ಹಿಮಪಾತದ ನಂತರ ಸೋಮವಾರ ಕೆನಡಾದ ಟೊರೊಂಟೊ ಪಿಯರ್‌ಸನ್ ವಿಮಾನ ನಿಲ್ದಾಣದ ಹಿಮದಿಂದ ಆವೃತವಾದ ರನ್‌ವೇಯಲ್ಲಿ ಇಳಿಯುವಾಗ ಡೆಲ್ಟಾ ಏರ್‌ಲೈನ್ಸ್ ಜೆಟ್ ತಲೆಕೆಳಗಾಗಿ ಪಲ್ಟಿಯಾಗಿದ್ದು, ಅದರಲ್ಲಿದ್ದ 80 ಜನರಲ್ಲಿ 19 ಜನರು ಗಾಯಗೊಂಡಿದ್ದಾರೆ ಎಂದು ವರದಿಯಾಗಿದೆ.
ಮಿನ್ನಿಯಾಪೋಲಿಸ್‌ ಡೆಲ್ಟಾ ವಿಮಾನದಲ್ಲಿ “ಘಟನೆ” ಸಂಭವಿಸಿದೆ ಎಂದು ವಿಮಾನನಿಲ್ದಾಣವು ಎಕ್ಸ್‌ ಪೋಸ್ಟ್‌ನಲ್ಲಿ ದೃಢಪಡಿಸಿದೆ. ಗಾಯಗೊಂಡವರಲ್ಲಿ ಮೂವರು ಗಂಭೀರವಾಗಿ ಗಾಯಗೊಂಡಿದ್ದಾರೆ ಎಂದು ವೈದ್ಯಾಧಿಕಾರಿಗಳು ತಿಳಿಸಿದ್ದಾರೆ. ಈ ಘಟನೆ ಸೋಮವಾರ ಮಧ್ಯಾಹ್ನ 2:15 ಕ್ಕೆ (ಸ್ಥಳೀಯ ಕಾಲಮಾನ) ನಡೆದಿದ್ದು, ವಿಮಾನ ನಿಲ್ದಾಣದಲ್ಲಿ ಸುಮಾರು ಎರಡೂವರೆ ಗಂಟೆಗಳ ಕಾಲ ವಿಮಾನಗಳನ್ನು ನಿಲ್ಲಿಸಲಾಯಿತು. ಡೆಲ್ಟಾ ಫ್ಲೈಟ್ 4819 ರಲ್ಲಿ 76 ಪ್ರಯಾಣಿಕರು ಮತ್ತು ನಾಲ್ವರು ಸಿಬ್ಬಂದಿ ಇದ್ದರು. ವಿಮಾನ ಹಾರಾಟವನ್ನು ನಂತರ ಪನರಾರಂಭಿಸಲಾಗಿದೆ ಎಂದು ವಿಮಾನ ನಿಲ್ದಾಣವು ನಂತರ ತಿಳಿಸಿದೆ.
ದೃಶ್ಯದಿಂದ ವೀಡಿಯೊ ಮಿತ್ಸುಬಿಷಿ CRJ-900LR ವಿಮಾನ ಹಿಮಭರಿತ ಟಾರ್ಮ್ಯಾಕ್‌ನಲ್ಲಿ ತಲೆಕೆಳಗಾಗಿರುವುದನ್ನು ತೋರಿಸುತ್ತದೆ. ವಾರಾಂತ್ಯದಲ್ಲಿ ಟೊರೊಂಟೊಗೆ ಅಪ್ಪಳಿಸಿದ ಚಳಿಗಾಲದ ಚಂಡಮಾರುತದಿಂದ ಹಿಮದಿಂದ ರನ್‌ ವೇ ಅಸ್ಪಷ್ಟವಾಗಿತ್ತು. ಅಲ್ಲಿ ವಿಮಾನ ಜಾರಿದೆ.
ವಿಮಾನಕ್ಕೆ ಬೆಂಕಿ ಹೊತ್ತಿಕೊಳ್ಳುವ ಮೊದಲು ಪವಾಡಸದೃಶ ರೀತಿಯಲ್ಲಿ ವಿಮಾನದಲ್ಲಿದ್ದ ಎಲ್ಲಾ 80 ಜನರು ವಿಮಾನದಿಂದ ಹೊರಬಂದರು. ವಿಮಾನದ ಒಂದು ರೆಕ್ಕೆಗೆ ಹಾನಿಯಾಗಿದೆ. ಮತ್ತು ವಿಮಾನದ ಬಾಲದ ಭಾಗವು ಭಾಗಶಃ ಮುರಿದುಹೋಗಿದೆ. ಬಿಬಿಸಿ ಪ್ರಕಾರ, ಗಂಭೀರ ಗಾಯಗೊಂಡ ಮೂವರನ್ನು ವಿವಿಧ ಆಸ್ಪತ್ರೆಗಳಿಗೆ ಸಾಗಿಸಲಾಗಿದೆ.
ಸಾಮಾಜಿಕ ಮಾಧ್ಯಮದಲ್ಲಿ ಪ್ರಯಾಣಿಕರೊಬ್ಬರು ಪೋಸ್ಟ್ ಮಾಡಿದ ನಾಟಕೀಯ ವೀಡಿಯೊ ಅಗ್ನಿಶಾಮಕ ದಳದವರು, ಅರೆವೈದ್ಯರು ಮತ್ತು ಇತರ ತುರ್ತು ಸಿಬ್ಬಂದಿ ಹಿಮದಿಂದ ಗುಡಿಸಿದ ರನ್‌ವೇಯ ಮೂಲಕ ತಲೆಕೆಳಗಾದ ವಿಮಾನದತ್ತ ಸಾಗುತ್ತಿರುವುದನ್ನು ತೋರಿಸಿದೆ.
ಬಾವಲಿ ರೀತಿ ವಿಮಾನದಲ್ಲಿ ನೇತಾಡುತ್ತಿದ್ದೆವು ಎಂದು ಪ್ರಯಾಣಿಕರೊಬ್ಬರು ಹೇಳಿಕೊಂಡಿದ್ದಾರೆ. ವಿಮಾನ ಅಪಘಾತದಿಂದ ಬದುಕುಳಿದವರೊಬ್ಬರು ಅಪಘಾತವಾದ ವಿಮಾನದ ದೃಶ್ಯ ಸೆರೆಹಿಡಿದಿದ್ದು, ವಿಮಾನ ಪಲ್ಟಿಯಾದ ನಂತರ ಮಹಿಳಾ ಪ್ರಯಾಣಿಕರೊಬ್ಬರು ತಮ್ಮ ಆಸನದಲ್ಲಿ ತಲೆಕೆಳಗಾಗಿ ನೇತಾಡುತ್ತಿರುವುದು ಕಂಡುಬಂದಿದೆ. “ನನ್ನ ವಿಮಾನ ಪತನ ಆಗಿದೆ, ನಾನು ತಲೆಕೆಳಗಾಗಿದ್ದೇನೆ,” ಎಂದು ಅವರು ರೆಕಾರ್ಡಿಂಗ್ ವೇಳೆ ಕಿರುಚಿದ್ದಾರೆ. ಭಯಭೀತರಾದ ಪ್ರಯಾಣಿಕರು ವಿಮಾನದಿಂದ ಹೊರಬರಲು ಪ್ರಯತ್ನಿಸುತ್ತಿರುವುದು ಮತ್ತು ಸುರಕ್ಷಿತ ಸ್ಥಳಕ್ಕೆ ತೆರಳುತ್ತಿರುವುದುರೆಕಾರ್ಡ್ ಆಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ