ನವದೆಹಲಿ: ವಂದೇ ಭಾರತ್ ಎಕ್ಸ್‌ಪ್ರೆಸ್ ರೈಲುಗಳು ಸೇರಿದಂತೆ ಭಾರತದಾದ್ಯಂತ ಚಲಿಸುವ ಎಲ್ಲಾ ರೈಲುಗಳಲ್ಲಿ ಭಾರತೀಯ ರೈಲ್ವೇಯು ಎಸಿ ಚೇರ್ ಕಾರ್ ಮತ್ತು ಎಕ್ಸಿಕ್ಯೂಟಿವ್ ದರ್ಜೆ ದರವನ್ನು ಶೇಕಡಾ 25ರ ವರೆಗೆ ಕಡಿತಗೊಳಿಸಲಿದೆ ಎಂದು ರೈಲ್ವೇ ಮಂಡಳಿಯ ಆದೇಶ ಹೇಳಿದೆ.
ವಂದೇ ಭಾರತ್ ಎಕ್ಸ್‌ಪ್ರೆಸ್, ಶತಾಬ್ದಿ ಎಕ್ಸ್‌ಪ್ರೆಸ್, ಅನುಭೂತಿ ಮತ್ತು ವಿಸ್ಟಾಡೋಮ್ ಕೋಚ್‌ಗಳಂತಹ ರೈಲುಗಳಲ್ಲಿ ಪ್ರಯಾಣಿಸುವ ಪ್ರಯಾಣಿಕರಿಗೆ ಜನದಟ್ಟಣೆಗೆ ಅನುಗುಣವಾಗಿ ಇಳಿಕೆ ಕುರಿತು ನಿರ್ಧಾರ ತೆಗೆದುಕೊಳ್ಳಲಾಗುತ್ತದೆ. ದರಗಳು ಜನದಟ್ಟಣೆ ಮೇಲೆ ಅವಲಂಬಿತವಾಗಿರುತ್ತದೆ ಎಂದು ರೈಲ್ವೆ ಮಂಡಳಿ ತಿಳಿಸಿದೆ. ರಜಾದಿನಗಳು ಅಥವಾ ಹಬ್ಬದ ವಿಶೇಷತೆಗಳಾಗಿ ಪರಿಚಯಿಸಲಾದ ವಿಶೇಷ ರೈಲುಗಳಲ್ಲಿ ಈ ಯೋಜನೆಯು ಅನ್ವಯಿಸುವುದಿಲ್ಲ ಎಂದು ಹೇಳಿದೆ.
ಸೌಕರ್ಯಗಳ ಬಳಕೆಯನ್ನು ಉತ್ತಮಗೊಳಿಸುವ ದೃಷ್ಟಿಯಿಂದ, ರೈಲ್ವೇ ಸಚಿವಾಲಯವು ರೈಲ್ವೇ ವಲಯಗಳ ಪ್ರಧಾನ ಮುಖ್ಯ ವಾಣಿಜ್ಯ ವ್ಯವಸ್ಥಾಪಕರಿಗೆ ಎಸಿ ಆಸನಗಳಿರುವ ರೈಲುಗಳಲ್ಲಿ ರಿಯಾಯಿತಿ ದರದ ಯೋಜನೆಗಳನ್ನು ಪರಿಚಯಿಸಲು ಅಧಿಕಾರ ನೀಡಲು ನಿರ್ಧರಿಸಿದೆ. “ಈ ಯೋಜನೆಯು ಅನುಭೂತಿ ಮತ್ತು ವಿಸ್ಟಾಡೋಮ್ ಕೋಚ್‌ಗಳು ಸೇರಿದಂತೆ ಎಸಿ ಆಸನ ಸೌಕರ್ಯಗಳನ್ನು ಹೊಂದಿರುವ ಎಲ್ಲಾ ರೈಲುಗಳ ಎಸಿ ಚೇರ್ ಕಾರ್ ಮತ್ತು ಎಕ್ಸಿಕ್ಯೂಟಿವ್ ದರ್ಜೆಗಳಿಗೆ ಅನ್ವಯಿಸುತ್ತದೆ” ಎಂದು ರೈಲ್ವೆ ಮಂಡಳಿಯ ಆದೇಶದಲ್ಲಿ ತಿಳಿಸಲಾಗಿದೆ.
“ರಿಯಾಯಿತಿಯ ಅಂಶವು ಮೂಲ ದರದ ಮೇಲೆ ಗರಿಷ್ಠ 25 ಪ್ರತಿಶತದವರೆಗೆ ಇರುತ್ತದೆ. ಕಾಯ್ದಿಡುವ (ರಿಸರ್ವೇಶನ್‌) ಶುಲ್ಕ, ಸೂಪರ್ ಫಾಸ್ಟ್ ಸರ್ಚಾರ್ಜ್, ಜಿಎಸ್‌ ಟಿ, ಇತ್ಯಾದಿ ಇತರ ಶುಲ್ಕಗಳಿಗೆ ಅನ್ವಯವಾಗುವಂತೆ ಪ್ರತ್ಯೇಕವಾಗಿ ವಿಧಿಸಲಾಗುತ್ತದೆ. ಜನದಟ್ಟಣೆಯ ಆಧಾರದ ಮೇಲೆ ಕೋಚ್‌ಗಳ ದರ್ಜೆಗಳ ಮೇಲೆ ರಿಯಾಯಿತಿಯನ್ನು ಯಾವುದರಲ್ಲಾದರೂ ಅಥವಾ ಎಲ್ಲದರಲ್ಲೂ ಒದಗಿಸಬಹುದು ಎಂದು ಅದು ಹೇಳಿದೆ.
ಕಳೆದ 30 ದಿನಗಳಲ್ಲಿ ಶೇಕಡಾ 50 ಕ್ಕಿಂತ ಕಡಿಮೆ ದಟ್ಟಣೆ ಹೊಂದಿರುವ ರೈಲುಗಳನ್ನು ಪರಿಗಣನೆಗೆ ತೆಗೆದುಕೊಳ್ಳಲಾಗುವುದು ಎಂದು ಆದೇಶವು ಹೇಳಿದೆ. ಪ್ರಯಾಣದ ಮೊದಲ ಮತ್ತು/ಅಥವಾ ಕೊನೆಯ ಚರಣ ಮತ್ತು/ಅಥವಾ ಮಧ್ಯಂತರ ವಿಭಾಗಗಳು ಮತ್ತು/ಅಥವಾ ಕೊನೆಯಿಂದ ಕೊನೆಯ ಪ್ರಯಾಣಕ್ಕೆ ರಿಯಾಯಿತಿಯನ್ನು ನೀಡಬಹುದು, ಆ ಚರಣ/ವಿಭಾಗ/ಒಂದು ತುದಿಯಿಂದ ಇನ್ನೊಂದು ತುದಿಯಯ ವರೆಗೆ ದಟ್ಟಣೆಯು ಶೇಕಡಾ 50 ಕ್ಕಿಂತ ಕಡಿಮೆಯಿದ್ದರೆ . “ರಿಯಾಯ್ತಿಯನ್ನು ತಕ್ಷಣದಿಂದ ಜಾರಿಗೆ ತರಲಾಗುವುದು. ಆದಾಗ್ಯೂ, ಈಗಾಗಲೇ ಕಾಯ್ದಿರಿಸಿದ ಪ್ರಯಾಣಿಕರಿಗೆ ಯಾವುದೇ ಶುಲ್ಕದ ಮರುಪಾವತಿಯನ್ನು ನೀಡಲಾಗುವುದಿಲ್ಲ” ಎಂದು ಅದು ಹೇಳಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ