ಮತಭೇದ ಇರಬಹುದು… ಆದರೆ ಜಗಳವಿಲ್ಲ” : ಕೇಂದ್ರ ಸರ್ಕಾರದ ಜೊತೆಗಿನ ಸಂಬಂಧದ ಬಗ್ಗೆ ಆರ್‌ಎಸ್‌ಎಸ್ ಮುಖ್ಯಸ್ಥ

ನವದೆಹಲಿ: ರಾಷ್ಟ್ರೀಯ ಸ್ವಯಂಸೇವಕ ಸಂಘ(ಆರ್‌ಎಸ್‌ಎಸ್)ದ ಸರಸಂಘಚಾಲಕ ಮೋಹನ ಭಾಗವತ ಅವರು ಬಿಜೆಪಿ ಜೊತೆಗಿನ ಸಂಬಂಧದಲ್ಲಿ ಬಿಕ್ಕಟ್ಟುಗಳಿವೆ ಎಂಬ ಊಹಾಪೋಹಗಳನ್ನು ಗುರುವಾರ ತಳ್ಳಿಹಾಕಿದ್ದಾರೆ. ಬಿಜೆಪಿ ಜೊತೆಗೆ ಮತಭೇದ ಇರಬಹುದು, ಆದರೆ ಯಾವುದೇ ಜಗಳವಿಲ್ಲ ಎಂದು ಸ್ಪಷ್ಟಪಡಿಸಿದರು.
ಭಾಗವತ್ ದೆಹಲಿಯ ವಿಜ್ಞಾನ ಭವನದಲ್ಲಿ ‘ಆರ್‌ಎಸ್‌ಎಸ್ ಶತಮಾನೋತ್ಸವ ಉಪನ್ಯಾಸ ಸರಣಿ – 100 ವರ್ಷಗಳ ಸಂಘದ ಪಯಣ: ಹೊಸ ದಿಗಂತಗಳು’ ಕಾರ್ಯಕ್ರಮದ 3 ನೇ ದಿನದಂದು ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಅವರು, “ಕೆಲವು ಆಂತರಿಕ ವಿರೋಧಾಭಾಸಗಳನ್ನು ಹೊಂದಿರುವ ವ್ಯವಸ್ಥೆಗಳಿವೆ. ಕುರ್ಚಿಯಲ್ಲಿರುವ ವ್ಯಕ್ತಿ ನಮಗೆ 100% ಸಮ್ಮತ ಇದ್ದವರೇ ಇದ್ದರೂ ಸಹ, ಅವರು ಅದನ್ನು ಮಾಡಬೇಕಾದಾಗ ಇರುವ ಅಡೆತಡೆಗಳು ಏನೆಂಬುದು ಅವರಿಗೆ ತಿಳಿದಿರುತ್ತದೆ. ಅವರಿಗೆ ಅದನ್ನು ಮಾಡಲು ಸಾಧ್ಯವಾಗಬಹುದು ಅಥವಾ ಆಗದಿರಬಹುದು. ನಾವು ಅವರಿಗೆ ಆ ಸ್ವಾತಂತ್ರ್ಯವನ್ನು ನೀಡಬೇಕು. ಎಲ್ಲಿಯೂ ಯಾವುದೇ ಜಗಳವಿಲ್ಲ ಎಂದು ಮೋಹನ ಭಾಗವತ ಹೇಳಿದರು. ದೇಶದ ಗುರಿಗಳ ಕಡೆಗೆ ಕೆಲಸ ಮಾಡುವಾಗ ಮತಭೇದ (ಅಭಿಪ್ರಾಯದ ವ್ಯತ್ಯಾಸಗಳು) ಇರಬಹುದು, ಆದರೆ “ಮನಭೇದ (ಹೃದಯದಿಂದ ಹೃದಯಕ್ಕೆ ಭಿನ್ನಾಭಿಪ್ರಾಯಗಳು)” ಇಲ್ಲ ಎಂದು ಅವರು ಒತ್ತಿ ಹೇಳಿದರು.

“ಆರ್‌ಎಸ್‌ಎಸ್ ಬಿಜೆಪಿಗಾಗಿ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತದೆ ಎಂಬುದು ನಿಜವಲ್ಲ” ಎಂದು ಹೇಳಿದ ಅವರು, ಅನೇಕ ಕಡೆಯಿಂದ, ವಿಶೇಷವಾಗಿ ವಿಪಕ್ಷದೊಳಗೆ ಇರುವ ಕಲ್ಪನೆಗಳನ್ನು ತಳ್ಳಿಹಾಕಿದರು. “ನಮಗೆ ಕೇಂದ್ರ ಮತ್ತು ರಾಜ್ಯಗಳೊಂದಿಗೆ ಉತ್ತಮ ಸಮನ್ವಯವಿದೆ. ಆಂತರಿಕ ವಿರೋಧಾಭಾಸಗಳನ್ನು ಹೊಂದಿರುವ ವ್ಯವಸ್ಥೆಗಳಿವೆ… ಯಾವುದೇ ರೀತಿಯಲ್ಲಿ ಯಾವುದೇ ಜಗಳವಿಲ್ಲ… ಪ್ರತಿಯೊಂದು ಸರ್ಕಾರದೊಂದಿಗೆ ನಮಗೆ ಉತ್ತಮ ಸಮನ್ವಯವಿದೆ” ಎಂದು ಹೇಳಿದರು.
ನಿರ್ಧಾರ ತೆಗೆದುಕೊಳ್ಳುವಿಕೆಗೆ ಸಂಬಂಧಿಸಿದಂತೆ, ಆರ್‌ಎಸ್‌ಎಸ್ ಮತ್ತು ಬಿಜೆಪಿ ಯಾವಾಗಲೂ ಒಮ್ಮತಕ್ಕೆ ಬರುವುದಿಲ್ಲವಾದರೂ, ಆರ್‌ಎಸ್‌ಎಸ್ ತನ್ನ ಸದಸ್ಯರನ್ನು ನಂಬುತ್ತದೆ ಮತ್ತು ಒಂದು ಹಂತದಲ್ಲಿ ಅವರು “ಒಗ್ಗೂಡುತ್ತಾರೆ” ಎಂಬುದು ಸಕಾರಾತ್ಮಕವಾಗಿದೆ ಎಂದು ಭಾಗವತ ಹೇಳಿದರು.

ನಿರ್ಧಾರ ತೆಗೆದುಕೊಳ್ಳುವ ಪ್ರಕ್ರಿಯೆಯಲ್ಲಿ ಎಂದಿಗೂ ಹಸ್ತಕ್ಷೇಪ ಮಾಡುವುದಿಲ್ಲ. ನಾನು 50 ವರ್ಷಗಳಿಂದ ಶಾಖೆಯನ್ನು ನಡೆಸುತ್ತಿದ್ದೇನೆ. ಯಾರಾದರೂ ನನಗೆ ಸಲಹೆ ನೀಡಿದರೆ, ನಾನು ಕೇಳುತ್ತೇನೆ. ಆದರೆ ಪಕ್ಷವು ದೇಶವನ್ನು ನಡೆಸುತ್ತಿದೆ. ಅವರು ಅದರಲ್ಲಿ ಪರಿಣಿತರು. ನಾವು (ಆರ್‌ಎಸ್‌ಎಸ್) ಅಲ್ಲ” ಎಂದು ಅವರು ಹೇಳಿದರು. ಅವರ ಕ್ಷೇತ್ರದಲ್ಲಿ ನಿರ್ಧಾರ ಅವರದು, ಮತ್ತು ನಮ್ಮ ಕ್ಷೇತ್ರದಲ್ಲಿ ನಮ್ಮದು” ಎಂದು ಅವರು ಹೇಳಿದರು.
ಮತ್ತೊಂದು ಪ್ರಶ್ನೆಗೆ ಉತ್ತರಿಸುತ್ತ, ಭಾಗವತ್ ಅವರು, ಆರ್‌ಎಸ್‌ಎಸ್‌ (RSS) ಅನ್ನು ವಿರೋಧಿಸಿದವರು ತಮ್ಮ ನಿಲುವನ್ನು ಬದಲಾಯಿಸಿದ ಹಲವಾರು ನಿದರ್ಶನಗಳಿವೆ ಎಂದು ಹೇಳಿದರು. “ನಮ್ಮ ವಿರೋಧಿಗಳು ನಮ್ಮನ್ನು ಹೇಗೆ ನೋಡುತ್ತಾರೆ ಎಂಬುದರಲ್ಲಿ ನಾವು ಬದಲಾವಣೆಯನ್ನು ಕಾಣುತ್ತೇವೆ… ಜಯಪ್ರಕಾಶ ನಾರಾಯಣ ಅವರಿಂದ ಹಿಡಿದು ಪ್ರಣಬ್ ಮುಖರ್ಜಿಯವರೆಗೆ, ಜನರು ನಮ್ಮ ಬಗ್ಗೆ ತಮ್ಮ ಅಭಿಪ್ರಾಯಗಳನ್ನು ಬದಲಾಯಿಸಿಕೊಂಡಿದ್ದಾರೆ” ಎಂದು ಅವರು ಹೇಳಿದರು.