ಸ್ಯಾನ್ ಫ್ರಾನ್ಸಿಸ್ಕೋ : ಜನನಿಬಿಡ ರಸ್ತೆಗಳಲ್ಲಿ ಸಾಗುವ ಬಸ್, ಜನರು ಬರುವಾಗ ತನ್ನಷ್ಟಕ್ಕೆ ತಾನೇ ನಿಲ್ಲುತ್ತದೆ. ಬಸ್ ಹತ್ತಿದ ನಂತರ ತಾನೇ ಮುಂದಕ್ಕೆ ಚಲಿಸುತ್ತದೆ. ಈ ಬಸ್ಸಿನಲ್ಲಿ ಡ್ರೈವರ್ ಇಲ್ಲ.. ಸ್ಟೀರಿಂಗ್ ಕೂಡ ಇಲ್ಲ. ಆದರೂ ಬಸ್ ಸಲೀಸಾಗಿ ತನ್ನಷ್ಟಕ್ಕೆ ಚಲಿಸುತ್ತದೆ. ರೋಬೋಟ್ಯಾಕ್ಸಿಗಳು ಮೊದಲು ಬಂತು. ಈಗ ಚಾಲಕ ರಹಿತ ಬಸ್‌ಗಳು ಬಂದಿವೆ.ಈಗ ಅಮೆರಿಕದ ಸ್ಯಾನ್ ಫ್ರಾನ್ಸಿಸ್ಕೋದಲ್ಲಿ ಈ ಬಸ್ಸಿನ ಪ್ರಾಯೋಗಿಕ ಪರೀಕ್ಷೆ ನಡೆಯುತ್ತಿದೆ.
ಕ್ಯಾಲಿಫೋರ್ನಿಯಾ ನಿಯಂತ್ರಕರು ರೋಬೋಟ್ಯಾಕ್ಸಿಗಳ ವಿಸ್ತರಣೆಯನ್ನು ಅನುಮೋದಿಸಿದ ಒಂದು ವಾರದೊಳಗೆ ಸ್ಯಾನ್ ಫ್ರಾನ್ಸಿಸ್ಕೋ ಆಟೊನಾಮಸ್‌ ಶಟಲ್ ಸರ್ವಿಸ್‌ (autonomous shuttle service) ಪ್ರಾರಂಭಿಸಿದೆ.
ಉಚಿತ ಬಸ್ ಸ್ಯಾನ್ ಫ್ರಾನ್ಸಿಸ್ಕೋ ಕೊಲ್ಲಿಯ ಮಧ್ಯದಲ್ಲಿರುವ ಹಿಂದಿನ ಅಮೆರಿಕ ನೌಕಾಪಡೆಯ ನೆಲೆಯಾದ ಟ್ರೆಷರ್ ಐಲ್ಯಾಂಡ್‌ನ ಸುತ್ತಲಿನ ಲೂಪ್ ಎಂಬ ಸ್ಥಿರ ಮಾರ್ಗದಲ್ಲಿ ಪ್ರತಿದಿನ ಚಲಿಸುತ್ತದೆ. ಈ ಲೂಪ್ ನಲ್ಲಿ ಏಳು ನಿಲ್ದಾಣಗಳಿವೆ, ವಸತಿ ಪ್ರದೇಶಗಳು, ಅಂಗಡಿಗಳು ಮತ್ತು ಸಮುದಾಯ ಕೇಂದ್ರಗಳನ್ನು ಇದು ಸಂಪರ್ಕಿಸುತ್ತದೆ. ದ್ವೀಪದಲ್ಲಿ ಸುಮಾರು 2,000 ಜನರು ವಾಸಿಸುತ್ತಿದ್ದಾರೆ. ಈ ವಿನೂತನ ಬಸ್ ಶುಕ್ರವಾರ ಟ್ರೆಷರ್ ಐಲ್ಯಾಂಡ್ ಸುತ್ತ ಸುತ್ತಿದೆ. ಈ ಎಲೆಕ್ಟ್ರಿಕ್ ಬಸ್ ಯಾವುದೇ ತೊಂದರೆಯಿಲ್ಲದೆ ಸುಮಾರು 20 ನಿಮಿಷಗಳಲ್ಲಿ ದ್ವೀಪವನ್ನು ಸುತ್ತು ಹಾಕಿದೆ.
ಈ ಬಸ್ಸಿಗೆ ಡ್ರೈವರ್ ಸೀಟ್ ಅಥವಾ ಸ್ಟೀರಿಂಗ್ ವೀಲ್ ಇರದ ಆಲ್-ಎಲೆಕ್ಟ್ರಿಕ್ ವಾಹನ ಇದಾಗಿದೆ. ಬಸ್ಸಿನಲ್ಲಿ ಒಬ್ಬ ಸಿಬ್ಬಂದಿಯನ್ನು ಹೊಂದಿದೆ. ಮತ್ತು ಅವರು ಅಗತ್ಯವಿದ್ದರೆ ಹ್ಯಾಂಡ್‌ ಹೆಲ್ಡ್ ಕಂಟ್ರೋಲರ್‌ನೊಂದಿಗೆ ಬಸ್ ಅನ್ನು ಓಡಿಸಬಹುದಾಗಿದೆ. ಆಟೊಮೆಟಿಕ್‌ ವಾಹನಗಳು ಸಾರ್ವಜನಿಕ ಸಾರಿಗೆ ವ್ಯವಸ್ಥೆಗೆ ಹೇಗೆ ಪೂರಕವಾಗಬಹುದು ಎಂಬುದನ್ನು ನಿರ್ಧರಿಸಲು ಅನುದಾನ-ನಿಧಿಯ ಪೈಲಟ್ ಕಾರ್ಯಕ್ರಮದ ಭಾಗವಾಗಿ ಕೌಂಟಿ ಶಟಲ್ ಸರ್ವೀಸ್‌ ನೀಡುತ್ತಿದೆ. ರಸ್ತೆಗೆ ಅಡ್ಡಲಾಗಿ ವಾಹನ ನಿಲ್ಲಿಸಿದಾಗ ಅಟೆಂಡರ್ ವಾಹನವನ್ನು ಚಲಾಯಿಸಿದರು. ಈ ಬಸ್ನಲ್ಲಿ 10 ಪ್ರಯಾಣಿಕರು ಕುಳಿತುಕೊಳ್ಳಬಹುದಾಗಿದ್ದು, ಬೆಳಿಗ್ಗೆ 9 ರಿಂದ ಸಂಜೆ 6ರ ವರೆಗೆ ಚಾಲನೆಯಲ್ಲಿರುತ್ತದೆ.
ಸ್ಯಾನ್ ಫ್ರಾನ್ಸಿಸ್ಕೊ ಕೌಂಟಿ ಸಾರಿಗೆ ಪ್ರಾಧಿಕಾರದ ಕಾರ್ಯನಿರ್ವಾಹಕ ನಿರ್ದೇಶಕ ಟಿಲ್ಲಿ ಚಾಂಗ್ ಅವರು, “ಬೋರ್ಡಿನಲ್ಲಿ ಅಟೆಂಡೆಂಟ್ ಅನ್ನು ಹೊಂದಿರುವುದು ಎಲ್ಲರಿಗೂ ಆರಾಮದಾಯಕವಾಗಿದೆ. “ಇದು ಅದು ಹೇಗೆ ಕಾಣುತ್ತದೆ ಮತ್ತು ಚಾಲಕರಹಿತ ಸೇವೆಯನ್ನು ಹೊಂದಲು ಅದು ಹೇಗೆ ಕೆಲಸ ಮಾಡುತ್ತದೆ ಎಂಬುದನ್ನು ನೋಡಲು ಕೇವಲ ಪ್ರಯೋಗವಾಗಿದೆ ಎಂದು ಹೇಳಿದ್ದಾರೆ.
ಸಾರ್ವಜನಿಕ ಸಾರಿಗೆಯನ್ನು ಪರಿವರ್ತಿಸಲು ಸ್ವಯಂ-ಚಾಲನಾ ವಾಹನಗಳ ಸುರಕ್ಷತೆ ಮತ್ತು ಸಾಮರ್ಥ್ಯವನ್ನು ಪರೀಕ್ಷಿಸುತ್ತಿರುವ ವಿಶ್ವದಾದ್ಯಂತ ಬೆಳೆಯುತ್ತಿರುವ ನಗರಗಳಲ್ಲಿ ಸ್ಯಾನ್ ಫ್ರಾನ್ಸಿಸ್ಕೋ ಕೂಡ ಒಂದಾಗಿದೆ.
ಮಿಯಾಮಿ ಮೃಗಾಲಯ, ಮೇಯೊ ಕ್ಲಿನಿಕ್ ಮತ್ತು ಯೆಲ್ಲೊಸ್ಟೋನ್ ನ್ಯಾಶನಲ್ ಪಾರ್ಕ್‌ನಲ್ಲಿ ಸೇವೆ ಸೇರಿದಂತೆ ಒಂದು ಡಜನ್‌ಗಿಂತಲೂ ಹೆಚ್ಚು ಅಮೆರಿಕದ ಕಮ್ಯುನಿಟಿಗಳಲ್ಲಿ ಇದೇ ರೀತಿಯ ಪ್ರಾಯೋಗಿಕ ಪರೀಕ್ಷಾ ಕಾರ್ಯಕ್ರಮಗಳನ್ನು ನಡೆಸುತ್ತಿರುವ ಒರ್ಲ್ಯಾಂಡೊ, ಫ್ಲೋರಿಡಾ ಮೂಲದ ಕಂಪನಿಯಾದ ಬೀಪ್‌ನಿಂದ ಈ ಬಸ್ಸುಗಳನ್ನು ನಿರ್ವಹಿಸಲಾಗುತ್ತದೆ.
ನಿಮ್ಮ ಕಾಮೆಂಟ್ ಬರೆಯಿರಿ