ನವದೆಹಲಿ: ರಕ್ಷಣಾ ಉತ್ಪಾದನೆ ಮತ್ತು ರಫ್ತು ವಲಯದಲ್ಲಿ ಸ್ವಾವಲಂಬನೆ ಸಾಧಿಸುತ್ತಿರುವ ಭಾರತ, ಆಗ್ನೇಯ ಏಷ್ಯಾ ರಾಷ್ಟ್ರಗಳ ಜೊತೆ ತನ್ನ ರಕ್ಷಣಾ ಸಂಬಂಧವನ್ನು ಮತ್ತಷ್ಟು ಗಟ್ಟಿಗೊಳಿಸಿದೆ. ವಿಯೆಟ್ನಾಂ ದೇಶಕ್ಕೆ ಭಾರತದ ಹೆಮ್ಮೆಯ ‘ಬ್ರಹ್ಮೋಸ್’ ಸೂಪರ್ಸಾನಿಕ್ ಕ್ರೂಸ್ ಕ್ಷಿಪಣಿಗಳನ್ನು ಪೂರೈಸುವ ಬೃಹತ್ ಒಪ್ಪಂದಕ್ಕೆ ಉಭಯ ದೇಶಗಳು ಅಧಿಕೃತವಾಗಿ ಸಹಿ ಹಾಕಿವೆ. ಇದೇ ವೇಳೆ ಇಂಡೋನೇಷ್ಯಾ ಜೊತೆಗಿನ ಕ್ಷಿಪಣಿ ಖರೀದಿ ಒಪ್ಪಂದವೂ ಸಹ ‘ಅಂತಿಮ ಹಂತ’ ತಲುಪಿದೆ ಎಂದು ಭಾರತ ಶನಿವಾರ ಖಚಿತಪಡಿಸಿದೆ.
ಸಿಂಗಾಪುರದಲ್ಲಿ ನಡೆಯುತ್ತಿರುವ ಜಾಗತಿಕ ರಕ್ಷಣಾ ಶೃಂಗಸಭೆ ‘ಶಾಂಗ್ರಿ-ಲಾ ಡೈಲಾಗ್’ನಲ್ಲಿ ಮಾಧ್ಯಮಗಳ ಜೊತೆ ಮಾತನಾಡಿದ ಭಾರತದ ರಕ್ಷಣಾ ಕಾರ್ಯದರ್ಶಿ ರಾಜೇಶಕುಮಾರ ಸಿಂಗ್ ಅವರು ಈ ಮಹತ್ವದ ಬೆಳವಣಿಗೆ ಬಗ್ಗೆ ಮಾಹಿತಿ ನೀಡಿದ್ದಾರೆ.
“ನನ್ನ ಮಾಹಿತಿ ಪ್ರಕಾರ, ಇಂಡೋನೇಷ್ಯಾ ಮತ್ತು ವಿಯೆಟ್ನಾಂ ಎರಡೂ ದೇಶಗಳ ಜೊತೆಗಿನ ರಕ್ಷಣಾ ಒಪ್ಪಂದಗಳು ಅಂತಿಮ ಹಂತದಲ್ಲಿವೆ. ವಿಯೆಟ್ನಾಂ ಜೊತೆಗಿನ ಒಪ್ಪಂದಕ್ಕೆ ಈಗಾಗಲೇ ಸಹಿ ಹಾಕಲಾಗಿದೆ. ಈ ವಿಷಯವನ್ನು ಬಹುಶಃ ಇನ್ನೂ ಸಾರ್ವಜನಿಕವಾಗಿ ಪ್ರಕಟಿಸದೇ ಇರಬಹುದು, ಆದರೆ ಪ್ರಕ್ರಿಯೆ ಪೂರ್ಣಗೊಂಡಿದೆ” ಎಂದು ಅವರು ತಿಳಿಸಿದ್ದಾರೆ.
ಆಸಿಯಾನ್ (ASEAN) ಒಕ್ಕೂಟದ ರಾಷ್ಟ್ರಗಳ ಜೊತೆ ಭಾರತ ಬಲವಾದ ಬದ್ಧತೆಯನ್ನು ಹೊಂದಿದೆ. ಈ ದೇಶಗಳನ್ನು ‘ಸ್ನೇಹಪರ ವಿದೇಶಿ ರಾಷ್ಟ್ರಗಳುʼ ಎಂದು ಪರಿಗಣಿಸುವ ಭಾರತ, ಇಂತಹ ಸುಧಾರಿತ ರಕ್ಷಣಾ ತಂತ್ರಜ್ಞಾನಗಳನ್ನು ಮುಕ್ತವಾಗಿ ಹಂಚಿಕೊಳ್ಳಲು ಸಂತೋಷಪಡುತ್ತದೆ ಎಂದು ಅವರು ಒತ್ತಿಹೇಳಿದ್ದಾರೆ.
ಚೀನಾಕ್ಕೆ ಟಕ್ಕರ್ ನೀಡಲು ‘ಆಕ್ಟ್ ಈಸ್ಟ್’ ನೀತಿ ಜೋರು
ದಕ್ಷಿಣ ಚೀನಾ ಸಮುದ್ರದಲ್ಲಿ ಚೀನಾದ ಪ್ರಭಾವವನ್ನು ಎದುರಿಸಲು ಮತ್ತು ಭಾರತದ ‘ಆಕ್ಟ್ ಈಸ್ಟ್’ (Act East) ನೀತಿಯನ್ನು ಬಲಪಡಿಸಲು ಈ ರಕ್ಷಣಾ ಒಪ್ಪಂದಗಳು ಅತ್ಯಂತ ಕಾರ್ಯತಂತ್ರದ ಹೆಜ್ಜೆಯಾಗಿವೆ. ಪ್ರಸ್ತುತ ಫಿಲಿಪೈನ್ಸ್, ವಿಯೆಟ್ನಾಂ ಮತ್ತು ಇಂಡೋನೇಷ್ಯಾ ದೇಶಗಳು ದಕ್ಷಿಣ ಚೀನಾ ಸಮುದ್ರದಲ್ಲಿನ ಪ್ರಾದೇಶಿಕ ಗಡಿ ವಿವಾದಗಳ ಕಾರಣದಿಂದಾಗಿ ಚೀನಾದ ಜೊತೆ ಉದ್ವಿಗ್ನ ಸಂಬಂಧವನ್ನು ಹೊಂದಿವೆ. ಇಂತಹ ಪರಿಸ್ಥಿತಿಯಲ್ಲಿ ಭಾರತದ ಅತ್ಯಾಧುನಿಕ ಕ್ಷಿಪಣಿಗಳು ಈ ರಾಷ್ಟ್ರಗಳ ರಕ್ಷಣಾ ಸಾಮರ್ಥ್ಯವನ್ನು ಹೆಚ್ಚಿಸಲಿವೆ.
ವಿಯೆಟ್ನಾಂ ಅಧ್ಯಕ್ಷ ತೋ ಲಾಮ್ ಅವರು ಇತ್ತೀಚೆಗೆ ಭಾರತಕ್ಕೆ ನೀಡಿದ್ದ ಮೂರು ದಿನಗಳ ಭೇಟಿಯ ಸಂದರ್ಭದಲ್ಲಿ ಸುಮಾರು $70 ಕೋಟಿ ಡಾಲರ್) ಮೌಲ್ಯದ ಬ್ರಹ್ಮೋಸ್ ಕ್ಷಿಪಣಿ ಖರೀದಿ ಒಪ್ಪಂದದ ಬಗ್ಗೆ ಭಾರತದೊಂದಿಗೆ ಸುಧಾರಿತ ಮಾತುಕತೆ ನಡೆಸಿದ್ದರು. ಈ ಕುರಿತು ವಿದೇಶಾಂಗ ಸಚಿವಾಲಯವೂ ಸಹ ಪ್ರತಿಕ್ರಿಯಿಸಿ, ಭಾರತ ಮತ್ತು ವಿಯೆಟ್ನಾಂ ಹಲವು ರಕ್ಷಣಾ ವೇದಿಕೆಗಳ ಕುರಿತು ಚರ್ಚಿಸುತ್ತಿದ್ದು, ಅದರಲ್ಲಿ ಬ್ರಹ್ಮೋಸ್ ಕೂಡ ಪ್ರಮುಖವಾಗಿದೆ ಎಂದು ತಿಳಿಸಿತ್ತು.
ಮತ್ತೊಂದೆಡೆ, ಇಂಡೋನೇಷ್ಯಾ ಕಳೆದ ಮಾರ್ಚ್ ತಿಂಗಳಿನಲ್ಲಿ ಭಾರತದಿಂದ $200 ಮಿಲಿಯನ್ನಿಂದ $350 ಮಿಲಿಯನ್ ಮೌಲ್ಯದ ಬ್ರಹ್ಮೋಸ್ ಕ್ಷಿಪಣಿ ವ್ಯವಸ್ಥೆಯನ್ನು ಖರೀದಿಸಲು ಮಾತುಕತೆ ಆರಂಭಿಸಿತ್ತು. ಈ ಒಪ್ಪಂದವು ಅಂತಿಮಗೊಂಡರೆ, ಫಿಲಿಪೈನ್ಸ್ ನಂತರ ಭಾರತದಿಂದ ಬ್ರಹ್ಮೋಸ್ ಖರೀದಿಸುವ ಎರಡನೇ ಅಧಿಕೃತ ಅಂತಾರಾಷ್ಟ್ರೀಯ ಗ್ರಾಹಕ ರಾಷ್ಟ್ರವಾಗಿ ಇಂಡೋನೇಷ್ಯಾ ಹೊರಹೊಮ್ಮಲಿದೆ. ಆದರೆ, ಒಪ್ಪಂದದ ಒಟ್ಟು ಮೌಲ್ಯ ಮತ್ತು ಕ್ಷಿಪಣಿ ವ್ಯವಸ್ಥೆಗಳ ನಿಖರ ಸಂಖ್ಯೆಯನ್ನು ಇನ್ನೂ ಅಧಿಕೃತವಾಗಿ ಬಹಿರಂಗಪಡಿಸಲಾಗಿಲ್ಲ.
ಈ ಜಾಗತಿಕ ಒಪ್ಪಂದಗಳಿಂದಾಗಿ ಬ್ರಹ್ಮೋಸ್ ಕ್ಷಿಪಣಿ ಕಾರ್ಯಕ್ರಮಕ್ಕೆ ಬಿಡಿಭಾಗಗಳು ಮತ್ತು ಉಳಿದ ಸಿಸ್ಟಂ ಪೂರೈಸುವ ಹಲವು ಭಾರತೀಯ ರಕ್ಷಣಾ ಕಂಪನಿಗಳಿಗೆ ಭಾರಿ ಆರ್ಥಿಕ ಲಾಭವಾಗಲಿದೆ.
ಗ್ರೀಸ್ ಮೇಲೂ ತರಲಿದೆಯೇ ಹವಾ?
ಇದೇ ವೇಳೆ, ಗ್ರೀಸ್ ದೇಶವು ಸೈಪ್ರಸ್ ಮೂಲಕ ಭಾರತೀಯ ಕ್ಷಿಪಣಿಗಳ ಮೇಲೆ ಕಣ್ಣಿಟ್ಟಿದೆಯೇ ಎಂಬ ಆತಂಕವನ್ನು ತುರ್ಕಿಯ ರಕ್ಷಣಾ ತಜ್ಞರು ವ್ಯಕ್ತಪಡಿಸುತ್ತಿದ್ದು, ಈ ವಲಯದಲ್ಲಿನ ಕಾರ್ಯತಂತ್ರದ ಬದಲಾವಣೆಗಳೂ ಈಗ ಜಾಗತಿಕವಾಗಿ ಗಮನ ಸೆಳೆಯುತ್ತಿವೆ.
ಏನಿದು ‘ಬ್ರಹ್ಮೋಸ್’ ಕ್ಷಿಪಣಿ? ಇದರ ವಿಶೇಷತೆಗಳೇನು?
ಬ್ರಹ್ಮೋಸ್ ವಿಶ್ವದ ಅತ್ಯಂತ ವೇಗದ ಮತ್ತು ಅತ್ಯಾಧುನಿಕ ಸೂಪರ್ಸಾನಿಕ್ ಕ್ರೂಸ್ ಕ್ಷಿಪಣಿಗಳಲ್ಲಿ ಒಂದಾಗಿದೆ. ಇದು ಭಾರತದ ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (DRDO) ಮತ್ತು ರಷ್ಯಾದ ‘ಎನ್ಪಿಒ ಮಾಶಿನೋಸ್ಟ್ರೋಯೇನಿಯಾ’ (NPO Mashinostroyeniya) ಜಂಟಿ ಸಹಯೋಗದಲ್ಲಿ ‘ಬ್ರಹ್ಮೋಸ್ ಏರೋಸ್ಪೇಸ್’ ಸಂಸ್ಥೆಯ ಮೂಲಕ ಅಭಿವೃದ್ಧಿಪಡಿಸಲಾದ ಕ್ಷಿಪಣಿಯಾಗಿದೆ. ಭಾರತದ ಬ್ರಹ್ಮಪುತ್ರ ಮತ್ತು ರಷ್ಯಾದ ಮೊಸ್ಕ್ವಾ ನದಿಗಳ ಹೆಸರನ್ನು ಸೇರಿಸಿ ಇದಕ್ಕೆ ‘ಬ್ರಹ್ಮೋಸ್’ ಎಂದು ಹೆಸರಿಡಲಾಗಿದೆ.
ಅಪ್ರತಿಮ ವೇಗ: ಇದು ಧ್ವನಿಯ ವೇಗಕ್ಕಿಂತ ಸುಮಾರು ಮೂರು ಪಟ್ಟು ವೇಗವಾಗಿ, ಅಂದರೆ ಮ್ಯಾಕ್ 2.8 ರಿಂದ 3.0 (Mach 2.8 to 3.0) ವೇಗದಲ್ಲಿ ಚಲಿಸುತ್ತದೆ. ಇದರಿಂದಾಗಿ ಪ್ರಸ್ತುತ ಜಗತ್ತಿನಲ್ಲಿರುವ ಯಾವುದೇ ವಾಯು ರಕ್ಷಣಾ ವ್ಯವಸ್ಥೆಗಳಿಗೂ (Air Defence Systems) ಇದನ್ನು ತಡೆಯುವುದು ಅಸಾಧ್ಯವಾಗಿದೆ.
ದೂರ ವ್ಯಾಪ್ತಿ (Range): ಇದರ ಮೂಲ ಸಾಮರ್ಥ್ಯ 290 ಕಿ.ಮೀ ಆಗಿದ್ದು, ಇದರ ವಿಸ್ತರಿತ ಆವೃತ್ತಿಯು (Extended Range – ER) 450 ಕಿಮೀ ನಿಂದ 800 ಕಿಮೀ ವರೆಗಿನ ಟಾರ್ಗೆಟ್ ಅನ್ನು ಧ್ವಂಸಗೊಳಿಸಬಲ್ಲದು.
ರಡಾರ್ಗೆ ಸಿಗದ ತಂತ್ರಜ್ಞಾನ: ಶತ್ರುಗಳ ರಡಾರ್ ಕಣ್ಣಿಗೆ ಬೀಳದಂತೆ ತಪ್ಪಿಸಿಕೊಳ್ಳಲು ಇದು ಸಮುದ್ರದ ಮಟ್ಟದಿಂದ ಕೇವಲ 3 ರಿಂದ 10 ಮೀಟರ್ಗಳಷ್ಟು ಕೆಳಮಟ್ಟದಲ್ಲಿ ಹಾರಬಲ್ಲದು (Sea-Skimming). ಹಾಗೆಯೇ ಅಗತ್ಯವಿದ್ದಲ್ಲಿ ಗರಿಷ್ಠ 15 ಕಿ.ಮೀ ಎತ್ತರದಲ್ಲೂ ಹಾರಾಟ ನಡೆಸುವ ಅದ್ಭುತ ಸಾಮರ್ಥ್ಯವನ್ನು ಹೊಂದಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ