ನವದೆಹಲಿ: ಇಂಡೋನೇಷ್ಯಾ ಪ್ರವಾಸದಲ್ಲಿರುವ ಪ್ರಧಾನಿ ನರೇಂದ್ರ ಮೋದಿ ಅವರು ಇಂಡೋನೇಷ್ಯಾ ಸಂಸತ್ತನ್ನು ಉದ್ದೇಶಿಸಿ ಮಾತನಾಡುವ ವೇಳೆ ಒಡಿಶಾದ ಮಾಜಿ ಮುಖ್ಯಮಂತ್ರಿ ಹಾಗೂ ಖ್ಯಾತ ನಾಯಕ ದಿವಂಗತ ಬಿಜು ಪಟ್ನಾಯಕ್ ಅವರ ಸಾಹಸ ಮತ್ತು ಇಂಡೋನೇಷ್ಯಾದ ಸ್ವಾತಂತ್ರ್ಯ ಹೋರಾಟದಲ್ಲಿ ಅವರು ವಹಿಸಿದ್ದ ಮಹತ್ವದ ಪಾತ್ರವನ್ನು ಕೊಂಡಾಡಿದ್ದಾರೆ.
ಪ್ರಧಾನಿ ಮೋದಿ ತಮ್ಮ ಭಾಷಣದಲ್ಲಿ, “ಇಂಡೋನೇಷ್ಯಾ 1945ರಲ್ಲಿ ಮತ್ತು ಭಾರತ 1947ರಲ್ಲಿ ಸ್ವಾತಂತ್ರ್ಯ ಪಡೆದವು. ಎರಡೂ ರಾಷ್ಟ್ರಗಳು ಒಂದೇ ಕಾಲಘಟ್ಟದಲ್ಲಿ ಸ್ವಾತಂತ್ರ್ಯವನ್ನು ಪಡೆದಿವೆ. ಇಂಡೋನೇಷ್ಯಾದ ಸ್ವಾತಂತ್ರ್ಯ ಚಳವಳಿಗೆ ಭಾರತವು ವಿಶ್ವಸಂಸ್ಥೆಯಲ್ಲಿ ಪ್ರಬಲ ಬೆಂಬಲದ ಧ್ವನಿಯಾಗಿ ನಿಂತಿತ್ತು” ಎಂದು ಹೇಳಿದರು.
ಅದೇ ವೇಳೆ, “ಆ ಸಮಯದಲ್ಲಿ ಗೌರವಾನ್ವಿತ ಬಿಜು ಪಟ್ನಾಯಕ್ ಅವರು ವಹಿಸಿದ ಪಾತ್ರ ಅತ್ಯಂತ ಮಹತ್ವದ್ದಾಗಿತ್ತು. ಇಂಡೋನೇಷ್ಯಾದ ಪ್ರಧಾನಿ ಸುತಾನ್ ಶಹ್ರಿರ್ ಹಾಗೂ ಉಪಾಧ್ಯಕ್ಷ ಮೊಹಮ್ಮದ್ ಹಟ್ಟಾ ಅವರನ್ನು ಸುರಕ್ಷಿತವಾಗಿ ಭಾರತಕ್ಕೆ ಕರೆತಂದ ಘಟನೆ ಭಾರತ ಮತ್ತು ಇಂಡೋನೇಷ್ಯಾ ನಡುವಿನ ಸಂಬಂಧವನ್ನು ಮತ್ತಷ್ಟು ಬಲಪಡಿಸಿತು” ಎಂದು ಪ್ರಧಾನಿ ಮೋದಿ ನೆನಪಿಸಿದರು.
ರಾಜಕೀಯ ಪ್ರವೇಶಿಸುವ ಮೊದಲು ಮತ್ತು ಒಡಿಶಾದ ಮುಖ್ಯಮಂತ್ರಿಯಾಗುವ ಮುನ್ನ ಬಿಜು ಪಟ್ನಾಯಕ್ ಭಾರತೀಯ ವಾಯುಪಡೆಯ ಸಾಹಸಿ ಪೈಲಟ್ ಆಗಿದ್ದರು. ಇಂಡೋನೇಷ್ಯಾ 1945ರಲ್ಲೇ ಸ್ವಾತಂತ್ರ್ಯ ಘೋಷಿಸಿದ್ದರೂ, 1947ರಲ್ಲಿ ಡಚ್ ವಸಾಹತುಶಾಹಿ ಪಡೆಗಳ ವಿರುದ್ಧ ಸಶಸ್ತ್ರ ಸಂಘರ್ಷ ಮುಂದುವರಿದಿತ್ತು. ಆ ಸಂದರ್ಭದಲ್ಲಿ ಭಾರತದ ಮೊದಲ ಪ್ರಧಾನಿ ಜವಾಹರಲಾಲ್ ನೆಹರೂ ಅವರು ಇಂಡೋನೇಷ್ಯಾದ ಪ್ರಧಾನಿ ಸುತಾನ್ ಶಹ್ರಿರ್ ಹಾಗೂ ಉಪಾಧ್ಯಕ್ಷ ಮೊಹಮ್ಮದ್ ಹಟ್ಟಾ ಅವರನ್ನು ಡಚ್ ಸೇನೆಯ ದಿಗ್ಬಂಧನದಿಂದ ರಕ್ಷಿಸುವ ವಿಶೇಷ ಕಾರ್ಯಾಚರಣೆ ನಡೆಸುವಂತೆ ಆದೇಶಿಸಿದ್ದರು.
ಇಂಡೋನೇಷ್ಯಾವನ್ನು ಮರಳಿ ಪಡೆಯಲು ಡಚ್ ಪಡೆಗಳು ಭಾರೀ ಸೇನಾ ದಾಳಿ ನಡೆಸಿದ್ದವು. ಈ ವೇಳೆ ದೇಶದ ಪ್ರಮುಖ ನಾಯಕರು ಸೇರಿದಂತೆ ಸುತಾನ್ ಶಹ್ರಿರ್ ಮತ್ತು ಮೊಹಮ್ಮದ್ ಹಟ್ಟಾ ಅವರನ್ನು ಗೃಹಬಂಧನದಲ್ಲಿರಿಸಲಾಗಿತ್ತು. ಕಾರ್ಯಾಚರಣೆಯ ಮೂಲಕ ಅವರನ್ನು ರಕ್ಷಿಸುವ ಜವಾಬ್ದಾರಿಯನ್ನು ಬಿಜು ಪಟ್ನಾಯಕ್ ಅವರಿಗೆ ನೀಡಲಾಗಿತ್ತು. ಅವರು ತಮ್ಮ ಸಹ ಪೈಲಟ್ ಹಾಗೂ ಪತ್ನಿ ಗ್ಯಾನವತಿ ಪಟ್ನಾಯಕ್ ಅವರ ಜೊತೆ ಡಗ್ಲಸ್ ಸಿ-47 (ಡಕೋಟಾ) ಮಿಲಿಟರಿ ವಿಮಾನದಲ್ಲಿ ಇಂಡೋನೇಷ್ಯಾಕ್ಕೆ ತೆರಳಿ, ಸುತಾನ್ ಶಹ್ರಿರ್ ಮತ್ತು ಮೊಹಮ್ಮದ್ ಹಟ್ಟಾ ಅವರನ್ನು ಸಿಂಗಾಪುರ ಮಾರ್ಗವಾಗಿ ಸುರಕ್ಷಿತವಾಗಿ ಭಾರತಕ್ಕೆ ಕರೆತಂದಿದ್ದರು. ಈ ಕಾರ್ಯಾಚರಣೆಯ ವೇಳೆ ಡಚ್ ಪಡೆಗಳು ವಿಮಾನವನ್ನು ಹೊಡೆದುರುಳಿಸುವುದಾಗಿ ಬೆದರಿಕೆ ಹಾಕಿದ್ದವು. ಅದಕ್ಕೆ ಪ್ರತಿಯಾಗಿ, ಭಾರತದಿಂದ ಸೂಕ್ತ ಪ್ರತಿದಾಳಿ ನಡೆಯಲಿದೆ ಎಂದು ಬಿಜು ಪಟ್ನಾಯಕ್ ಎಚ್ಚರಿಕೆ ನೀಡಿದ್ದರೆಂದು ವರದಿಗಳು ತಿಳಿಸಿವೆ.
ಇಂಡೋನೇಷ್ಯಾದ ಸ್ವಾತಂತ್ರ್ಯ ಹೋರಾಟಕ್ಕೆ ನೀಡಿದ ಅಮೂಲ್ಯ ಕೊಡುಗೆಯನ್ನು ಗೌರವಿಸಿ, ಬಳಿಕ ಇಂಡೋನೇಷ್ಯಾ ಸರ್ಕಾರವು ಬಿಜು ಪಟ್ನಾಯಕ್ ಅವರಿಗೆ ಗೌರವ ಪೌರತ್ವವನ್ನು ನೀಡಿ ಸನ್ಮಾನಿಸಿತ್ತು.
“ಸುವರ್ಣ ಅಧ್ಯಾಯ” ಆರಂಭ
ಭಾರತ ಮತ್ತು ಇಂಡೋನೇಷ್ಯಾ ನಡುವಿನ ಸಂಬಂಧವು ಈಗ ಹೊಸ “ಸುವರ್ಣ ಅಧ್ಯಾಯ”ಕ್ಕೆ ಕಾಲಿಡುತ್ತಿದೆ ಎಂದು ಪ್ರಧಾನಿ ಮೋದಿ ಹೇಳಿದರು. ಈ ಹೊಸ ಸಹಭಾಗಿತ್ವವು 21ನೇ ಶತಮಾನ ಹಾಗೂ ಸಮಗ್ರ ಮಾನವಕುಲದ ಭವಿಷ್ಯದ ಮೇಲೆ ಆಳವಾದ ಸಕಾರಾತ್ಮಕ ಪರಿಣಾಮ ಬೀರಲಿದೆ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದರು.
ಇಂಡೋನೇಷ್ಯಾ ಅಧ್ಯಕ್ಷ ಪ್ರಬೋವೋ ಸುಬಿಯಾಂತೋ ಅವರ ಜೊತೆ ನಡೆದ ವ್ಯಾಪಕ ದ್ವಿಪಕ್ಷೀಯ ಮಾತುಕತೆಗಳ ಬಳಿಕ, ಭಾರತ ಮತ್ತು ಇಂಡೋನೇಷ್ಯಾ ಹಲವು ಹೊಸ ಕ್ಷೇತ್ರಗಳಲ್ಲಿ ಸಹಕಾರವನ್ನು ವಿಸ್ತರಿಸಲು ನಿರ್ಧರಿಸಿವೆ. ಈ ವ್ಯಾಪ್ತಿಯಲ್ಲಿ ರಕ್ಷಣಾ ಕ್ಷೇತ್ರ, ತಂತ್ರಜ್ಞಾನ, ಆರೋಗ್ಯ ಸೇವೆ, ಸಾಗರ ಭದ್ರತೆ, ಶಿಕ್ಷಣ, ಪ್ರಮುಖ ಖನಿಜಗಳು (ಕ್ರಿಟಿಕಲ್ ಮಿನರಲ್ಸ್) ಹಾಗೂ ಡಿಜಿಟಲ್ ಸಂಪರ್ಕ ಸೇರಿದಂತೆ ಹಲವು ಕ್ಷೇತ್ರಗಳು ಸೇರಿವೆ ಎಂದು ಉಭಯ ನಾಯಕರು ಘೋಷಿಸಿದರು.
ನಿಮ್ಮ ಕಾಮೆಂಟ್ ಬರೆಯಿರಿ