ಲಂಡನ್‌ : ಮಾರಣಾಂತಿಕ ಕೋವಿಡ್ -19 ಕ್ಕಿಂತ ಮಾರಕವಾದ ಮತ್ತೊಂದು ಸಾಂಕ್ರಾಮಿಕ ರೋಗ ಬರಬಹುದು ಎಂದು ಯುಕೆ ಆರೋಗ್ಯ ತಜ್ಞರು ಎಚ್ಚರಿಸಿದ್ದಾರೆ. ಅಲ್ಲದೆ, ಇದಕ್ಕೆ ವಿಶ್ವ ಆರೋಗ್ಯ ಸಂಸ್ಥೆ (ಡಬ್ಲ್ಯುಎಚ್‌ಒ) ಡಿಸೀಸ್-X (Disease X) ಎಂಬ ಹೆಸರಿಟ್ಟಿದೆ ಎಂದು ಅವರು ಮಾಹಿತಿ ನೀಡಿದ್ದಾರೆ.
ಮೇನಿಂದ ಡಿಸೆಂಬರ್ 2020 ರವರೆಗೆ ಯುಕೆ ಲಸಿಕೆ ಕಾರ್ಯಪಡೆಯ ಅಧ್ಯಕ್ಷರಾಗಿ ಸೇವೆ ಸಲ್ಲಿಸಿದ ಕೇಟ್ ಬಿಂಗ್‌ಹ್ಯಾಮ್ ಅವರು ಡೈಲಿ ಮೇಲ್‌ಗೆ ನೀಡಿದ ಸಂದರ್ಶನದಲ್ಲಿ, ಈ ಮಾರಣಾಂತಿಕ ಹೊಸ ವೈರಸ್ 1919-1920ರ ವಿನಾಶಕಾರಿ ಸ್ಪ್ಯಾನಿಷ್ ಜ್ವರಕ್ಕೆ ಸಮಾನವಾದ ಘಾತಕ ಪರಿಣಾಮ ಬೀರಬಹುದು ಎಂದು ಎಚ್ಚರಿಸಿದ್ದಾರೆ.
ಈ ಹೊಸ ರೋಗ-X ವೈರಸ್, ಬ್ಯಾಕ್ಟೀಯ ಅಥವಾ ಶಿಲೀಂಧ್ರ ಅಥವಾ ಯಾವುದೇ ಹೊಸ ಏಜೆಂಟ್‌ ಆಗಿರಬಹುದು. ಇದಕ್ಕೆ ಯಾವುದೇ ಗೊತ್ತುಪಡಿಸಿದ ಚಿಕಿತ್ಸೆಗಳಿರುವುದಿಲ್ಲ ಎಂದು ವಿಶ್ವ ಆರೋಗ್ಯ ಸಂಸ್ಥೆ (WHO) ಮಾಹಿತಿ ನೀಡಿದೆ ಎಂದು ಅವರು ಹೇಳಿದ್ದಾರೆ.
1918-19 ಫ್ಲೂ ಸಾಂಕ್ರಾಮಿಕವು ವಿಶ್ವಾದ್ಯಂತ ಕನಿಷ್ಠ 50 ಮಿಲಿಯನ್ (5 ಕೋಟಿ) ಜನರನ್ನು ಬಲಿ ತೆಗೆದುಕೊಂಡಿದೆ. ಇದು ಮೊದಲನೆಯ ಮಹಾಯುದ್ಧದಲ್ಲಿ ಸತ್ತವರಿಗಿಂತ ಎರಡು ಪಟ್ಟು ಹೆಚ್ಚು. ಹೊಸ ರೋಗ-X ವಿಚಾರದಲ್ಲಿಯೂ ನಾವು ಇದೇ ರೀತಿಯ ಸಾವಿನ ಸಂಖ್ಯೆಯನ್ನು ನಿರೀಕ್ಷಿಸಬಹುದು. ಈಗಾಗಲೇ ಅಸ್ತಿತ್ವದಲ್ಲಿರುವ ಹಲವಾರು ವೈರಸ್‌ಗಳಲ್ಲಿ ಯಾವುದೋ ಒಂದರಿಂದ ಈ ಕಾಯಿಲೆ ಹರಡಬಹುದು’ ಎಂದು ಕೇಟ್ ಬಿಂಗ್‌ಹ್ಯಾಮ್ ತಮ್ಮ ಕಳವಳ ವ್ಯಕ್ತಪಡಿಸಿದ್ದಾರೆ.
ಪ್ರಪಂಚವು ರೋಗ X ನಿಂದ ಇರುವ ಬೆದರಿಕೆಯನ್ನು ನಿಭಾಯಿಸಬೇಕಾದರೆ, ಜಗತ್ತು ಸಾಮೂಹಿಕ ವ್ಯಾಕ್ಸಿನೇಷನ್ ಅಭಿಯಾನಗಳಿಗೆ ತಯಾರಿ ಮಾಡಬೇಕಾಗುತ್ತದೆ ಮತ್ತು ದಾಖಲೆಯ ಸಮಯದಲ್ಲಿ ಡೋಸ್‌ಗಳನ್ನು ನೀಡಬೇಕಾಗುತ್ತದೆ” ಎಂದು ಅವರು ಡೈಲಿ ಮೇಲ್‌ಗೆ ತಿಳಿಸಿದ್ದಾರೆ.
“ಒಂದರ್ಥದಲ್ಲಿ, ನಾವು ಕೋವಿಡ್-19 ರೋಗ ಹರಡಿದ ವೇಳೆ ಅದೃಷ್ಟಶಾಲಿಯಾಗಿದ್ದೇವೆ. ಇದು ಪ್ರಪಂಚದಾದ್ಯಂತ 20 ಮಿಲಿಯನ್ (2 ಕೋಟಿ) ಅಥವಾ ಅದಕ್ಕಿಂತ ಹೆಚ್ಚು ಸಾವುಗಳಿಗೆ ಕಾರಣವಾಗಿದ್ದರೂ ಸಹ ವೈರಸ್ ಸೋಂಕಿಗೆ ಒಳಗಾದ ಬಹುಪಾಲು ಜನರು ಚೇತರಿಸಿಕೊಂಡಿದ್ದಾರೆ. ಆದರೆ, ರೋಗ X ಅನ್ನು ಊಹಿಸಿದರೆ, ಅದು ಎಬೋಲಾದ ಮಾರಣಾಂತಿಕ ಪ್ರಮಾಣದ ಜೊತೆಗೆ ದಡಾರದಂತೆ ಸಾಂಕ್ರಾಮಿಕವಾಗಿರಬಹುದು. ಪ್ರಪಂಚದ ಎಲ್ಲೋ, ಇದು ಪುನರಾವರ್ತನೆಯಾಗುತ್ತಿದೆ ಮತ್ತು ಬೇಗ ಅಥವಾ ಸ್ವಲ್ಪ ತಡವಾಗಿ, ಯಾರಾದರೂ ಅನಾರೋಗ್ಯಕ್ಕೆ ಒಳಗಾಗುತ್ತಾರೆ ಎಂದೂ ಕೇಟ್ ಬಿಂಗ್‌ಹ್ಯಾಮ್ ಹೇಳಿದ್ದಾರೆ.
ಎಬೋಲಾ ಸುಮಾರು ನೂರಕ್ಕೆ 67%ರಷ್ಟು ಮಾರಣಾಂತಿಕ ಸಾವಿನ ಪ್ರಮಾಣ ಹೊಂದಿತ್ತು, ಮತ್ತು ಪಕ್ಷಿ ಜ್ವರ ಹಾಗೂ MERS ಸಹ ಹೆಚ್ಚಿನ ಸಂಖ್ಯೆಯ ಜನರನ್ನು ಕೊಂದಿದೆ. ಆದ್ದರಿಂದ ನಾವು ಖಂಡಿತವಾಗಿಯೂ ಮುಂದಿನ ಸಾಂಕ್ರಾಮಿಕ ರೋಗವನ್ನು ಸುಲಭವಾಗಿ ನಿಗ್ರಹಿಸಲು ಸಾಧ್ಯವಿಲ್ಲ ಎಂದು ಅವರು ಹೇಳಿದರು.
ಅಲ್ಲದೆ, ಸಾಂಕ್ರಾಮಿಕ ರೋಗಗಳ ಸಂಖ್ಯೆ ಏಕೆ ಹೆಚ್ಚುತ್ತಿದೆ ಎಂಬುದನ್ನು ಕೇಟ್ ಬಿಂಗ್‌ಹ್ಯಾಮ್ ವಿವರಿಸಿದ್ದಾರೆ.
“ಇಂತಹ ರೋಗಗಳ ಏಕಾಏಕಿಗಳ ಹೆಚ್ಚಳವು ಆಧುನಿಕ ಜಗತ್ತಿನಲ್ಲಿ ವಾಸಿಸುತ್ತಿರುವುದಕ್ಕೆ ನಾವು ತೆರಬೇಕಾದ ಬೆಲೆಯಾಗಿದೆ. ಮೊದಲನೆಯದಾಗಿ, ಇದು ಜಾಗತೀಕರಣದ ಮೂಲಕ ಹೆಚ್ಚು ಸಂಪರ್ಕ ಹೊಂದಿದೆ. ಎರಡನೆಯದಾಗಿ, ಹೆಚ್ಚು ಹೆಚ್ಚು ಜನರು ನಗರಗಳಿಗೆ ನುಗ್ಗುತ್ತಿದ್ದಾರೆ, ಅಲ್ಲಿ ಅವರು ಇತರರೊಂದಿಗೆ ನಿಕಟ ಸಂಪರ್ಕಕ್ಕೆ ಬರುತ್ತಾರೆ. ಅಲ್ಲದೆ, ಅರಣ್ಯನಾಶ, ಆಧುನಿಕ ಕೃಷಿ ವಿಧಾನಗಳು ಮತ್ತು ಜೌಗು ಪ್ರದೇಶಗಳ ನಾಶದಿಂದಾಗಿ ವೈರಸ್ಸುಗಳು ಒಂದು ಜಾತಿ ಪ್ರಾಣಿಗಳಿಂದ ಇನ್ನೊಂದಕ್ಕೆ ಜಿಗಿಯುತ್ತಿವೆ ಎಂದು ಕೇಟ್ ಬಿಂಗ್‌ಹ್ಯಾಮ್ ವಿವರಿಸಿದ್ದಾರೆ.
ವಿಶ್ವ ಆರೋಗ್ಯ ಸಂಸ್ಥೆ (WHO) ಮೊದಲ ಬಾರಿಗೆ ಮೇ ತಿಂಗಳಲ್ಲಿ ತನ್ನ ವೆಬ್‌ಸೈಟ್‌ನಲ್ಲಿ ರೋಗ-X ಬಗ್ಗೆ ಪ್ರಸ್ತಾಪಿಸಿದೆ. ಈ ಪದವು “ಮನುಷ್ಯನ ಕಾಯಿಲೆಗೆ ಕಾರಣವಾಗಲು ಪ್ರಸ್ತುತ ತಿಳಿದಿಲ್ಲದ ರೋಗಕಾರಕದಿಂದ ಗಂಭೀರವಾದ ಅಂತಾರಾಷ್ಟ್ರೀಯ ಸಾಂಕ್ರಾಮಿಕ ರೋಗ ಉಂಟಾಗಬಹುದು ಎಂಬುದನ್ನು ಪ್ರತಿನಿಧಿಸುತ್ತದೆ” ಎಂದು ಅದು ಹೇಳಿದೆ.
ವಿಶ್ವ ಆರೋಗ್ಯ ಸಂಸ್ಥೆ (WHO) ಈ ಪದವನ್ನು 2018 ರಲ್ಲಿ ಬಳಸಲು ಪ್ರಾರಂಭಿಸಿತು. ಮತ್ತು ಒಂದು ವರ್ಷದ ನಂತರ, ಕೋವಿಡ್-19 ಪ್ರಪಂಚದಾದ್ಯಂತ ಹರಡಲು ಪ್ರಾರಂಭಿಸಿತು.
ನಿಮ್ಮ ಕಾಮೆಂಟ್ ಬರೆಯಿರಿ