ಜೈಪುರ: ಜೈಪುರದಲ್ಲಿ ನಡೆದ ಅಂತಾರಾಷ್ಟ್ರೀಯ ಭಾರತೀಯ ಚಲನಚಿತ್ರ ಅಕಾಡೆಮಿ (ಐಐಎಫ್‌ಎ) ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ರಾಜಸ್ಥಾನ ಮುಖ್ಯಮಂತ್ರಿ ಭಜನಲಾಲ ಶರ್ಮಾ ಅವರು ಪ್ರಧಾನಿ ನರೇಂದ್ರ ಮೋದಿ ಅವರನ್ನು ತಮ್ಮ ನೆಚ್ಚಿನ ನಟ ಎಂದು ಹೇಳಿರುವುದು ರಾಜಕೀಯ ಚರ್ಚೆಗೆ ಕಾರಣವಾಗಿದೆ. ರಾಜಸ್ಥಾನ ಮುಖ್ಯಮಂತ್ರಿಗಳ ಈ ಹೇಳಿಕೆಗೆ ವಿಪಕ್ಷಗಳು ಬಿಜೆಪಿಯನ್ನು ಅಪಹಾಸ್ಯ ಮಾಡಿವೆ.
ಜೈಪುರದಲ್ಲಿ ನಡೆದ ಅಂತಾರಾಷ್ಟ್ರೀಯ ಭಾರತೀಯ ಚಲನಚಿತ್ರ ಅಕಾಡೆಮಿ (ಐಐಎಫ್‌ಎ) ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಸುದ್ದಿಗಾರರೊಂದಿಗಿನ ಸಂವಾದದಲ್ಲಿ ಶರ್ಮಾ ಅವರು ಈ ಹೇಳಿಕೆ ನೀಡಿದ್ದಾರೆ. ಸಂವಾದದ ಸಮಯದಲ್ಲಿ ನಿಮ್ಮ ನೆಚ್ಚಿನ ನಟ ಯಾರು ಎಂದು ಕೇಳಲಾಯಿತು. ನಗುತ್ತಾ ಅವರು ‘ನರೇಂದ್ರ ಮೋದಿ ಜಿ’ ಎಂದು ಉತ್ತರಿಸಿದ್ದಾರೆ. ಇದು ಈಗ ವಿಪಕ್ಷಗಳ ಟೀಕೆಗೆ ಗುರಿಯಾಗಿದೆ. ರಾಜಸ್ಥಾನ ಕಾಂಗ್ರೆಸ್ ಅಧ್ಯಕ್ಷ ಗೋವಿಂದ ಸಿಂಗ್ ದೋತಾಸ್ರಾ, ಮೋದಿ ನಾಯಕರಲ್ಲ. ಆದರೆ ನಟ ಎಂದು ನಾವು ಬಹಳ ಹಿಂದಿನಿಂದಲೂ ಹೇಳುತ್ತ ಬಂದಿದ್ದೇವೆ. ಈಗ, ಬಿಜೆಪಿ ಮುಖ್ಯಮಂತ್ರಿಗಳು ತಡವಾಗಿಯಾದರೂ, ಮೋದಿ ನಾಯಕರಲ್ಲ, ನಟರು ಎಂದು ಹೇಳಿದ್ದಾರೆ. ಕ್ಯಾಮೆರಾ ಕೌಶಲ್ಯ, ಟೆಲಿಪ್ರೊಂಪ್ಟರ್‌ಗಳು, ವೇಷಭೂಷಣಗಳು ಮತ್ತು ಭವ್ಯ ಭಾಷಣಗಳಲ್ಲಿ ಮೋದಿ ನಿಪುಣರು ಎಂಬುದನ್ನು ಒಪ್ಪಿಕೊಂಡಿದ್ದಾರೆ ಎಂದು ಟಾಂಗ್‌ಬಿಜೆಪಿಗೆ ಟಾಂಗ್‌ನೀಡಿದ್ದಾರೆ.
ಭಜನ್ ಲಾಲ್ ಜಿ, ನೀವು ಸರಿಯಾಗಿಯೇ ಹೇಳಿದ್ದೀರಿ. ಪ್ರಧಾನಿ ಮೋದಿ ಉತ್ತಮ ನಟ. ಆದರೆ, ಇತ್ತೀಚೆಗೆ ಅವರ ಅತಿ ನಟನೆ ಸ್ವಲ್ಪ ಹೆಚ್ಚುತ್ತಿದೆ ಎಂದು ನೀವು ಭಾವಿಸುವುದಿಲ್ಲವೇ ಎಂದು ರಾಜಸ್ಥಾನ ಮುಖ್ಯಮಂತ್ರಿ ಭಜನಲಾಲ ಶರ್ಮಾ ಅವರನ್ನು ಟ್ಯಾಗ್ ಮಾಡಿ ಕಾಂಗ್ರೆಸ್ ನಾಯಕ ಪವನ್ ಖೇರಾ ಪೋಸ್ಟ್‌ಮಾಡಿದ್ದಾರೆ. ಎಎಪಿ ತನ್ನ ಎಕ್ಸ್‌ಖಾತೆಯಲ್ಲಿ, ಪ್ರಧಾನಿ ನರೇಂದ್ರ ಮೋದಿಯವರನ್ನು ದೇಶದ ಶ್ರೇಷ್ಠ ನಟ. ಭೂತ, ವರ್ತಮಾನ ಅಥವಾ ಭವಿಷ್ಯದಲ್ಲಿ ಅವರನ್ನು ಮೀರಿಸಬಲ್ಲವರು ಯಾರೂ ಇಲ್ಲ ಎಂದು ಬಿಜೆಪಿ ಮುಖ್ಯಮಂತ್ರಿಗಳು ಮತ್ತು ನಾಯಕರು ಸ್ವತಃ ನಂಬುತ್ತಾರೆ ಎಂದು ಕಾಲೆಳೆದಿದೆ.
ಆದರೆ, ಬಿಜೆಪಿ ವಕ್ತಾರ ಲಕ್ಷ್ಮೀಕಾಂತ ಭಾರದ್ವಾಜ್, ಈ ಹೇಳಿಕೆಯನ್ನು ನಿರಾಕರಿಸಿದ್ದಾರೆ. ಭಜನಲಾಲ ಶರ್ಮಾ ಅವರಿಗೆ ನಿಮ್ಮ ನೆಚ್ಚಿನ ನಟರು ಯಾರು ಎಂದು ಕೇಳಿಲ್ಲ, ಅವರಿಗೆ ನಿಮ್ಮ ನೆಚ್ಚಿನ “ಹೀರೋ” ಯಾರೆಂದು ಕೇಳಲಾಯಿತು, ಅದಕ್ಕೆ ಅವರು ಉತ್ತರಿಸಿದ್ದಾರೆ ಎಂದು ಸ್ಪಷ್ಟನೆ ನೀಡಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ