ಉದ್ಧವ್‌ ಠಾಕ್ರೆಗೆ ಮಹಾ ಶಾಕ್ : ಶಿಂದೆ ಪಾಳಯ ಸೇರಿದ ಪಕ್ಷದ ಆರು ಬಂಡಾಯ ಸಂಸದರು !

ಮುಂಬೈ: ಮಹಾರಾಷ್ಟ್ರ ರಾಜಕಾರಣದಲ್ಲಿ ಭಾರಿ ಸಂಚಲನ ಮೂಡಿಸಿರುವ ಪ್ರಮುಖ ರಾಜಕೀಯ ಬೆಳವಣಿಗೆಯೊಂದರಲ್ಲಿ, ಶಿವಸೇನಾ (ಯುಬಿಟಿ) ಪಕ್ಷದ ಆರೂ ಜನ ಬಂಡಾಯ ಸಂಸದರು ಸೋಮವಾರ ಮುಂಬೈನಲ್ಲಿ ಮಹಾರಾಷ್ಟ್ರದ ಉಪಮುಖ್ಯಮಂತ್ರಿ ಏಕನಾಥ ಶಿಂದೆ ನೇತೃತ್ವದ ಆಡಳಿತಾರೂಢ ಶಿವಸೇನೆಗೆ ಅಧಿಕೃತವಾಗಿ ಸೇರ್ಪಡೆಯಾಗಿದ್ದಾರೆ. ಇದು ಉದ್ಧವ್ ಠಾಕ್ರೆ ಬಣಕ್ಕೆ ಬಿದ್ದ ಬಲವಾದ ಆಘಾತವಾಗಿದೆ.

ಮುಂಬೈನಲ್ಲಿ  ಸೋಮವಾರ ನಡೆದ ವಿಶೇಷ ಕಾರ್ಯಕ್ರಮದಲ್ಲಿ ಮುಖ್ಯಮಂತ್ರಿ ಏಕನಾಥ ಶಿಂದೆ ಹಾಗೂ ಪಕ್ಷದ ಹಿರಿಯ ನಾಯಕರ ಸಮ್ಮುಖದಲ್ಲಿ ಈ ಸಂಸದರು ಶಿವಸೇನೆಗೆ ಸೇರ್ಪಡೆಯಾಗಿದ್ದಾರೆ.

ಸಂಸದೀಯ ಸಭೆಗೆ ಗೈರಾದ ಐದೇ ದಿನದಲ್ಲಿ ನಿರ್ಧಾರ

ನವದೆಹಲಿಯಲ್ಲಿ ನಡೆದಿದ್ದ ಶಿವಸೇನಾ (ಯುಬಿಟಿ) ಅತ್ಯಂತ ನಿರ್ಣಾಯಕ ಸಂಸದೀಯ ಪಕ್ಷದ ಸಭೆಗೆ ಈ ಆರು ಸಂಸದರು ಗೈರಾಗಿದ್ದರು. ಕೇವಲ ಮೂವರು ಲೋಕಸಭಾ ಸಂಸದರು ಮಾತ್ರ ಹಾಜರಾಗಿದ್ದರು. ಈ ಘಟನೆ ನಡೆದ ಕೇವಲ ಐದು ದಿನಗಳಲ್ಲೇ ಈ ಸಂಸದರು ಶಿಂದೆ ಬಣ ಸೇರಿರುವುದು ಗಮನಾರ್ಹ.

ಶಿಂದೆ ನೇತೃತ್ವದ ಶಿವಸೇನೆ ಸೇರಿದ ಆರು ಬಂಡಾಯ ಸಂಸದರ ವಿವರಗಳು

ಸಂಜಯ ಹರಿಭಾವು ಜಾಧವ್ (ಪರಭಣಿ)

ಭಾವೂಸಾಹೇಬ್ ರಾಜಾರಾಮ ವಕ್ಚೌರೆ (ಶಿರಡಿ)

ಓಂಪ್ರಕಾಶ ರಾಜೇ ನಿಂಬಾಳ್ಕರ್ (ಉಸ್ಮಾನಾಬಾದ್)

ಸಂಜಯ ದಿನಾ ಪಾಟೀಲ್ (ಮುಂಬೈ ಈಶಾನ್ಯ)

ಸಂಜಯ ಉತ್ತಮರಾವ್ ದೇಶಮುಖ (ಯವತ್ಮಾಲ್-ವಾಶಿಮ್)

ನಾಗೇಶ ಬಾಪುರಾವ್ ಶಿಂದೆ ಪಾಟೀಲ್ ಅಷ್ಟಿಕರ್ (ಹಿಂಗೋಲಿ)

ವಿಶೇಷವೆಂದರೆ, ಈ ಆರೂ ಜನ ಸಂಸದರು 2024ರ ಸಾರ್ವತ್ರಿಕ ಚುನಾವಣೆಯಲ್ಲಿ ಬಿಜೆಪಿ ಮತ್ತು ಶಿವಸೇನೆ ಅಭ್ಯರ್ಥಿಗಳ ವಿರುದ್ಧ ಸ್ಪರ್ಧಿಸಿ ಜಯಗಳಿಸಿದ್ದರು. 2024ರ ಚುನಾವಣೆಯಲ್ಲಿ ಶಿವಸೇನಾ (ಯುಬಿಟಿ) ಮಹಾರಾಷ್ಟ್ರದಲ್ಲಿ ಒಟ್ಟು ಒಂಬತ್ತು ಲೋಕಸಭಾ ಸ್ಥಾನಗಳನ್ನು ಗೆದ್ದುಕೊಂಡಿತ್ತು. ಆ ಒಂಬತ್ತರಲ್ಲಿ ಈಗ ಆರು ಜನ ಶಿಂದೆ ಪಾಳಯ ಸೇರಿದ್ದಾರೆ.