ಶುಕ್ರವಾರ ಅರುಣಾಚಲ ಪ್ರದೇಶ ವಿರುದ್ಧದ ರಣಜಿ ಟ್ರೋಫಿ ಪಂದ್ಯದಲ್ಲಿ ಹೈದರಾಬಾದ್ ಬ್ಯಾಟರ್ ತನ್ಮಯ ಅಗರ್ವಾಲ್ ಕೇವಲ 147 ಎಸೆತಗಳಲ್ಲಿ ತ್ರಿಶತಕ ಸಿಡಿಸುವ ಮೂಲಕ 252 ವರ್ಷಗಳ ಕ್ರಿಕೆಟ್ ಇತಿಹಾಸದಲ್ಲಿ ಹೊಸ ದಾಖಲೆ ಮಾಡಿದ್ದಾರೆ.
ತನ್ಮಯ ಅಗರ್ವಾಲ್ ಅವರ ಆಕರ್ಷಕ ಬ್ಯಾಟಿಂಗ್‌ನಿಂದಾಗಿ ಹೈದರಾಬಾದ್ ತಂಡವು ಕೇವಲ 48 ಓವರ್‌ಗಳಲ್ಲಿ ಒಂದು ವಿಕೆಟ್ ನಷ್ಟಕ್ಕೆ 529 ರನ್ ಗಳಿಸಿತು. ಪ್ರಥಮ ದರ್ಜೆ ಕ್ರಿಕೆಟ್ ಪಂದ್ಯವೊಂದರಲ್ಲಿ ಬ್ಯಾಟರ್ 150ಕ್ಕೆ ಕಡಿಮೆ ಎಸೆತ ಎದುರಿಸಿ ತ್ರಿಶತಕ ಸಿಡಿಸಿದ್ದು ಇದೇ ಮೊದಲು. ವಿಸ್ಡನ್ ಅಲ್ಮಾನಾಕ್ ಪ್ರಕಾರ, ಮೊದಲ ‘ಪ್ರಥಮ ದರ್ಜೆ’ ಕ್ರಿಕೆಟ್ ಪಂದ್ಯವನ್ನು 1772 ರಲ್ಲಿ ಆಡಲಾಯಿತು ಮತ್ತು ಸುಮಾರು 252 ವರ್ಷಗಳಲ್ಲಿ ಈ ಸಾಧನೆಯನ್ನು ಮಾಡಿದ್ದು ಇದೇ ಮೊದಲು.
ಇದು ಪ್ರಥಮ ದರ್ಜೆ ಕ್ರಿಕೆಟ್‌ನಲ್ಲಿ ಅತ್ಯಂತ ವೇಗದ ತ್ರಿಶತಕವಾಗಿದ್ದು, ಅಗರ್ವಾಲ್ ಅವರು 2017ರಲ್ಲಿ ಮಾರ್ಕೊ ಮರೈಸ್ ಅವರು ನಿರ್ಮಿಸಿದ್ದ ಹಿಂದಿನ ದಾಖಲೆಯನ್ನು ಮುರಿದಿದ್ದಾರೆ. ತನ್ಮಯ ಅಗರ್ವಾಲ್ ಅವರ ಇನ್ನಿಂಗ್ಸ್ ನಲ್ಲಿ 33 ಬೌಂಡರಿಗಳು ಮತ್ತು 21 ಸಿಕ್ಸರ್‌ಗಳಿವೆ.- ಇದು ಪ್ರಥಮ ದರ್ಜೆ ಕ್ರಿಕೆಟ್‌ನಲ್ಲಿ ಮತ್ತೊಂದು ದಾಖಲೆಯಾಗಿದೆ. ಇಶಾನ್ ಕಿಶನ್ ಅವರ ಹಿಂದಿನ ದಾಖಲೆಯನ್ನು ಸಹ ಅವರು ಮುರಿದಿದ್ದಾರೆ.
28ರ ಹರೆಯದ ತನ್ಮಯ ಅವರು ರಣಜಿ ಇತಿಹಾಸದಲ್ಲಿ ಒಂದೇ ದಿನದಲ್ಲಿ 300ಕ್ಕಿಂತ ಹೆಚ್ಚು ರನ್ ಗಳಿಸಿದ ಮೊದಲ ಆಟಗಾರರಾಗಿದ್ದಾರೆ.
ಅಗರ್ವಾಲ್ ಕೇವಲ 160 ಎಸೆತಗಳಲ್ಲಿ ಅಜೇಯ 323 ರನ್ ಗಳಿಸಿದರು – ಪ್ರಥಮ ದರ್ಜೆ ಕ್ರಿಕೆಟ್‌ನಲ್ಲಿ ಒಂದೇ ದಿನದ ಆಟದಲ್ಲಿ ಯಾವುದೇ ಬ್ಯಾಟರ್ ಗಳಿಸಿದ ಏಳನೇ ಅತಿ ಹೆಚ್ಚು ರನ್ ಇದಾಗಿದೆ.
ಈ ದಾಖಲೆಗಳು ಕೇವಲ ಟ್ರಿಪಲ್ ಶತಕಕ್ಕೆ ಸೀಮಿತವಾಗಿರಲಿಲ್ಲ ಏಕೆಂದರೆ ಅಗರ್ವಾಲ್ ಅವರು ಭಾರತೀಯರ ವೇಗದ ಪ್ರಥಮ ದರ್ಜೆ ದ್ವಿಶತಕವನ್ನು ಸಹ ಹೊಡೆದರು. ಅವರು 119 ಎಸೆತಗಳಲ್ಲಿ ಈ ಸಾಧನೆ ಮಾಡಿದರು ಮತ್ತು 1985 ರಲ್ಲಿ ಬರೋಡಾ ವಿರುದ್ಧ 123 ಎಸೆತಗಳಲ್ಲಿ ದ್ವಿಶತಕ ಸಿಡಿಸಿದ ರವಿಶಾಸ್ತ್ರಿ ಅವರ ಹಿಂದಿನ ದಾಖಲೆಯನ್ನು ಅವರು ಮುರಿದರು. ಒಟ್ಟಾರೆಯಾಗಿ, ಇದು ಪ್ರಥಮ ದರ್ಜೆ ಕ್ರಿಕೆಟ್ ಇತಿಹಾಸದಲ್ಲಿ ಎರಡನೇ ವೇಗದ ದ್ವಿಶತಕವಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ