ಸಿರಿಯಾದಲ್ಲಿ ಐಸಿಸ್ ಮುಖ್ಯಸ್ಥ ಅಬು ಹುಸೇನ್ ಖುರಾಶಿಯನ್ನು ಕೊಂದು ಹಾಕಿದ ಟರ್ಕಿ

ಟರ್ಕಿಯ ಎಂಐಟಿ ಗುಪ್ತಚರ ಸಂಸ್ಥೆ ನಡೆಸಿದ ಕಾರ್ಯಾಚರಣೆಯಲ್ಲಿ ಶಂಕಿತ ಐಸಿಸ್ (ಇಸ್ಲಾಮಿಕ್ ಸ್ಟೇಟ್ ಆಫ್ ಇರಾಕ್ ಮತ್ತು ಸಿರಿಯಾ) ಮುಖ್ಯಸ್ಥನನ್ನು ಸಿರಿಯಾದಲ್ಲಿ ಕೊಲ್ಲಲಾಗಿದೆ ಎಂದು ಟರ್ಕಿಯ ಅಧ್ಯಕ್ಷ ರೆಸೆಪ್ ತಯ್ಯಿಪ್ ಎರ್ಡೊಗನ್ ಭಾನುವಾರ ಹೇಳಿದ್ದಾರೆ.
ಅಬು ಹುಸೇನ್ ಅಲ್-ಖುರಾಶಿ ಎಂಬ ದಾಯೆಶ್‌ನ ಶಂಕಿತ ನಾಯಕನನ್ನು ನಿನ್ನೆ (ಶನಿವಾರ) ಸಿರಿಯಾದಲ್ಲಿ ಎಂಐಟಿ (MIT) ನಡೆಸಿದ ಕಾರ್ಯಾಚರಣೆಯಲ್ಲಿ ಕೊಲ್ಲಲಾಗಿದೆ” ಎಂದು ಎರ್ಡೋಗನ್ ತಿಳಿಸಿದ್ದಾರೆ.
ನವೆಂಬರ್ 30 ರಂದು, ಐಸಿಸ್ ತನ್ನ ಮಾಜಿ ನಾಯಕ ಅಬು ಹಸನ್ ಅಲ್-ಹಶಿಮಿ ಅಲ್-ಕುರಾಶಿಯ ಸತ್ತಿದ್ದಾನೆ ಎಂದು ಪ್ರಕಟಿಸಿತ್ತು ಹಾಗೂ ನಂತರ ಅಬು ಹುಸೇನ್ ಅಲ್-ಕುರಾಶಿಯನ್ನು ಆತನ ಬದಲಿಯಾಗಿ ಮುಖ್ಯಸ್ಥನ ಸ್ಥಾನಕ್ಕೆ ನೇಮಿಸಿತ್ತು.
ಉತ್ತರ ಸಿರಿಯಾದ ಎಎಫ್‌ಪಿ ಪತ್ರಕರ್ತರ ಪ್ರಕಾರ, ಟರ್ಕಿಯ ಗುಪ್ತಚರ ಸಂಸ್ಥೆ ಸದಸ್ಯರು ಮತ್ತು ಅಫ್ರಿನ್‌ನ ವಾಯುವ್ಯ ಪ್ರದೇಶದಲ್ಲಿ ಜಿಂಡಿರೆಸ್‌ನಲ್ಲಿರುವ ಸ್ಥಳೀಯ ಮಿಲಿಟರಿ ಪೊಲೀಸರು ಶನಿವಾರ ಒಂದು ವಲಯವನ್ನು ಮುಚ್ಚಿದ್ದಾರೆ.

ಕೈಬಿಡಲಾದ ಜಮೀನನ್ನು ಇಸ್ಲಾಮಿಕ್ ಶಾಲೆಯಾಗಿ ಬಳಸಿಕೊಳ್ಳಲಾಗುತ್ತಿದೆ ಎಂದು ಸ್ಥಳೀಯರು ಎಎಫ್‌ಪಿಗೆ ಮಾಹಿತಿ ನೀಡಿದ್ದಾರೆ. ಇಲ್ಲಿಯೇ ಕಾರ್ಯಾಚರಣೆಯನ್ನು ನಡೆಸಲಾಯಿತು, ಇದು ನಂತರ ಶಂಕಿತ ಐಸಿಸ್ ಮುಖ್ಯಸ್ಥನ ಹತ್ಯೆಗೆ ಕಾರಣವಾಯಿತು. ಟರ್ಕಿಯು 2020 ರಿಂದ ಉತ್ತರ ಸಿರಿಯಾದಲ್ಲಿ ಸೈನಿಕರನ್ನು ಹೊಂದಿದೆ ಮತ್ತು ಸಿರಿಯನ್ ಸಹಾಯಕ ಪಡೆಗಳ ಸಹಾಯದಿಂದ ದೊಡ್ಡ ವಲಯಗಳನ್ನು ನಿಯಂತ್ರಿಸುತ್ತದೆ.
ಮಧ್ಯಪ್ರಾಚ್ಯ ಮತ್ತು ಯುರೋಪ್‌ನಲ್ಲಿ ಐಸಿಸ್ ದಾಳಿಗಳನ್ನು ಸಿದ್ಧಪಡಿಸುತ್ತಿದೆ ಎಂಬ ಆಧಾರದ ಮೇಲೆ ಏಪ್ರಿಲ್ ಮಧ್ಯದಲ್ಲಿ, ಅಮೆರಿಕ ಉತ್ತರ ಸಿರಿಯಾದಲ್ಲಿ ಹೆಲಿಕಾಪ್ಟರ್ ದಾಳಿ ನಡೆಸಿತು. ಅಮೆರಿಕ ಸೆಂಟ್ರಲ್ ಕಮಾಂಡ್ ಪ್ರಕಾರ, ಐಸಿಸ್ ಸದಸ್ಯ ಅಬ್ದುಲ್-ಅಲ್ ಹಾದಿ ಮಹಮೂದ್ ಅಲ್-ಹಾಜಿ ಅಲಿ ಕಾರ್ಯಾಚರಣೆಯಲ್ಲಿ ಕೊಲ್ಲಲ್ಪಟ್ಟಿದ್ದಾನೆ ಎಂದು ವರದಿಯಾಗಿದೆ.
ಏಪ್ರಿಲ್ 16 ರಂದು ಸಿರಿಯಾದಲ್ಲಿ, ಶಂಕಿತ ಐಸಿಸ್ ಉಗ್ರಗಾಮಿಗಳು ಕನಿಷ್ಠ 41 ಜನರನ್ನು ಕೊಂದರು, ಅವರಲ್ಲಿ 24 ಮಂದಿ ನಾಗರಿಕರಾಗಿದ್ದಾರೆ.

ಅಮೆರಿಕ ಪಡೆಗಳು, ಏಪ್ರಿಲ್ ಮೊದಲ ವಾರದಲ್ಲಿ, ಯುರೋಪ್‌ನಲ್ಲಿ ಸ್ಟ್ರೈಕ್‌ಗಳ ಸಂಚು ರೂಪಿಸುವ ಉಸ್ತುವಾರಿ ವಹಿಸಿದ್ದ ISIS ಹಿರಿಯ ನಾಯಕ ಖಲೀದ್ ಅಯದ್ ಅಹ್ಮದ್ ಅಲ್-ಜಬೌರಿಯನ್ನು ಹತ್ಯೆ ಮಾಡಿರುವುದಾಗಿ ಹೇಳಿಕೊಂಡಿದೆ.
ಐಸಿಸ್ ಇತ್ತೀಚಿನ ವರ್ಷಗಳಲ್ಲಿ ಯುರೋಪ್‌ನಲ್ಲಿ ಹಲವಾರು ಭಯೋತ್ಪಾದಕ ದಾಳಿಗಳನ್ನು ನಡೆಸಿದೆ, ಪ್ರಾಥಮಿಕವಾಗಿ 2014 ಮತ್ತು 2017 ರ ನಡುವೆ. ಕೆಲವು ಪ್ರಮುಖ ದಾಳಿಗಳಲ್ಲಿ ನವೆಂಬರ್ 2015 ಪ್ಯಾರಿಸ್ ದಾಳಿಗಳು, ಮಾರ್ಚ್ 2016 ಬ್ರಸೆಲ್ಸ್ ಬಾಂಬ್ ದಾಳಿಗಳು, ಜುಲೈ 2016 ನೈಸ್ ಟ್ರಕ್ ದಾಳಿ, ಡಿಸೆಂಬರ್ 2016 ಬರ್ಲಿನ್ ಟ್ರಕ್ ದಾಳಿ ಮತ್ತು ಮೇ 2017 ಅರೆನಾ ಬಾಂಬ್ ದಾಳಿ ಇದರಲ್ಲಿ ಸೇರಿವೆ.
ಇರಾಕ್ ಮತ್ತು ಸಿರಿಯಾದಲ್ಲಿ ಐಸಿಸ್‌ (ISIS) ತನ್ನ ಹೆಚ್ಚಿನ ಪ್ರಾದೇಶಿಕ ನಿಯಂತ್ರಣವನ್ನು ಕಳೆದುಕೊಂಡಿವೆ. ಆದರೂ ಗುಂಪಿನ ಜಾಗತಿಕ ನೆಟ್‌ವರ್ಕ್ ಅಂಗಸಂಸ್ಥೆಗಳು ಆಗಾಗ ಭಯೋತ್ಪಾದನೆಯ ಬೆದರಿಕೆ ಒಡ್ಡುತ್ತವೆ. ಅಕ್ಟೋಬರ್ 2019 ರಲ್ಲಿ, ವಾಯುವ್ಯ ಸಿರಿಯಾದಲ್ಲಿ ಅಮೆರಿಕ ಮಿಲಿಟರಿ ಕಾರ್ಯಾಚರಣೆಯಲ್ಲಿ ಐಸಿಸ್ ನಾಯಕ ಅಬು ಬಕರ್ ಅಲ್-ಬಾಗ್ದಾದಿ ಕೊಲ್ಲಲ್ಪಟ್ಟರು. ಅವರ ಸಾವನ್ನು ಐಸಿಸ್‌ಗೆ ದೊಡ್ಡ ಹೊಡೆತವೆಂದು ಪರಿಗಣಿಸಲಾಗಿದೆ, ಆದರೂ ಗುಂಪು ಭಯೋತ್ಪಾದಕ ದಾಳಿಗಳನ್ನು ಮುಂದುವರೆಸಿದೆ ಮತ್ತು ಅದರ ಜಾಗತಿಕ ಅಂಗಸಂಸ್ಥೆಗಳ ಜಾಲವನ್ನು ನಿರ್ವಹಿಸುತ್ತಿದೆ.