ನವದೆಹಲಿ: ಭ್ರಷ್ಟಾಚಾರ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪಂಜಾಬ್ನ ರೋಪರ್ ವಿಭಾಗದ (Ropar Range) ಡಿಐಜಿ ಆಗಿ ನಿಯೋಜಿಸಲಾಗಿದ್ದ ಹಿರಿಯ ಐಪಿಎಸ್ ಅಧಿಕಾರಿಯನ್ನು ಕೇಂದ್ರೀಯ ತನಿಖಾ ದಳ (ಸಿಬಿಐ) ಬಂಧಿಸಿದೆ. ಆರಂಭದಲ್ಲಿ ₹ 8 ಲಕ್ಷ ಲಂಚದ ಬೇಡಿಕೆಯೊಂದಿಗೆ ಪ್ರಾರಂಭವಾದ ಈ ಪ್ರಕರಣದಲ್ಲಿ, ₹ 5 ಕೋಟಿಗೂ ಹೆಚ್ಚು ನಗದು, ಐಷಾರಾಮಿ ವಾಹನಗಳು, ಆಭರಣ ಮತ್ತು ಅತ್ಯಾಧುನಿಕ ಕೈಗಡಿಯಾರಗಳು ಸೇರಿದಂತೆ ಅಪಾರ ಪ್ರಮಾಣದ ಅಕ್ರಮ ಆಸ್ತಿಗಳಿರುವುದು ಬಯಲಾಗಿವೆ.
2009ರ ಬ್ಯಾಚ್ನ ಐಪಿಎಸ್ ಅಧಿಕಾರಿ ಡಿಐಜಿ ಹರಚರಣ್ ಸಿಂಗ್ ಭುಲ್ಲರ್ ಅವರನ್ನು ಮತ್ತು ಅವರ ಮಧ್ಯವರ್ತಿ ಎಂದು ಹೇಳಲಾದ ಕೃಷ್ಣ ಎಂಬ ಖಾಸಗಿ ವ್ಯಕ್ತಿಯನ್ನು ಸಿಬಿಐ ಬಂಧಿಸಿದೆ. ಸ್ಥಳೀಯ ಉದ್ಯಮಿಯೊಬ್ಬರ ವಿರುದ್ಧ ದಾಖಲಾಗಿದ್ದ ಕ್ರಿಮಿನಲ್ ಪ್ರಕರಣವನ್ನು “ಬಗೆಹರಿಸಲು” ಈ ಮಧ್ಯವರ್ತಿಯ ಮೂಲಕ ಹಿರಿಯ ಪೊಲೀಸ್ ಅಧಿಕಾರಿ ಹರಚರಣ್ ಸಿಂಗ್ ಭುಲ್ಲರ್ ಲಂಚದ ಬೇಡಿಕೆ ಇಡುತ್ತಿದ್ದರು ಮತ್ತು ಸ್ವೀಕರಿಸುತ್ತಿದ್ದರು, ಹಾಗೂ ಪ್ರತಿ ತಿಂಗಳು ಹಣ ನೀಡುವಂತೆ ಒತ್ತಾಯಿಸುತ್ತಿದ್ದರು ಎಂದು ಸಿಬಿಐ ಹೇಳಿದೆ.
ದೂರು ಮತ್ತು ಕಾರ್ಯಾಚರಣೆ
ಪಂಜಾಬ್ನ ಫತೇಗಢ್ ಸಾಹಿಬ್ನ ಆಕಾಶ ಬಟ್ಟಾ ಎಂಬ ಸ್ಕ್ರ್ಯಾಪ್ ಡೀಲರ್ ಐದು ದಿನಗಳ ಹಿಂದೆ ನೀಡಿದ ಲಿಖಿತ ದೂರಿನ ಮೇರೆಗೆ ಸಿಬಿಐ ಗುರುವಾರ ಪ್ರಕರಣ ದಾಖಲಿಸಿದೆ. ಡಿಐಜಿ ಭುಲ್ಲರ್ ಸ್ಕ್ರ್ಯಾಪ್ ಡೀಲರ್ ಅವರಿಗೆ ಅವರ ವ್ಯವಹಾರಕ್ಕೆ ಸಂಬಂಧಿಸಿದ ಸುಳ್ಳು ಪ್ರಕರಣದಲ್ಲಿ ಸಿಲುಕಿಸುವ ಬೆದರಿಕೆ ಹಾಕುತ್ತಿದ್ದರು. ಇದನ್ನು ತಪ್ಪಿಸಲು, ಆರಂಭಿಕವಾಗಿ ₹ 8 ಲಕ್ಷ ಲಂಚ ಹಾಗೂ ನಂತರ ಪ್ರತಿ ತಿಂಗಳು ಹಣ ನೀಡುವಂತೆ ಒತ್ತಾಯಿಸುತ್ತಿದ್ದರು ಎಂದು ದೂರುದಾರರು ಆರೋಪಿಸಿದ್ದರು.
ಸಿಬಿಐನ ಪ್ರಥಮ ಮಾಹಿತಿ ವರದಿ (ಎಫ್ಐಆರ್) ಪ್ರಕಾರ, ಡಿಐಜಿ ಭುಲ್ಲರ್ ತಮ್ಮ ಸಹವರ್ತಿ ಕೃಷ್ಣನ ಮೂಲಕ ಹಣವನ್ನು ನೀಡುವಂತೆ ಬೇಡಿಕೆ ಇಟ್ಟಿದ್ದರು. ಕೃಷ್ಣ ದೂರುದಾರರಿಗೆ “ಆಗಸ್ಟ್ ತಿಂಗಳ ಹಣ ಪಾವತಿಯಾಗಿಲ್ಲ, ಸೆಪ್ಟೆಂಬರ್ ತಿಂಗಳ ಹಣ ಪಾವತಿಯಾಗಿಲ್ಲ” ಎಂದು ಹಣ ನೀಡುವಂತೆ ಒತ್ತಾಯಿಸಿದ್ದ ಎಂದು ತನಿಖಾ ಸಂಸ್ಥೆ ತಿಳಿಸಿದೆ.
ಪ್ರಾಥಮಿಕ ಪರಿಶೀಲನೆಯ ನಂತರ, ಸಿಬಿಐ ಚಂಡೀಗಢದ ಸೆಕ್ಟರ್ 21ರಲ್ಲಿ ಜಾಲವನ್ನು (trap) ಹೆಣೆದಿತ್ತು. ಈ ಕಾರ್ಯಾಚರಣೆಯ ಸಮಯದಲ್ಲಿ, ಡಿಐಜಿ ಪರವಾಗಿ ದೂರುದಾರರಿಂದ ₹ 8 ಲಕ್ಷ ಸ್ವೀಕರಿಸುವಾಗ ಮಧ್ಯವರ್ತಿ ಕೃಷ್ಣ ಸಿಕ್ಕಿಬಿದ್ದಿದ್ದಾನೆ. ಹಣದ ವಹಿವಾಟು ಆದ ತಕ್ಷಣ, ದೂರುದಾರರು ಮತ್ತು ಡಿಐಜಿ ನಡುವೆ ನಿಯಂತ್ರಿತ ಕರೆಯನ್ನು ಏರ್ಪಡಿಸಲಾಯಿತು. ಈ ಕರೆಯಲ್ಲಿ, ಅಧಿಕಾರಿ ಹಣ ಸ್ವೀಕರಿಸಿದ್ದನ್ನು ಒಪ್ಪಿಕೊಂಡಿದ್ದಾರೆ ಮತ್ತು ಇಬ್ಬರೂ ತಮ್ಮ ಕಚೇರಿಗೆ ಬರುವಂತೆ ಸೂಚಿಸಿದ್ದಾರೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ನಂತರ, ಈ ಸಾಕ್ಷ್ಯದ ಆಧಾರದ ಮೇಲೆ, ಸಿಬಿಐ ತಂಡವು ಡಿಐಜಿ ಭುಲ್ಲರ್ ಅವರನ್ನು ಮೊಹಾಲಿಯಲ್ಲಿರುವ ಅವರ ಕಚೇರಿಯಲ್ಲಿ ಪತ್ತೆ ಮಾಡಿ, ಇಬ್ಬರು ಆರೋಪಿಗಳನ್ನು ಔಪಚಾರಿಕವಾಗಿ ಬಂಧಿಸಿತು.
ವಶಪಡಿಸಿಕೊಂಡ ವಸ್ತುಗಳು
ಬಂಧನದ ನಂತರ, ಸಿಬಿಐ ರೋಪರ್, ಮೊಹಾಲಿ ಮತ್ತು ಚಂಡೀಗಢದಲ್ಲಿ ಭುಲ್ಲರ್ ಅವರಿಗೆ ಸಂಬಂಧಿಸಿದ ಅನೇಕ ಸ್ಥಳಗಳಲ್ಲಿ ವ್ಯಾಪಕ ಶೋಧ ನಡೆಸಿತು. ವಶಪಡಿಸಿಕೊಂಡ ವಸ್ತುಗಳಲ್ಲಿ ಇವು ಸೇರಿವೆ:
ಸುಮಾರು ₹ 5 ಕೋಟಿ ನಗದು (ಎಣಿಕೆ ಇನ್ನೂ ಮುಂದುವರಿದಿದೆ)
1.5 ಕೆಜಿ ಚಿನ್ನ ಮತ್ತು ಆಭರಣಗಳು
ಪಂಜಾಬ್ನಾದ್ಯಂತ ಇರುವ ಸ್ಥಿರಾಸ್ತಿಗಳಿಗೆ ಸಂಬಂಧಿಸಿದ ದಾಖಲೆಗಳು
ಎರಡು ಐಷಾರಾಮಿ ವಾಹನಗಳ ಕೀಲಿಗಳು (ಮರ್ಸಿಡಿಸ್ ಮತ್ತು ಆಡಿ)
22 ಅತ್ಯಾಧುನಿಕ ಕೈಗಡಿಯಾರಗಳು
ಲಾಕರ್ ಕೀಲಿಗಳು ಮತ್ತು 40 ಲೀಟರ್ ಆಮದು ಮಾಡಿದ ಮದ್ಯ
ಎರಡು ನಳಿಕೆಗಳ ಬಂದೂಕು (double-barrel shotgun), ಪಿಸ್ತೂಲ್, ರಿವಾಲ್ವರ್, ಮತ್ತು ಏರ್ಗನ್ ಸೇರಿದಂತೆ ಬಂದೂಕುಗಳು ಮತ್ತು ಮದ್ದುಗುಂಡುಗಳು
ಆರೋಪಿತ ಮಧ್ಯವರ್ತಿ ಕೃಷ್ಣ ನಿವಾಸದಿಂದ ಸಿಬಿಐ ಹೆಚ್ಚುವರಿಯಾಗಿ ₹ 21 ಲಕ್ಷ ನಗದನ್ನು ವಶಪಡಿಸಿಕೊಂಡಿದೆ.
ಭುಲ್ಲರ್ ಮತ್ತು ಕೃಷ್ಣ ಇಬ್ಬರನ್ನೂ ಶುಕ್ರವಾರ ನ್ಯಾಯಾಲಯದ ಮುಂದೆ ಹಾಜರುಪಡಿಸಲಾಗುವುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಆಸ್ತಿಯ ಸಂಪೂರ್ಣ ವಿವರ ಮತ್ತು ಹಣ ವರ್ಗಾವಣೆಯ (money laundering) ಸಾಧ್ಯತೆಗಳನ್ನು ನಿರ್ಧರಿಸಲು ಹೆಚ್ಚಿನ ಶೋಧ ಮತ್ತು ತನಿಖೆ ಮುಂದುವರಿದಿದೆ.
2009ರ ಬ್ಯಾಚ್ನ ಐಪಿಎಸ್ ಅಧಿಕಾರಿಯಾಗಿರುವ ಭುಲ್ಲರ್ ಪಟಿಯಾಲಾ ಶ್ರೇಣಿಯ ಡಿಐಜಿ, ಜಾಗೃತ ದಳದ ಜಂಟಿ ನಿರ್ದೇಶಕ ಮತ್ತು ಮೊಹಾಲಿ, ಸಂಗ್ರೂರ್, ಖನ್ನಾ, ಹೋಶಿಯಾರ್ಪುರ್, ಫತೇಗಢ್ ಸಾಹಿಬ್ ಮತ್ತು ಗುರುದಾಸ್ಪುರ್ನಲ್ಲಿ ಹಿರಿಯ ಪೊಲೀಸ್ ಅಧೀಕ್ಷಕ (ಎಸ್ಎಸ್ಪಿ) ಸೇರಿದಂತೆ ಹಲವಾರು ಪ್ರಮುಖ ಹುದ್ದೆಗಳನ್ನು ನಿರ್ವಹಿಸಿದ್ದಾರೆ.
2021ರಲ್ಲಿ, ಶಿರೋಮಣಿ ಅಕಾಲಿದಳ (SAD) ನಾಯಕ ಬಿಕ್ರಮ್ ಸಿಂಗ್ ಮಜಿಥಿಯಾ ವಿರುದ್ಧದ ಉನ್ನತ ಮಟ್ಟದ ಮಾದಕವಸ್ತು ಕಳ್ಳಸಾಗಣೆ ಪ್ರಕರಣವನ್ನು ತನಿಖೆ ಮಾಡಿದ ವಿಶೇಷ ತನಿಖಾ ತಂಡದ (SIT) ನೇತೃತ್ವವನ್ನು ಭುಲ್ಲರ್ ವಹಿಸಿದ್ದರು. ರಾಜ್ಯದಾದ್ಯಂತ ಮಾದಕವಸ್ತು ಜಾಲಗಳನ್ನು ಭೇದಿಸಲು ಪ್ರಾರಂಭಿಸಲಾದ ಪಂಜಾಬ್ ಸರ್ಕಾರದ ಮಾದಕವಸ್ತು ವಿರೋಧಿ ಅಭಿಯಾನದಲ್ಲಿ ಪ್ರಮುಖವಾಗಿ ಸೇವೆ ಸಲ್ಲಿಸಿದ್ದರು.
ಭುಲ್ಲರ್ ಅವರು ನವೆಂಬರ್ 2024ರಲ್ಲಿ ರೋಪರ ಡಿಐಜಿ ಆಗಿ ಅಧಿಕಾರ ವಹಿಸಿಕೊಂಡಿದ್ದರು.
ನಿಮ್ಮ ಕಾಮೆಂಟ್ ಬರೆಯಿರಿ