ಅಮೆರಿಕದ ಕೆಂಟುಕಿ ಬ್ಯಾಂಕಿನಲ್ಲಿ ಗುಂಡಿನ ದಾಳಿ: 4 ಸಾವು, 8 ಮಂದಿಗೆ ಗಾಯ

ಕೆಂಟುಕಿಯ ಲೂಯಿಸ್‌ವಿಲ್ಲೆ ಡೌನ್‌ಟೌನ್‌ನಲ್ಲಿ ಬ್ಯಾಂಕ್ ಗುರಿಯಾಗಿಸಿಕೊಂಡು ಸೋಮವಾರ ನಡೆದ ಗುಂಡಿನ ದಾಳಿಯಲ್ಲಿ ನಾಲ್ವರು ಸಾವಿಗೀಡಾಗಿದ್ದಾರೆ ಮತ್ತು ಕನಿಷ್ಠ ಎಂಟು ಜನರು ಗಾಯಗೊಂಡಿದ್ದಾರೆ ಎಂದು ಅಮೆರಿಕ ಪೊಲೀಸರು ಹೇಳಿದ್ದಾರೆ. ಗುಂಡು ಹಾರಿಸಿದವನನ್ನು ಮಾಜಿ ಉದ್ಯೋಗಿ ಎಂದು ಶಂಕಿಸಲಾಗಿದೆ. ಆತನೂ ದಾಳಿಯಲ್ಲಿ ಸಾವಿಗೀಡಾಗಿದ್ದಾನೆ ಎಂದು ಪೊಲೀಸರು ಹೇಳಿದ್ದಾರೆ.
ದಕ್ಷಿಣ ರಾಜ್ಯದ ಅತಿದೊಡ್ಡ ನಗರವಾದ ಲೂಯಿಸ್‌ವಿಲ್ಲೆಯಲ್ಲಿರುವ ಓಲ್ಡ್ ನ್ಯಾಷನಲ್ ಬ್ಯಾಂಕ್‌ನಲ್ಲಿ ಬಂದೂಕುಧಾರಿ ನುಗ್ಗಿದ್ದಾನೆ ಎಂದು ಬೆಳಿಗ್ಗೆ 8:30 ರ ಸುಮಾರಿಗೆ (1230 GMT) ಕರೆಗಳು ಬಂದಿವೆ ಮತ್ತು ಅಧಿಕಾರಿಗಳು “ನಿಮಿಷಗಳಲ್ಲಿ” ಸ್ಥಳದಲ್ಲಿದ್ದರು ಎಂದು ಪೊಲೀಸರು ತಿಳಿಸಿದ್ದಾರೆ.
ಅಧಿಕಾರಿಗಳು “ತಕ್ಷಣವೇ ಶಂಕಿತನೊಂದಿಗೆ ಮುಖಾಮುಖಿಯಾದರು. ಆತ, ಇನ್ನೂ ಬಂದೂಕು ಗುಂಡು ಹಾರಿಸುತ್ತಿದ್ದ ಎಂದು ಲೂಯಿಸ್ವಿಲ್ಲೆ ಪೊಲೀಸ್ ಉಪ ಮುಖ್ಯಸ್ಥ ಪೌಲ್ ಹಂಫ್ರೆ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದರು, ಶೂಟರ್ ಸ್ಥಳದಲ್ಲೇ ಸಾವಿಗೀಡಾಗಿದ್ದಾನೆ ಎಂದು ಅವರು ಹೇಳಿದರು.

ಶಂಕಿತ ವ್ಯಕ್ತಿಯು ಸ್ವಯಂ ಗುಂಡುಹಾರಿಸಿಕೊಂಡಿದ್ದಾನೆಯೇ ಅಥವಾ ಅಧಿಕಾರಿಗಳಿಂದ ಕೊಲ್ಲಲ್ಪಟ್ಟಿದ್ದಾನೆಯೇ ಎಂದು ನಾವು ಖಚಿತಪಡಿಸಲು ಪ್ರಯತ್ನಿಸುತ್ತಿದ್ದೇವೆ” ಎಂದು ಹಂಫ್ರೆ ಹೇಳಿದರು.
ಬ್ಯಾಂಕಿನಲ್ಲಿ ಕನಿಷ್ಠ ನಾಲ್ವರು ಕೊಲ್ಲಲ್ಪಟ್ಟರು ಮತ್ತು ಲೂಯಿಸ್ವಿಲ್ಲೆ ವಿಶ್ವವಿದ್ಯಾಲಯದ ಆಸ್ಪತ್ರೆಯಲ್ಲಿ ಇಬ್ಬರು ಅಧಿಕಾರಿಗಳು ಸೇರಿದಂತೆ ಎಂಟು ಮಂದಿ ಗಾಯಗೊಂಡು ಚಿಕಿತ್ಸೆ ಪಡೆಯುತ್ತಿದ್ದಾರೆ ಎಂದು ಹಂಫ್ರೆ ಹೇಳಿದ್ದಾರೆ.
ಪೊಲೀಸರು ಆರಂಭದಲ್ಲಿ ಐದು ಸಾವಿನ ಸಂಖ್ಯೆಯನ್ನು ನೀಡಿದ್ದರು, ಆದರೆ ನಂತರ ಆ ಅಂಕಿಅಂಶವು ಶೂಟರ್ ಅನ್ನು ಒಳಗೊಂಡಿದೆ ಎಂದು ಸ್ಪಷ್ಟಪಡಿಸಿದರು. ಒಬ್ಬ ಅಧಿಕಾರಿ ಸೇರಿದಂತೆ ಇಬ್ಬರ ಸ್ಥಿತಿ ಚಿಂತಾಜನಕವಾಗಿದೆ.
ಇದರಲ್ಲಿ ಒಬ್ಬನೇ ಬಂದೂಕುಧಾರಿ ಭಾಗಿಯಾಗಿದ್ದಾನೆಂದು ನಾವು ನಂಬುತ್ತೇವೆ, ಆತ ಬ್ಯಾಂಕ್‌ಗೆ ಸಂಪರ್ಕ ಹೊಂದಿದ್ದಾನೆ. ಆತ ಮಾಜಿ ಉದ್ಯೋಗಿ ಎಂದು ತೋರುತ್ತಿದೆ ಎಂದು ಅವರು ಹೇಳಿದರು.