ಸಾಮಾನ್ಯವಾಗಿ ಚುನಾವಣೆ ಎಂದರೆ ಅಲ್ಲಿ ರಾಜಕೀಯ ಆರೋಪ-ಪ್ರತ್ಯಾರೋಪಗಳು ಸಹಜ. ಆದರೆ, ಮಂಗಳವಾರ ಪ್ರಕಟವಾದ ಗುಜರಾತ್ ಸ್ಥಳೀಯ ಸಂಸ್ಥೆಗಳ ಚುನಾವಣಾ ಫಲಿತಾಂಶವು ಕೋಮು ಸೌಹಾರ್ದತೆ ಮತ್ತು ಅಂತರ್ಗತ ರಾಜಕಾರಣಕ್ಕೆ ಒಂದು ಮೈಲಿಗಲ್ಲಾಗಿ ನಿಂತಿದೆ.
ಗೋದ್ರಾ ನಗರಸಭೆಯ 7ನೇ ವಾರ್ಡ್‌ನಲ್ಲಿ ಪಕ್ಷೇತರ ಅಭ್ಯರ್ಥಿಯಾಗಿ ಸ್ಪರ್ಧಿಸಿದ್ದ ಹಿಂದೂ ಮಹಿಳೆ ಅಪೇಕ್ಷಾಬೆನ್ ನೈನೇಷ್‌ಭಾಯಿ ಸೋನಿ ಅವರು ಭರ್ಜರಿ ಜಯ ದಾಖಲಿಸಿದ್ದಾರೆ. ವಿಶೇಷವೆಂದರೆ, ಈ ವಾರ್ಡ್‌ನಲ್ಲಿ ವಾಸಿಸುವ ಜನರೆಲ್ಲರೂ (ಶೇ. 100 ರಷ್ಟು) ಮುಸ್ಲಿಂ ಸಮುದಾಯಕ್ಕೆ ಸೇರಿದವರಾಗಿದ್ದಾರೆ.
ಎನ್‌ಡಿಟಿವಿ ವರದಿಯ ಪ್ರಕಾರ, ಅಪೇಕ್ಷಾಬೆನ್ ಸೋನಿ ಅವರು 7ನೇ ವಾರ್ಡ್‌ನ ನೋಂದಾಯಿತ ಮತದಾರರಲ್ಲದಿದ್ದರೂ ಸಹ, ಅಲ್ಲಿನ ಸ್ಥಳೀಯರ ವಿಶ್ವಾಸ ಗಳಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
ಧರ್ಮ ಅಥವಾ ಜಾತಿ ಆಧಾರಿತ ಸಾಂಪ್ರದಾಯಿಕ ಮತದಾನದ ಮಾದರಿಯನ್ನು ಈ ಫಲಿತಾಂಶವು ಸುಳ್ಳಾಗಿಸಿದೆ. ಈ ಹಿಂದೆ ತೀವ್ರ ಕೋಮು ಸಂಘರ್ಷಕ್ಕೆ ಸಾಕ್ಷಿಯಾಗಿದ್ದ ಈ ಪ್ರದೇಶದಲ್ಲಿ, ಮುಸ್ಲಿಂ ಮತದಾರರು ಅರ್ಹತೆ ಮತ್ತು ನಂಬಿಕೆಗೆ ಆದ್ಯತೆ ನೀಡಿ ಹಿಂದೂ ಅಭ್ಯರ್ಥಿಯನ್ನು ಆರಿಸಿರುವುದು ಹೊಸ ಬದಲಾವಣೆಗೆ ನಾಂದಿ ಹಾಡಿದೆ. ರಾಜಕೀಯ ವಿಶ್ಲೇಷಕರು ಇದನ್ನು ‘ಗೋದ್ರಾ ಮಾಡೆಲ್ ಆಫ್ ವೋಟಿಂಗ್’ ಎಂದು ಕರೆದಿದ್ದಾರೆ.
ಬಿಜೆಪಿ ಭರ್ಜರಿ ದಿಗ್ವಿಜಯ
ಮತ್ತೊಂದೆಡೆ, ಗುಜರಾತ್‌ನ ಸ್ಥಳೀಯ ಸಂಸ್ಥೆ ಚುನಾವಣೆಯಲ್ಲಿ ಬಿಜೆಪಿ ಐತಿಹಾಸಿಕ ಗೆಲುವು ಸಾಧಿಸಿದೆ. ರಾಜ್ಯದ ಎಲ್ಲಾ 15 ಮಹಾನಗರ ಪಾಲಿಕೆಗಳನ್ನು ತನ್ನ ತೆಕ್ಕೆಗೆ ತೆಗೆದುಕೊಳ್ಳುವಲ್ಲಿ ಬಿಜೆಪಿ ಯಶಸ್ವಿಯಾಗಿದೆ. ಪ್ರತಿಯೊಂದು ಪಾಲಿಕೆಯಲ್ಲೂ ಶೇ. 50ಕ್ಕಿಂತ ಹೆಚ್ಚು ಸ್ಥಾನಗಳನ್ನು ಗೆಲ್ಲುವ ಮೂಲಕ ತನ್ನ ಪ್ರಾಬಲ್ಯ ಮೆರೆದಿದೆ.
ರಾಜ್ಯ ಚುನಾವಣಾ ಆಯೋಗದ (SEC) ಅಂಕಿಅಂಶಗಳ ಪ್ರಕಾರ, ಸುರೇಂದ್ರನಗರ, ಜಾಮ್‌ನಗರ, ಪೋರಬಂದರ್, ಆನಂದ್, ನಡಿಯಾದ್, ನವಸಾರಿ, ವಾಪಿ, ಸೂರತ್ ಮತ್ತು ಮೋರ್ಬಿ ಮಹಾನಗರ ಪಾಲಿಕೆಗಳಲ್ಲಿ ಬಿಜೆಪಿ ಸ್ಪಷ್ಟ ಬಹುಮತ ಗಳಿಸಿದೆ.
ಅಹಮದಾಬಾದಿನಲ್ಲಿ ಒಟ್ಟು 192 ಸ್ಥಾನಗಳಲ್ಲಿ ಬಿಜೆಪಿ 146 ಸ್ಥಾನಗಳನ್ನು ಗೆದ್ದರೆ, ಕಾಂಗ್ರೆಸ್ ಕೇವಲ 18 ಸ್ಥಾನಗಳಿಗೆ ತೃಪ್ತಿಪಟ್ಟುಕೊಂಡಿದೆ.
ರಾಜ್‌ಕೋಟ್ ಮತ್ತು ವಡೋದರಾ ಎರಡೂ ಕಡೆ ತಲಾ 65 ಸ್ಥಾನಗಳನ್ನು ಬಿಜೆಪಿ ಗೆದ್ದುಕೊಂಡಿದೆ. ಮುಂದಿನ ವರ್ಷ ನಡೆಯಲಿರುವ ವಿಧಾನಸಭಾ ಚುನಾವಣೆಯ ದೃಷ್ಟಿಯಿಂದ ಈ ಚುನಾವಣೆ ಅತ್ಯಂತ ಮಹತ್ವದ್ದಾಗಿದ್ದು, ಸುಮಾರು 4.18 ಕೋಟಿ ಮತದಾರರು ಈ ಪ್ರಕ್ರಿಯೆಯಲ್ಲಿ ಭಾಗವಹಿಸಿದ್ದರು.
ನಿಮ್ಮ ಕಾಮೆಂಟ್ ಬರೆಯಿರಿ