ವೀಡಿಯೊ…| ಟಿವಿ ನೇರ ಪ್ರಸಾರ ಕಾರ್ಯಕ್ರಮದಲ್ಲಿ ಪಾಕಿಸ್ತಾನಕ್ಕೆ ಭಯೋತ್ಪಾದನೆ ಜೊತೆ ನಂಟಿತ್ತು ಎಂಬುದನ್ನು ಒಪ್ಪಿಕೊಂಡ ಪಾಕ್‌ ಸೆನೆಟರ್ ಶೆರ್ರಿ ರೆಹಮಾನ್

ಪಾಕಿಸ್ತಾನ ಪೀಪಲ್ಸ್ ಪಾರ್ಟಿ (ಪಿಪಿಪಿ) ಉಪಾಧ್ಯಕ್ಷೆ ಶೆರ್ರಿ ರೆಹಮಾನ್ ಅವರು ಅಲ್-ಖೈದಾಗೆ ಸಂಬಂಧಿಸಿದ ಬ್ರಿಗೇಡ್ 313 ಕುರಿತ ಪ್ರಶ್ನೆಗಳಿಗೆ ಪ್ರತಿಕ್ರಿಯಿಸುವಾಗ ಪಾಕಿಸ್ತಾನದ ಭೂತಕಾಲವು ಭಯೋತ್ಪಾದನೆ ಜೊತೆ ನಂಟು ಇತ್ತು ಎಂಬುದನ್ನು ಒಪ್ಪಿಕೊಂಡಿದ್ದಾರೆ.
.
“ನೀವು ಭೂತಕಾಲದ ಬಗ್ಗೆ ಮಾತನಾಡುತ್ತಲೇ ಇರುತ್ತೀರಿ ಏಕೆಂದರೆ ಅದು ಹಾಗೆ ಇತ್ತು” ಎಂದು ಅವರು ಸ್ಕೈ ನ್ಯೂಸ್ ಪತ್ರಕರ್ತೆ ಯಾಲ್ಡಾ ಹಕೀಮ್ ಅವರ ಪ್ರಶ್ನೆಗೆ ಉತ್ತರಿಸುವಾಗ ಅವರು ಹೇಳಿದ್ದಾರೆ. ಪಾಕಿಸ್ತಾನದ ಉಗ್ರಗಾಮಿ ಅಂಶಗಳನ್ನು ಆಶ್ರಯ ನೀಡಿದ ದಾಖಲೆಗಳ ಕುರಿತಾದ ಪ್ರಶ್ನೆಗಳಿಗೆ ಪ್ರತಿಕ್ರಿಯಿಸಿದ ಅವರು, “ನಾವು ಭಯೋತ್ಪಾದನೆಯ ವಿರುದ್ಧ ಹೋರಾಡುತ್ತಿದ್ದೇವೆ. ಪಾಕಿಸ್ತಾನ ಈಗ ಬದಲಾದ ದೇಶವಾಗಿದೆ ಎಂದು ಹೇಳಿದ್ದಾರೆ.

ಭಯೋತ್ಪಾದನಾ ಸಂಶೋಧನೆ ಮತ್ತು ವಿಶ್ಲೇಷಣಾ ಒಕ್ಕೂಟದ (TRAC) ಮಾಹಿತಿಗಳನ್ನು ಉಲ್ಲೇಖಿಸಿ ಯಾಲ್ಡಾ ಹಕೀಮ್ ಅವರು, ಬ್ರಿಗೇಡ್ 313 ಪಾಕಿಸ್ತಾನ ಮೂಲದ ಭಯೋತ್ಪಾದಕ ಸಂಘಟನೆಯಾಗಿದ್ದು, ತಾಲಿಬಾನ್, ಲಷ್ಕರ್-ಎ-ಜಾಂಗ್ವಿ ಮತ್ತು ಹರ್ಕತ್-ಉಲ್-ಜಿಹಾದ್-ಅಲ್-ಇಸ್ಲಾಮಿಯಂತಹ ಗುಂಪುಗಳ ಸದಸ್ಯರ ಜೊತೆ ಅಲ್-ಖೈದಾಕ್ಕೆ ಸಂಬಂಧಿಸಿದೆ ಎಂದು ಹೇಳಿದರು. “ಬ್ರಿಗೇಡ್ 313 ಪಾಕಿಸ್ತಾನದಲ್ಲಿ ಅಲ್-ಖೈದಾ ಆಗಿದೆ” ಎಂದು ಅವರು ಟಿಆರ್‌ಎಸಿ (TRAC) ಅನ್ನು ಉಲ್ಲೇಖಿಸಿ ಹೇಳಿದರು. “ಅವರು ಕಾಶ್ಮೀರದಲ್ಲಿ ನಡೆಯುವ ದಾಳಿಗಳ ಮೇಲೆ ಕೇಂದ್ರೀಕರಿಸುವ ಬೃಹತ್ ಭಯೋತ್ಪಾದಕ ಸಂಘಟನೆಯ ನಾಯಕರು, ಈ ಗುಂಪು “ಭಯೋತ್ಪಾದನೆಯ ಕೇಂದ್ರ” ಎಂದು ತಿಳಿದುಬಂದಿದೆ ಎಂದು ಯಾಲ್ಡಾ ಹಕೀಮ್ ಹೇಳಿದರು
ಇದಕ್ಕೆ ಪ್ರತಿಕ್ರಿಯಿಸಿದ ಪಾಕಿಸ್ತಾನದ ನಾಯಕಿ ಶೆರ್ರಿ ರೆಹಮಾನ್‌ ಅವರು, ಭಾರತದಲ್ಲಿ ಪದೇ ಪದೇ ದಾಳಿ ನಡೆಯುವುದಕ್ಕೆ, ವಿಶೇಷವಾಗಿ ಬ್ರಿಗೇಡ್ 313 ನಂತಹ ಗುಂಪುಗಳೊಂದಿಗೆ ಸಂಬಂಧ ಹೊಂದಿರುವ ದಾಳಿಗಳಿಗೆ ಪಾಕಿಸ್ತಾನವನ್ನು ಹೊಣೆಗಾರರನ್ನಾಗಿ ಮಾಡಬೇಕೇ ಎಂದು ಪ್ರಶ್ನಿಸಿದರು. “ಭಾರತದಲ್ಲಿ ದಾಳಿ ನಡೆದಾಗಲೆಲ್ಲಾ ನಾನು ಯುದ್ಧಕ್ಕೆ ಹೋಗುತ್ತೇನೆಯೇ?” ಎಂದು ರೆಹಮಾನ್ ಸ್ಪಷ್ಟವಾಗಿ ದಿಕ್ಕು ತಪ್ಪಿಸಲು ಯತ್ನಿಸಿದರು. “ಭಾರತದಲ್ಲಿ ನೂರು ದಂಗೆಗಳು ನಡೆಯುತ್ತವೆ. ಅಲ್ಲಿ ನಡೆಯುತ್ತಿರುವ ಘಟನೆಗಳಿಗೆ ನಾವು ಜವಾಬ್ದಾರರೇ? ಎಂದು ಅವರು ಪ್ರಶ್ನಿಸಿದರು.

2022 ರವರೆಗೆ ಪಾಕಿಸ್ತಾನವನ್ನು ಹಣಕಾಸು ಕ್ರಿಯಾ ಕಾರ್ಯಪಡೆ (FATF) ಬೂದು ಪಟ್ಟಿಗೆ ಸೇರಿಸಿದ್ದರ ಬಗ್ಗೆಯೂ ಸಂದರ್ಶನದಲ್ಲಿ ಚರ್ಚಿಸಲಾಯಿತು. 26/11 ಮುಂಬೈ ದಾಳಿಯ ಪ್ರಮುಖ ಸಂಚುಕೋರರಲ್ಲಿ ಒಬ್ಬರಾದ ಸಾಜಿದ್ ಮೀರ್ ನಂತಹ ವ್ಯಕ್ತಿಗಳು ಎಫ್‌ಎಟಿಎಫ್‌ ಬೂದು ಪಟ್ಟಿಯಿಂದ ಪಾಕಿಸ್ತಾನವು ಹೊರಬರಲು ವಿಳಂಬವಾಗುವುದಕ್ಕೆ ಪ್ರಮುಖ ಪಾತ್ರ ಹೊಂದಿದ್ದಾರೆಯೇ ಎಂದು ಯಾಲ್ಡಾ ಪ್ರಶ್ನಿಸಿದರು.
“ನೀವು ಒಂದಲ್ಲ ಒಂದು ರೀತಿಯಲ್ಲಿ ಭಯೋತ್ಪಾದನೆಯೊಂದಿಗೆ ತೊಡಗಿಸಿಕೊಂಡ ದೀರ್ಘ ಇತಿಹಾಸವನ್ನು ಉಲ್ಲೇಖಿಸುತ್ತಿದ್ದೀರಿ  ಎಂದು ಶೆರ್ರಿ ರೆಹಮಾನ್ ಪ್ರತಿಕ್ರಿಯಿಸಿದರು.

ಬ್ರಿಗೇಡ್ 313 …
2000ನೇ ದಶಕದ ಆರಂಭದಲ್ಲಿ ರೂಪುಗೊಂಡ ಬ್ರಿಗೇಡ್ 313ರ ನೇತೃತ್ವವನ್ನು ಪಾಕಿಸ್ತಾನದ ಸೇನೆಯಲ್ಲಿ ತರಬೇತಿ ಪಡೆದಿದ್ದ ಮಾಜಿ ಹೋರಾಟಗಾರ ಇಲ್ಯಾಸ್ ಕಾಶ್ಮೀರಿ ವಹಿಸಿದ್ದರು. 2011 ರ ಅಮೆರಿಕ ಡ್ರೋನ್ ದಾಳಿಯಲ್ಲಿ ಅವರು ಸಾವಿಗೀಡಾಗುವ ಮೊದಲು ಅಲ್-ಖೈದಾದ ಪ್ರಮುಖ ಕಮಾಂಡರ್‌ಗಳಲ್ಲಿ ಒಬ್ಬರಾಗಿದ್ದರು.
ಈ ಬ್ರಿಗೇಡ್ ಒಂದು ಹೈಬ್ರಿಡ್ ಒಕ್ಕೂಟವಾಗಿದ್ದು, ಲಷ್ಕರ್-ಎ-ತೈಬಾ, ಲಷ್ಕರ್-ಎ-ಜಾಂಗ್ವಿ, ಹರ್ಕತ್-ಉಲ್-ಜಿಹಾದ್ ಅಲ್-ಇಸ್ಲಾಮಿ (ಹುಜಿ), ಜೈಶ್-ಎ-ಮೊಹಮ್ಮದ್ ಮತ್ತು ಇತರ ಸಂಘಟನೆಗಳ ಭಯೋತ್ಪಾದಕರನ್ನು ಸೆಳೆಯುತ್ತಿದೆ. ಇದು ಅಲ್-ಖೈದಾದ ಆಶ್ರಯದಲ್ಲಿ ಕಾರ್ಯನಿರ್ವಹಿಸುತ್ತಿತ್ತು ಮತ್ತು ಆಗಾಗ್ಗೆ ಪಾಕಿಸ್ತಾನದ ತಾಲಿಬಾನ್ ಬಣಗಳ ಜೊತೆ ಸಹಕರಿಸುತ್ತಿತ್ತು.

ಕೆಲವರು ಇದನ್ನು ದಕ್ಷಿಣ ಏಷ್ಯಾದಲ್ಲಿ ಅಲ್-ಖೈದಾದ ಅತ್ಯಂತ “ಅಪಾಯಕಾರಿ ಮತ್ತು ಪರಿಣಾಮಕಾರಿ” ರಚನೆಗಳಲ್ಲಿ ಒಂದೆಂದು ಬಣ್ಣಿಸುತ್ತಾರೆ, ಪಾಕಿಸ್ತಾನದ ಹಿರಿಯ ಅಧಿಕಾರಿಗಳ ಹತ್ಯೆ, ಪಾಕಿಸ್ತಾನದಾದ್ಯಂತ ಬಾಂಬ್ ದಾಳಿಗಳನ್ನು ರೂಪಿಸುತ್ತದೆ.
ಬ್ರಿಗೇಡ್ 313 ಅನ್ನು ಸಾಮಾನ್ಯವಾಗಿ ಅಲ್-ಖೈದಾದ ಲಷ್ಕರ್ ಅಲ್-ಜಿಲ್ (“ನೆರಳು ಸೇನೆ”) ನ ಭಾಗವೆಂದು ವಿವರಿಸಲಾಗುತ್ತದೆ ಮತ್ತು ಕಾಶ್ಮೀರವನ್ನು ಗುರಿಯಾಗಿಟ್ಟುಕೊಂಡು ಬಾಂಬ್ ದಾಳಿಗಳು, ಹತ್ಯೆಗಳು ಮತ್ತು ಪಿತೂರಿಗಳು ಸೇರಿದಂತೆ ಉನ್ನತ ಮಟ್ಟದ ಭಯೋತ್ಪಾದಕ ದಾಳಿಗಳನ್ನು ನಡೆಸುತ್ತಿದೆ ಎಂದು ಆರೋಪಿಸಲಾಗಿದೆ.
ಇದಕ್ಕೂ ಮೊದಲು, ಪಾಕಿಸ್ತಾನದ ರಕ್ಷಣಾ ಸಚಿವ ಖವಾಜಾ ಆಸಿಫ್ ಅವರು, ಈ ಹಿಂದೆ ಭಯೋತ್ಪಾದಕ ಗುಂಪುಗಳನ್ನು ಬೆಂಬಲಿಸುವಲ್ಲಿ ದೇಶದ ಶಾಮೀಲಾಗಿದೆ ಎಂದು ಒಪ್ಪಿಕೊಂಡಿದ್ದರು. ಅವರು, “ನಾವು ಸುಮಾರು ಮೂರು ದಶಕಗಳಿಂದ ಅಮೆರಿಕ ಸಂಯುಕ್ತ ಸಂಸ್ಥಾನಕ್ಕಾಗಿ ಮತ್ತು ಬ್ರಿಟನ್ ಸೇರಿದಂತೆ ಪಶ್ಚಿಮ ದೇಶಗಳಿಗಾಗಿ ಈ ಕೊಳಕು ಕೆಲಸವನ್ನು ಮಾಡುತ್ತಿದ್ದೆವು ” ಎಂದು ಅವರು ಹೇಳಿದ್ದರು.