ಅಂಕಾರಾ: ಟರ್ಕಿಯು ತನ್ನ ಮಾನವರಹಿತ (Unmanned) ಯುದ್ಧ ವಿಮಾನವಾದ ‘ಕಿಜಿಲೆಲ್ಮಾ’ (Kizilelma) ವನ್ನು ಯಶಸ್ವಿಯಾಗಿ ಪರೀಕ್ಷಿಸುವ ಮೂಲಕ ಜಾಗತಿಕ ಯುದ್ಧ ವಿಮಾನಯಾನ ಇತಿಹಾಸದಲ್ಲಿ ಹೊಸ ಅಧ್ಯಾಯ ಬರೆದಿದೆ. ರಾಡಾರ್ ನಿರ್ದೇಶಿತ ಗಾಳಿಯಿಂದ-ಗಾಳಿಗೆ (air-to-air) ಚಿಮ್ಮುವ ಕ್ಷಿಪಣಿಯನ್ನು ಬಳಸಿ, ಒಂದು ವಿಮಾನವನ್ನು ನಿಖರವಾಗಿ ಮತ್ತು ಯಶಸ್ವಿಯಾಗಿ ಗುರಿ ಮಾಡಿ ಪರೀಕ್ಷೆ ನಡೆಸಲಾಗಿದೆ.
ಸಿನೋಪ್ ಫೈರಿಂಗ್ ರೇಂಜ್ನ ಕರಾವಳಿಯಲ್ಲಿ ನಡೆಸಿದ ಈ ಪರೀಕ್ಷೆಯಲ್ಲಿ, ಕಿಜಿಲೆಲ್ಮಾ ವಿಮಾನವು ‘ಅಸೆಲ್ಸಾನ್’ (Aselsan) ಸಂಸ್ಥೆಯ ‘ಮುರಾದ್ ಏಸಾ ರಾಡಾರ್’ (Murad Aesa Radar) ನಿಂದ ಗುರುತಿಸಲ್ಪಟ್ಟ ಜೆಟ್-ಚಾಲಿತ ವೈಮಾನಿಕ ಗುರಿಯನ್ನು, ದೃಷ್ಟಿ ಮಿತಿಯನ್ನು ಮೀರಿದ (Beyond Visual Range) ಗಾಳಿಯಿಂದ-ಗಾಳಿಗೆ ಚಿಮ್ಮುವ ‘ಗೋಕ್ಡೋಗನ್’ (Gokdogan) ಕ್ಷಿಪಣಿಯ ಮೂಲಕ ಧ್ವಂಸಗೊಳಿಸಿತು. ಇದು ಮಾನವರಹಿತ ಯುದ್ಧ ಸಾಮರ್ಥ್ಯಗಳಲ್ಲಿ ಮಹತ್ವದ ಪ್ರಗತಿಯಾಗಿದೆ.
ಪರೀಕ್ಷೆಯ ವಿವರಗಳು:
ಟರ್ಕಿಯ ಸ್ಥಳೀಯ ಸಂಸ್ಥೆ ‘ಬಾಯ್ಕರ್’ (Baykar) ನಿಂದ ಅಭಿವೃದ್ಧಿಪಡಿಸಲಾದ ಕಿಜಿಲೆಲ್ಮಾ, ಈ ಪರೀಕ್ಷೆಯ ಸಮಯದಲ್ಲಿ ಐದು F-15 ಯುದ್ಧ ವಿಮಾನಗಳೊಂದಿಗೆ ಹಾರಾಟ ನಡೆಸಿತು.
ಕಿಜಿಲೆಲ್ಮಾ ವಿಮಾನದಲ್ಲಿ ಅಳವಡಿಸಲಾದ ಮುರಾದ್ ಏಸಾ ರಾಡಾರ್, ವೇಗದ ಜೆಟ್-ಚಾಲಿತ ಗುರಿಯನ್ನು (ಟಾರ್ಗೆಟ್) ಪತ್ತೆಹಚ್ಚಿ, ಅದನ್ನು ಹಿಂಬಾಲಿಸಿತು. ನಂತರ, ಅದು ತನ್ನ ರೆಕ್ಕೆಯ ಕೆಳಗೆ ಅಳವಡಿಸಲಾಗಿದ್ದ ಗೋಕ್ಡೋಗನ್ ಕ್ಷಿಪಣಿಯನ್ನು ಉಡಾಯಿಸಿತು.ಉಡಾಯಿಸಲ್ಪಟ್ಟ ಕ್ಷಿಪಣಿಯು ನೇರವಾಗಿ ತನ್ನ ಗುರಿಯಾದ ಡ್ರೋನ್ ಅನ್ನು ಅಪ್ಪಳಿಸಿ, ಅದನ್ನು ಯಶಸ್ವಿಯಾಗಿ ನಾಶ ಮಾಡಿದೆ ಎಂದು ಸಿಎನ್ಎನ್ ವರದಿ ಮಾಡಿದೆ.
ಕಿಜಿಲೆಲ್ಮಾದ ವಿಶೇಷತೆ:
ಪ್ರಸ್ತುತ ಯುದ್ಧ ವಿಮಾನಗಳಿಗಿಂತ ಕಡಿಮೆ ರಾಡಾರ್ ಸಿಗ್ನೇಚರ್ (Radar Signature) ಹೊಂದಿರುವ ಕಿಜಿಲೆಲ್ಮಾ, ಶತ್ರು ವಿಮಾನಗಳನ್ನು ಬಹಳ ದೂರದಿಂದಲೇ ಪತ್ತೆಹಚ್ಚುವ ಸಾಮರ್ಥ್ಯ ಹೊಂದಿದೆ. ಇದು ವಾಯು ಯುದ್ಧದಲ್ಲಿ “ಯಾರಿಗೂ ಕಾಣಿಸದೆ ನೋಡುವುದು, ಗುಂಡು ಹೊಡೆಯಿಸಿಕೊಳ್ಳದೆ ದಾಳಿ ಮಾಡುವುದು” ಎಂಬ ಪರಿಕಲ್ಪನೆಯನ್ನು ಕಾರ್ಯರೂಪಕ್ಕೆ ತರುತ್ತದೆ.
ಇದು ಈಗ ಗಾಳಿಯಿಂದ-ನೆಲಕ್ಕೆ (Air-to-to Ground) ಮತ್ತು ಗಾಳಿಯಿಂದ-ಗಾಳಿಗೆ (Air-to-Air) ಎರಡೂ ಕಾರ್ಯಾಚರಣೆಗಳನ್ನು ನಡೆಸಲು ಸಮರ್ಥವಾಗಿದೆ.
ಡ್ರೋನ್ ರಫ್ತಿನಲ್ಲಿ ಜಾಗತಿಕ ನಾಯಕನಾಗಿರುವ ‘ಬಾಯ್ಕರ್’ ಸಂಸ್ಥೆ, 2023 ಮತ್ತು 2024 ರಲ್ಲಿ ತಲಾ $1.8 ಶತಕೋಟಿ ರಫ್ತು ಆದಾಯವನ್ನು ಗಳಿಸಿದೆ. ಇದರ ಒಟ್ಟು ಆದಾಯದಲ್ಲಿ ಶೇ. 90 ರಷ್ಟು ರಫ್ತಿನಿಂದಲೇ ಬಂದಿದೆ. ಅಧಿಕೃತ ಮಾಹಿತಿ ಪ್ರಕಾರ, ಈ ಕಂಪನಿಯು ಕಳೆದ ನಾಲ್ಕು ವರ್ಷಗಳಿಂದ ಟರ್ಕಿಯ ಉನ್ನತ ರಕ್ಷಣಾ ಮತ್ತು ಏರೋಸ್ಪೇಸ್ ರಫ್ತುದಾರನಾಗಿ ಮುಂದುವರೆದಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ