ಆಸ್ಟ್ರೇಲಿಯಾದಲ್ಲಿ ಭಾರತೀಯ ನರ್ಸಿಂಗ್ ವಿದ್ಯಾರ್ಥಿನಿಯೊಬ್ಬಳು ತನ್ನ ಜೊತೆ ಸಂಬಂಧ ಕೊನೆಗೊಳಿಸಿದ ಕಾರಣಕ್ಕೆ ಸೇಡು ತೀರಿಸಿಕೊಳ್ಳಲು ಆಕೆಯ ಮಾಜಿ ಗೆಳೆಯ ಅವಳನ್ನು ಅಪಹರಿಸಿ ಜೀವಂತವಾಗಿ ಹೂಳಿದ್ದ ಘಟನೆಗೆ ಸಂಬಂಧಿಸಿದಂತೆ ನ್ಯಾಯಾಲಯವು ವಿಚಾರಣೆ ನಡೆಸಿತು.
ಮಾರ್ಚ್, 2021 ರಲ್ಲಿ ಭಾರತೀಯ ನರ್ಸಿಂಗ್ ವಿದ್ಯಾರ್ಥಿನಿ ಜಸ್ಮೀನ್ ಕೌರ್ ಎಂಬವಳ ಮಾಜಿ ಗೆಳೆಯ ತಾರಿಕ್ಜೋತ್ ಸಿಂಗ್ ಅವಳನ್ನು ಅಪಹರಿಸಿ ಜೀವಂತವಾಗಿ ಹೂತಿದ್ದ. ಬುಧವಾರ ಆತ ನ್ಯಾಯಾಲಯದಲ್ಲಿ ಆಕೆಯ ಕೊಲೆಯ ಬಗ್ಗೆ ತಪ್ಪೊಪ್ಪಿಕೊಂಡಿದ್ದಾನೆ.
21 ವರ್ಷದ ಜಸ್ಮೀನ್ ಕೌರ್ ಅವರನ್ನು ಮಾರ್ಚ್ 5, 2021 ರಂದು ಸಿಂಗ್ ಅವಳ ಕೆಲಸದ ಸ್ಥಳದಿಂದ ಅಪಹರಿಸಿದ್ದ ಎಂದು news.com.au ವರದಿಯಲ್ಲಿ ತಿಳಿಸಿದೆ. ತಾರಿಕ್ಜೋತ್ ಸಿಂಗ್ ಸ್ನೇಹಿತನಿಂದ ಎರವಲು ಪಡೆದಿದ್ದ ಕಾರಿನ ಬೂಟಿನಲ್ಲಿ ಕೌರ್ ಅವಳನ್ನು ಕಟ್ಟಿಹಾಕಿದ ನಂತರ 650 ಕಿಮೀಗೂ ಹೆಚ್ಚು ದೂರ ಕಾರು ಓಡಿಸಿದ್ದಾನೆ.
ವರದಿಗಳ ಪ್ರಕಾರ, ಆತ ಕೌರ್‌ಳ ಗಂಟಲಿಗೆ “ಗಾಯ ಮಾಡಿದ್ದಾನೆ, ಆದರೆ ಅದು ಅವಳನ್ನು ಕೊಲ್ಲುವಷ್ಟು ಆಳವಿರಲಿಲ್ಲ. ನಂತರ, ದಕ್ಷಿಣ ಆಸ್ಟ್ರೇಲಿಯಾದ ದೂರದ ಫ್ಲಿಂಡರ್ಸ್ ರೇಂಜ್‌ಗಳಲ್ಲಿ ಆಳವಿಲ್ಲದ ಸಮಾಧಿಯಲ್ಲಿ ಅವಳನ್ನು ಜೀವಂತವಾಗಿಹೂತಿದ್ದಾನೆ ಎಂದು ಆತನ ವಿರುದ್ಧ ಆರೋಪ ಹೊರಿಸಲಾಗಿದೆ.
ಈ ಘಟನೆಯ ಭಯಾನಕ ವಿವರಗಳು ಸುಪ್ರೀಂ ಕೋರ್ಟ್‌ನಲ್ಲಿ ಶಿಕ್ಷೆಯ ಸಲ್ಲಿಕೆಗಳ ಸಮಯದಲ್ಲಿ ಮುಂಚೂಣಿಗೆ ಬಂದವು. ಪ್ರಾಸಿಕ್ಯೂಟರ್ ಕಾರ್ಮೆನ್ ಮ್ಯಾಟಿಯೊ ಅವರು “ಜಸ್ಮೀನ್ ಕೌರ್ ಕೊಲ್ಲಲ್ಪಟ್ಟ ರೀತಿ ನಿಜವಾಗಿಯೂ, ಅಸಾಮಾನ್ಯ ಮಟ್ಟದ ಕ್ರೌರ್ಯವನ್ನು ಒಳಗೊಂಡಿತ್ತು” ಎಂದು ಹೇಳಿದರು. “ಅವಳ ಗಂಟಲನ್ನು ಯಾವಾಗ ಕತ್ತರಿಸಲಾಯಿತು ಎಂಬುದು ತಿಳಿದಿಲ್ಲ, ಅವಳು ಯಾವಾಗ ಅಥವಾ ಹೇಗೆ ಆ ಸಮಾಧಿಗೆ ಪ್ರವೇಶಿಸಿದಳು ಅಥವಾ ಇಡಲ್ಪಟ್ಟಳು ಎಂಬುದು ತಿಳಿದಿಲ್ಲ, ಮತ್ತು ಅದನ್ನು ಯಾವಾಗ ಅಗೆದು ಹಾಕಲಾಯಿತು ಎಂಬುದು ತಿಳಿದಿಲ್ಲ, ಆದರೆ ಪ್ರಾಸಿಕ್ಯೂಷನ್ ಅವಳು ಇನ್ನೂ ಜೀವಂತ ಇರುವಾಗಲೇ ಆಗಿರಬೇಕು ಎಂದು ಹೇಳುತ್ತದೆ. (ಇದು) ಪ್ರತೀಕಾರಕ್ಕಾಗಿ ಅಥವಾ ಸೇಡಿಗಾಗಿ ಮಾಡಿದ ಕೊಲೆ” ಎಂದು ಅವರು ಹೇಳಿದರು.
ಎಬಿಸಿ ನ್ಯೂಸ್ ಪ್ರಕಾರ, ತಾರಿಕ್ಜೋತ್ ಸಿಂಗ್ ತನ್ನನ್ನು ಹಿಂಬಾಲಿಸುತ್ತಿದ್ದಾನೆ ಎಂದು ಪೊಲೀಸ್ ದೂರು ನೀಡಿದ ಒಂದು ತಿಂಗಳ ನಂತರ ಜಸ್ಮೀನ್ ಕೌರ್ ಕೊಲ್ಲಲ್ಪಟ್ಟಿದ್ದಾಳೆ ಎಂದು ಪ್ರಾಸಿಕ್ಯೂಟರ್‌ಗಳು ಬುಧವಾರ ಸುಪ್ರೀಂ ಕೋರ್ಟ್‌ಗೆ ತಿಳಿಸಿದರು.
ಶಿಕ್ಷೆಯ ಅರ್ಜಿಗಳನ್ನು ಆಲಿಸಿದಾಗ ಜಸ್ಮೀನ್ ಕೌರ್ ತಾಯಿ ಸಹ ಹಾಜರಿದ್ದರು. ತಾರಿಕ್ಜೋತ್ ತನ್ನ ಮಗಳ ಬಗ್ಗೆ ಗೀಳು ಹೊಂದಿದ್ದ, ಅವಳು ಆತನನ್ನು “ನೂರು ಬಾರಿ” ನಿರಾಕರಿಸಿದಳು ಎಂದು ತಾಯಿ ಹೇಳಿದ್ದಾಳೆ ಎಂದು 9 ನ್ಯೂಸ್ ವರದಿಯಲ್ಲಿ ತಿಳಿಸಿದೆ.
ಜಸ್ಮೀನ್ ಕೌರ್ ಸಾವಿನ ಮುನ್ನಾದಿನ ತಾರಿಕ್ಜೋತ್ ಸಿಂಗ್ ಆಕೆಗೆ ಹಲವಾರು ಸಂದೇಶಗಳನ್ನು ಬರೆದಿದ್ದ, ಆದರೆ ಅದನ್ನು ಆತ ಎಂದಿಗೂ ಕಳುಹಿಸಲಿಲ್ಲ. ತಾರಿಕ್ಜೋತ್ ತಮ್ಮ ಸಂಬಂಧ ಮುರಿದುಹೋದ ನಂತರ ಅದರಿಂದ ಹೊರಬರಲು ಸಾಧ್ಯವಾಗದ ಕಾರಣ ಕೊಲೆಯನ್ನು ಯೋಜಿಸಿದ್ದ. ಜಸ್ಮೀನ್ ಕೌರ್ ಹತ್ಯೆಯ ಆರಂಭಿಕ ತನಿಖೆಯ ಸಮಯದಲ್ಲಿ, ಆತ ಆರೋಪಗಳನ್ನು ನಿರಾಕರಿಸಿದ ಹಾಗೂ ಆಕೆ ಆತ್ಮಹತ್ಯೆ ಮಾಡಿಕೊಂಡಿದ್ದಾಳೆ ಎಂದು ಹೇಳಿದ್ದ. ಬಳಿಕ ಈ ವರ್ಷದ ಆರಂಭದಲ್ಲಿ ವಿಚಾರಣೆಗೆ ಹಾಜರಾಗುವ ಮೊದಲು ಸಿಂಗ್ ಕೊಂದಿರುವ ಬಗ್ಗೆ ತಪ್ಪೊಪ್ಪಿಕೊಂಡಿದ್ದಾನೆ. ಅಧಿಕಾರಿಗಳು ಜಸ್ಮೀನ್ ಹೂತಿದ್ದ ಸ್ಥಳಕ್ಕೆ ಆತನನ್ನು ಕರೆದೊಯ್ದರು. ಅಲ್ಲಿ ಅಧಿಕಾರಿಗಳು ಕೌರ್ ಅವರ ಬೂಟುಗಳು, ಕನ್ನಡಕಗಳು ಮತ್ತು ಕೆಲಸದ ಹೆಸರಿನ ಬ್ಯಾಡ್ಜ್ ಅನ್ನು ಲೂಪ್ ಮಾಡಿದ ಟೈಗಳೊಂದಿಗೆ ಕಂಡುಕೊಂಡರು.
ಅಪಹರಣದ ಮಧ್ಯಾಹ್ನ, ಭದ್ರತಾ ಕ್ಯಾಮೆರಾಗಳು ತಾರಿಕ್ಜೋತ್ ಕೈಗವಸುಗಳು, ಕೇಬಲ್ ಟೈಗಳು ಮತ್ತು ಸಲಿಕೆಯನ್ನು ಹಾರ್ಡ್‌ವೇರ್ ಅಂಗಡಿಯಲ್ಲಿ ಖರೀದಿ ಮಾಡುತ್ತಿದ್ದುದನ್ನು ತೋರಿಸಿದೆ ಎಂದು ಎಬಿಸಿ ನ್ಯೂಸ್ ವರದಿಯಲ್ಲಿ ತಿಳಿಸಿದೆ.
ತಾರಿಕ್ಜೋತ್ ಸಿಂಗ್ ಕಡ್ಡಾಯವಾಗಿ ಜೀವಾವಧಿ ಶಿಕ್ಷೆಯನ್ನು ಎದುರಿಸಬೇಕಾಗುತ್ತದೆ. ಅವರ ವಕೀಲರು ಇದನ್ನು “ಭಾವೋದ್ರೇಕದ ಅಪರಾಧ” ಎಂದು ಹೇಳಿದರು ಮತ್ತು ಅವರಿಗೆ ಹೆಚ್ಚು ದಯೆಯುಳ್ಳ ಶಿಕ್ಷೆಯನ್ನು ನೀಡಬೇಕೆಂದು ಕೋರಿದರು.
ನಿಮ್ಮ ಕಾಮೆಂಟ್ ಬರೆಯಿರಿ