ಬೆಂಗಳೂರು/ಅಹಮದಾಬಾದ್: ಭಾರತದ ಖಾಸಗಿ ಬಾಹ್ಯಾಕಾಶ ರಂಗದಲ್ಲಿ ಇಂದು ಐತಿಹಾಸಿಕ ಸಾಧನೆಯೊಂದು ದಾಖಲಾಗಿದೆ. ಅಹಮದಾಬಾದ್ ಮೂಲದ ಅಜಿಸ್ಟಾ ಇಂಡಸ್ಟ್ರೀಸ್ ಪ್ರೈವೇಟ್ ಲಿಮಿಟೆಡ್ (Azista Industries) ತನ್ನ ʼಎಎಫ್ಆರ್ʼ (AFR)ಉಪಗ್ರಹದ ಮೂಲಕ ಬಾಹ್ಯಾಕಾಶದಲ್ಲಿ ಚಲಿಸುತ್ತಿರುವ ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣದ (ISS) ಚಿತ್ರಗಳನ್ನು ಯಶಸ್ವಿಯಾಗಿ ಸೆರೆಹಿಡಿದಿದೆ. ಈ ಮೂಲಕ ಕಕ್ಷೆಯಲ್ಲಿರುವ ಇತರ ವಸ್ತುಗಳ ಮೇಲೆ ನಿಗಾ ಇಡುವ (Non-Earth Imaging – NEI) ಸಾಮರ್ಥ್ಯ ಪ್ರದರ್ಶಿಸಿದ ಭಾರತದ ಮೊದಲ ಖಾಸಗಿ ಕಂಪನಿ ಎಂಬ ಹೆಗ್ಗಳಿಕೆಗೆ ಅಜಿಸ್ಟಾ ಪಾತ್ರವಾಗಿದೆ.
ಬಾಹ್ಯಾಕಾಶದ ಭಾಷೆಯಲ್ಲಿ ಇದನ್ನು ‘ಇನ್-ಆರ್ಬಿಟ್ ಸ್ನೂಪಿಂಗ್’ (In-orbit snooping) ಅಥವಾ ಕಕ್ಷೆಯಲ್ಲಿ ನಿಗಾ ಇಡುವುದು ಎಂದು ಕರೆಯಲಾಗುತ್ತದೆ.
ಕಾರ್ಯಾಚರಣೆ ಹೇಗಿತ್ತು?
ಫೆಬ್ರವರಿ 3 ರಂದು ನಡೆದ ಎರಡು ಪ್ರತ್ಯೇಕ ಪ್ರಯೋಗಗಳಲ್ಲಿ ಅಜಿಸ್ಟಾ ಈ ಸಾಧನೆ ಮಾಡಿದೆ. 80 ಕೆಜಿ ತೂಕದ AFR (Azista First Remote-Sensing) ಎಂಬ ಭೂ-ವೀಕ್ಷಣಾ ಉಪಗ್ರಹವನ್ನು ಬಳಸಿ ಈ ಚಿತ್ರಗಳನ್ನು ತೆಗೆಯಲಾಗಿದೆ.
ಮೊದಲ ಯತ್ನದಲ್ಲಿ ಸುಮಾರು 300 ಕಿಲೋಮೀಟರ್ ದೂರದಿಂದ ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣದ (ISS) ಚಿತ್ರೀಕರಣ ಮಾಡಲಾಗಿದೆ. ಎರಡನೇ ಯತ್ನದಲ್ಲಿ ಸುಮಾರು 245 ಕಿಲೋಮೀಟರ್ ದೂರದಿಂದ ಚಿತ್ರೀಕರಣ ಮಾಡಲಾಗಿದೆ.
ಸೂರ್ಯನ ಬೆಳಕಿನ ತೀವ್ರತೆ ಹಾಗೂ ಹವಾಮಾನದ ಸವಾಲಿನ ನಡುವೆಯೂ, ಅತ್ಯಂತ ವೇಗವಾಗಿ ಚಲಿಸುವ ಅಂತಾರಾಷ್ಟ್ರೀಯ ಬಾಹ್ಯಾಕಾಶ ನಿಲ್ದಾಣವನ್ನು ಟ್ರ್ಯಾಕ್ ಮಾಡಿ ಸುಮಾರು 2.2 ಮೀಟರ್ಗಳ ಇಮೇಜಿಂಗ್ ಮಾದರಿಯೊಂದಿಗೆ ಒಟ್ಟು 15 ಸ್ಪಷ್ಟ ಚೌಕಟ್ಟುಗಳನ್ನು (Frames) ಸೆರೆಹಿಡಿಯಲಾಗಿದೆ. ಈ ಪ್ರಯೋಗವು 100 ಪ್ರತಿಶತ ಯಶಸ್ವಿಯಾಗಿದೆ ಎಂದು ಕಂಪನಿ ತಿಳಿಸಿದೆ.
ಇದರ ಪ್ರಾಮುಖ್ಯತೆ ಏನು?
ಬಾಹ್ಯಾಕಾಶದಲ್ಲಿ ಉಪಗ್ರಹಗಳ ಸಂಖ್ಯೆ ಹೆಚ್ಚಾಗುತ್ತಿರುವ ಈ ಕಾಲದಲ್ಲಿ ‘ಸ್ಪೇಸ್ ಸಿಚುವೇಷನಲ್ ಅವೇರ್ನೆಸ್’ (SSA) ಅತ್ಯಂತ ನಿರ್ಣಾಯಕವಾಗಿದೆ.
ಭಾರತವು ಸರಿಸುಮಾರು 50,000 ಕೋಟಿ ರೂಪಾಯಿ ಮೌಲ್ಯದ 50ಕ್ಕೂ ಹೆಚ್ಚು ಉಪಗ್ರಹಗಳನ್ನು ಹೊಂದಿದೆ. ಇವುಗಳ ಸುರಕ್ಷತೆಗಾಗಿ ಇತರ ದೇಶಗಳ ಉಪಗ್ರಹಗಳ ಚಲನವಲನದ ಮೇಲೆ ನಿಗಾ ಇಡುವುದು ಅತ್ಯಗತ್ಯ.ಇದೇ ತಂತ್ರಜ್ಞಾನವನ್ನು ಭವಿಷ್ಯದಲ್ಲಿ ಶತ್ರು ರಾಷ್ಟ್ರಗಳ ಬ್ಯಾಲಿಸ್ಟಿಕ್ ಕ್ಷಿಪಣಿಗಳನ್ನು ಪತ್ತೆಹಚ್ಚಲು ಬಳಸಬಹುದು.
ಇದು ಸಂಪೂರ್ಣವಾಗಿ ಭಾರತದಲ್ಲಿಯೇ ಅಭಿವೃದ್ಧಿಪಡಿಸಿದ ಅಲ್ಗಾರಿದಮ್ಗಳು ಮತ್ತು ಆಪ್ಟಿಕಲ್ ಸಿಸ್ಟಮ್ಗಳ ಸಾಮರ್ಥ್ಯವನ್ನು ಸಾಬೀತುಪಡಿಸಿದೆ. “ನಮ್ಮ ಈ ತಂತ್ರಜ್ಞಾನವು ಕಕ್ಷೆಯಲ್ಲಿರುವ ವಸ್ತುಗಳನ್ನು ನಿಖರವಾಗಿ ಟ್ರ್ಯಾಕ್ ಮಾಡಲು ಮತ್ತು ಅವುಗಳ ಗುಣಲಕ್ಷಣಗಳನ್ನು ಅರ್ಥಮಾಡಿಕೊಳ್ಳಲು ಬೆನ್ನೆಲುಬಾಗಿದೆ. ಇದು ಕೇವಲ ಆರಂಭವಷ್ಟೇ,” ಎಂದು ಅಜಿಸ್ಟಾ ವ್ಯವಸ್ಥಾಪಕ ನಿರ್ದೇಶಕ ಶ್ರೀನಿವಾಸ್ ರೆಡ್ಡಿ ಹರ್ಷ ವ್ಯಕ್ತಪಡಿಸಿದ್ದಾರೆ.
AFR ಉಪಗ್ರಹದ ವಿಶೇಷತೆ
ಇದು ಸಂಪೂರ್ಣವಾಗಿ ಭಾರತದ ಖಾಸಗಿ ವಲಯದಲ್ಲಿ ವಿನ್ಯಾಸಗೊಳಿಸಿ, ನಿರ್ಮಿಸಿ ಮತ್ತು ನಿರ್ವಹಿಸುತ್ತಿರುವ ಮೊದಲ ಸಣ್ಣ ಉಪಗ್ರಹವಾಗಿದೆ. ಇದನ್ನು ಜೂನ್ 13, 2023 ರಂದು ಸ್ಪೇಸ್ಎಕ್ಸ್ನ ಫಾಲ್ಕನ್ 9 ರಾಕೆಟ್ ಮೂಲಕ ಉಡಾವಣೆ ಮಾಡಲಾಗಿತ್ತು.
ಕಳೆದ 2.5 ವರ್ಷಗಳಿಂದ ಯಶಸ್ವಿಯಾಗಿ ಕಾರ್ಯನಿರ್ವಹಿಸುತ್ತಿರುವ ಇದು, ಇನ್ನೂ 2.5 ವರ್ಷಗಳ ಕಾಲ ಸೇವೆ ನೀಡುವ ಸಾಮರ್ಥ್ಯ ಹೊಂದಿದೆ.
ಮುಂದಿನ ಗುರಿ
ಅಜಿಸ್ಟಾ ಕಂಪನಿಯು ಈಗ ಅಹಮದಾಬಾದ್ನಲ್ಲಿ ಅತ್ಯಾಧುನಿಕ ಪೇಲೋಡ್ ಉತ್ಪಾದನಾ ಘಟಕವನ್ನು ಸ್ಥಾಪಿಸುತ್ತಿದೆ. ಮುಂದಿನ ದಿನಗಳಲ್ಲಿ ಕಕ್ಷೆಯಲ್ಲಿರುವ ವಸ್ತುಗಳನ್ನು ಕೇವಲ 25 ಸೆಂಟಿಮೀಟರ್ಗಳಷ್ಟು ಅತಿ ಹೆಚ್ಚಿನ ರೆಸಲ್ಯೂಶನ್ನಲ್ಲಿ ಚಿತ್ರೀಕರಿಸುವ ಗುರಿಯನ್ನು ಕಂಪನಿ ಹೊಂದಿದೆ ಎಂದು ಎಕ್ಸಿಕ್ಯೂಟಿವ್ ಡೈರೆಕ್ಟರ್ ಬ್ರಿಗೇಡಿಯರ್ ಆದರ್ಶ ಭಾರದ್ವಾಜ ತಿಳಿಸಿದ್ದಾರೆ.
ಈ ಬೆಳವಣಿಗೆಯಿಂದಾಗಿ ಭಾರತವು ಬಾಹ್ಯಾಕಾಶ ಕ್ಷೇತ್ರದಲ್ಲಿ ಕೇವಲ ಭೂಮಿಯನ್ನಷ್ಟೇ ಅಲ್ಲದೆ, ಬಾಹ್ಯಾಕಾಶದೊಳಗಿನ ಚಟುವಟಿಕೆಗಳನ್ನೂ ಸೂಕ್ಷ್ಮವಾಗಿ ಗಮನಿಸುವ ಸಾಮರ್ಥ್ಯವನ್ನು ವೃದ್ಧಿಸಿಕೊಂಡಂತಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ