ಮಾಸ್ಕೋ: ಜಗತ್ತಿನ ಜನಪ್ರಿಯ ಸಂದೇಶ ರವಾನೆ ಅಪ್ಲಿಕೇಶನ್ ಆದ ‘ವ್ಯಾಟ್ಸಾಪ್’ (WhatsApp) ಅನ್ನು ರಷ್ಯಾದಲ್ಲಿ ಗುರುವಾರದಿಂದ ಸಂಪೂರ್ಣವಾಗಿ ನಿರ್ಬಂಧಿಸಲಾಗಿದೆ. ಸ್ಥಳೀಯ ಕಾನೂನುಗಳನ್ನು ಪಾಲಿಸುವಲ್ಲಿ ವಿಫಲವಾದ ಕಾರಣ ಅಮೆರಿಕ ಮೂಲದ ಮೆಟಾ (Meta) ಕಂಪನಿಯ ಒಡೆತನದ ಈ ಆ್ಯಪ್ ಅನ್ನು ರಷ್ಯಾ ಸರ್ಕಾರ ಅಧಿಕೃತವಾಗಿ ನಿಷೇಧಿಸಿದೆ. ಇದರ ಬದಲಿಗೆ ರಷ್ಯನ್ನರು ಸರ್ಕಾರಿ ಪ್ರಾಯೋಜಿತ ಮ್ಯಾಕ್ಸ್ (‘MAX’) ಎಂಬ ರಾಷ್ಟ್ರೀಯ ಆ್ಯಪ್ ಬಳಸುವಂತೆ ಸೂಚನೆ ನೀಡಲಾಗಿದೆ.
ರಷ್ಯಾದ ಕಾನೂನು ನಿಯಮಗಳಿಗೆ ಅನುಸಾರವಾಗಿ ಕಾರ್ಯನಿರ್ವಹಿಸಲು ಮೆಟಾ ಸಂಸ್ಥೆ ಒಪ್ಪದ ಕಾರಣ ಈ ಕಠಿಣ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು ಕ್ರೆಮ್ಲಿನ್ ವಕ್ತಾರ ಡಿಮಿಟ್ರಿ ಪೆಸ್ಕೋವ್ ತಿಳಿಸಿದ್ದಾರೆ. “ಮೆಟಾ ಸಂಸ್ಥೆಯು ರಷ್ಯಾದ ಕಾನೂನುಗಳನ್ನು ಗೌರವಿಸಲು ಸಿದ್ಧವಿಲ್ಲದ ಕಾರಣ, ನಾವು ಈ ನಿರ್ಧಾರವನ್ನು ಜಾರಿಗೆ ತಂದಿದ್ದೇವೆ,” ಎಂದು ಅವರು ಸುದ್ದಿಗಾರರಿಗೆ ತಿಳಿಸಿದರು.
ಅಲ್ಲದೆ, ವ್ಯಾಟ್ಸಾಪ್ ಮೂಲಕ ಭಯೋತ್ಪಾದನಾ ಚಟುವಟಿಕೆಗಳಿಗೆ ಸಂಚು ರೂಪಿಸಲಾಗುತ್ತಿದೆ ಮತ್ತು ಅಪರಾಧ ಕೃತ್ಯಗಳಿಗೆ ಇದು ವೇದಿಕೆಯಾಗುತ್ತಿದೆ ಎಂದು ರಷ್ಯಾದ ಸಂವಹನ ನಿಯಂತ್ರಕ ಸಂಸ್ಥೆ ‘ರೋಸ್ಕೊಮ್ನಾಡ್ಜೋರ್’ (Roskomnadzor) ಗಂಭೀರ ಆರೋಪ ಮಾಡಿದೆ.
ಸರ್ಕಾರಿ ಅಪ್ಲಿಕೇಶನ್ ‘MAX’ಗೆ ಒತ್ತು
ವ್ಯಾಟ್ಸಾಪ್ಗೆ ಪರ್ಯಾಯವಾಗಿ ರಷ್ಯಾ ಸರ್ಕಾರವು ಮ್ಯಾಕ್ಸ್ (MAX) ಎಂಬ ರಾಷ್ಟ್ರೀಯ ಸಂದೇಶ ಆ್ಯಪ್ ಅನ್ನು ಪರಿಚಯಿಸಿದೆ.ಇದು ರಷ್ಯಾದ ನಾಗರಿಕರಿಗೆ ಲಭ್ಯವಿರುವ ಸುಲಭ ಮತ್ತು ಸುರಕ್ಷಿತ ಪರ್ಯಾಯ ಎಂದು ಪೆಸ್ಕೋವ್ ಬಣ್ಣಿಸಿದ್ದಾರೆ.
ಇದು ಕೇವಲ ಸಂದೇಶ ರವಾನೆಯಷ್ಟೇ ಅಲ್ಲದೆ, ಸರ್ಕಾರದ ವಿವಿಧ ಸೇವೆಗಳನ್ನು ಒಳಗೊಂಡಿದೆ. ಆದರೆ, ಈ ಆ್ಯಪ್ ಅನ್ನು ಸರ್ಕಾರದ ‘ಕಣ್ಗಾವಲು ಸಾಧನ’ (Surveillance tool) ಎಂದು ವಿಮರ್ಶಕರು ಟೀಕಿಸಿದ್ದಾರೆ. ಇದನ್ನು ಬಳಸುವ ಮೂಲಕ ಜನರ ಖಾಸಗಿ ಮಾಹಿತಿ ಸರ್ಕಾರದ ಪಾಲಾಗಲಿದೆ ಎಂದು ಅವರು ಆತಂಕ ವ್ಯಕ್ತಪಡಿಸಿದ್ದಾರೆ.
ಮೆಟಾ ಮತ್ತು ವ್ಯಾಟ್ಸಾಪ್ ಪ್ರತಿಕ್ರಿಯೆ
ತನ್ನ ಸೇವೆಯನ್ನು ರಷ್ಯಾ ನಿರ್ಬಂಧಿಸಿರುವುದಕ್ಕೆ ವ್ಯಾಟ್ಸಾಪ್ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದೆ. “ರಷ್ಯಾ ಸರ್ಕಾರವು ಸುಮಾರು 10 ಕೋಟಿ ಬಳಕೆದಾರರನ್ನು ಸುರಕ್ಷಿತ ಮತ್ತು ಖಾಸಗಿ ಸಂವಹನದಿಂದ ದೂರವಿಡುತ್ತಿದೆ. ಇದು ಹಿಮ್ಮುಖ ಹೆಜ್ಜೆಯಾಗಿದ್ದು, ಜನಸಾಮಾನ್ಯರ ಸುರಕ್ಷತೆಗೆ ಧಕ್ಕೆ ತರುತ್ತದೆ,” ಎಂದು ಕಂಪನಿ ಹೇಳಿಕೆಯಲ್ಲಿ ತಿಳಿಸಿದೆ.
ತಾಂತ್ರಿಕವಾಗಿ ತಡೆ ಹಿಡಿದಿದ್ದು ಹೇಗೆ?
ರಷ್ಯಾದ ರಾಷ್ಟ್ರೀಯ ಡೊಮೇನ್ ರಿಜಿಸ್ಟರ್ನಿಂದ ವ್ಯಾಟ್ಸಾಪ್ಗೆ ಸಂಬಂಧಿಸಿದ ಡೊಮೇನ್ ಹೆಸರುಗಳನ್ನು ತೆಗೆದುಹಾಕಲಾಗಿದೆ. ಇದರಿಂದಾಗಿ ರಷ್ಯಾದ ಒಳಗಿರುವ ಸಾಧನಗಳಿಗೆ ವ್ಯಾಟ್ಸಾಪ್ ಐಪಿ (IP) ವಿಳಾಸಗಳು ಸಿಗುತ್ತಿಲ್ಲ. ಪ್ರಸ್ತುತ ರಷ್ಯಾದಲ್ಲಿ ಜನರು VPN (ವರ್ಚುವಲ್ ಪ್ರೈವೇಟ್ ನೆಟ್ವರ್ಕ್) ಬಳಸಿದರೆ ಮಾತ್ರ ವ್ಯಾಟ್ಸಾಪ್ ಬಳಸಲು ಸಾಧ್ಯವಾಗುತ್ತಿದೆ.
ಕಳೆದ ಆರು ತಿಂಗಳಿನಿಂದ ರಷ್ಯಾ ಸರ್ಕಾರವು ವ್ಯಾಟ್ಸಾಪ್ ಮೇಲೆ ಒತ್ತಡ ಹೇರುತ್ತಲೇ ಇತ್ತು. ಕಳೆದ ಆಗಸ್ಟ್ನಲ್ಲಿ ಮೊದಲ ಬಾರಿಗೆ ವ್ಯಾಟ್ಸಾಪ್ ಕರೆಗಳನ್ನು ನಿರ್ಬಂಧಿಸಲಾಗಿತ್ತು. ರಷ್ಯಾ ಮತ್ತು ಉಕ್ರೇನ್ ಯುದ್ಧದ ಹಿನ್ನೆಲೆಯಲ್ಲಿ ವಿದೇಶಿ ಟೆಕ್ ಕಂಪನಿಗಳ ಮೇಲೆ ಹಿಡಿತ ಸಾಧಿಸಲು ಮತ್ತು ತನ್ನದೇ ಆದ ‘ಸಾರ್ವಭೌಮ’ ಸಂವಹನ ವ್ಯವಸ್ಥೆಯನ್ನು ರೂಪಿಸಲು ರಷ್ಯಾ ಮುಂದಾಗಿದೆ. ಫೇಸ್ಬುಕ್, ಇನ್ಸ್ಟಾಗ್ರಾಮ್ ಮತ್ತು ಯೂಟ್ಯೂಬ್ಗಳ ಮೇಲೂ ರಷ್ಯಾ ಈಗಾಗಲೇ ನಿರ್ಬಂಧ ಹೇರಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ