ಹೊಸ ತಿಂಗಳು, ಹೊಸ ಸಾಮಾಜಿಕ ಜಾಲತಾಣ ಟ್ರೆಂಡ್. ಈ ಬಾರಿ ಇಂಟರ್ನೆಟ್ ಬಳಕೆದಾರರು 1980ರ ದಶಕದ ನೆನಪುಗಳತ್ತ ಮುಖ ಮಾಡಿದ್ದಾರೆ. ಇನ್ಸ್ಟಾಗ್ರಾಮ್ ಮತ್ತು ಎಕ್ಸ್ (ಹಳೆಯ ಟ್ವಿಟರ್) ವೇದಿಕೆಗಳಲ್ಲಿ ಎಐ (ಕೃತಕ ಬುದ್ಧಿಮತ್ತೆ) ಮೂಲಕ ರೂಪಾಂತರಗೊಂಡ 1980ರ ಶೈಲಿಯ ಫೋಟೋಗಳು ಈಗ ಟ್ರೆಂಡ್ ಆಗುತ್ತಿವೆ.
ಈ ಟ್ರೆಂಡ್ನಲ್ಲಿ ಬಳಕೆದಾರರು ತಮ್ಮ ಇತ್ತೀಚಿನ ಫೋಟೋವನ್ನು ಎಐ ಇಮೇಜ್ ಜನರೇಟರ್ಗೆ ಅಪ್ಲೋಡ್ ಮಾಡಿ, ಅದನ್ನು 1980ರ ದಶಕದ ಶೈಲಿಯಲ್ಲಿ ಮರುಸೃಷ್ಟಿಸುವಂತೆ ಸೂಚಿಸುತ್ತಾರೆ. ಪರಿಣಾಮವಾಗಿ ಆಧುನಿಕ ಫೋಟೋಗಳು ಹಳೆಯ ಕುಟುಂಬದ ಆಲ್ಬಂ, ಬಾಲಿವುಡ್ ಪ್ರಚಾರ ಚಿತ್ರ ಅಥವಾ ಸ್ಟುಡಿಯೊ ಭಾವಚಿತ್ರದಂತೆ ಕಾಣಿಸುತ್ತವೆ. ಆ ಕಾಲದ ಉಡುಪು, ಕೇಶವಿನ್ಯಾಸ, ಬೆಳಕಿನ ವಿನ್ಯಾಸ, ಫಿಲ್ಮ್ ಗ್ರೇನ್ ಮತ್ತು ಸ್ವಲ್ಪ ಮಸುಕಾದ ಬಣ್ಣಗಳು ಚಿತ್ರಗಳಿಗೆ ಹಳೆಯ ಕಾಲದ ಸ್ಪರ್ಶ ನೀಡುತ್ತವೆ.
‘ಚಾಟ್ಜಿಪಿಟಿ 80ಸ್ ಫೋಟೋ ಟ್ರೆಂಡ್’ ಎಂದು ಕರೆಯಲಾಗುತ್ತಿರುವ ಈ ಟ್ರೆಂಡ್ ಈಗ ಕೇವಲ ಇನ್ಫ್ಲುಯೆನ್ಸರ್ಗಳು ಮತ್ತು ಸಿನಿತಾರೆಯರಿಗಷ್ಟೇ ಸೀಮಿತವಾಗಿಲ್ಲ. ರಾಜಕೀಯ ನಾಯಕರು ಮತ್ತು ರಾಜಕೀಯ ಪಕ್ಷಗಳೂ ಇದರಲ್ಲಿ ಭಾಗಿಯಾಗುತ್ತಿವೆ.
ಬಿಜೆಪಿಯ ಅಧಿಕೃತ ಇನ್ಸ್ಟಾಗ್ರಾಮ್ ಖಾತೆಯು ಪ್ರಧಾನಿ ನರೇಂದ್ರ ಮೋದಿ ಅವರ 1980ರ ಶೈಲಿಯ ಚಿತ್ರವನ್ನು “PM Modi ft. 1980s era!” ಎಂಬ ಶೀರ್ಷಿಕೆಯೊಂದಿಗೆ ಹಂಚಿಕೊಂಡಿದೆ. ಆದರೆ ಅದು ಎಐ ಮೂಲಕ ಸೃಷ್ಟಿಸಿದ ಚಿತ್ರವೇ ಅಥವಾ ನಿಜವಾದ ಹಳೆಯ ಛಾಯಾಚಿತ್ರವೇ ಎಂಬ ಚರ್ಚೆಯೂ ಸಾಮಾಜಿಕ ಜಾಲತಾಣಗಳಲ್ಲಿ ನಡೆಯುತ್ತಿದೆ.
ಕೇಂದ್ರ ವಾಣಿಜ್ಯ ಮತ್ತು ಕೈಗಾರಿಕಾ ಸಚಿವ ಪಿಯೂಷ್ ಗೋಯಲ್ ಕೂಡ ಈ ಟ್ರೆಂಡ್ಗೆ ಸೇರ್ಪಡೆಯಾಗಿದ್ದಾರೆ. “Vibing to the 80s trend” ಎಂಬ ಶೀರ್ಷಿಕೆಯೊಂದಿಗೆ ಅವರು ತಮ್ಮ ಎಐ ಚಿತ್ರವನ್ನು ಹಂಚಿಕೊಂಡಿದ್ದಾರೆ. ಬೂದು ಬಣ್ಣದ ಸೂಟ್, ಬಿಳಿ ಅಂಗಿ ಮತ್ತು ಏವಿಯೇಟರ್ ಕನ್ನಡಕ ಧರಿಸಿರುವ ಅವರ ಚಿತ್ರವು ಹಳೆಯ ಬಾಲಿವುಡ್ ನಾಯಕನ ಭಾವ ಮೂಡಿಸಿದೆ. ಇದನ್ನು ಕಂಡ ಕೆಲವರು, “ಗೋಯಲ್ ಬಾಲಿವುಡ್ಗೆ ಹೋಗಿದ್ದರೂ ಯಶಸ್ವಿಯಾಗುತ್ತಿದ್ದರು” ಎಂದು ತಮಾಷೆ ಮಾಡಿದ್ದಾರೆ.
ಕೇಂದ್ರ ಸಂಸದೀಯ ವ್ಯವಹಾರಗಳ ಸಚಿವ ಕಿರಣ ರಿಜಿಜು ಕೂಡ “ಎಲ್ಲರೂ 80ರ ದಶಕದ ನೆನಪುಗಳಿಗೆ ಮರಳುತ್ತಿರುವಾಗ ನಾನು ಮಾತ್ರ ಹೇಗೆ ಹಿಂದೆ ಉಳಿಯಲಿ?” ಎಂಬ ಅರ್ಥದ ಸಂದೇಶದೊಂದಿಗೆ ತಮ್ಮ ಚಿತ್ರವನ್ನು ಹಂಚಿಕೊಂಡಿದ್ದಾರೆ. ಬ್ಲೇಸರ್, ಕನ್ನಡಕ ಮತ್ತು ಕಾರಿನ ಪಕ್ಕದಲ್ಲಿ ನಿಂತಿರುವ ಅವರ ಚಿತ್ರವು ಹಳೆಯ ಬಾಲಿವುಡ್ ಶೈಲಿಯನ್ನು ನೆನಪಿಸುತ್ತದೆ.
ಅಸ್ಸಾಂ ಮುಖ್ಯಮಂತ್ರಿ ಹಿಮಂತ ಬಿಸ್ವ ಶರ್ಮಾ ಕೂಡ ಈ ಟ್ರೆಂಡ್ನಲ್ಲಿ ಭಾಗವಹಿಸಿ, “ನೆನಪುಗಳನ್ನು ಜೋಡಿಸುವ ಯಾವುದೇ ಟ್ರೆಂಡ್ ನನಗೆ ಇಷ್ಟ. ಮತ್ತೆ 80ರ ದಶಕಕ್ಕೆ ಹೋದ ಅನುಭವವಾಗಿದೆ” ಎಂದು ಬರೆದುಕೊಂಡಿದ್ದಾರೆ.
ಇನ್ನೊಂದೆಡೆ, ಕಾಂಗ್ರೆಸ್ ಸೇವಾದಳವು ರಾಹುಲ್ ಗಾಂಧಿ ಅವರ 1980ರ ಶೈಲಿಯ ಎಐ ಚಿತ್ರಗಳನ್ನು ಹಂಚಿಕೊಂಡಿದೆ. ಕಂದು ಬಣ್ಣದ ಜಾಕೆಟ್, ಬಿಳಿ ಅಂಗಿ ಮತ್ತು ಬೇಜ್ ಬಣ್ಣದ ಪ್ಯಾಂಟ್ ಧರಿಸಿರುವ ರಾಹುಲ್ ಗಾಂಧಿ ಚಿತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಇದರಿಂದ ಈ ಟ್ರೆಂಡ್ ರಾಜಕೀಯ ಪಕ್ಷಗಳ ಗಡಿ ಮೀರಿ ಎಲ್ಲ ವಲಯಗಳಲ್ಲೂ ಜನಪ್ರಿಯವಾಗಿರುವುದು ಸ್ಪಷ್ಟವಾಗಿದೆ.
80ರ ದಶಕದ ಎಐ ಟ್ರೆಂಡ್ ಎಂದರೇನು?
ಈ ಟ್ರೆಂಡ್ನಲ್ಲಿ ಬಳಕೆದಾರರು ತಮ್ಮ ಫೋಟೋವನ್ನು ಅಪ್ಲೋಡ್ ಮಾಡಿ, ಅದನ್ನು 1980ರ ದಶಕದಲ್ಲಿ ತೆಗೆದ ಚಿತ್ರವೆಂದು ಕಾಣುವಂತೆ ರಚಿಸು ಎಂದು ಎಐಗೆ ಸೂಚಿಸುತ್ತಾರೆ. ಮುಖದ ಗುರುತನ್ನು ಹಾಗೆಯೇ ಉಳಿಸಿಕೊಂಡು, ಉಡುಪು, ಕೇಶವಿನ್ಯಾಸ, ಹಿನ್ನೆಲೆ, ಬೆಳಕು ಮತ್ತು ಚಿತ್ರದ ಗುಣಮಟ್ಟವನ್ನು ಆ ಕಾಲದ ಶೈಲಿಗೆ ತಕ್ಕಂತೆ ಬದಲಾಯಿಸಲಾಗುತ್ತದೆ.
ಇದರ ಪರಿಣಾಮವಾಗಿ ಹಳೆಯ ಮಾದರಿಯ ಉಡುಪು, ದೊಡ್ಡ ಕೇಶವಿನ್ಯಾಸ, ಗಮನ ಸೆಳೆಯುವ ಆಭರಣಗಳು, ಸ್ಟುಡಿಯೊ ಬೆಳಕು ಮತ್ತು ಅನಾಲಾಗ್ ಫಿಲ್ಮ್ ಗ್ರೇನ್ ಹೊಂದಿರುವ ಚಿತ್ರಗಳು ಸೃಷ್ಟಿಯಾಗುತ್ತವೆ. ಕೆಲವರು ಹಳೆಯ ಕುಟುಂಬದ ಆಲ್ಬಂನ ಚಿತ್ರಗಳಂತೆ ಫೋಟೋಗಳನ್ನು ರೂಪಿಸುತ್ತಿದ್ದರೆ, ಇನ್ನೂ ಕೆಲವರು ಹಳೆಯ ಬಾಲಿವುಡ್ ಪೋಸ್ಟರ್ ಅಥವಾ ಸಿನಿತಾರೆಯರ ಪ್ರಚಾರ ಚಿತ್ರಗಳ ಮಾದರಿಯನ್ನು ಆಯ್ಕೆ ಮಾಡುತ್ತಿದ್ದಾರೆ.
ಘಿಬ್ಲಿಯಿಂದ 80ರ ದಶಕದವರೆಗೆ
ಕಳೆದ ಒಂದು ವರ್ಷದಲ್ಲಿ ಎಐ ಆಧಾರಿತ ಹಲವು ಸಾಮಾಜಿಕ ಜಾಲತಾಣ ಟ್ರೆಂಡ್ಗಳು ಜನಪ್ರಿಯವಾಗಿವೆ. ಸ್ಟುಡಿಯೊ ಘಿಬ್ಲಿ ಶೈಲಿಯ ಚಿತ್ರಗಳು, ಇತರ ಸೃಜನಾತ್ಮಕ ಪ್ರಯೋಗಗಳು ಸಾಕಷ್ಟು ಗಮನ ಸೆಳೆದಿವೆ. ಆದರೆ 80ರ ದಶಕದ ಟ್ರೆಂಡ್ಗೆ ವಿಶೇಷ ಜನಪ್ರಿಯತೆ ತಂದುಕೊಟ್ಟಿರುವುದು ಹಳೆಯ ನೆನಪುಗಳ ಅನುಭವವಾಗಿದೆ.
ರಾಜಕಾರಣಿಗಳು ಈ ಟ್ರೆಂಡ್ಗೆ ಏಕೆ ಸೇರುತ್ತಿದ್ದಾರೆ?
ಇಂದಿನ ರಾಜಕೀಯ ಸಂವಹನ ಕೇವಲ ಸಾರ್ವಜನಿಕ ಸಭೆಗಳು, ಪತ್ರಿಕಾಗೋಷ್ಠಿಗಳು ಮತ್ತು ಅಧಿಕೃತ ಪ್ರಕಟಣೆಗಳಿಗೆ ಸೀಮಿತವಾಗಿಲ್ಲ. ಇನ್ಸ್ಟಾಗ್ರಾಮ್, ಎಕ್ಸ್, ರೀಲ್ಸ್ ಮತ್ತು ಕಿರು ವಿಡಿಯೊಗಳ ಯುಗದಲ್ಲಿ ರಾಜಕಾರಣಿಗಳು ಜನರ ಗಮನ ಸೆಳೆಯಲು ಹೊಸ ಮಾರ್ಗಗಳನ್ನು ಹುಡುಕುತ್ತಿದ್ದಾರೆ.
ಇಂತಹ ಎಐ ಟ್ರೆಂಡ್ಗಳಲ್ಲಿ ಭಾಗವಹಿಸುವ ಮೂಲಕ ಅವರಿಗೆ ಇದು ವಿಶೇಷವಾಗಿ ಯುವಸಮೂಹದ ಜೊತೆ ಸಂಪರ್ಕ ಸಾಧಿಸಲು ಇದು ಒಂದು ಪರಿಣಾಮಕಾರಿ ಮಾರ್ಗವಾಗಿದೆ.
ಪ್ರಧಾನಿ ನರೇಂದ್ರ ಮೋದಿ ಕೂಡ ಇತ್ತೀಚಿನ ವರ್ಷಗಳಲ್ಲಿ ಯುವಸಮೂಹದ ಭಾಷೆ ಮತ್ತು ಸಾಮಾಜಿಕ ಜಾಲತಾಣಗಳಲ್ಲಿ ಜನಪ್ರಿಯವಾಗಿರುವ ಪದಗಳನ್ನು ಬಳಸುತ್ತಿರುವುದು ಗಮನಾರ್ಹ. ಶ್ರೀರಾಮ ಕಾಲೇಜ್ ಆಫ್ ಕಾಮರ್ಸ್ ಶತಮಾನೋತ್ಸವ ಕಾರ್ಯಕ್ರಮದಲ್ಲಿ ಅವರು ಹಳೆಯ ವಿದ್ಯಾರ್ಥಿಗಳನ್ನು “OGs” ಎಂದು ಉಲ್ಲೇಖಿಸಿದ್ದು ಇದಕ್ಕೆ ಉದಾಹರಣೆಯಾಗಿದೆ.
ನಿಮ್ಮದೇ 80ರ ಶೈಲಿಯ ಎಐ ಫೋಟೋ ಹೇಗೆ ರಚಿಸಬಹುದು?
ಈ ಟ್ರೆಂಡ್ನಲ್ಲಿ ಭಾಗವಹಿಸಲು ಬಯಸುವವರು ಚಾಟ್ಜಿಪಿಟಿಯ ಇಮೇಜ್ ವೈಶಿಷ್ಟ್ಯವನ್ನು ಬಳಸಬಹುದು. ಸ್ಪಷ್ಟವಾದ ಫೋಟೋವನ್ನು ಅಪ್ಲೋಡ್ ಮಾಡಿ, ನಿಮಗೆ ಬೇಕಾದ ಉಡುಪು, ಕೇಶವಿನ್ಯಾಸ, ಬೆಳಕು ಮತ್ತು ಛಾಯಾಚಿತ್ರ ಶೈಲಿಯನ್ನು ವಿವರಿಸಿದರೆ ಸಾಕು.
ಅನಾಲಾಗ್ ಫಿಲ್ಮ್ ಗ್ರೇನ್, 1980ರ ಕಾಲಕ್ಕೆ ಹೊಂದುವ ಉಡುಪುಗಳು, ಸ್ಟುಡಿಯೊ ಬೆಳಕು ಮತ್ತು ಮಸುಕಾದ ಬಣ್ಣಗಳಂತಹ ವಿವರಗಳನ್ನು ನೀಡಿದಷ್ಟು ಉತ್ತಮ ಫಲಿತಾಂಶ ಸಿಗುತ್ತದೆ.
ಉದಾಹರಣೆಗೆ, ಹಳೆಯ ಬಾಲಿವುಡ್ ಶೈಲಿಯ ಭಾವಚಿತ್ರ ಬೇಕಿದ್ದರೆ, “ನನ್ನ ಫೋಟೋವನ್ನು 1980ರ ದಶಕದ ಭಾರತೀಯ ಸಿನೆಮಾ ಶೈಲಿಯ ಭಾವಚಿತ್ರವಾಗಿ ಪರಿವರ್ತಿಸಿ. ನನ್ನ ಮುಖದ ವೈಶಿಷ್ಟ್ಯಗಳನ್ನು ಹಾಗೆಯೇ ಉಳಿಸಿ. ಆ ಕಾಲಕ್ಕೆ ಹೊಂದುವ ಉಡುಪು, ಕೇಶವಿನ್ಯಾಸ ಮತ್ತು ಆಭರಣಗಳನ್ನು ಸೇರಿಸಿ. ಸ್ಟುಡಿಯೊ ಬೆಳಕು, ಮೃದುವಾದ ಫೋಕಸ್, ಸ್ವಲ್ಪ ಮಸುಕಾದ ಬಣ್ಣಗಳು ಮತ್ತು ಅನಾಲಾಗ್ ಫಿಲ್ಮ್ ಗ್ರೇನ್ ಬಳಸಿ. ಚಿತ್ರವು ಹಳೆಯ ಬಾಲಿವುಡ್ ಚಿತ್ರದ ಪ್ರಚಾರ ಫೋಟೋದಂತೆ ಕಾಣಬೇಕು” ಎಂದು ಸೂಚನೆ ನೀಡಬಹುದು.
ನಿಮ್ಮ ಕಾಮೆಂಟ್ ಬರೆಯಿರಿ