ಮುಂಬೈ : ಭಾರತದ ಮುಕ್ತ ನೀರಿನ (Open Water) ಈಜುಗಾರ ಅಂಶುಮಾನ ಜಿಂಗ್ರಾನ್ ಮತ್ತೊಂದು ಐತಿಹಾಸಿಕ ಸಾಧನೆ ಮಾಡಿ ಎರಡನೇ ಗಿನ್ನೆಸ್ ವಿಶ್ವ ದಾಖಲೆ (Guinness World Records) ತಮ್ಮದಾಗಿಸಿಕೊಂಡಿದ್ದಾರೆ. ಅಂತಾರಾಷ್ಟ್ರೀಯ ಮುಕ್ತ ನೀರಿನ ಈಜು (ಸಾಗರ, ನದಿ, ಸರೋವರ ಅಥವಾ ಜಲಾಶಯಗಳಂತಹ ನೈಸರ್ಗಿಕ ಹೊರಾಂಗಣ ನೀರಿನ ಪ್ರದೇಶ) ಕ್ಷೇತ್ರದ ಅತ್ಯಂತ ಕಠಿಣ ಸವಾಲುಗಳಲ್ಲಿ ಒಂದಾದ “ಓಶನ್ಸ್ ಸೆವನ್” (Oceans Seven) ಅನ್ನು ಪೂರ್ಣಗೊಳಿಸಿದ ಅತ್ಯಂತ ಕಿರಿಯ ಎಂಬ ಗೌರವ ಅವರಿಗೆ ಲಭಿಸಿದೆ.
ನವಿ ಮುಂಬೈ ಮೂಲದ ಅಂಶುಮಾನ, ಕೇವಲ 21 ವರ್ಷ 109 ದಿನಗಳ ವಯಸ್ಸಿನಲ್ಲಿ ಓಶನ್ಸ್ ಸೆವನ್ ಸವಾಲನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದ್ದಾರೆ. 2026ರ ಜೂನ್ 30ರಂದು ಜಪಾನ್ನ ತ್ಸುಗರು ಜಲಸಂಧಿ (Tsugaru Strait) ದಾಟುವ ಮೂಲಕ ಅವರು ತಮ್ಮ ಏಳನೇ ಹಾಗೂ ಅಂತಿಮ ಸಮುದ್ರ ಸವಾಲನ್ನು ಮುಗಿಸಿ ಈ ಐತಿಹಾಸಿಕ ಸಾಧನೆ ಮಾಡಿದ್ದಾರೆ.
ಈ ಸಾಧನೆಯೊಂದಿಗೆ ಅಂಶುಮಾನ ಅವರು, ಓಶನ್ಸ್ ಸೆವನ್ ಪೂರ್ಣಗೊಳಿಸಿದ ವಿಶ್ವದ ಆಯ್ದ ಮ್ಯಾರಥಾನ್ ಮುಕ್ತಜಲ ಈಜುಗಾರರ ಪಟ್ಟಿಗೆ ಸೇರಿದ್ದಾರೆ. ಜೊತೆಗೆ, ಗಿನ್ನೆಸ್ ವಿಶ್ವ ದಾಖಲೆಗಳ ಇತಿಹಾಸದಲ್ಲೇ ಈ ಸಾಧನೆ ಮಾಡಿದ ಅತ್ಯಂತ ಕಿರಿಯ ಪುರುಷ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಇದು ಜಾಗತಿಕ ಮಟ್ಟದಲ್ಲಿ ಭಾರತೀಯ ಮುಕ್ತಜಲ ಈಜು ಕ್ರೀಡೆಗೆ ಮಹತ್ವದ ಮೈಲಿಗಲ್ಲು ಎಂದು ಪರಿಗಣಿಸಲಾಗಿದೆ.
ಈ ಮಾನ್ಯತೆ ಅಂಶುಮಾನ ಅವರಿಗೆ ದೊರೆತಿರುವ ಎರಡನೇ ಗಿನ್ನೆಸ್ ವಿಶ್ವ ದಾಖಲೆ. ಇದಕ್ಕೂ ಮುನ್ನ 2023ರ ಜುಲೈನಲ್ಲಿ, ಕೇವಲ 18 ವರ್ಷ 126 ದಿನಗಳ ವಯಸ್ಸಿನಲ್ಲಿ, ಅವರು ನಾರ್ತ್ ಚಾನೆಲ್ (North Channel) ಈಜಿದ ಅತ್ಯಂತ ಕಿರಿಯ ಪುರುಷ ಎಂಬ ವಿಶ್ವ ದಾಖಲೆ ನಿರ್ಮಿಸಿದ್ದರು. ಉತ್ತರ ಐರ್ಲೆಂಡ್ನಿಂದ ಸ್ಕಾಟ್ಲ್ಯಾಂಡ್ವರೆಗೆ ನಡೆದ ಆ ಈಜನ್ನು ಅವರು 11 ಗಂಟೆ 28 ನಿಮಿಷ 52 ಸೆಕೆಂಡುಗಳಲ್ಲಿ ಪೂರ್ಣಗೊಳಿಸಿದ್ದರು.
ನಾರ್ತ್ ಚಾನೆಲ್ ವಿಶ್ವ ದಾಖಲೆಯೊಂದಿಗೆ ಆರಂಭವಾದ ಈ ಪಯಣ, ಮೂರು ವರ್ಷಗಳ ನಿರಂತರ ಪರಿಶ್ರಮದ ಬಳಿಕ ಓಶನ್ಸ್ ಸೆವನ್ ಸಾಧನೆಯಾಗಿ ರೂಪುಗೊಂಡಿದೆ. ಈ ಅವಧಿಯಲ್ಲಿ ಅವರು, ನವಿ ಮುಂಬೈನ ವಾಶಿಯಲ್ಲಿರುವ ಫಾದರ್ ಅಗ್ನೆಲ್ ಕ್ರೀಡಾ ಕೇಂದ್ರದಲ್ಲಿ (Fr Agnel Sports Centre) ತರಬೇತಿ ಪಡೆದು, ತರಬೇತುದಾರ ಗೋಕುಲ ಕಾಮತ್ ಅವರ ಮಾರ್ಗದರ್ಶನದಲ್ಲಿ ಸಿದ್ಧತೆ ನಡೆಸಿದರು.
ಓಶನ್ಸ್ ಸೆವನ್ ಅನ್ನು ಸಾಮಾನ್ಯವಾಗಿ ಪರ್ವತಾರೋಹಣದ “ಸೆವನ್ ಸಮಿಟ್ಸ್” ಗೆ ಸಮಾನವಾದ ಮುಕ್ತಜಲ ಈಜಿನ ಅತ್ಯುನ್ನತ ಸವಾಲು ಎಂದು ಪರಿಗಣಿಸಲಾಗುತ್ತದೆ. ಈ ಸವಾಲಿನಲ್ಲಿ ಏಳು ಪ್ರಸಿದ್ಧ ಹಾಗೂ ಕಠಿಣ ಜಲಸಂಧಿಗಳನ್ನು ಈಜಬೇಕಾಗುತ್ತದೆ. ಈ ವೇಳೆ ಈಜುಗಾರರು ಪ್ರಬಲ ಸಮುದ್ರ ಪ್ರವಾಹಗಳು, ಅಲೆಗಳು, ಹವಾಮಾನ ಬದಲಾವಣೆ, ತಣ್ಣನೆಯ ನೀರು, ಸಮುದ್ರ ಜೀವಿಗಳು ಹಾಗೂ ದೀರ್ಘಕಾಲದ ದೈಹಿಕ-ಮಾನಸಿಕ ಸವಾಲುಗಳನ್ನು ಎದುರಿಸಬೇಕಾಗುತ್ತದೆ.
2005ರ ಮಾರ್ಚ್ 13ರಂದು ಜನಿಸಿದ ಅಂಶುಮಾನ ಅವರಿಗೆ, ಓಶನ್ಸ್ ಸೆವನ್ ಪೂರ್ಣಗೊಳಿಸುವುದು ಹಲವು ವರ್ಷಗಳ ಕಠಿಣ ತರಬೇತಿ, ಶಿಸ್ತು, ಪರಿಶ್ರಮ ಮತ್ತು ಅಚಲ ಸಂಕಲ್ಪದ ಫಲವಾಗಿದೆ. ವಿಶ್ವದ ಅತ್ಯಂತ ಸವಾಲಿನ ಸಮುದ್ರ ಮಾರ್ಗಗಳಲ್ಲಿ ಅವರು ಈ ಸಾಧನೆ ಮಾಡಿದ್ದಾರೆ.
ತಮ್ಮ ಸಾಧನೆ ಕುರಿತು ಪ್ರತಿಕ್ರಿಯಿಸಿದ ಅವರು, “ಕಳೆದ ಮೂರು ವರ್ಷಗಳ ಜೀವನವನ್ನು ಓಶನ್ಸ್ ಸೆವನ್ ರೂಪಿಸಿದೆ. ಪ್ರತಿಯೊಂದು ಜಲಸಂಧಿಯೂ ವಿಭಿನ್ನ ಸವಾಲುಗಳನ್ನು ಒಡ್ಡಿದ್ದು, ಸಹನಶೀಲತೆ, ತಾಳ್ಮೆ ಮತ್ತು ದೃಢ ಸಂಕಲ್ಪದ ಪಾಠ ಕಲಿಸಿದೆ. ನನ್ನ ತರಬೇತುದಾರರು, ಕುಟುಂಬದವರು, ಪೈಲಟ್ಗಳು, ಬೆಂಬಲ ತಂಡಗಳು ಹಾಗೂ ಈ ಪಯಣದಲ್ಲಿ ಬೆಂಬಲಿಸಿದ ಎಲ್ಲರಿಗೂ ನಾನು ಕೃತಜ್ಞನಾಗಿದ್ದೇನೆ” ಎಂದು ಹೇಳಿದ್ದಾರೆ.
ಅಂಶುಮಾನ ಅವರು ಈಜಿದ ಓಶನ್ಸ್ ಸೆವನ್ ಸಾಧನೆಗಳು
ನಾರ್ತ್ ಚಾನೆಲ್ (North Channel) – ಜುಲೈ 17, 2023: 11 ಗಂಟೆ 28 ನಿಮಿಷ 52 ಸೆಕೆಂಡುಗಳು
ಕ್ಯಾಟಲಿನಾ ಚಾನೆಲ್ (Catalina Channel) – ಆಗಸ್ಟ್ 30, 2023: 8 ಗಂಟೆ 38 ನಿಮಿಷ 19 ಸೆಕೆಂಡುಗಳು
ಕುಕ್ ಜಲಸಂಧಿ (Cook Strait) – ಜನವರಿ 18, 2024: 6 ಗಂಟೆ 58 ನಿಮಿಷ 11 ಸೆಕೆಂಡುಗಳು
ಮೊಲೊಕೈ/ಕೈವಿ ಚಾನೆಲ್ (Molokai/Ka’iwi Channel) – ಅಕ್ಟೋಬರ್ 5, 2024: 14 ಗಂಟೆ 21 ನಿಮಿಷ
ಜಿಬ್ರಾಲ್ಟರ್ ಜಲಸಂಧಿ (Strait of Gibraltar) – ಮೇ 9, 2025: 3 ಗಂಟೆ 51 ನಿಮಿಷ
ಇಂಗ್ಲಿಷ್ ಚಾನೆಲ್ (English Channel) – ಆಗಸ್ಟ್ 11, 2025: 15 ಗಂಟೆ 49 ನಿಮಿಷ
ತ್ಸುಗರು ಜಲಸಂಧಿ (Tsugaru Strait) – ಜೂನ್ 30, 2026: 11 ಗಂಟೆ 37 ನಿಮಿಷ 41 ಸೆಕೆಂಡುಗಳು
ಈ ಸಾಧನೆಯ ಮೂಲಕ ಅಂಶುಮಾನ ಜಿಂಗ್ರಾನ್ ಭಾರತೀಯ ಕ್ರೀಡಾ ಇತಿಹಾಸದಲ್ಲಿ ಹೊಸ ಅಧ್ಯಾಯ ಬರೆದಿದ್ದು, ಮುಕ್ತಜಲ ಈಜು ಕ್ಷೇತ್ರದಲ್ಲಿ ಭಾರತದ ಹೆಸರನ್ನು ಜಾಗತಿಕ ಮಟ್ಟದಲ್ಲಿ ಮತ್ತಷ್ಟು ಎತ್ತರಕ್ಕೆ ಕೊಂಡೊಯ್ದಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ