ಪಾಕಿಸ್ತಾನದಲ್ಲಿ ಮರಣದಂಡನೆ ಶಿಕ್ಷೆಗೆ ಒಳಗಾಗಿದ್ದ ಭಾರತೀಯ ಕೈದಿ ಸರಬ್ಜಿತ್ ಸಿಂಗ್ ಹತ್ಯೆಯ ಆರೋಪಿ ಮತ್ತು ಭಯೋತ್ಪಾದಕ ಸಂಘಟನೆ ಲಷ್ಕರ್-ಎ-ತೊಯ್ಬಾ ಸಂಸ್ಥಾಪಕ ಹಫೀಜ್ ಸಯೀದ್ ನ ನಿಕಟವರ್ತಿ ಅಮೀರ್ ಸರ್ಫರಾಜ್ ತಾಂಬಾ ಎಂಬಾತನನ್ನು ಪಾಕಿಸ್ತಾನ ಪಂಜಾಬ್‌ನ ಲಾಹೋರ್‌ನಲ್ಲಿ ಭಾನುವಾರ ಅಪರಿಚಿತ ಬಂದೂಕುಧಾರಿಗಳಿಂದ ಗುಂಡಿಕ್ಕಿ ಹತ್ಯೆ ಮಾಡಿದ್ದಾರೆ ಎಂದು ಮಾಧ್ಯಮ ವರದಿಗಳು ತಿಳಿಸಿವೆ.
ವರದಿಗಳ ಪ್ರಕಾರ, ಇಸ್ಲಾಂಪುರ ಪ್ರದೇಶದಲ್ಲಿ ಮೋಟಾರು ಸೈಕಲ್‌ಗಳಲ್ಲಿ ಬಂದ ದುಷ್ಕರ್ಮಿಗಳು ಅಮೀರ್ ಸರ್ಫರಾಜ್ ತಾಂಬಾ ಮೇಲೆ ದಾಳಿ ನಡೆಸಿದ್ದಾರೆ. ಚಿಂತಾಜನಕ ಸ್ಥಿತಿಯಲ್ಲಿದ್ದ ಆತನನ್ನು ಆಸ್ಪತ್ರೆಗೆ ಸಾಗಿಸಲಾಯಿತು, ಆದರೆ ಅವರು ಮೃತಪಟ್ಟಿದ್ದಾರೆ ಎಂದು ಘೋಷಿಸಲಾಯಿತು. ಆದರೆ ಪೊಲೀಸರು ಇದನ್ನು ಇನ್ನೂ ದೃಢಪಡಿಸಿಲ್ಲ.
ತಾಂಬಾ ದೇಹದಲ್ಲಿ ನಾಲ್ಕು ಗುಂಡುಗಳು ಹೊಕ್ಕಿದ್ದು, ಎದೆ ಮತ್ತು ಕಾಲುಗಳಲ್ಲಿ ತಲಾ ಎರಡು ಗಾಯಗಳಿವೆ ಎಂದು ವರದಿ ಹೇಳಿದೆ, ಬಂದೂಕುಧಾರಿಗಳಲ್ಲಿ ಒಬ್ಬ ಹೆಲ್ಮೆಟ್ ಧರಿಸಿದ್ದರೆ, ಮತ್ತೊಬ್ಬ ಮುಖಕ್ಕೆ ಮಾಸ್ಕ್ ಹಾಕಿಕೊಂಡಿದ್ದ ಮತ್ತು ಗುಂಡು ಹಾರಿಸಿ ಇಬ್ಬರೂ ಸ್ಥಳದಿಂದ ಪರಾರಿಯಾಗಿದ್ದಾರೆ ಎಂದು ವರದಿಗಳು ತಿಳಿಸಿವೆ.
ಕ್ರಿಮಿನಲ್ ಚಟುವಟಿಕೆಗಳಿಗಾಗಿ ಜೈಲಿನಲ್ಲಿದ್ದ ಸಮಯದಲ್ಲಿ ತಾಂಬಾ ಜೈಲಿನೊಳಗೆ ಮೊಬೈಲ್ ಫೋನ್ ಸೇರಿದಂತೆ ಎಲ್ಲಾ ಸೌಲಭ್ಯಗಳನ್ನು ಆನಂದಿಸುತ್ತಿದ್ದ ಎಂದು ಮೂಲಗಳು ತಿಳಿಸಿವೆ.
ತಾಂಬಾ 1979 ರಲ್ಲಿ ಲಾಹೋರ್‌ನಲ್ಲಿ ಜನಿಸಿದ ಮತ್ತು ಲಷ್ಕರ್-ಎ-ತೊಯ್ಬಾ ಸಂಸ್ಥಾಪಕ ಹಫೀಜ್ ಸಯೀದನ ನಿಕಟವರ್ತಿಯಾಗಿದ್ದ, ಆತ ಸರಬ್ಜಿತ್ ಸಿಂಗ್ ಅವರನ್ನು ಕೊಂದಿದ್ದಕ್ಕಾಗಿ ಹಫೀಜ್ ಸಯೀದ್ ಆತನನ್ನು ಅಭಿನಂದಿಸಿದ್ದ.. “ಲಾಹೋರ್ ಕಾ ಅಸ್ಲಿ ಡಾನ್” ಎಂದು ಕುಖ್ಯಾತಿ ಪಡೆದಿದ್ದ ತಾಂಬಾ ‘ಟ್ರಕೆನ್‌ವಾಲಾ ಗ್ಯಾಂಗ್’ ನ ಭಾಗವಾಗಿದ್ದ ಮತ್ತು ಆಸ್ತಿ ವ್ಯಾಪಾರ ಮತ್ತು ಮಾದಕವಸ್ತು ಕಳ್ಳಸಾಗಣೆಯಲ್ಲಿ ತೊಡಗಿದ್ದ. ಅಲ್ಲದೆ, ಇತ್ತೀಚೆಗೆ ಗ್ಯಾಂಗ್ ಸದಸ್ಯರಲ್ಲೊಬ್ಬನಾದ ಅಮೀರ್ ಬಾಲಾಜ್ ಟಿಪ್ಪು ಜೊತೆ ಘರ್ಷಣೆಯಲ್ಲಿ ತೊಡಗಿದ್ದ, ನಂತರ ಅಮೀರ್ ಬಾಲಾಜ್ ಟಿಪ್ಪು ಲಾಹೋರ್‌ನಲ್ಲಿ ಮದುವೆಯ ಆರತಕ್ಷತೆಯ ಸಂದರ್ಭದಲ್ಲಿ ಕೊಲ್ಲಲ್ಪಟ್ಟಿದ್ದ.
ಸರಬ್ಜಿತ್ ಸಿಂಗ್ ಮೇ 2, 2013 ರ ಮುಂಜಾನೆ ಲಾಹೋರ್‌ನ ಜಿನ್ನಾ ಆಸ್ಪತ್ರೆಯಲ್ಲಿ ಹೃದಯ ಸ್ತಂಭನದಿಂದ ನಿಧನರಾಗಿದ್ದರು. ಹೆಚ್ಚಿನ ಭದ್ರತೆಯ ಕೇಂದ್ರ ಕಾರಾಗೃಹದ ಲಾಹೋರ್‌ನಲ್ಲಿ ಕೈದಿಗಳ ಕ್ರೂರ ಹಲ್ಲೆಯ ನಂತರ ಸುಮಾರು ಒಂದು ವಾರದವರೆಗೆ ಅವರು ಕೋಮಾದಲ್ಲಿದ್ದರು. ಇಟ್ಟಿಗೆ ಮತ್ತು ಕಬ್ಬಿಣದ ರಾಡ್‌ಗಳಿಂದ ಆತನ ಮೇಲೆ ಹಲ್ಲೆ ನಡೆಸಲಾಗಿತ್ತು. 1990 ರಲ್ಲಿ ಪಾಕಿಸ್ತಾನದ ಪಂಜಾಬ್ ಪ್ರಾಂತ್ಯದಲ್ಲಿ ಹಲವಾರು ಬಾಂಬ್ ಸ್ಫೋಟಗಳಲ್ಲಿ ಭಾಗವಹಿಸಿದ್ದ ಎಂದು ಆರೋಪಿಸಿ ಆತನಿಗೆ ಮರಣದಂಡನೆ ವಿಧಿಸಲಾಗಿತ್ತು.
ಆದಾಗ್ಯೂ, ಸಿಂಗ್ ಕುಟುಂಬವು ಆತ ತಪ್ಪಾದ ಗುರುತಿಸಲಾದ ಬಲಿಪಶು ಎಂದು ಹೇಳಿದ್ದಾರೆ. ಮತ್ತು ಸರಬ್ಜಿತ್ ಸಿಂಗ್ ಅಜಾಗರೂಕತೆಯಿಂದ ಗಡಿಯಲ್ಲಿ ದಾರಿ ತಪ್ಪಿ ಪಾಕಿಸ್ತಾನಕ್ಕೆ ಹೋಗಿದ್ದ ಎಂದು ಹೇಳಿದ್ದಾರೆ. ಸರಬ್ಜಿತ್ ಸಿಂಗ್ ಸಹೋದರಿ ದಲ್ಬೀರ್ ಕೌರ್ ಪಾಕಿಸ್ತಾನದಿಂದ ಆತನನ್ನು ಬಿಡುಗಡೆ ಮಾಡಿಸಲು ಸುದೀರ್ಘ ಹೋರಾಟ ನಡೆಸಿದರು, ಆದರೆ ವಿಫಲರಾದರು. ಅವರು 2022 ರಲ್ಲಿ ಅಮೃತಸರದಲ್ಲಿ ನಿಧನರಾದರು.
ನಿಮ್ಮ ಕಾಮೆಂಟ್ ಬರೆಯಿರಿ