ಮುಂಬೈ: ಬಾಬಾ ಅಣು ಸಂಶೋಧನಾ ಕೇಂದ್ರದ (BARC) ವಿಜ್ಞಾನಿ ಎಂದು ನಟಿಸಿ ಇರಾನ್‌ನಲ್ಲಿರುವ ಕಂಪನಿಗಳಿಗೆ ಪರಮಾಣು ಸಂಬಂಧಿತ ವಿನ್ಯಾಸವನ್ನು “ವೈಜ್ಞಾನಿಕ ಸಹಯೋಗ” ಮತ್ತು “ಸಂಶೋಧನಾ ಸಹಭಾಗಿತ್ವ”ದ ನೆಪದಲ್ಲಿ ಮಾರಾಟ ಮಾಡಲು ಯತ್ನಿಸುತ್ತಿದ್ದ 60 ವರ್ಷದ ವ್ಯಕ್ತಿಯನ್ನು ಮುಂಬೈ ಪೊಲೀಸರು ಬಂಧಿಸಿದ್ದಾರೆ. ಈತನ ಸಹೋದರನನ್ನೂ ಸಹ ಬಂಧಿಸಲಾಗಿದೆ.
ತನಿಖಾ ಸಂಸ್ಥೆಯ ಮೂಲಗಳ ಪ್ರಕಾರ, ಅಖ್ತರ್ ಹುಸೇನಿ ಕುತ್ಬುದ್ದೀನ್ ಅಹ್ಮದ್ ಮತ್ತು ಆತನ ಸಹೋದರ ಆದಿಲ್ ಹುಸೇನಿ (59) ಇಬ್ಬರೂ ಸೇರಿ ಲಿಥಿಯಂ-6 ರಿಯಾಕ್ಟರ್‌ಗೆ ಸಂಬಂಧಿಸಿದ ವಿನ್ಯಾಸವನ್ನು VPN ಗಳು ಮತ್ತು ಎನ್‌ಕ್ರಿಪ್ಟ್ ಮಾಡಿದ ನೆಟ್‌ವರ್ಕ್‌ಗಳ ಮೂಲಕ ಮಾರಾಟ ಮಾಡಲು ಪ್ರಯತ್ನಿಸುತ್ತಿದ್ದರು ಎಂದು ಆರೋಪಿಸಲಾಗಿದೆ.
ಆರೋಪಿಗಳಿಬ್ಬರು ಮಾರ್ಚ್ ಮತ್ತು ಏಪ್ರಿಲ್ ತಿಂಗಳಲ್ಲಿ ತೆಹ್ರಾನ್‌ಗೆ ಭೇಟಿ ನೀಡಿದ್ದರು ಮತ್ತು ಭಾರತ ಹಾಗೂ ದುಬೈನಲ್ಲಿರುವ ಇರಾನ್ ರಾಯಭಾರ ಕಚೇರಿಗಳಿಗೂ ಹಲವು ಬಾರಿ ಭೇಟಿ ನೀಡಿದ್ದರು.
ಮುಂಬೈ ಮೂಲದ ಇರಾನ್‌ನ ರಾಜತಾಂತ್ರಿಕರೊಬ್ಬರಿಗೆ ಸಹ ಹಿರಿಯ ಬಾರ್ಕ್‌ (BARC) ವಿಜ್ಞಾನಿ ಎಂದು ನಟಿಸಿ ವಂಚಿಸಿದ್ದರು. ನಕಲಿ ವಿವರಗಳು ಮತ್ತು ರಿಯಾಕ್ಟರ್ ವಿನ್ಯಾಸಗಳನ್ನು ನೀಡಿ ರಾಜತಾಂತ್ರಿಕರನ್ನು ವಂಚಿಸಲಾಗಿದೆ ಎಂದು ಮೂಲಗಳು ತಿಳಿಸಿವೆ.
‘ಫ್ಯೂಷನ್ ಬ್ರೇಕ್‌ಥ್ರೂ’ ಎಂಬ ಸುಳ್ಳು ಹೇಳಿಕೆ
ಲಿಥಿಯಂ-6 ಆಧಾರಿತ ಫ್ಯೂಷನ್ ರಿಯಾಕ್ಟರ್ ಟ್ರಿಟಿಯಮ್ ಇಂಧನವನ್ನು ಉತ್ಪಾದಿಸುತ್ತದೆ ಮತ್ತು ಫ್ಯೂಷನ್ ಕ್ರಿಯೆಯಿಂದ ಉಷ್ಣತೆಯನ್ನು ತೆಗೆದುಹಾಕಲು ಕರಗಿದ ಲಿಥಿಯಂ ಅನ್ನು ಬಳಸುತ್ತದೆ.
ಆರೋಪಿಗಳು, ಪ್ಲಾಸ್ಮಾ ತಾಪಮಾನವನ್ನು ನಿಯಂತ್ರಿಸಲು ಲಿಥಿಯಂ-6 ಆಧಾರಿತ ಫ್ಯೂಷನ್ ರಿಯಾಕ್ಟರ್‌ನ ಪ್ರೋಟೋಟೈಪ್ ಅನ್ನು ಅಭಿವೃದ್ಧಿಪಡಿಸಿದ್ದೇವೆ ಎಂದು ಇರಾನ್ ಕಂಪನಿಗಳ ಮುಂದೆ ಹೇಳಿಕೊಂಡಿದ್ದರು. ಲಿಥಿಯಂ-7 ಬಳಸಿದ ರಿಯಾಕ್ಟರ್ ಅನ್ನು ಪರೀಕ್ಷಿಸಿದ್ದೇವೆ, ಆದರೆ “ಪ್ಲಾಸ್ಮಾ ತಾಪನ ವೈಫಲ್ಯ”ದಿಂದ ಅದು ವಿಫಲವಾಗಿದೆ ಎಂದು ಸಹ ಹೇಳಿದ್ದರು.
ಆದರೆ, ತನಿಖೆಗೆ ಸಂಬಂಧಿಸಿದ ವಿಜ್ಞಾನಿಗಳ ಪ್ರಕಾರ, ಆರೋಪಿಗಳು ಉಲ್ಲೇಖಿಸಿದ ಪ್ರೋಟೋಟೈಪ್ ಸೈದ್ಧಾಂತಿಕವಾಗಿ ರಚಿಸಲ್ಪಟ್ಟಿದ್ದರೂ, ಅದು ಕಾರ್ಯನಿರ್ವಹಿಸುತ್ತದೆ ಎಂದು ಸಾಬೀತುಪಡಿಸಲು ಯಾವುದೇ ವೈಜ್ಞಾನಿಕ ಪುರಾವೆಗಳಿಲ್ಲ. ಲಿಥಿಯಂ-7 ಯಾವುದೇ ಫ್ಯೂಷನ್‌ಗೆ ಸೂಕ್ತವಲ್ಲ.
ತನಿಖಾಧಿಕಾರಿಗಳಿಗೆ ಗೊಂದಲ ಸೃಷ್ಟಿಸಲು ಯತ್ನ
ಆರೋಪಿಗಳಿಬ್ಬರೂ ತನಿಖಾಧಿಕಾರಿಗಳನ್ನು ಗೊಂದಲಗೊಳಿಸಲು ನ್ಯೂಕ್ಲಿಯರ್ ರಿಯಾಕ್ಟರ್ ಭೌತಶಾಸ್ತ್ರ, ಐಸೋಟೋಪ್ ರಸಾಯನಶಾಸ್ತ್ರ ಮತ್ತು ಪ್ಲಾಸ್ಮಾ ಡೈನಾಮಿಕ್ಸ್ ನಂತಹ ಸಂಕೀರ್ಣ ವೈಜ್ಞಾನಿಕ ಪದಗಳನ್ನು ಬಳಸಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಅವರ ಹೇಳಿಕೆಗಳ ತಾಂತ್ರಿಕ ವಿವರಗಳನ್ನು ಅರ್ಥಮಾಡಿಕೊಳ್ಳಲು ತನಿಖೆಯಲ್ಲಿ ಪ್ಲಾಸ್ಮಾ ಭೌತಶಾಸ್ತ್ರ ಮತ್ತು ಪರಮಾಣು ಎಂಜಿನಿಯರಿಂಗ್ ತಜ್ಞರನ್ನು ನೇಮಿಸಿಕೊಳ್ಳಲಾಗಿತ್ತು.
ಜಾರ್ಖಂಡ್‌ನ ಜಮ್ಶೆಡ್‌ಪುರದ ನಿವಾಸಿ ಅಖ್ತರ್ ನನ್ನು ಮುಂಬೈ ಪೊಲೀಸರು ಬಂಧಿಸಿದ್ದು, ಆತನ ಸಹೋದರನನ್ನು ದೆಹಲಿ ಪೊಲೀಸರು ಬಂಧಿಸಿದ್ದಾರೆ. ಅಖ್ತರ್‌ನಿಂದ 10 ಕ್ಕೂ ಹೆಚ್ಚು ನಕ್ಷೆಗಳು ಮತ್ತು ಪರಮಾಣು ಶಸ್ತ್ರಾಸ್ತ್ರಗಳಿಗೆ ಸಂಬಂಧಿಸಿದ ಡೇಟಾವನ್ನು ವಶಪಡಿಸಿಕೊಳ್ಳಲಾಗಿದೆ.
ಆತನಿಂದ ಹಲವಾರು ನಕಲಿ ಪಾಸ್‌ಪೋರ್ಟ್‌ಗಳು, ಆಧಾರ್ ಮತ್ತು ಪ್ಯಾನ್ ಕಾರ್ಡ್‌ಗಳು ಮತ್ತು ನಕಲಿ BARC ಐಡಿಯನ್ನು ಸಹ ವಶಪಡಿಸಿಕೊಳ್ಳಲಾಗಿದೆ. ಈತ ಅಲಿ ರಜಾ ಹುಸೇನ್ ಮತ್ತು ಅಲೆಕ್ಸಾಂಡರ್ ಪಾಮರ್ ಎಂಬ ನಕಲಿ ಹೆಸರುಗಳನ್ನು ಸಹ ಬಳಸುತ್ತಿದ್ದನು ಎಂದು ಹೇಳಲಾಗಿದೆ.
ಪೊಲೀಸರ ಪ್ರಕಾರ, ಈ ಸಹೋದರರು 1995 ರಿಂದಲೇ ವಿದೇಶಿ ನಿಧಿಯನ್ನು ಪಡೆಯಲು ಪ್ರಾರಂಭಿಸಿದ್ದರು. ಆರಂಭದಲ್ಲಿ ಲಕ್ಷಗಳಲ್ಲಿ ಪಾವತಿಸಲಾಗುತ್ತಿತ್ತು, ಆದರೆ 2000 ರ ನಂತರ ಕೋಟಿಗಟ್ಟಲೆ ಹಣವನ್ನು ನೀಡಲಾಗುತ್ತಿತ್ತು. BARC ಮತ್ತು ಇತರ ಪರಮಾಣು ಸ್ಥಾವರಗಳಿಗೆ ಸಂಬಂಧಿಸಿದ ರಹಸ್ಯ ನೀಲನಕ್ಷೆಗಳಿಗಾಗಿ ಈ ಹಣವನ್ನು ಪಾವತಿಸಲಾಗಿದೆ ಎಂದು ಶಂಕಿಸಲಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ