ್ಗೋ ವಾಹನಗಳನ್ನು ಲಾಂಚ್‌ ಮಾಡಲು ಸಹಾಯ ಮಾಡಿದರು.