ಲಕ್ನೋ : ಶಾಲೆ ನಿಗದಿಪಡಿಸಿರುವ ಸಮವಸ್ತ್ರದ ಜೊತೆಗೆ ಹಿಜಾಬ್ (ತಲೆ ಸ್ಕಾರ್ಫ್) ಧರಿಸಲು ಅನುಮತಿ ನೀಡುವಂತೆ ಕೋರಿ ಮುಸ್ಲಿಂ ವಿದ್ಯಾರ್ಥಿನಿಯೊಬ್ಬರು ಸಲ್ಲಿಸಿದ್ದ ಅರ್ಜಿಯನ್ನು ಅಲಹಾಬಾದ್ ಹೈಕೋರ್ಟ್ ತಿರಸ್ಕರಿಸಿದೆ. ಹಿಜಾಬ್ ಧರಿಸುವುದು ಇಸ್ಲಾಂ ಧರ್ಮದ ಅವಿಭಾಜ್ಯ ಮತ್ತು ಕಡ್ಡಾಯ ಆಚರಣೆ ಎಂಬುದನ್ನು ಸಾಬೀತುಪಡಿಸುವ ಸಮರ್ಪಕ ದಾಖಲೆಗಳನ್ನು ಅರ್ಜಿದಾರರು ಸಲ್ಲಿಸಿಲ್ಲ ಎಂದು ನ್ಯಾಯಾಲಯ ಅಭಿಪ್ರಾಯಪಟ್ಟಿದೆ.
ಆಗಸ್ಟ್ 21ರಂದು ನ್ಯಾಯಮೂರ್ತಿಗಳಾದ ಜೆ.ಜೆ. ಮುನೀರ್ ಹಾಗೂ ಇಂದ್ರಜೀತ ಶುಕ್ಲಾ ಅವರಿದ್ದ ವಿಭಾಗೀಯ ಪೀಠ ಈ ಮಹತ್ವದ ತೀರ್ಪು ನೀಡಿದೆ. ಮಹಿಳೆಯೊಬ್ಬಳು ಹಿಜಾಬ್ ಅಥವಾ ತಲೆ ಸ್ಕಾರ್ಫ್ ಧರಿಸುವುದು ಇಸ್ಲಾಂ ಧರ್ಮದ ಅವಿಭಾಜ್ಯ ಆಚರಣೆ ಎಂಬುದನ್ನು ವಿವಿಧ ಹೈಕೋರ್ಟ್ಗಳು ಒಪ್ಪಿಕೊಂಡಿಲ್ಲ ಎಂದು ನ್ಯಾಯಾಲಯ ಗಮನಿಸಿದೆ.
ಇದೇ ವೇಳೆ, ಶಾಲೆಗಳಲ್ಲಿ ಹಿಜಾಬ್ ಧರಿಸುವುದನ್ನು ವಿರೋಧಿಸಿ ಕರ್ನಾಟಕ ಹೈಕೋರ್ಟ್ ನೀಡಿದ್ದ ತೀರ್ಪು ಇನ್ನೂ ಪ್ರಭಾವದಲ್ಲಿದೆ ಎಂದು ಅಲಹಾಬಾದ್ ಹೈಕೋರ್ಟ್ ಸ್ಪಷ್ಟಪಡಿಸಿದೆ. ಕರ್ನಾಟಕ ಹೈಕೋರ್ಟ್ನ ಪೂರ್ಣ ಪೀಠದ ತೀರ್ಪು ವಿರುದ್ಧ ಸಲ್ಲಿಕೆಯಾಗಿದ್ದ ಮೇಲ್ಮನವಿಯಲ್ಲಿ ಸುಪ್ರೀಂ ಕೋರ್ಟ್ನಲ್ಲಿ ವಿಭಜಿತ ತೀರ್ಪು ಬಂದಿದ್ದು, ಅಂತಿಮ ನಿರ್ಣಯ ಇನ್ನೂ ಹೊರಬಂದಿಲ್ಲ. ಆದ್ದರಿಂದ ಕರ್ನಾಟಕ ಹೈಕೋರ್ಟ್ನ ತೀರ್ಪು ಪ್ರಬಲ ಮಾರ್ಗದರ್ಶಕ ತೀರ್ಪಾಗಿ ಉಳಿದಿದೆ ಎಂದು ನ್ಯಾಯಾಲಯ ಹೇಳಿದೆ.
ಅರ್ಜಿದಾರ ವಿದ್ಯಾರ್ಥಿನಿ, ತಾನು ಆರನೇ ತರಗತಿಯಿಂದಲೇ ಹಿಜಾಬ್ ಧರಿಸುತ್ತಾ ಬಂದಿದ್ದೇನೆ ಮತ್ತು ಅದು ತನ್ನ ಧಾರ್ಮಿಕ ನಂಬಿಕೆಯ ಭಾಗ ಎಂದು ವಾದಿಸಿದ್ದರು. ಆದರೆ, ಕೇವಲ ವೈಯಕ್ತಿಕ ಹೇಳಿಕೆ ಆಧರಿಸಿ ಸಂವಿಧಾನದ 25ನೇ ವಿಧಿಯಡಿ ಧಾರ್ಮಿಕ ಹಕ್ಕುಗಳ ರಕ್ಷಣೆಯನ್ನು ಕೋರುವುದಕ್ಕೆ ಸಾಧ್ಯವಿಲ್ಲ ಎಂದು ನ್ಯಾಯಾಲಯ ಹೇಳಿದೆ.
“ತರಗತಿ ಕೊಠಡಿಯಲ್ಲಿ ತಲೆ ಸ್ಕಾರ್ಫ್ ಧರಿಸುವುದು ಧಾರ್ಮಿಕವಾಗಿ ಕಡ್ಡಾಯ ಆಚರಣೆ ಎಂಬುದನ್ನು ತೋರಿಸುವ ಯಾವುದೇ ಅಧಿಕೃತ ಧಾರ್ಮಿಕ ಗ್ರಂಥ, ದಾಖಲೆ ಅಥವಾ ಸಾಕ್ಷ್ಯವನ್ನು ಅರ್ಜಿದಾರರು ಸಲ್ಲಿಸಿಲ್ಲ. ಅದನ್ನು ಪಾಲಿಸದಿದ್ದರೆ ಅವರ ಧರ್ಮದ ಮೂಲ ಸ್ವರೂಪವೇ ಬದಲಾಗುತ್ತದೆ ಎಂಬುದಕ್ಕೂ ಯಾವುದೇ ಆಧಾರವಿಲ್ಲ” ಎಂದು ಪೀಠ ತಿಳಿಸಿದೆ.
ಅಲ್ಲದೆ, “ನಾನು ಬಾಲ್ಯದಿಂದಲೇ ಹಿಜಾಬ್ ಧರಿಸುತ್ತಿದ್ದೇನೆ, ಆರನೇ ತರಗತಿಯಿಂದ ಶಾಲೆಯಲ್ಲಿ ಅದನ್ನು ಅನುಸರಿಸುತ್ತಿದ್ದೇನೆ” ಎಂಬ ಹೇಳಿಕೆಯ ಹೊರತಾಗಿ ಅಗತ್ಯವಾದ ವಾಸ್ತವಿಕ ಹಾಗೂ ಕಾನೂನು ಆಧಾರಿತ ವಾದಗಳನ್ನು ಅರ್ಜಿಯಲ್ಲಿ ಮಂಡಿಸಲಾಗಿಲ್ಲ ಎಂದು ನ್ಯಾಯಾಲಯ ಹೇಳಿದೆ.
ಶಾಲೆಯ ಸಮವಸ್ತ್ರ ನಿಯಮಗಳು ಎಲ್ಲ ವಿದ್ಯಾರ್ಥಿಗಳಿಗೂ ಸಮಾನವಾಗಿ ಅನ್ವಯವಾಗುವಂತಿದ್ದು, ಅವು ಸದುದ್ದೇಶದಿಂದ ರೂಪಿಸಲ್ಪಟ್ಟಿದ್ದರೆ, ತಾರತಮ್ಯರಹಿತವಾಗಿದ್ದರೆ ಹಾಗೂ ಶಿಸ್ತು ಮತ್ತು ಸಂಸ್ಥೆಯ ಗುರುತನ್ನು ಕಾಪಾಡುವ ಉದ್ದೇಶ ಹೊಂದಿದ್ದರೆ, ಸಮವಸ್ತ್ರವನ್ನು ನಿರ್ಧರಿಸುವ ಹಕ್ಕು ಮುಖ್ಯವಾಗಿ ಶಾಲೆಯ ಆಡಳಿತದ ವ್ಯಾಪ್ತಿಗೆ ಸೇರಿದೆ ಎಂದು ನ್ಯಾಯಾಲಯ ಅಭಿಪ್ರಾಯಪಟ್ಟಿದೆ.
ಈ ಪ್ರಕರಣವು ಪ್ರಯಾಗರಾಜ್ನ ಅಟ್ಟರ್ಸುಯಿಯಾ ಪ್ರದೇಶದಲ್ಲಿರುವ ಟ್ಯಾಗೋರ್ ಪಬ್ಲಿಕ್ ಸ್ಕೂಲ್ನ ವಿದ್ಯಾರ್ಥಿನಿಯೊಬ್ಬರು ಸಲ್ಲಿಸಿದ್ದ ಅರ್ಜಿಗೆ ಸಂಬಂಧಿಸಿದೆ. ಹನ್ನೊಂದನೇ ತರಗತಿಗೆ ಪ್ರವೇಶ ಪಡೆಯಲು ಯತ್ನಿಸಿದ ವೇಳೆ ಹಿಜಾಬ್ ಧರಿಸಿ ಬರಲು ಅವಕಾಶ ಇಲ್ಲ ಎಂದು ಶಾಲಾ ಆಡಳಿತ ತಿಳಿಸಿದ್ದರಿಂದ ಆಕೆ ನ್ಯಾಯಾಲಯದ ಮೊರೆ ಹೋಗಿದ್ದರು.
ತಾನು ಆರನೇ ತರಗತಿಯಿಂದಲೇ ಹಿಜಾಬ್ ಧರಿಸುತ್ತಾ ಬಂದಿದ್ದೇನೆ ಎಂದು ವಿದ್ಯಾರ್ಥಿನಿ ವಾದಿಸಿದರೆ, ಶಾಲೆ ಆಡಳಿತವು ನಿಗದಿಪಡಿಸಿರುವ ಸಮವಸ್ತ್ರಕ್ಕೆ ಹೆಚ್ಚುವರಿಯಾಗಿ ತಲೆ ಸ್ಕಾರ್ಫ್ ಧರಿಸುವುದು ಸಮವಸ್ತ್ರ ನಿಯಮಗಳಿಗೆ ವಿರುದ್ಧವಾಗುತ್ತದೆ ಎಂದು ಪ್ರತಿಪಾದಿಸಿತ್ತು. ಈ ಕುರಿತು ನ್ಯಾಯಾಲಯ, ಹಿಂದೆ ಶಾಲೆಯು ಹಿಜಾಬ್ ಧರಿಸುವುದಕ್ಕೆ ಆಕ್ಷೇಪ ವ್ಯಕ್ತಪಡಿಸದೇ ಇದ್ದಿದ್ದರೂ, ಅದರಿಂದ ವಿದ್ಯಾರ್ಥಿನಿಗೆ ಶಾಶ್ವತ ಅಥವಾ ಜಾರಿಗೆ ಬರುವ ಹಕ್ಕು ಸೃಷ್ಟಿಯಾಗುವುದಿಲ್ಲ ಎಂದು ಹೇಳಿದೆ.
ಶಾಲೆಗೆ ಅಗತ್ಯವಿದ್ದಲ್ಲಿ ತನ್ನ ಸಮವಸ್ತ್ರ ನೀತಿಯನ್ನು ಬದಲಾಯಿಸುವ ಮತ್ತು ಉಡುಪು ನಿಯಮಗಳನ್ನು ಪರಿಷ್ಕರಿಸುವ ಹಕ್ಕು ಇದೆ ಎಂದು ಹೇಳಿದ ನ್ಯಾಯಾಲಯ, ಸಮವಸ್ತ್ರದ ಮಹತ್ವವನ್ನೂ ವಿವರಿಸಿದೆ. “ಶಾಲಾ ಸಮವಸ್ತ್ರವು ಶಿಸ್ತು ಬೆಳೆಸುತ್ತದೆ, ವಿದ್ಯಾರ್ಥಿಗಳಲ್ಲಿ ಸಮಾನತೆಯ ಭಾವನೆ ಮೂಡಿಸುತ್ತದೆ, ಶಿಕ್ಷಣ ಸಂಸ್ಥೆಯ ಗುರುತನ್ನು ಬಲಪಡಿಸುತ್ತದೆ ಹಾಗೂ ತರಗತಿ ಕೊಠಡಿಯಲ್ಲಿ ಆರ್ಥಿಕ ಅಥವಾ ಸಾಮಾಜಿಕ ಭೇದಗಳನ್ನು ಕಡಿಮೆ ಮಾಡುತ್ತದೆ. ಎಲ್ಲ ಧರ್ಮಗಳ ವಿದ್ಯಾರ್ಥಿಗಳಿಗೆ ಸಮಾನವಾಗಿ ಅನ್ವಯವಾಗುವ ಸಮವಸ್ತ್ರ ನಿಯಮವು ಧರ್ಮನಿರಪೇಕ್ಷ ವಾತಾವರಣವನ್ನು ನಿರ್ಮಿಸುತ್ತದೆ” ಎಂದು ನ್ಯಾಯಾಲಯ ಅಭಿಪ್ರಾಯಪಟ್ಟಿದೆ.
ಮುಸ್ಲಿಂ ಮಹಿಳೆಯರಿಗೆ ಹಿಜಾಬ್ ಧರಿಸುವುದು ಧರ್ಮದ ಅವಿಭಾಜ್ಯ ಭಾಗ ಎಂಬುದನ್ನು ಸಾಬೀತುಪಡಿಸುವ ಯಾವುದೇ ದಾಖಲೆಗಳು ನ್ಯಾಯಾಲಯದ ಮುಂದೆ ಇರಿಸಲ್ಪಟ್ಟಿಲ್ಲ ಎಂದು ಪೀಠ ಹೇಳಿದೆ. “ಈ ವಿಷಯದಲ್ಲಿ ಈಗಾಗಲೇ ಅಸ್ತಿತ್ವದಲ್ಲಿರುವ ನ್ಯಾಯಾಂಗ ತೀರ್ಪುಗಳೇ ಅರ್ಜಿದಾರರ ವಾದಕ್ಕೆ ವಿರುದ್ಧವಾಗಿವೆ,” ಎಂದು ನ್ಯಾಯಾಲಯ ಉಲ್ಲೇಖಿಸಿದೆ. ಈ ಹಿನ್ನೆಲೆಯಲ್ಲಿ ವಿದ್ಯಾರ್ಥಿನಿಯ ಅರ್ಜಿಯನ್ನು ಹೈಕೋರ್ಟ್ ವಜಾಗೊಳಿಸಿದೆ.
ಪ್ರಕರಣದಲ್ಲಿ ಅರ್ಜಿದಾರರ ಪರವಾಗಿ ಅಡ್ವೊಕೇಟ್ ಮೊಹಮ್ಮದ್ ಮೊನಿಸ್ ವಾದ ಮಂಡಿಸಿದರೆ, ರಾಜ್ಯ ಸರ್ಕಾರದ ಪರವಾಗಿ ಹೆಚ್ಚುವರಿ ಮುಖ್ಯ ಸ್ಥಾಯಿ ವಕೀಲ ಗಿರಿಜೇಶಕುಮಾರ ತ್ರಿಪಾಠಿ ಹಾಜರಾಗಿದ್ದರು.
ನಿಮ್ಮ ಕಾಮೆಂಟ್ ಬರೆಯಿರಿ