ಇಸ್ಲಾಮಾಬಾದ್: 2025ನೇ ವರ್ಷ ಮುಕ್ತಾಯದ ಹಂತಕ್ಕೆ ತಲುಪಿದೆ. ಈ ವರ್ಷದಲ್ಲಿ ವಿವಿಧ ವಿಷಯಗಳಿಗಾಗಿ ಗೂಗಲ್ನಲ್ಲಿ ಅತಿ ಹೆಚ್ಚು ಹುಡುಕಲ್ಪಟ್ಟ ಪಟ್ಟಿಯಲ್ಲಿ ಒಂದು ಆಸಕ್ತಿದಾಯಕ ಅಂಶವು ಪಾಕಿಸ್ತಾನದಿಂದ ಬೆಳಕಿಗೆ ಬಂದಿದೆ. 2025 ರಲ್ಲಿ ಪಾಕಿಸ್ತಾನದಲ್ಲಿ ಅತಿ ಹೆಚ್ಚು ಹುಡುಕಲ್ಪಟ್ಟ ಕ್ರೀಡಾಪಟು ಪಾಕಿಸ್ತಾನದವರಲ್ಲ, ಅವರು ಭಾರತದವರು ಎಂಬುದೇ ವಿಶೇಷವಾಗಿದೆ.
ಗೂಗಲ್ ಅಂಕಿಅಂಶಗಳ ಪ್ರಕಾರ, 2025 ರಲ್ಲಿ ಪಾಕಿಸ್ತಾನದಲ್ಲಿ ಅತಿ ಹೆಚ್ಚು ಹುಡುಕಲ್ಪಟ್ಟ ಕ್ರಿಕೆಟಿಗ ಭಾರತದ ಸ್ಟಾರ್ ಓಪನರ್ ಅಭಿಷೇಕ ಶರ್ಮಾ ಆಗಿದ್ದಾರೆ. ಇವರು ವಿಶ್ವದ ನಂಬರ್ 1 ಟಿ20ಐ ಬ್ಯಾಟರ್ ಆಗಿದ್ದು, ವರ್ಷವಿಡೀ ಅದ್ಭುತ ಪ್ರದರ್ಶನ ನೀಡಿದ್ದಾರೆ.
2025ರ ಏಷ್ಯಾ ಕಪ್ನಲ್ಲಿ 200ರ ಸ್ಟ್ರೈಕ್ ರೇಟ್ನಲ್ಲಿ 314 ರನ್ಗಳನ್ನು ಗಳಿಸಿ ಅಗ್ರ ರನ್ ಗಳಿಸಿದ ಆಟಗಾರ ಎನಿಸಿಕೊಂಡಿದ್ದರು.ಅದರಲ್ಲೂ, ಏಷ್ಯಾ ಕಪ್ ಸೂಪರ್ 4 ಹಂತದಲ್ಲಿ ಪಾಕಿಸ್ತಾನದ ವಿರುದ್ಧ ಕೇವಲ 39 ಎಸೆತಗಳಲ್ಲಿ 74 ರನ್ಗಳ ಸ್ಫೋಟಕ ಇನ್ನಿಂಗ್ಸ್ ಆಡಿದ್ದರು.
2025ರಲ್ಲಿ ಆಡಿದ 17 ಟಿ20ಐ ಪಂದ್ಯಗಳಲ್ಲಿ ಒಂದು ಶತಕ ಸೇರಿ 47.25ರ ಸರಾಸರಿಯಲ್ಲಿ ಒಟ್ಟು 756 ರನ್ ಕಲೆಹಾಕಿದ್ದಾರೆ.
ಅಚ್ಚರಿಯ ವಿಷಯವೆಂದರೆ, ಪಾಕಿಸ್ತಾನದ ಖ್ಯಾತ ಆಟಗಾರರಾದ ಬಾಬರ್ ಆಜಮ್, ಶಾಹೀನ್ ಅಫ್ರಿದಿ, ಅಥವಾ ಮೊಹಮ್ಮದ್ ರಿಜ್ವಾನ್ ಅವರಲ್ಲಿ ಯಾರೂ ಕೂಡ ಪಾಕಿಸ್ತಾನದ ಟಾಪ್-ಐದು ಸ್ಥಾನಗಳಲ್ಲಿ ಇಲ್ಲ.
ಪಾಕಿಸ್ತಾನದಲ್ಲಿ ಅತಿ ಹೆಚ್ಚು ಹುಡುಕಲ್ಪಟ್ಟ ಆಟಗಾರರ ಟಾಪ್-ಫೈವ್ ಪಟ್ಟಿಯಲ್ಲಿರುವ ಇತರೆ ಆಟಗಾರರೆಲ್ಲರೂ ಯುವ ಪ್ರತಿಭೆಗಳಾಗಿದ್ದಾರೆ. ಅಭಿಷೇಕ ನಂತರ, ಪಾಕಿಸ್ತಾನದಲ್ಲಿ ಅತಿ ಹೆಚ್ಚು ಹುಡುಕಲ್ಪಟ್ಟ ಕ್ರಿಕೆಟಿಗರೆಂದರೆ ಹಸನ್ ನವಾಜ್, ಇರ್ಫಾನ್ ಖಾನ್ ನಿಯಾಜಿ, ಸಾಹಿಬ್ಜಾದಾ ಫರ್ಹಾನ್ ಮತ್ತು ಮುಹಮ್ಮದ್ ಅಬ್ಬಾಸ್.ಇದು ಪಾಕಿಸ್ತಾನದ ಕ್ರಿಕೆಟ್ ಅಭಿಮಾನಿಗಳು ತಮ್ಮ ತಂಡದ ಯುವ ಆಟಗಾರರ ಬಗ್ಗೆ ಹೆಚ್ಚು ಆಸಕ್ತಿ ವಹಿಸುತ್ತಿದ್ದಾರೆ ಎಂಬುದನ್ನು ಸೂಚಿಸುತ್ತದೆ.
ಅತಿ ಹೆಚ್ಚು ಹುಡುಕಲ್ಪಟ್ಟ ಟರ್ಮ್ ‘ಪಾಕ್ vs ದಕ್ಷಿಣ ಆಫ್ರಿಕಾ’
ಅತಿ ಹೆಚ್ಚು ಹುಡುಕಲ್ಪಟ್ಟ ಕ್ರಿಕೆಟ್ ಪದಗಳ ಪಟ್ಟಿಯಲ್ಲಿಯೂ ಒಂದು ಅಚ್ಚರಿ ಕಾದಿತ್ತು. ‘ಪಾಕಿಸ್ತಾನ vs ದಕ್ಷಿಣ ಆಫ್ರಿಕಾ’ ಸರಣಿಯು ಪಾಕಿಸ್ತಾನ ಸೂಪರ್ ಲೀಗ್ (PSL) ಮತ್ತು ಏಷ್ಯಾ ಕಪ್ಗಿಂತಲೂ ಹೆಚ್ಚು ಹುಡುಕಲ್ಪಟ್ಟ ವಿಷಯವಾಗಿ ಹೊರಹೊಮ್ಮಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ