ನವದೆಹಲಿ: ಮೆಸೇಜಿಂಗ್ ವೇದಿಕೆಗಳಾದ ಟೆಲಿಗ್ರಾಂ ಮತ್ತು ಸಿಗ್ನಲ್‌ನಲ್ಲಿರುವ ‘ಯೂಸರ್‌ನೇಮ್’ (Username) ವೈಶಿಷ್ಟ್ಯದ ಕುರಿತು ಕೇಂದ್ರ ಸರ್ಕಾರದ ಎಲೆಕ್ಟ್ರಾನಿಕ್ಸ್ ಮತ್ತು ಮಾಹಿತಿ ತಂತ್ರಜ್ಞಾನ ಸಚಿವಾಲಯ (MeitY) ಗುರುವಾರ ನೋಟಿಸ್ ಜಾರಿ ಮಾಡಿದೆ ಎಂದು ವರದಿಯಾಗಿದೆ. ಮೆಟಾ ಒಡೆತನದ ವಾಟ್ಸ್ಆ್ಯಪ್‌ಗೆ ಇದೇ ವೈಶಿಷ್ಟ್ಯದ ಕುರಿತು ಬುಧವಾರ ನೋಟಿಸ್ ನೀಡಿದ ಒಂದು ದಿನದ ಬಳಿಕ ಈ ಬೆಳವಣಿಗೆನಡೆದಿದೆ.
ನೋಟಿಸ್‌ನಲ್ಲಿ, ಮೊಬೈಲ್ ಸಂಖ್ಯೆಯನ್ನು ಹಂಚಿಕೊಳ್ಳದೇ ಬಳಕೆದಾರರು ಪರಸ್ಪರ ಸಂಪರ್ಕ ಸಾಧಿಸಲು ಅವಕಾಶ ನೀಡುವ ‘ಯೂಸರ್‌ನೇಮ್’ ವೈಶಿಷ್ಟ್ಯವನ್ನು ಮುಂದುವರಿಸಲು ಟೆಲಿಗ್ರಾಂ ಮತ್ತು ಸಿಗ್ನಲ್‌ಗೆ ಏಕೆ ಅನುಮತಿ ನೀಡಬೇಕು ಎಂಬುದನ್ನು ಸ್ಪಷ್ಟಪಡಿಸುವಂತೆ ಸಚಿವಾಲಯ ಕೇಳಿದೆ. ಜೊತೆಗೆ, ವಂಚನೆ (Fraud) ಮತ್ತು ಸೋಗು (Impersonation) ಸಂಬಂಧಿತ ಆತಂಕಗಳನ್ನು ಈ ಎರಡು ವೇದಿಕೆಗಳು ಹೇಗೆ ನಿರ್ವಹಿಸುತ್ತಿವೆ ಎಂಬ ಬಗ್ಗೆಯೂ ವಿವರ ನೀಡುವಂತೆ ಸೂಚಿಸಲಾಗಿದೆ.
ಇದಕ್ಕೂ ಮುನ್ನ ಬುಧವಾರ, ವಾಟ್ಸ್ಆ್ಯಪ್ ಪರಿಚಯಿಸಲು ಉದ್ದೇಶಿಸಿರುವ ಹೊಸ ‘ಯೂಸರ್‌ನೇಮ್’ ವೈಶಿಷ್ಟ್ಯದ ಕುರಿತು ಕೇಂದ್ರ ಸರ್ಕಾರ ಮೆಟಾಗೆ ನೋಟಿಸ್ ಜಾರಿ ಮಾಡಿತ್ತು. ಈ ವೈಶಿಷ್ಟ್ಯದಿಂದ ‘ಐಡೆಂಟಿಟಿ ಸ್ಪೂಫಿಂಗ್’ (Identity Spoofing) ಮತ್ತು ಸೋಗು ಪ್ರಕರಣಗಳು ಹೆಚ್ಚಾಗುವ ಸಾಧ್ಯತೆ ಇದೆ ಎಂಬ ಆತಂಕವನ್ನು ಸರ್ಕಾರ ವ್ಯಕ್ತಪಡಿಸಿದೆ. ಈ ಕುರಿತು ಮೂರು ದಿನಗಳೊಳಗೆ ಸಮರ್ಪಕ ವಿವರಣೆ ಸಲ್ಲಿಸುವಂತೆ ಸೂಚಿಸಿರುವ ಸಚಿವಾಲಯ, ತೃಪ್ತಿಕರ ಉತ್ತರ ಸಿಗುವವರೆಗೆ ಈ ವೈಶಿಷ್ಟ್ಯವನ್ನು ಜಾರಿಗೆ ತರಬಾರದು ಎಂದು ಮೆಟಾಗೆ ನಿರ್ದೇಶನ ನೀಡಿದೆ.
ಈ ನೋಟಿಸ್ ಅನ್ನು ಮಾಹಿತಿ ತಂತ್ರಜ್ಞಾನ ಕಾಯ್ದೆ–2000 (Information Technology Act, 2000), ಮಾಹಿತಿ ತಂತ್ರಜ್ಞಾನ (ಮಧ್ಯವರ್ತಿ ಮಾರ್ಗಸೂಚಿಗಳು ಹಾಗೂ ಡಿಜಿಟಲ್ ಮಾಧ್ಯಮ ನೈತಿಕ ಸಂಹಿತೆ) ನಿಯಮಗಳು–2021 (IT Rules, 2021) ಹಾಗೂ ಇತರೆ ಸಂಬಂಧಿತ ಕಾನೂನುಗಳ ಅಡಿಯಲ್ಲಿ ಜಾರಿ ಮಾಡಲಾಗಿದೆ.
ನೋಟಿಸ್‌ನಲ್ಲಿ, “ಈ ವೈಶಿಷ್ಟ್ಯವು ನೈಜ ವ್ಯಕ್ತಿಗಳು ಅಥವಾ ಸಂಸ್ಥೆಗಳ ಹೆಸರನ್ನು ಹೋಲುವ ಯೂಸರ್‌ನೇಮ್‌ಗಳನ್ನು ಬಳಸಲು ಅವಕಾಶ ನೀಡುವ ಮೂಲಕ ಸೋಗು ಮತ್ತು ಐಡೆಂಟಿಟಿ ಸ್ಪೂಫಿಂಗ್‌ಗೆ ದಾರಿ ಮಾಡಿಕೊಡಬಹುದು. ಸಾರ್ವಜನಿಕರು, ಸಾರ್ವಜನಿಕ ಪ್ರಾಧಿಕಾರಗಳು, ಹಣಕಾಸು ಸಂಸ್ಥೆಗಳು ಹಾಗೂ ಸರ್ಕಾರಿ ಸಂಸ್ಥೆಗಳ ಹೆಸರಿನಲ್ಲಿ ವಂಚನೆ ನಡೆಯುವ ಸಾಧ್ಯತೆಯೂ ಇದೆ ” ಎಂದು ಉಲ್ಲೇಖಿಸಲಾಗಿದೆ.
ಇದಕ್ಕೆ ಪ್ರತಿಕ್ರಿಯಿಸಿರುವ ವಾಟ್ಸ್ಆ್ಯಪ್, ವಂಚನೆ ಮತ್ತು ಸೋಗು ತಡೆಯಲು ಹಲವು ಕ್ರಮಗಳನ್ನು ಕೈಗೊಂಡಿರುವುದಾಗಿ ತಿಳಿಸಿದೆ. ಜೊತೆಗೆ, ವೇದಿಕೆಯನ್ನು ಬಳಸಲು ಬಳಕೆದಾರರಿಗೆ ಮೊಬೈಲ್ ಸಂಖ್ಯೆ ಇನ್ನೂ ಕಡ್ಡಾಯವಾಗಿಯೇ ಇರುತ್ತದೆ ಎಂದು ಸ್ಪಷ್ಟಪಡಿಸಿದೆ.
ಮೊದಲ ಬಾರಿಗೆ ಸಂದೇಶ ಕಳುಹಿಸುವ ವ್ಯಕ್ತಿ ಹೊಸ ಖಾತೆಯವರೇ, ಈಗಾಗಲೇ ಸಂಪರ್ಕದಲ್ಲಿರುವವರೇ, ಪರಸ್ಪರ ಸಾಮಾನ್ಯ ಗುಂಪಿನ ಸದಸ್ಯರೇ ಅಥವಾ ಬೇರೆ ದೇಶದಿಂದ ಸಂದೇಶ ಕಳುಹಿಸುತ್ತಿರುವವರೇ ಎಂಬ ಮಾಹಿತಿಯನ್ನು ಬಳಕೆದಾರರಿಗೆ ತೋರಿಸಲಾಗುತ್ತದೆ ಎಂದು ವಾಟ್ಸ್ಆ್ಯಪ್ ಹೇಳಿದೆ.
“ಇತರರು ನಿಮಗೆ ಸಂದೇಶ ಕಳುಹಿಸಲು ನಿಮ್ಮ ನಿಖರವಾದ ಯೂಸರ್‌ನೇಮ್ ತಿಳಿದಿರಬೇಕು. ಹೊಸದಾಗಿ ಪರಿಚಯವಿಲ್ಲದ ಹೆಚ್ಚಿನ ಜನರಿಗೆ ಒಂದೇ ಖಾತೆಯಿಂದ ಸಂದೇಶ ಕಳುಹಿಸುವುದಕ್ಕೆ ಮಿತಿಯನ್ನು ವಿಧಿಸಲಾಗುತ್ತದೆ. ಯಾರಾದರೂ ಯೂಸರ್‌ನೇಮ್ ಅನ್ನು ಊಹಿಸಿ ನಿರಂತರವಾಗಿ ಪ್ರಯತ್ನಿಸಿದರೆ ಅದನ್ನು ತಡೆಯಲಾಗುತ್ತದೆ. ಸೋಗು ಹಾಗೂ ದುರ್ಬಳಕೆಯ ಮಾದರಿಗಳನ್ನು ಪತ್ತೆಹಚ್ಚಿ ಅವನ್ನು ತೆಗೆದುಹಾಕುವ ವ್ಯವಸ್ಥೆಗಳೂ ನಮ್ಮಲ್ಲಿವೆ,” ಎಂದು ಮೆಟಾ ತನ್ನ ಪ್ರಕಟಣೆಯಲ್ಲಿ ತಿಳಿಸಿದೆ.
ಇದೇ ವೇಳೆ, ಟೆಲಿಗ್ರಾಂ ಕಳೆದ ಕೆಲವು ಸಮಯದಿಂದಲೇ ಕೇಂದ್ರ ಸರ್ಕಾರದ ನಿಗಾದಲ್ಲಿದೆ. ಕಳೆದ ತಿಂಗಳು ರಾಷ್ಟ್ರೀಯ ಅರ್ಹತಾ ಮತ್ತು ಪ್ರವೇಶ ಪರೀಕ್ಷೆ (NEET) ಪ್ರಶ್ನೆಪತ್ರಿಕೆ ಸೋರಿಕೆ ಹಾಗೂ ನಕಲಿ ಪ್ರಶ್ನೆಪತ್ರಿಕೆಗಳ ಪ್ರಸಾರಕ್ಕೆ ಈ ವೇದಿಕೆಯನ್ನು ಬಳಸುವ ಸಾಧ್ಯತೆ ಇರುವ ಆತಂಕದ ಹಿನ್ನೆಲೆಯಲ್ಲಿ ಟೆಲಿಗ್ರಾಂಗೆ ಒಂದು ವಾರದ ನಿಷೇಧ ಹೇರಲಾಗಿತ್ತು. ಬಳಿಕ ಜೂನ್ 22ರಂದು ನಿಷೇಧದ ಅವಧಿ ಮುಗಿದ ನಂತರ ಟೆಲಿಗ್ರಾಂ ಸೇವೆಗಳನ್ನು ಮರುಸ್ಥಾಪಿಸಲಾಗಿತ್ತು.
ನಿಮ್ಮ ಕಾಮೆಂಟ್ ಬರೆಯಿರಿ