ಎಸ್‌ಸಿಒ ಶೃಂಗಸಭೆಗೆ ಪಾಕಿಸ್ತಾನದ ವಿದೇಶಾಂಗ ಸಚಿವರು ಉತ್ತಮ ತಯಾರಿಯೊಂದಿಗೆ ಹೋಗಬೇಕಿತ್ತು: ಇಮ್ರಾನ್ ಖಾನ್‌ ತರಾಟೆ

ನವದೆಹಲಿ : ಪಾಕಿಸ್ತಾನದ ಮಾಜಿ ಪ್ರಧಾನಿ ಇಮ್ರಾನ್ ಖಾನ್ ಅವರು ಗೋವಾದಲ್ಲಿ ಇತ್ತೀಚೆಗೆ ಮುಕ್ತಾಯಗೊಂಡ ಎಸ್‌ಸಿಒ ಶೃಂಗಸಭೆಯಲ್ಲಿ ಭಾರತೀಯ ವಿದೇಶಾಂಗ ಸಚಿವ ಜೈಶಂಕರ ಅವರಿಗೆ “ಸೂಕ್ತ ಉತ್ತರ” ನೀಡಲು ಪಾಕಿಸ್ತಾನದ ವಿದೇಶಾಂಗ ಸಚಿವರು ವಿಫಲರಾಗಿದ್ದಾರೆ ಎಂದು ಬಿಲಾವಲ್‌ ಭುಟ್ಟೋ ಅವರನ್ನು ತರಾಟೆಗೆ ತೆಗೆದುಕೊಂಡರು.
ಈ ಹಿಂದೆ, ಶಾಂಘೈ ಸಹಕಾರ ಸಂಘಟನೆಯ ವಿದೇಶಾಂಗ ಸಚಿವರ ಶೃಂಗಸಭೆಯಲ್ಲಿ, ವಿದೇಶಾಂಗ ವ್ಯವಹಾರಗಳ ಸಚಿವ ಎಸ್. ಜೈಶಂಕರ ಅವರು ತಮ್ಮ ಪಾಕಿಸ್ತಾನಿ ವಿದೇಶಾಂಗ ಸಚಿವ ಬಿಲಾವಲ್ ಭುಟ್ಟೋ ಜರ್ದಾರಿ ಅವರನ್ನು ʼಭಯೋತ್ಪಾದಕ ಉದ್ಯಮ ಸಮರ್ಥಕ ಮತ್ತು ವಕ್ತಾರʼ ಎಂದು ಟೀಕಿಸಿದರು.
ಜಾಗತಿಕ ಅವಮಾನದ ಬಗ್ಗೆ ತಮ್ಮ ಕಳವಳವನ್ನು ವ್ಯಕ್ತಪಡಿಸಿದ ಇಮ್ರಾನ್‌ ಖಾನ್, ಭುಟ್ಟೋ ಪಾಕಿಸ್ತಾನವನ್ನು ಹೆಚ್ಚು ನಿರ್ಣಾಯಕವಾಗಿ ಪ್ರಸ್ತುತಪಡಿಸಬೇಕಿತ್ತು ಮತ್ತು ಭಾರತಕ್ಕೆ ಭೇಟಿ ನೀಡುವ ಮೊದಲು ಅವರು ಉತ್ತಮವಾಗಿ ತಯಾರಿ ನಡೆಸಬೇಕಿತ್ತು ಎಂದು ಪ್ರತಿಪಾದಿಸಿದರು. ಖಾನ್ ಪ್ರಕಾರ, ಎಸ್‌ಸಿಒ (SCO) ಶೃಂಗಸಭೆಗೆ ತೆರಳುವ ಮೊದಲು ಭುಟ್ಟೋ ಎಲ್ಲರ ಜೊತೆ ಸಮಾಲೋಚಿಸಿಬೇಕಿತ್ತು ಎಂದು ಹೇಳಿದರು.

ಭಾರತಕ್ಕೆ ಹೋಗುವ ಮೊದಲು ಬಿಲಾವಲ್ ಯಾರನ್ನಾದರೂ ಕೇಳಿದ್ದೀರಾ” ಎಂದು ಲಾಹೋರ್‌ನಲ್ಲಿ ಸಾರ್ವಜನಿಕ ರ್ಯಾಲಿಯಲ್ಲಿ ಇಮ್ರಾನ್‌ ಖಾನ್‌ ಹೇಳಿದ್ದನ್ನು ಪಾಕಿಸ್ತಾನಿ ಇಂಗ್ಲಿಷ್ ದೈನಿಕ ಡಾನ್ ಉಲ್ಲೇಖಿಸಿದೆ. “ಬಿಲಾವಲ್ ಉತ್ತಮ ತಯಾರಿಯೊಂದಿಗೆ ಹೋಗಬೇಕಿತ್ತು” ಎಂದು ಅವರು ಹೇಳಿದರು.
ಪಾಕಿಸ್ತಾನ ಪ್ರಾಯೋಜಿತ ಭಯೋತ್ಪಾದನೆ ವಿರುದ್ಧ ಜೈಶಂಕರ್ ಅವರ ದೃಢ ನಿಲುವು
ಭಯೋತ್ಪಾದನೆಯ ಸಂತ್ರಸ್ತರು ಮತ್ತು ಭಯೋತ್ಪಾದನೆಯ ಪ್ರತಿಪಾದಕರು ಜಾಗತಿಕ ವೇದಿಕೆಯಲ್ಲಿ ಭಯೋತ್ಪಾದನೆಯ ಬಗ್ಗೆ ಚರ್ಚಿಸಲು ಒಟ್ಟಿಗೆ ಕುಳಿತುಕೊಳ್ಳಲು ಸಾಧ್ಯವಿಲ್ಲ ಎಂದು ಭಾರತದ ವಿದೇಶಾಂಗ ಸಚಿವ ಜೈಶಂಕರ ಒತ್ತಿ ಹೇಳಿದರು. “ಭಯೋತ್ಪಾದನೆಯ ಸಂತ್ರಸ್ತರು ಭಯೋತ್ಪಾದನೆಯ ಬಗ್ಗೆ ಚರ್ಚಿಸಲು ಅದರ ಪ್ರವರ್ತಕರೊಂದಿಗೆ ಒಟ್ಟಿಗೆ ಕುಳಿತುಕೊಳ್ಳುವುದಿಲ್ಲ. ಬಿಲಾವಲ್‌ ಭುಟ್ಟೋ ಜರ್ದಾರಿ ಅವರು ಎಸ್‌ಸಿಒ ಸದಸ್ಯ ರಾಷ್ಟ್ರದ ವಿದೇಶಾಂಗ ಸಚಿವರಾಗಿ ಬಂದರು; ಅದು ಬಹುಪಕ್ಷೀಯ ರಾಜತಾಂತ್ರಿಕತೆಯ ಭಾಗವಾಗಿದೆ ಮತ್ತು ಅದಕ್ಕಿಂತ ಹೆಚ್ಚಿನದನ್ನು ನಾವು ನೋಡುವುದಿಲ್ಲ” ಎಂದು ಜೈಶಂಕರ್ ಸ್ಪಷ್ಟಪಡಿಸಿದ್ದಾರೆ.