ರೋಮ್: ಟೆಲಿವಿಷನ್‌ನಲ್ಲಿ ಸೆಕ್ಸಿಸ್ಟ್ ಹೇಳಿಕೆ ನೀಡಿದ್ದಕ್ಕೆ ತೀವ್ರ ವಿವಾದಕ್ಕೆ ಗುರಿಯಾಗಿರುವ ತಮ್ಮ ಪತಿ ಹಾಗೂ ಪತ್ರಕರ್ತ ಆಂಡ್ರಿಯಾ ಗಿಯಾಂಬ್ರುನೊ ಅವರಿಂದ ಬೇರ್ಪಟ್ಟಿರುವುದಾಗಿ ಇಟಲಿ ಪ್ರಧಾನಿ ಜಾರ್ಜಿಯಾ ಮೆಲೋನಿ ಶುಕ್ರವಾರ ಪ್ರಕಟಿಸಿದ್ದಾರೆ.
ಆಂಡ್ರಿಯಾ ಗಿಯಾಂಬ್ರುನೊ ಜೊತೆಗಿನ ನನ್ನ ಸುಮಾರು 10 ವರ್ಷಗಳ ಸಂಬಂಧ ಇಲ್ಲಿಗೆ ಅಂತ್ಯಗೊಂಡಿದೆ” ಎಂದು ಇಟಲಿ ಪ್ರಧಾನಿ ಮೆಲೋನಿ ಫೇಸ್‌ಬುಕ್‌ನಲ್ಲಿ ಬರೆದುಕೊಂಡಿದ್ದಾರೆ. “ನಮ್ಮ ದಾರಿಗಳು ಕೆಲವೊಮ್ಮೆ ಬೇರೆ ಬೇರೆಯಾಗಿವೆ. ಅದನ್ನು ಒಪ್ಪಿಕೊಳ್ಳುವ ಸಮಯ
ಈಗ ಬಂದಿದೆ” ಎಂದು ಇಟಲಿ ಪ್ರಧಾನಿ ತಿಳಿಸಿದ್ದಾರೆ. ಈ ದಂಪತಿಗೆ ಒಬ್ಬ ಪುಟ್ಟ ಮಗಳಿದ್ದಾಳೆ.
ಎಂಎಫ್‌ಇ ಮಾಧ್ಯಮ ಸಮೂಹದ ಭಾಗವಾದ ಮೀಡಿಯಾ ಸೆಟ್‌ ಪ್ರಸಾರ ಮಾಡುವ ಸುದ್ದಿ ಕಾರ್ಯಕ್ರಮದಲ್ಲಿ ಗಿಯಾಂಬ್ರುನೊ ನಿರೂಪಕರಾಗಿದ್ದಾರೆ.
ಗಿಯಾಂಬ್ರುನೊ ಅವರ ಟಿವಿ ಕಾರ್ಯಕ್ರಮದ ವೇಳೆ ಮಹಿಳಾ ಸಹೋದ್ಯೋಗಿಯೊಬ್ಬರ ಕುರಿತು ಕೀಳು ಅಭಿರುಚಿಯ ಹೇಳಿಕೆ ನೀಡಿದ ಹಾಗೂ ಅಸಭ್ಯ ಭಾಷೆ ಬಳಸಿರುವುದಕ್ಕೆ ವ್ಯಾಪಕ ಆಕ್ರೋಶಕ್ಕೆ ವ್ಯಕ್ತವಾಗಿತ್ತು. ಇದು ಟಿವಿಯಲ್ಲಿ ಪ್ರಸಾರವಾಗಿರಲಿಲ್ಲ. “ನಿನ್ನನ್ನು ನಾನು ಮೊದಲೇ ಏಕೆ ಭೇಟಿ ಮಾಡಿರಲಿಲ್ಲ?” ಎಂದು ಗಿಯಾಂಬ್ರುನೊ ಅವರು ಮಹಿಳಾ ಸಹೋದ್ಯೋಗಿಯನ್ನು ಪ್ರಶ್ನಿಸಿದ್ದರು.
ಆದರೆ ಗುರುವಾರ ಇನ್ನೂ ಅನುಚಿತ ಪದಗಳನ್ನು ಗಿಯಾಂಬ್ರುನೊ ಬಳಸಿದ್ದು, ಅದು ಟಿವಿಯಲ್ಲಿ ಪ್ರಸಾರವಾಗಿತ್ತು. ಅಫೇರ್ ಕುರಿತು ಹೆಮ್ಮೆ ವ್ಯಕ್ತಪಡಿಸಿದ್ದ ಅವರು, ಸಾಮೂಹಿಕ ಅತ್ಯಾಚಾರ ಪ್ರಕರಣವೊಂದರ ಬಳಿಕ ಸಂತ್ರಸ್ತೆಯನ್ನೇ ನಿಂದಿಸುವ ಹೇಳಿಕೆಗಳನ್ನು ನೀಡಿದ್ದಕ್ಕಾಗಿ ಆಗಸ್ಟ್ ತಿಂಗಳಲ್ಲಿ ಗಿಯಾಂಬ್ರುನೊ ವಿರುದ್ಧ ಕಟು ಟೀಕೆಗಳು ವ್ಯಕ್ತವಾಗಿದ್ದವು.
ಈ ಕಾರ್ಯಕ್ರಮ ವಿವಾದಕ್ಕೆ ಗುರಿಯಾದ ಬಳಿಕ ಪ್ರತಿಕ್ರಿಯೆ ನೀಡಿದ್ದ ಪ್ರಧಾನಿ ಮೆಲೋನಿ, ತಮ್ಮ ಸಂಗಾತಿ ನೀಡಿದ ಹೇಳಿಕೆಗಳ ಕಾರಣಕ್ಕೆ ತಮ್ಮ ನಿಲುವನ್ನು ತೀರ್ಮಾನಿಸಬಾರದು. ಅವರ ವರ್ತನೆ ಕುರಿತಾಗಿ ಮುಂದೆ ಕೇಳುವ ಪ್ರಶ್ನೆಗಳಿಗೆ ತಾನು ಉತ್ತರ ನೀಡುವುದಿಲ್ಲ ಎಂದು ಹೇಳಿದ್ದರು.
ನಿಮ್ಮ ಕಾಮೆಂಟ್ ಬರೆಯಿರಿ