ಪುಲ್ವಾಮಾ: ಒಂದು ಕಾಲದಲ್ಲಿ ಭಯೋತ್ಪಾದನೆ, ಕಲ್ಲು ತೂರಾಟ ಮತ್ತು ಅಶಾಂತಿಯ ಕಾರಣದಿಂದ ಸುದ್ದಿಯಾಗುತ್ತಿದ್ದ ಜಮ್ಮು-ಕಾಶ್ಮೀರದ ಪುಲ್ವಾಮಾ ಜಿಲ್ಲೆ ಈಗ ಕ್ರೀಡೆಯ ಮೂಲಕ ಹೊಸ ಭವಿಷ್ಯವನ್ನು ಕಟ್ಟಿಕೊಳ್ಳುತ್ತಿದೆ. ಶನಿವಾರ ರಾತ್ರಿ ಪುಲ್ವಾಮಾ ನಿದ್ರಿಸಲೇ ಇಲ್ಲ. ರಾಯಲ್ ಪ್ರೀಮಿಯರ್ ಲೀಗ್ (ಆರ್ಪಿಎಲ್) ಫೈನಲ್ ಪಂದ್ಯ ವೀಕ್ಷಿಸಲು ಸಾವಿರಾರು ಜನರು ಕ್ರೀಡಾಂಗಣದತ್ತ ಹರಿದುಬಂದಿದ್ದು, ಪ್ರತಿಯೊಂದು ಚೆಂಡು, ವಿಕೆಟ್ ಹಾಗೂ ಬೌಂಡರಿಯನ್ನು ಹರ್ಷೋದ್ಗಾರಗಳಿಂದ ಸ್ವಾಗತಿಸಿದರು.
ಕ್ರೀಡಾಂಗಣ ಜನರಿಂದ ಕಿಕ್ಕಿರಿದು ತುಂಬಿದ್ದರೆ, ಹೊರಗಿನ ರಸ್ತೆಗಳು ವಾಹನಗಳಿಂದ ಜಾಮ್ ಆಗಿದ್ದವು. ಸಾವಿರಾರು ಮಂದಿಗೆ ಒಳ ಪ್ರವೇಶ ಸಿಗದೇ ಹೊರಗಡೆಯೇ ಪಂದ್ಯಾವಳಿಯ ಸಂಭ್ರಮದಲ್ಲಿ ಪಾಲ್ಗೊಳ್ಳಬೇಕಾಯಿತು. ಇದು ಕೇವಲ ಕ್ರಿಕೆಟ್ ಮೇಲಿನ ಅಭಿಮಾನವಲ್ಲ; ಪುಲ್ವಾಮಾ ತನ್ನ ಹೊಸ ಭವಿಷ್ಯವನ್ನು ಬರೆದುಕೊಳ್ಳುತ್ತಿದ್ದ ಅಪರೂಪದ ಕ್ಷಣವಾಗಿತ್ತು.
ಕಳೆದ ಮೂರು ದಶಕಗಳ ಉಗ್ರವಾದದ ಕತ್ತಲೆ ಕಣಿವೆಯ ರಾತ್ರಿಜೀವನವನ್ನು ಬಹುತೇಕ ಕಸಿದುಕೊಂಡಿತ್ತು. ಆದರೆ ಕ್ರಿಕೆಟ್ ಇದೀಗ ಪುಲ್ವಾಮಾದ ಬೀದಿಗಳಿಗೆ ಮತ್ತೆ ಚೈತನ್ಯ ತುಂಬಿದೆ. ಸ್ಥಳೀಯರ ಪ್ರಕಾರ, ಮೂರು ವಾರಗಳ ಹಿಂದೆ ಲೀಗ್ ಆರಂಭವಾದ ಬಳಿಕ ರಾತ್ರಿ ವೇಳೆಯಲ್ಲಿ ರಸ್ತೆಗಳಲ್ಲಿ ಕಾಣಿಸಿಕೊಳ್ಳುವ ಜನಸಂದಣಿ ಹಗಲಿಗಿಂತಲೂ ಹೆಚ್ಚಾಗಿದೆ.
ಈ ಬದಲಾವಣೆಯ ಹಿಂದಿರುವ ಶಕ್ತಿ ಪುಲ್ವಾಮಾದ ಗಾಯಕ ಇರ್ಫಾನ್ ಸರ್ಕಾರ್. ಅವರ ನೇತೃತ್ವದಲ್ಲಿ ನಡೆದ ಈ ಟೂರ್ನಿಯಲ್ಲಿ ಕಣಿವೆಯ ವಿವಿಧ ಭಾಗಗಳ 10 ಕ್ರಿಕೆಟ್ ಕ್ಲಬ್ಗಳು ಭಾಗವಹಿಸಿದ್ದು, ಸಾವಿರಾರು ಅಭಿಮಾನಿಗಳನ್ನು ಒಂದೇ ವೇದಿಕೆಗೆ ಕರೆತಂದಿವೆ.
ಕಳೆದ ಆರು ವರ್ಷಗಳಿಂದ ಸ್ಥಳೀಯ ಕ್ರಿಕೆಟ್ ಪಂದ್ಯಾವಳಿಗಳನ್ನು ಆಯೋಜಿಸುತ್ತಿರುವ ಇರ್ಫಾನ್, ಕಳೆದ ವರ್ಷ ಮೊದಲ ಬಾರಿಗೆ ಹಗಲು-ರಾತ್ರಿ ಮಾದರಿಯ ರಾಯಲ್ ಪ್ರೀಮಿಯರ್ ಲೀಗ್ಗೆ ಚಾಲನೆ ನೀಡಿದ್ದರು. ಈ ವರ್ಷ ಅದರ ವ್ಯಾಪ್ತಿಯನ್ನು ವಿಸ್ತರಿಸಿ 10 ತಂಡಗಳನ್ನು ಸ್ಪರ್ಧೆಗೆ ಆಹ್ವಾನಿಸಿದ್ದಾರೆ.
“ರಾತ್ರಿ ವೇಳೆ ಪಂದ್ಯಗಳನ್ನು ಆಯೋಜಿಸುವುದು ಮತ್ತು ಕಣಿವೆಯ ಅತ್ಯುತ್ತಮ ತಂಡಗಳನ್ನು ಪುಲ್ವಾಮಾದಲ್ಲಿ ಆಡಲು ವಿಶ್ವಾಸ ಮೂಡಿಸುವುದು ಸುಲಭದ ಕೆಲಸವಾಗಿರಲಿಲ್ಲ. ಆದರೆ ಜನರ ಬೆಂಬಲದಿಂದ ಈ ಪ್ರಯತ್ನ ಯಶೋಗಾಥೆಯಾಗಿ ರೂಪುಗೊಂಡಿದೆ,” ಎಂದು ಇರ್ಫಾನ್ ಹೇಳಿದ್ದಾರೆ.
ಕಾಶ್ಮೀರದಲ್ಲಿ ಹಿಂಸಾಚಾರ ಗಣನೀಯವಾಗಿ ಇಳಿಕೆಯಾಗಿದ್ದು, ಪುಲ್ವಾಮಾದಿಂದ ಸ್ಥಳೀಯ ಯುವಕರು ಉಗ್ರ ಸಂಘಟನೆಗಳಿಗೆ ಸೇರ್ಪಡೆಯಾಗುವ ಪ್ರಮಾಣ ಶೂನ್ಯಕ್ಕೆ ತಲುಪಿದೆ. ಆದಾಗ್ಯೂ, ಭದ್ರತೆ ಕುರಿತ ಆತಂಕ ಇನ್ನೂ ಜನಮನದಲ್ಲಿ ಉಳಿದಿದೆ.
ಅನಂತನಾಗ್ನಲ್ಲಿ ಇತ್ತೀಚೆಗೆ ನಡೆದ ಎರಡು ಉಗ್ರ ದಾಳಿಗಳ ಬಳಿಕ ಪೊಲೀಸರು ಕಾಶ್ಮೀರದಾದ್ಯಂತ ವ್ಯಾಪಕ ಕಾರ್ಯಾಚರಣೆ ನಡೆಸಿ 3,000ಕ್ಕೂ ಹೆಚ್ಚು ಮಂದಿಯನ್ನು ಬಂಧಿಸಿದ್ದರು. ಅವರಲ್ಲಿ ಬಹುತೇಕರನ್ನು ಭಯೋತ್ಪಾದಕರಿಗೆ ಗುಪ್ತವಾಗಿ ನೆರವು ನೀಡುತ್ತಿದ್ದ ಓವರ್ಗ್ರೌಂಡ್ ವರ್ಕರ್ಸ್ (ಒಜಿಡಬ್ಲ್ಯು) ಎಂದು ಗುರುತಿಸಲಾಗಿತ್ತು.
ಇಂತಹ ಕಾರ್ಯಾಚರಣೆಗಳ ಅನುಭವ ಹೊಂದಿರುವ ಪುಲ್ವಾಮಾ ಜನರಿಗೆ ಈ ಕ್ರಿಕೆಟ್ ಲೀಗ್ ಒಂದು ರೀತಿಯ ಸಾಮಾಜಿಕ ಗುಣಮುಖತೆಯ ಸಂಕೇತವಾಗಿ ಪರಿಣಮಿಸಿದೆ. ಪಂದ್ಯಾವಳಿಯ ವೇಳೆ ಜನಸಂದಣಿಯನ್ನು ನಿಯಂತ್ರಿಸಲು ನೂರಾರು ಪೊಲೀಸ್ ಹಾಗೂ ಅರೆಸೇನಾ ಸಿಬ್ಬಂದಿಯನ್ನು ನಿಯೋಜಿಸಲಾಗಿದ್ದರೂ, ಯಾವುದೇ ಉದ್ವಿಗ್ನತೆ ಅಥವಾ ಅಹಿತಕರ ಘಟನೆಗಳು ವರದಿಯಾಗಲಿಲ್ಲ.
ಮಧ್ಯರಾತ್ರಿಯ ವೇಳೆಗೆ ಸಾವಿರಾರು ಅಭಿಮಾನಿಗಳ ಜಯಘೋಷಗಳ ನಡುವೆ ಶ್ರೀನಗರದ ರಾಯಲ್ ಗುಡ್ವಿಲ್ ತಂಡ ಟ್ರೋಫಿಯನ್ನು ಎತ್ತಿಹಿಡಿಯಿತು. ಆದರೆ ಆ ರಾತ್ರಿ ನಿಜವಾದ ಗೆಲುವು ಒಂದೇ ತಂಡದ್ದಾಗಿರಲಿಲ್ಲ; ಅದು ಪುಲ್ವಾಮಾದದ್ದಾಗಿತ್ತು. ಉಗ್ರವಾದದ ನೆರಳಿನಿಂದ ಹೊರಬಂದು ಕ್ರೀಡೆಯ ಬೆಳಕಿನಲ್ಲಿ ಹೊಸ ಅಧ್ಯಾಯ ಆರಂಭಿಸಿರುವ ಪುಲ್ವಾಮಾ, ಕಾಶ್ಮೀರದ ಕ್ರೀಡಾ ರಾಜಧಾನಿಯಾಗುವ ಕನಸಿನತ್ತ ಮತ್ತೊಂದು ಮಹತ್ವದ ಹೆಜ್ಜೆ ಇಟ್ಟಿತು.
ನಿಮ್ಮ ಕಾಮೆಂಟ್ ಬರೆಯಿರಿ