ನವದೆಹಲಿ: ಮಂಗಳವಾರ ಚುನಾವಣಾ ಆಯೋಗವು ರಾಷ್ಟ್ರೀಯವಾದಿ ಕಾಂಗ್ರೆಸ್ ಪಕ್ಷದ ಅಜಿತ್ ಪವಾರ್ ನೇತೃತ್ವದ ಬಣವನ್ನು “ನಿಜವಾದ” ಎನ್‌ಸಿಪಿ ಎಂದು ಪ್ರಕಟಿಸಿದ್ದು, ಪಕ್ಷದ ಸಂಸ್ಥಾಪಕ ಮತ್ತು ಅವರ ಚಿಕ್ಕಪ್ಪ ಶರದ್ ಪವಾರ್ ಅವರೊಂದಿಗಿನ ಬಣದ ನಡುವಿನ ವಿವಾದವನ್ನು ಕೊನೆಗೊಳಿಸಿದೆ.
ಅಜಿತ್ ಪವಾರ್ ತನ್ನ ಚಿಕ್ಕಪ್ಪ ಮತ್ತು ಎನ್‌ಸಿಪಿ ಸಂಸ್ಥಾಪಕ ಶರದ್ ಪವಾರ್ ವಿರುದ್ಧ ಬಂಡಾಯವೆದ್ದು ಮಹಾರಾಷ್ಟ್ರದ ಆಡಳಿತಾರೂಢ ಬಿಜೆಪಿ-ಶಿವಸೇನೆ ಸರ್ಕಾರಕ್ಕೆ ಸೇರಿದ ನಂತರ ಜುಲೈ 2023 ರಲ್ಲಿ ಎನ್‌ಸಿಪಿ ವಿಭಜನೆಗೆ ಸಾಕ್ಷಿಯಾಯಿತು.
ಎರಡೂ ಬಣಗಳು ಚುನಾವಣಾ ಆಯೋಗದ ಮುಂದೆ ಪಕ್ಷದ ಹೆಸರು ಮತ್ತು ಚಿಹ್ನೆಗಾಗಿ ಹಕ್ಕು ಮಂಡಿಸಿದ್ದವು. ಚುನಾವಣಾ ಸಮಿತಿಯು ಅಜಿತ್ ಪವಾರ್ ಅವರ ಬಣದ ಪರವಾಗಿ ತೀರ್ಪು ನೀಡಿದ್ದು, ಅದನ್ನು ‘ನೈಜ’ ಎನ್‌ಸಿಪಿ ಎಂದು ಘೋಷಿಸಿದೆ. ಮತ್ತು ಅದಕ್ಕೆ ಎನ್‌ಸಿಪಿ ಚಿಹ್ನೆ ‘ಗೋಡೆ ಗಡಿಯಾರ’ವನ್ನು ನೀಡಿದೆ. ಆಯೋಗದ ನಿರ್ಧಾರವು ಬಣಗಳ ಸಂಖ್ಯಾ ಬಲವನ್ನು ಆಧರಿಸಿದೆ ಎಂದು ಮೂಲಗಳು ತಿಳಿಸಿವೆ. ಮಹಾರಾಷ್ಟ್ರ ವಿಧಾನಸಭೆಯಲ್ಲಿ ಅಜಿತ್ ಪವಾರ್ ನೇತೃತ್ವದ ಬಣವು ಎನ್‌ಸಿಪಿಯ 53 ಶಾಸಕರ ದೊಡ್ಡ ಭಾಗವನ್ನು ಹೊಂದಿದೆ. ಇದು ಶರದ್ ಪವಾರ್ ಬಣಕ್ಕೆ ದೊಡ್ಡ ಹಿನ್ನೆಡೆ ಎನ್ನಲಾಗಿದೆ.
ಈ ಬೆಳವಣಿಗೆಯ ಬಗ್ಗೆ ಸಾಮಾಜಿಮ ಮಾಧ್ಯಮದ ಮೂಲಕ ಪ್ರತಿಕ್ರಿಯಿಸಿದ ಅಜಿತ್ ಪವಾರ್ ಅವರು, “ನಮ್ಮ ವಕೀಲರು ಮಂಡಿಸಿದ ವಾದವನ್ನು ಆಲಿಸಿದ ನಂತರ ಚುನಾವಣಾ ಆಯೋಗವು ನೀಡಿದ ನಿರ್ಧಾರವನ್ನು ನಾವು ನಮ್ರತೆಯಿಂದ ಸ್ವೀಕರಿಸುತ್ತೇವೆ ಎಂದು ಹೇಳಿದ್ದಾರೆ.
ರಾಜ್ಯಸಭಾ ಚುನಾವಣೆಯನ್ನು ಗಮನದಲ್ಲಿಟ್ಟುಕೊಂಡು ಶರದ್ ಪವಾರ್ ಅವರ ಬಣಕ್ಕೆ ಫೆ.7ರ ಬುಧವಾರ ಸಂಜೆ 4 ಗಂಟೆಯೊಳಗೆ ಮೂರು ಹೆಸರುಗಳನ್ನು ನೀಡಲು ಸಮಯಾವಕಾಶ ನೀಡಲಾಗಿದೆ.
ಆರು ತಿಂಗಳಿಗೂ ಹೆಚ್ಚು ಕಾಲ ನಡೆದ ಎರಡೂ ಬಣಗಳ ಕಾನೂನು ತಂಡಗಳಿಂದ 10 ಕ್ಕೂ ಹೆಚ್ಚು ವಿಚಾರಣೆಗಳ ನಂತರ ಚುನಾವಣಾ ಸಮಿತಿಯ ನಿರ್ಧಾರವು ಬಂದಿದೆ. ಗಮನಾರ್ಹವಾಗಿ, ಅಜಿತ್ ಪವಾರ್ ನೇತೃತ್ವದ ಬಣದ ಕಾನೂನು ತಂಡವು ಮುಕುಲ್ ರೋಹಟಗಿ, ನೀರಜ್ ಕೌಲ್, ಅಭಿಕಲ್ಪ ಪ್ರತಾಪ್ ಸಿಂಗ್, ಶ್ರೀರಂಗ್ ವರ್ಮಾ, ದೇವಾಂಶಿ ಸಿಂಗ್, ಆದಿತ್ಯ ಕೃಷ್ಣ ಮತ್ತು ಯಾಮಿನಿ ಸಿಂಗ್ ಅವರನ್ನು ಒಳಗೊಂಡಿತ್ತು.
ನಿಮ್ಮ ಕಾಮೆಂಟ್ ಬರೆಯಿರಿ