ದಕ್ಷಿಣ ಭಾರತದ ಖ್ಯಾತ ನಟಿ ಸಮಂತಾ ರುತ್ ಪ್ರಭು ಅವರು ಇಂದು (ಡಿಸೆಂಬರ್‌ 1) ಬೆಳಗ್ಗೆ ಕೋಯಂಬತ್ತೂರಿನ ಇಶಾ ಯೋಗ ಕೇಂದ್ರದಲ್ಲಿ ನಿರ್ದೇಶಕ ರಾಜ ನಿಡಿಮೋರು ಅವರೊಂದಿಗೆ ಖಾಸಗಿ ಸಮಾರಂಭದಲ್ಲಿ ವಿವಾಹವಾಗಿದ್ದಾರೆ ಎಂದು ವರದಿಯಾಗಿದೆ.
ವಿವಾಹದ ದಿನಾಂಕವನ್ನು ಶೀರ್ಷಿಕೆಯನ್ನಾಗಿ ಬಳಸಿ, ತಮ್ಮ ಇನ್‌ಸ್ಟಾಗ್ರಾಮ್ ಪುಟದಲ್ಲಿ ಸಮಾರಂಭದ ಸುಂದರ ಚಿತ್ರಗಳನ್ನು ನಟಿ ಹಂಚಿಕೊಂಡಿದ್ದಾರೆ. ಕೇಂದ್ರದ ಒಳಗಿರುವ ಲಿಂಗ ಭೈರವಿ ದೇಗುಲದಲ್ಲಿ ನಡೆದ ಈ ವಿವಾಹಕ್ಕೆ ಆಯ್ದ ಆಪ್ತ ಸ್ನೇಹಿತರು ಮತ್ತು ಕುಟುಂಬ ಸದಸ್ಯರು ಮಾತ್ರ ಹಾಜರಿದ್ದರು ಎಂದು ಹೇಳಲಾಗಿದೆ.
ಸಮಂತಾ ತಮ್ಮ ವಿಶೇಷ ದಿನಕ್ಕಾಗಿ ಕೆಂಪು ಸೀರೆಯನ್ನು ಧರಿಸಿದ್ದರು. ರಾಜ ನಿಡಿಮೋರು ಅವರು ಬಿಳಿ ಕುರ್ತಾ-ಪೈಜಾಮಾ ಮತ್ತು ಕೆನೆ ಬಣ್ಣದ ಬಂದ್‌ಗಲಾ ಧರಿಸಿದ್ದರು. ಚಿನ್ನ ಹಾಗೂ ವಜ್ರದ ಆಭರಣಗಳನ್ನು ಧರಿಸಿ ಸಮಂತಾ ವಿವಾಹದಲ್ಲಿ ಸಾಂಪ್ರದಾಯಿಕ ಮದುವೆ ಧಿರಿಗಳನ್ನು ಧರಿಸಿದ್ದರು.
ಇಬ್ಬರೂ ಲಿಂಗ ಭೈರವಿ ದೇವಿಯ ಸನ್ನಿಧಿಯಲ್ಲಿ ‘ಭೂತ ಶುದ್ಧಿ ವಿವಾಹ’ ವಿಧಿಯನ್ನು ನೆರವೇರಿಸಿದರು. ಈ ವಿಧಿಯು ದಂಪತಿಯೊಳಗೆ ಮತ್ತು ಅವರ ಬಂಧದಲ್ಲಿರುವ ಪಂಚಭೂತಗಳನ್ನು ಶುದ್ಧೀಕರಿಸಿ, ದೇವಿಯ ಅನುಗ್ರಹವನ್ನು ಆಹ್ವಾನಿಸುತ್ತದೆ. ಇದು ಅವರ ವೈವಾಹಿಕ ಜೀವನದಲ್ಲಿ ಸಾಮರಸ್ಯ, ಸಮೃದ್ಧಿ ಮತ್ತು ಆಧ್ಯಾತ್ಮಿಕ ಹೊಂದಾಣಿಕೆಗಾಗಿ ಆಶೀರ್ವಾದವನ್ನು ತರುತ್ತದೆ ಎಂದು ನಂಬಲಾಗಿದೆ.
ಕೇವಲ 30 ಅತಿಥಿಗಳು
ಭಾನುವಾರ ರಾತ್ರಿಯೇ ವಿವಾಹದ ಬಗ್ಗೆ ಊಹಾಪೋಹಗಳು ಶುರುವಾಗಿದ್ದವು. ಆದರೆ, ಈ ಸಮಾರಂಭಕ್ಕೆ ಸುಮಾರು 30 ಜನರಿಗೆ ಮಾತ್ರ ಆಹ್ವಾನ ನೀಡಲಾಗಿತ್ತು. ಅತ್ಯಂತ ಗೌಪ್ಯವಾಗಿ ಮತ್ತು ಸರಳವಾಗಿ ವಿವಾಹ ಕಾರ್ಯಕ್ರಮಗಳು ನೆರವೇರಿದವು.
ಸಮಂತಾ ಮತ್ತು ರಾಜ ನಿಡಿಮೋರು ಕಳೆದ ಕೆಲವು ವರ್ಷಗಳಿಂದ ಪ್ರೇಮ ಬಂಧನದಲ್ಲಿದ್ದರು. ಕಳೆದ ಒಂದು ವರ್ಷದಿಂದ ಸಮಂತಾ ತಮ್ಮ ಸಾಮಾಜಿಕ ಜಾಲತಾಣಗಳಲ್ಲಿ ರಾಜ ಅವರೊಂದಿಗೆ ಹಲವು ಫೋಟೋಗಳನ್ನು ಹಂಚಿಕೊಳ್ಳುವ ಮೂಲಕ ಅವರ ಸಂಬಂಧದ ಬಗ್ಗೆ ವದಂತಿಗಳಿಗೆ ಇಂಬು ನೀಡಿದ್ದರು.
ಹಿಂದಿನ ವೈವಾಹಿಕ ಜೀವನ..
ಸಮಂತಾ ಈ ಹಿಂದೆ ನಟ ನಾಗ ಚೈತನ್ಯ ಅವರನ್ನು ವಿವಾಹವಾಗಿದ್ದರು. ನಾಲ್ಕು ವರ್ಷಗಳ ನಂತರ ಅವರು ವಿಚ್ಛೇದನ ಪಡೆದರು. ನಂತರ ನಾಗ ಚೈತನ್ಯ ಅವರು ನಟಿ ಶೋಭಿತಾ ಧೂಳಿಪಾಲ ಅವರನ್ನು ವಿವಾಹವಾದರು. ರಾಜ ನಿಡಿಮೋರು ಅವರು 2022ರಲ್ಲಿ ಎಸ್. ಶ್ಯಾಮಲಿ ಡೇ ಅವರೊಂದಿಗೆ ವಿಚ್ಛೇದನ ಪಡೆದಿದ್ದರು ಎಂದು ವರದಿಯಾಗಿದೆ.
2024 ರ ಆರಂಭದಲ್ಲಿ ಸಮಂತಾ ಮತ್ತು ರಾಜ ನಿಡಿಮೋರು ಅವರ ನಿಕಟ ಒಡನಾಟದ ವರದಿಗಳು ಹೊರಬಿದ್ದಿದ್ದವು. ಇಬ್ಬರೂ ‘ದಿ ಫ್ಯಾಮಿಲಿ ಮ್ಯಾನ್ 2’, ‘ಸಿಟಾಡೆಲ್: ಹನಿ ಬನ್ನಿ’ ಮತ್ತು ಮುಂಬರುವ ‘ರಕ್ತ ಬ್ರಹ್ಮಾಂಡ’ ಚಿತ್ರಗಳಲ್ಲಿ ಒಟ್ಟಿಗೆ ಕೆಲಸ ಮಾಡಿದ್ದಾರೆ. ಸಮಂತಾ ಅವರ ಚೊಚ್ಚಲ ನಿರ್ಮಾಣ ಸಂಸ್ಥೆಯಾದ ‘ಶುಭಂ’ ಗೆ ರಾಜ ಅವರು ಸೃಜನಾತ್ಮಕ ನಿರ್ಮಾಪಕರಾಗಿಯೂ ಕೆಲಸ ಮಾಡಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ