ಉತ್ತರಕಾಶಿ : ಉತ್ತರಾಖಂಡದ ಉತ್ತರಕಾಶಿಯಲ್ಲಿ ಕುಸಿದ ಸಿಲ್ಕ್ಯಾರಾ ಸುರಂಗದೊಳಗೆ ಕಾರ್ಮಿಕರು ಸಿಲುಕಿದ ನಂತರದ ಮೊದಲ ದೃಶ್ಯಗಳು ಮಂಗಳವಾರ ಬೆಳಿಗ್ಗೆ ಹೊರಬಂದಿವೆ.
ಕುಸಿದ ಸುರಂಗದ ಅವಶೇಷಗಳ ಮೂಲಕ ಸೋಮವಾರ ಆರು ಇಂಚು ಅಗಲದ ಪೈಪ್ ಅನ್ನು ತಳ್ಳಲಾಯಿತು, ಇದು ಎಂಟು ದಿನಗಳ ಕಾಲ ಒಳಗೆ ಸಿಕ್ಕಿಬಿದ್ದ 41 ಕಾರ್ಮಿಕರ ದೊಡ್ಡ ಪ್ರಮಾಣದ ಆಹಾರ ಪೂರೈಸಲು ಅನುವು ಮಾಡಿಕೊಟ್ಟಿತು. ಹತ್ತು ದಿನಗಳ ರಕ್ಷಣಾ ಪ್ರಯತ್ನದಲ್ಲಿ, ಉತ್ತರಾಖಂಡದ ಸುರಂಗದಲ್ಲಿ ಸಿಕ್ಕಿಬಿದ್ದ ಕಾರ್ಮಿಕರು ಮಂಗಳವಾರ ಮುಂಜಾನೆ ಮೊದಲ ಬಾರಿಗೆ ಪೈಪ್ ಮೂಲಕ ಸೇರಿಸಲಾದ ಕ್ಯಾಮೆರಾ ಸೆರೆ ಹಿಡಿದ ದೃಶ್ಯಗಳಲ್ಲಿ ಕಾಣಿಸಿಕೊಂಡಿದ್ದಾರೆ.
ನವೆಂಬರ್ 12ರಂದು ಸುರಂಗದ ಒಂದು ಭಾಗವು ಕುಸಿದಿದ್ದರಿಂದ ಸಿಕ್ಕಿಬಿದ್ದ 41 ಕಾರ್ಮಿಕರಿಗೆ ಆಹಾರವನ್ನು ಕಳುಹಿಸಲು ಕಳೆದ ರಾತ್ರಿ ಕುಸಿದ ಅವಶೇಷಗಳ ಮೂಲಕ ಕಳುಹಿಸಲಾದ ಆರು ಇಂಚಿನ ಪೈಪ್ ಮೂಲಕ ಎಂಡೋಸ್ಕೋಪಿಕ್ ಕ್ಯಾಮೆರಾವನ್ನು ಸುರಂಗದೊಳಗೆ ತಳ್ಳಲಾಯಿತು.
ದೃಶ್ಯಗಳಲ್ಲಿ, ಕಾರ್ಮಿಕರು ತಮ್ಮ ಟೋಪಿಗಳನ್ನು ಧರಿಸಿರುವುದು ಮತ್ತು ಕೆಲಸದ ಗೇರ್‌ನಲ್ಲಿರುವುದು ಕಾಣಿಸುತ್ತದೆ. ಅವರು ಕ್ಯಾಮೆರಾದತ್ತ ಕೈ ಬೀಸುತ್ತಿದ್ದರು, ರಕ್ಷಣಾ ಅಧಿಕಾರಿಗಳು, ವಾಕಿ ಟಾಕೀಸ್ ಅಥವಾ ರೇಡಿಯೋ ಹ್ಯಾಂಡ್‌ಸೆಟ್‌ಗಳ ಮೂಲಕ ಕಾರ್ಮಿಕರೊಂದಿಗೆ ಮಾತನಾಡುತ್ತಾ, ಕಾರ್ಮಿಕರನ್ನು ಕ್ಯಾಮೆರಾ ಮುಂದೆ ಬರುವಂತೆ ಕೇಳಿಕೊಳ್ಳುತ್ತಿರುವುದು ಕಂಡುಬಂದಿದೆ. “ಆಪ್ ಕ್ಯಾಮೆರಾ ಕೆ ಪಾಸ್ ವಾಕಿ ಟಾಕಿ ಪೆ ಆಕೆ ಬಾತ್ ಕರೇನ್ (ಕ್ಯಾಮೆರಾ ಮುಂದೆ ಬಂದು ವಾಕಿ ಟಾಕಿ ಮೂಲಕ ನಮ್ಮೊಂದಿಗೆ ಮಾತನಾಡಿ)” ಎಂದು ಅಧಿಕಾರಿಯೊಬ್ಬರು ಹೇಳಿದ್ದಾರೆ.
ಕಳೆದ ರಾತ್ರಿ ಗಾಜಿನ ಬಾಟಲಿಗಳಲ್ಲಿ ಖಿಚಡಿಯನ್ನು ಪೈಪ್ ಮೂಲಕ ಕಳುಹಿಸಿದ್ದರಿಂದ ಕಾರ್ಮಿಕರು 10 ದಿನಗಳಲ್ಲಿ ತಮ್ಮ ಮೊದಲ ಬಿಸಿ ಊಟವನ್ನು ಸವಿದರು. ಈವರೆಗೆ, ಅವರು ಒಣ ಹಣ್ಣುಗಳು ಮತ್ತು ನೀರು ಕುಡಿದು ಬದುಕಿದ್ದರು. ರಕ್ಷಣಾ ಕಾರ್ಯಾಚರಣೆಯ ಉಸ್ತುವಾರಿ ಅಧಿಕಾರಿ ಕರ್ನಲ್ ದೀಪಕ ಪಾಟೀಲ ಮಾತನಾಡಿ, ಕಾರ್ಮಿಕರಿಗೆ ಶೀಘ್ರದಲ್ಲೇ ಮೊಬೈಲ್ ಮತ್ತು ಚಾರ್ಜರ್‌ಗಳನ್ನು ಪೈಪ್ ಮೂಲಕ ಕಳುಹಿಸಲಾಗುವುದು ಎಂದು ತಿಳಿಸಿದ್ದಾರೆ. ಮುಖ್ಯಮಂತ್ರಿ ಪುಷ್ಕರ್ ಸಿಂಗ್ ಧಾಮಿ ಕಾರ್ಮಿಕರ ವೀಡಿಯೊವನ್ನು ಹಂಚಿಕೊಂಡಿದ್ದಾರೆ, ಅವರೆಲ್ಲರೂ ಸುರಕ್ಷಿತವಾಗಿದ್ದಾರೆ ಮತ್ತು ಶೀಘ್ರದಲ್ಲೇ ಅವರನ್ನು ರಕ್ಷಣೆ ಮಾಡಲಾಗುವುದು ಎಂದು ಹೇಳಿದ್ದಾರೆ.
ಕಳೆದ ವಾರದಲ್ಲಿ, ಸ್ಥಳಾಕೃತಿ ಮತ್ತು ಪ್ರದೇಶದಲ್ಲಿನ ಬಂಡೆಗಳ ಸ್ವರೂಪ ಸೇರಿದಂತೆ ಸವಾಲುಗಳ ಕಾರಣ ಕಾರ್ಮಿಕರನ್ನು ರಕ್ಷಿಸುವ ಪುನರಾವರ್ತಿತ ಪ್ರಯತ್ನಗಳು ವಿಫಲವಾಗಿವೆ. ಕಳೆದ ವಾರ ಭೂಕುಸಿತಗಳು ಸಹ ರಕ್ಷಣಾ ಪ್ರಯತ್ನಗಳನ್ನು ನಿರ್ಬಂಧಿಸಿವೆ.
ಸಿಕ್ಕಿಬಿದ್ದ ಕಾರ್ಮಿಕರನ್ನು ಹೊರತರಲು ಮೂರು ಕಡೆಯಿಂದ ಡ್ರಿಲ್ಲಿಂಗ್ ಒಳಗೊಂಡಿರುವ ಐದು ಆಯ್ಕೆಗಳ ಕ್ರಿಯಾ ಯೋಜನೆಯನ್ನು ಕೇಂದ್ರವು ರೂಪಿಸಿದೆ. ಪ್ರತಿ ಕಾರ್ಯಾಚರಣೆಯನ್ನು ಕೈಗೊಳ್ಳಲು ಐದು ವಿವಿಧ ಏಜೆನ್ಸಿಗಳಿಗೆ ಜವಾಬ್ದಾರಿ ವಹಿಸಲಾಗಿದೆ. ಮುಖ್ಯ ಸುರಂಗದ ಬಲ ಮತ್ತು ಎಡ ಬದಿಗಳಿಂದ ಎರಡು ಸುರಂಗಗಳನ್ನು ಅಡ್ಡಲಾಗಿ ಕೊರೆಯಲಾಗುತ್ತಿದ್ದು, ಸುರಂಗದ ಮೇಲ್ಭಾಗದಿಂದ ಲಂಬವಾದ ಶಾಫ್ಟ್ ಅನ್ನು ಕೊರೆಯಲಾಗುತ್ತದೆ.
ಎನ್‌ಡಿಆರ್‌ಎಫ್‌ (NDRF), ಎಸ್‌ಡಿಆರ್‌ಎಫ್‌ (SDRF), ಬಿಆರ್‌ಒ (BRO) ಮತ್ತು ಐಟಿಬಿಪಿ (ITBP) ಸೇರಿದಂತೆ ಅನೇಕ ಏಜೆನ್ಸಿಗಳು ಪ್ರತಿನಿತ್ಯದ ರಕ್ಷಣಾ ಕಾರ್ಯವನ್ನು ನಿರ್ವಹಿಸುತ್ತಿವೆ. ಅಂತಾರಾಷ್ಟ್ರೀಯ ಸುರಂಗ ತಜ್ಞ ತಂಡ ನಿನ್ನೆ ಆಗಮಿಸಿ ಪ್ರಯತ್ನಕ್ಕೆ ಕೈಜೋಡಿಸಿದೆ. ರಕ್ಷಣಾ ಸಂಶೋಧನಾ ಸಂಸ್ಥೆ ಡಿಆರ್‌ಡಿಒದ ರೊಬೊಟಿಕ್ಸ್ ತಂಡವೂ ತಲುಪಿದೆ.
ಎಲ್ಲ ಕಾರ್ಮಿಕರು ಸುರಕ್ಷಿತವಾಗಿದ್ದು, ಉಕ್ಕಿನ ಪೈಪ್‌ಗಳ ಮೂಲಕ ಆಹಾರ ಮತ್ತು ನೀರನ್ನು ಸರಬರಾಜು ಮಾಡಲಾಗುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಇದಕ್ಕೂ ಮುನ್ನ ಸುರಂಗದ ಮೇಲ್ಭಾಗದಲ್ಲಿದ್ದ 4 ಇಂಚಿನ ಟ್ಯೂಬ್ ಮೂಲಕ ಆಮ್ಲಜನಕ ಹಾಗೂ ಅಗತ್ಯ ವಸ್ತುಗಳನ್ನು ಪೂರೈಕೆ ಮಾಡಲಾಗುತ್ತಿತ್ತು.
ನಿರ್ಮಾಣ ಹಂತದಲ್ಲಿರುವ ಸುರಂಗವು ಮಹತ್ವಾಕಾಂಕ್ಷೆಯ ಚಾರ್ ಧಾಮ್ ಯೋಜನೆಯ ಭಾಗವಾಗಿದೆ, ಇದು ಯಾತ್ರಾ ಸ್ಥಳಗಳಾದ ಬದರಿನಾಥ್, ಕೇದಾರನಾಥ, ಗಂಗೋತ್ರಿ ಮತ್ತು ಯಮುನೋತ್ರಿಗಳಿಗೆ ಸಂಪರ್ಕವನ್ನು ಹೆಚ್ಚಿಸುವ ರಾಷ್ಟ್ರೀಯ ಮೂಲಸೌಕರ್ಯ ಉಪಕ್ರಮವಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ