ರಾಜಾ ರವಿವರ್ಮ ಅವರ 35 x 28.25 ಇಂಚಿನ ತೈಲಚಿತ್ರವೊಂದು ಬುಧವಾರ ನಡೆದ ‘ಸ್ಯಾಫ್ರನ್ ಆರ್ಟ್’ (Saffronart) ವಸಂತಕಾಲದ ಹರಾಜಿನಲ್ಲಿ ₹167.2 ಕೋಟಿಗೆ ಮಾರಾಟವಾಗುವ ಮೂಲಕ, ಈವರೆಗೆ ಹರಾಜಿನಲ್ಲಿ ಮಾರಾಟವಾದ ಅತ್ಯಂತ ದುಬಾರಿ ಭಾರತೀಯ ಪೇಂಟಿಂಗ್ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ.
‘ಯಶೋದಾ ಮತ್ತು ಕೃಷ್ಣ’ ಎಂಬ ಶೀರ್ಷಿಕೆಯ ಈ ಕೃತಿಯನ್ನು ಖ್ಯಾತ ಭಾರತೀಯ ಕಲಾವಿದ ರಾಜಾ ರವಿವರ್ಮ ಅವರು 1890ರ ದಶಕದಲ್ಲಿ ರಚಿಸಿದ್ದರು ಮತ್ತು ಇದು ಅವರ ಸಹಿಯನ್ನು ಹೊಂದಿದೆ. “ಇದು ನಮ್ಮ ಸಂಸ್ಕೃತಿಯ ಅಪಾರ ಮೌಲ್ಯವನ್ನು ಹೊಂದಿದೆ ಮತ್ತು ಇಂತಹ ಕೃತಿಯನ್ನು ಪಡೆಯಲು ಕಲಾ ಸಂಗ್ರಾಹಕರು ಎಷ್ಟರ ಮಟ್ಟಿಗೆ ಶ್ರಮಿಸುತ್ತಾರೆ ಎಂಬುದನ್ನು ಇದು ತೋರಿಸುತ್ತದೆ ” ಎಂದು ಸ್ಯಾಫ್ರನ್ ಆರ್ಟ್ನ ಸಹ-ಸಂಸ್ಥಾಪಕ ಮತ್ತು ಸಿಇಒ ದಿನೇಶ ವಜಿರಾನಿ ಮಾರಾಟದ ನಂತರ ತಿಳಿಸಿದ್ದಾರೆ.
ಪುಣೆಯನ್ನು ಪ್ರಧಾನ ಕಚೇರಿಯನ್ನಾಗಿ ಹೊಂದಿರುವ ಸೀರಮ್ ಇನ್ಸ್ಟಿಟ್ಯೂಟ್ ಆಫ್ ಇಂಡಿಯಾದ ಸ್ಥಾಪಕ ಮತ್ತು ವ್ಯವಸ್ಥಾಪಕ ನಿರ್ದೇಶಕರಾದ ಸೈರಸ್ ಎಸ್. ಪೂನಾವಾಲಾ ಅವರು ಈ ವರ್ಣಚಿತ್ರವನ್ನು ಖರೀದಿಸಿದ್ದಾರೆ.
“ಐತಿಹಾಸಿಕ ರಾಜಾ ರವಿವರ್ಮ ಅವರ ‘ಯಶೋದಾ ಮತ್ತು ಕೃಷ್ಣ’ ಚಿತ್ರಕಲೆಯನ್ನು ಪಡೆದುಕೊಳ್ಳಲು, ಸಂರಕ್ಷಿಸಲು ಮತ್ತು ಪೋಷಿಸಲು ನನಗೆ ಅವಕಾಶ ಸಿಕ್ಕಿರುವುದು ನನ್ನ ಸೌಭಾಗ್ಯ. ಈ ರಾಷ್ಟ್ರೀಯ ಸಂಪತ್ತು ಕಾಲಕಾಲಕ್ಕೆ ಸಾರ್ವಜನಿಕ ವೀಕ್ಷಣೆಗೆ ಲಭ್ಯವಾಗಬೇಕು. ಇದನ್ನು ಮುಂದಕ್ಕೆ ಕೊಂಡೊಯ್ಯುವುದು ನನ್ನ ಪ್ರಯತ್ನವಾಗಿರುತ್ತದೆ ಎಂದು ಪೂನಾವಾಲಾ ಹೇಳಿದ್ದಾರೆ ಎಂದು ಸ್ಯಾಫ್ರನ್ ಆರ್ಟ್ ಬಿಡುಗಡೆ ಮಾಡಿದ ಪತ್ರಿಕಾ ಪ್ರಕಟಣೆ ತಿಳಿಸಿದೆ.
ರಾಜಾ ರವಿವರ್ಮ ಅವರ ಕೃತಿಗಳನ್ನು ರಾಷ್ಟ್ರೀಯ ಸಂಪತ್ತು ಎಂದು ವರ್ಗೀಕರಿಸಲಾಗಿದೆ ಮತ್ತು ಅವುಗಳನ್ನು ವಿದೇಶಕ್ಕೆ ರಫ್ತು ಮಾಡುವಂತಿಲ್ಲ. ಆದ್ದರಿಂದ ಇದನ್ನು ಖರೀದಿಸಿದವರು ಭಾರತೀಯ ಸಂಗ್ರಾಹಕರೇ ಆಗಿದ್ದಾರೆ.
ಇದು ಭಾರತೀಯ ಕಲಾ ಮಾರುಕಟ್ಟೆಗೆ ಒಂದು ಮಹತ್ವದ ಕ್ಷಣ. ರಾಜಾ ರವಿವರ್ಮ ಅವರ ‘ಯಶೋದಾ ಮತ್ತು ಕೃಷ್ಣ’ ಚಿತ್ರವು ಮಡೋನಾ ಮತ್ತು ಕ್ರೈಸ್ತ ಅಥವಾ ಯಾವುದೇ ತಾಯಿ ಮತ್ತು ಮಗುವನ್ನು ನೆನಪಿಸುವ ಸಾರ್ವತ್ರಿಕ ವಿಷಯವಾಗಿದೆ.
ಕಳೆದ ಮಾರ್ಚ್ನಲ್ಲಿ, ನ್ಯೂಯಾರ್ಕ್ನಲ್ಲಿ ನಡೆದ ಕ್ರಿಸ್ಟೀಸ್ ಸೌತ್ ಏಷ್ಯನ್ ಮಾಡರ್ನ್ + ಕಂಟೆಂಪರರಿ ಆರ್ಟ್ ಹರಾಜಿನಲ್ಲಿ ಎಂ.ಎಫ್. ಹುಸೇನ್ ಅವರ ಕೃತಿಯೊಂದು ದಾಖಲೆಯ $13.7 ಮಿಲಿಯನ್ (ಸುಮಾರು ₹118.7 ಕೋಟಿ) ಗೆ ಮಾರಾಟವಾಗುವ ಮೂಲಕ ಭಾರತೀಯ ಪೇಂಟಿಂಗ್ ವಿಶ್ವ ದಾಖಲೆ ಬರೆದಿತ್ತು. ಈಗ ರವಿವರ್ಮ ಅವರ ಚಿತ್ರ ಆ ದಾಖಲೆಯನ್ನು ಅಳಿಸಿ ಹಾಕಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ