ನವದೆಹಲಿ: ಪ್ರಧಾನ ಮಂತ್ರಿಯ ಆರ್ಥಿಕ ಸಲಹಾ ಮಂಡಳಿ (Prime Minister’s Economic Advisory Council) ನಡೆಸಿದ ಅಧ್ಯಯನವು ಭಾರತದಲ್ಲಿ ಬಹುಸಂಖ್ಯಾತ ಧರ್ಮದ (ಹಿಂದೂಗಳು) ಜನಸಂಖ್ಯೆಯ ಪಾಲು 1950 ಮತ್ತು 2015 ರ ನಡುವೆ ಶೇಕಡಾ 7.8 ರಷ್ಟು ಕುಸಿದಿದೆ, ಇದೇ ಅವಧಿಯಲ್ಲಿ ಮುಸ್ಲಿಮರ ಜನಸಂಖ್ಯೆಯಲ್ಲಿ 43.15% ರಷ್ಟು ಹೆಚ್ಚಳವಾಗಿದೆ ಎಂದು ಅದು ಹೇಳಿದೆ.
ಈ ಅವಧಿಯಲ್ಲಿ ಅನೇಕ ನೆರೆಯ ರಾಷ್ಟ್ರಗಳಲ್ಲಿ ಅಲ್ಲಿನ ಬಹುಸಂಖ್ಯಾತ ಸಮುದಾಯದ ಜನಸಂಖ್ಯೆಯಲ್ಲಿ ಜಿಗಿತವಾಗಿದೆ ಎಂದು ಅದು ಹೇಳಿದೆ. 38 ಇಸ್ಲಾಮಿಕ್ ದೇಶಗಳಲ್ಲಿ ಬಹುಸಂಖ್ಯಾತರ ಜನಸಂಖ್ಯೆಯಲ್ಲಿ ಹೆಚ್ಚಳ ಕಂಡುಬಂದಿದೆ. ಆದರೆ ಈ ಅವಧಿಯಲ್ಲಿ ನೇಪಾಳ ಮತ್ತು ಮ್ಯಾನ್ಮಾರ್‌ನಲ್ಲಿಯೂ ಬಹುಸಂಖ್ಯಾತ ಸಮುದಾಯದ ಜನಸಂಖ್ಯೆಯಲ್ಲಿ ಕುಸಿತ ಕಂಡುಬಂದಿದೆ.
ಅಧ್ಯಯನದ ಪ್ರಕಾರ, ಭಾರತದಲ್ಲಿ ಪಾರ್ಸಿಗಳು ಮತ್ತು ಜೈನರನ್ನು ಹೊರತುಪಡಿಸಿ, ಕ್ರೈಸ್ತರು, ಬೌದ್ಧರು ಮತ್ತು ಸಿಖ್ಖರು ಸೇರಿದಂತೆ ಎಲ್ಲ ಇತರ ಧಾರ್ಮಿಕ ಅಲ್ಪಸಂಖ್ಯಾತರ ಜನಸಂಖ್ಯೆಯ ಪ್ರಮಾಣದಲ್ಲಿ ಹೆಚ್ಚಳವಾಗಿದೆ, ಈ ಅವಧಿಯಲ್ಲಿ ಅದು 6.58 ರಷ್ಟು ಹೆಚ್ಚಳವಾಗಿದೆ.
ಭಾರತದ ಜನಸಂಖ್ಯೆಯಲ್ಲಿ ಹಿಂದೂಗಳ ಪಾಲು ಇಳಿಕೆ…
ಪ್ರಧಾನ ಮಂತ್ರಿಯ ಆರ್ಥಿಕ ಸಲಹಾ ಮಂಡಳಿ (EAC-PM) ಅಧ್ಯಯನದ ಪ್ರಕಾರ, ಭಾರತದ ಜನಸಂಖ್ಯೆಯಲ್ಲಿ ಹಿಂದೂಗಳ ಪಾಲು 1950 ರಲ್ಲಿ 84.68% ರಿಂದ 2015 ರಲ್ಲಿ 78.06% ಕ್ಕೆ ಕುಸಿದಿದೆ, ಆದರೆ ಮುಸ್ಲಿಮರ ಪಾಲು 9.84% ರಿಂದ 14.09% ಕ್ಕೆ ಏರಿಕೆಯಾಗಿದೆ.
“ಭಾರತದಲ್ಲಿ, ಬಹುಸಂಖ್ಯಾತ ಹಿಂದೂ ಜನಸಂಖ್ಯೆಯ ಪಾಲು 1950 ಮತ್ತು 2015 ರ ನಡುವೆ ಶೇಕಡಾ 7.82 ರಷ್ಟು ಕಡಿಮೆಯಾಗಿದೆ (ಶೇ 84.68 ರಿಂದ 78.06 ಕ್ಕೆ). 1950 ರಲ್ಲಿ ಮುಸ್ಲಿಂ ಜನಸಂಖ್ಯೆಯ ಪಾಲು ಶೇಕಡಾ 9.84 ರಷ್ಟಿತ್ತು ಮತ್ತು 2015 ರಲ್ಲಿ ಶೇಕಡಾ 14.09 ಕ್ಕೆ ಏರಿದೆ – ಅವರ ಪಾಲಿನಲ್ಲಿ ಶೇಕಡಾ 43.15 ರಷ್ಟು ಹೆಚ್ಚಳವಾಗಿದೆ” ಎಂದು ಶೇರ್ ಆಫ್ ರಿಲಿಜಿಯಸ್ ಮೈನಾರಿಟಿ: ಎ ಕ್ರಾಸ್-ಕಂಟ್ರಿ ಅನಾಲಿಸಿಸ್(1950-2015) ) ಅಧ್ಯಯನ ಪೇಪರ್‌ನಲ್ಲಿ ಶಮಿಕಾ ರವಿ, ಅಪೂರ್ವಕುಮಾರ ಮಿಶ್ರಾ ಮತ್ತು ಅಬ್ರಹಾಂ ಜೋಸ್ ಬರೆದಿದ್ದಾರೆ.
ಭಾರತದಲ್ಲಿ ಅಲ್ಪಸಂಖ್ಯಾತರ ಪಾಲು ಹೆಚ್ಚಳ…
1950 ಮತ್ತು 2015 ರ ನಡುವೆ ಅಲ್ಪಸಂಖ್ಯಾತರ ಪಾಲು ಹೆಚ್ಚಾಗಿದೆ. ಕ್ರಿಶ್ಚಿಯನ್ ಜನಸಂಖ್ಯೆಯ ಪಾಲು 1950 ರಲ್ಲಿ 2.24 ಪ್ರತಿಶತದಿಂದ 2015 ರಲ್ಲಿ 2.36 ಕ್ಕೆ ಏರಿತು (ಶೇ. 5.38 ಹೆಚ್ಚಳ), ಸಿಖ್ಖರ ಜನಸಂಖ್ಯೆಯು ಶೇಕಡಾ 1.24 ರಿಂದ ಶೇಕಡಾ 1.85 ಕ್ಕೆ ಏರಿತು (6.58% ಹೆಚ್ಚಳ). ಬೌದ್ಧರ ಜನಸಂಖ್ಯೆಯ ಪಾಲು ಸಹ 1950 ರಲ್ಲಿ 0.05 ಪ್ರತಿಶತದಿಂದ 0.81 ಪ್ರತಿಶತಕ್ಕೆ ಹೆಚ್ಚಳವನ್ನು ಕಂಡಿತು.
ಮತ್ತೊಂದೆಡೆ, ಭಾರತದ ಜನಸಂಖ್ಯೆಯಲ್ಲಿ ಜೈನರ ಪಾಲು 1950 ರಲ್ಲಿ ಶೇಕಡಾ 0.45 ರಿಂದ 2015 ರಲ್ಲಿ ಶೇಕಡಾ 0.36 ಕ್ಕೆ ಕಡಿಮೆಯಾಗಿದೆ. ಭಾರತದಲ್ಲಿ ಪಾರ್ಸಿ ಜನಸಂಖ್ಯೆಯ ಪಾಲು ಶೇಕಡಾ 85 ರಷ್ಟು ಕುಸಿತವನ್ನು ಕಂಡಿದೆ. 1950 ರಲ್ಲಿ ಇದು ಶೇಕಡಾ 0.03% ಇದ್ದಿದ್ದು, 2015 ರಲ್ಲಿ 0.004% ಕುಸಿದಿದೆ.
“ಬಾಂಗ್ಲಾದೇಶ, ಪಾಕಿಸ್ತಾನ, ಶ್ರೀಲಂಕಾ, ಭೂತಾನ್ ಮತ್ತು ಅಫ್ಘಾನಿಸ್ತಾನದಂತಹ ದೇಶಗಳಲ್ಲಿ ಅಲ್ಪಸಂಖ್ಯಾತರ ಜನಸಂಖ್ಯೆ ಆತಂಕಕಾರಿಯಾಗಿ ಕುಗ್ಗಿದೆ” ಎಂದು ಈ ಅಧ್ಯಯನದ ಲೇಖಕರು ಹೇಳುತ್ತಾರೆ.
ಪಾಕಿಸ್ತಾನ, ಬಾಂಗ್ಲಾದೇಶದಲ್ಲಿ ಮುಸ್ಲಿಂ ಜನಸಂಖ್ಯೆಯಲ್ಲಿ ಹೆಚ್ಚಳ…
65 ವರ್ಷಗಳ ಅವಧಿಯಲ್ಲಿ 167 ದೇಶಗಳಲ್ಲಿ ಧಾರ್ಮಿಕ ಅಲ್ಪಸಂಖ್ಯಾತರು ಮತ್ತು ಬಹುಸಂಖ್ಯಾತರ ಪಾಲಿನ ಜಾಗತಿಕ ಪ್ರವೃತ್ತಿಯ ಮೇಲೆ ಈ ಅಧ್ಯಯನ ಬೆಳಕು ಚೆಲ್ಲುತ್ತದೆ.
ಜನಸಂಖ್ಯೆಯ ಬದಲಾವಣೆಯ ಈ ಪ್ರವೃತ್ತಿಯು ಮುಸ್ಲಿಂ ಬಹುಸಂಖ್ಯಾತ ದೇಶದಲ್ಲಿ ಸ್ವಲ್ಪ ವಿಭಿನ್ನವಾಗಿದೆ. ಬಿಡುಗಡೆಯಾದ ವರದಿಯ ಪ್ರಕಾರ, 38 ಮುಸ್ಲಿಂ ಬಹುಸಂಖ್ಯಾತ ದೇಶಗಳಲ್ಲಿ ಮುಸ್ಲಿಮರ ಪಾಲು ಇನ್ನಷ್ಟು ಹೆಚ್ಚಾಗಿದೆ. “ಭಾರತೀಯ ಉಪಖಂಡದಲ್ಲಿ, ಮಾಲ್ಡೀವ್ಸ್ ಹೊರತುಪಡಿಸಿ ಎಲ್ಲಾ ಮುಸ್ಲಿಂ ಬಹುಸಂಖ್ಯಾತ ದೇಶಗಳಲ್ಲಿ ಬಹುಸಂಖ್ಯಾತ ಧಾರ್ಮಿಕ ಪಂಗಡದ ಪಾಲು ಹೆಚ್ಚಾಗಿದೆ. ಅಲ್ಲಿ ಬಹುಸಂಖ್ಯಾತ ಗುಂಪಿನ (ಶಾಫಿ ಸುನ್ನಿಗಳು) ಪಾಲು ಶೇಕಡಾ 1.47 ರಷ್ಟು ಕುಸಿದಿದೆ” ಎಂದು ಅದು ಹೇಳಿದೆ.
1971 ರಲ್ಲಿ ಬಾಂಗ್ಲಾದೇಶದ ರಚನೆಯ ಹೊರತಾಗಿಯೂ ಪಾಕಿಸ್ತಾನದಲ್ಲಿ ಬಹುಸಂಖ್ಯಾತ ಧಾರ್ಮಿಕ ಪಂಗಡದ (ಹನಾಫಿ ಮುಸ್ಲಿಂ) ಪಾಲು ಶೇಕಡಾ 3.75 ರಷ್ಟು ಮತ್ತು ಒಟ್ಟು ಮುಸ್ಲಿಂ ಜನಸಂಖ್ಯೆಯ ಪಾಲು ಶೇಕಡಾ 10 ರಷ್ಟು ಹೆಚ್ಚಾಗಿದೆ.
1950 ರಲ್ಲಿ, ಮುಸ್ಲಿಮರು ಪಾಕಿಸ್ತಾನದಲ್ಲಿ ಜನಸಂಖ್ಯೆಯ 77.45%ರಷ್ಟು ಇದ್ದರು. ಪ್ರಸ್ತುತ, ಶೇಕಡಾ 80.36 ರಷ್ಟಿದ್ದಾರೆ. ಎಂದು ಅದು ಹೇಳಿದೆ.
ಅದೇ ಅವಧಿಯಲ್ಲಿ, ಬಾಂಗ್ಲಾದೇಶದಲ್ಲಿ ಒಟ್ಟು ಜನಸಂಖ್ಯೆಯಲ್ಲಿ ಮುಸ್ಲಿಮರ ಪಾಲು ಶೇಕಡಾ 74.24 ರಿಂದ 88.02 ರಷ್ಟು ಏರಿದೆ. ಅದೇ ರೀತಿ ಅಫ್ಘಾನಿಸ್ತಾನದಲ್ಲಿ ಮುಸ್ಲಿಂ ಜನಸಂಖ್ಯೆ ಶೇ.88.75ರಿಂದ ಶೇ.89.01ಕ್ಕೆ ಏರಿಕೆಯಾಗಿದೆ. ಆದಾಗ್ಯೂ, ಮಾಲ್ಡೀವ್ಸ್‌ನಲ್ಲಿ, ಮುಸ್ಲಿಂ ಜನಸಂಖ್ಯೆಯಲ್ಲಿ ಸ್ವಲ್ಪ ಇಳಿಕೆ ಕಂಡುಬಂದಿದೆ, 99.83% ರಿಂದ 98.36% ಕ್ಕೆ ಇಳಿಕೆಯಾಗಿದೆ.
ವರದಿಯ ಪ್ರಕಾರ, ಮ್ಯಾನ್ಮಾರ್‌ನಲ್ಲಿ ಬೌದ್ಧರ ಜನಸಂಖ್ಯೆಯು ಶೇಕಡಾ 78.53% ರಿಂದ 70.80% ಕ್ಕೆ ಇಳಿದಿದೆ, ಶ್ರೀಲಂಕಾದಲ್ಲಿ ಬೌದ್ಧರ ಜನಸಂಖ್ಯೆಯು 64.28 ರಿಂದ 67.65% ಕ್ಕೆ ಏರಿದೆ ಮತ್ತು ಭೂತಾನ್‌ನಲ್ಲಿ ಬೌದ್ಧರ ಜನಸಂಖ್ಯೆಯು 71.44% ರಿಂದ 84.07%ಕ್ಕೆ ಹೆಚ್ಚಾಗಿದೆ. ನೇಪಾಳದಲ್ಲಿ ಹಿಂದೂಗಳ ಜನಸಂಖ್ಯೆ ಶೇ.84.30ರಿಂದ ಶೇ.81.26ಕ್ಕೆ ಇಳಿಕೆಯಾಗಿದೆ.
123 ದೇಶಗಳಲ್ಲಿ ಬಹುಸಂಖ್ಯಾತರ ಜನಸಂಖ್ಯೆ ಕಡಿಮೆಯಾಗಿದೆ…
ಪ್ರಧಾನ ಮಂತ್ರಿಯ ಆರ್ಥಿಕ ಸಲಹಾ ಮಂಡಳಿ (ಇಎಸಿ-ಪಿಎಂ) ನಡೆಸಿದ ಅಧ್ಯಯನದ ಪ್ರಕಾರ, ಜಾಗತಿಕವಾಗಿ, ಬಹುಸಂಖ್ಯಾತ ಜನಸಂಖ್ಯೆಯ ಪಾಲು 123 ದೇಶಗಳಲ್ಲಿ ಕಡಿಮೆಯಾಗಿದೆ. ಆದರೆ ಇದು 44 ದೇಶಗಳಲ್ಲಿ ಏರಿಕೆಯಾಗಿದೆ ಜಾಗತಿಕವಾಗಿ ಬಹುಸಂಖ್ಯಾತ ಧಾರ್ಮಿಕ ಪಂಗಡದ ಪಾಲು ಸರಿಸುಮಾರು 22 ಪ್ರತಿಶತದಷ್ಟು ಕಡಿಮೆಯಾಗಿದೆ. “ಪ್ರತಿಯೊಂದು ಪ್ರಮುಖ ಖಂಡದಲ್ಲಿ, ಹೆಚ್ಚಿನ ದೇಶಗಳು ಹೆಚ್ಚಿನ ಬಹುಸಂಖ್ಯಾತ ಧಾರ್ಮಿಕ ಪಂಗಡದ ಪಾಲಿನಲ್ಲಿ ಕುಸಿತವನ್ನು ಕಂಡಿವೆ” ಎಂದು ಅದು ಹೇಳುತ್ತದೆ.
ನಿಮ್ಮ ಕಾಮೆಂಟ್ ಬರೆಯಿರಿ