ಉತ್ತರ ಅಮೆರಿಕದ ನೈಋತ್ಯ ಭಾಗದಲ್ಲಿರುವ ನಾರ್ತ್ ಡಕೊಟಾದ ಬಯಲು ಪ್ರದೇಶಗಳಲ್ಲಿ (Badlands) ವಿಜ್ಞಾನಿಗಳು ಪೂರ್ಣವಯಸ್ಕ ಟೈರಾನೊಸಾರಸ್ ರೆಕ್ಸ್ (Tyrannosaurus rex – ಟಿ. ರೆಕ್ಸ್) ಬಿಟ್ಟಿರಬಹುದಾದ ಮೊದಲ ಹೆಜ್ಜೆಗುರುತುಗಳು ಇರುವ ದಾರಿಯನ್ನು (Trackway) ಪತ್ತೆಹಚ್ಚಿದ್ದಾರೆ. ಮೊಂಟಾನಾ ರಾಜ್ಯದ ಗಡಿ ಸಮೀಪದ ಈ ಪ್ರದೇಶದಲ್ಲಿ ನಾಲ್ಕು ಪರಸ್ಪರ ಸಂಪರ್ಕ ಹೊಂದಿರುವ ಹೆಜ್ಜೆಗುರುತುಗಳು ಪತ್ತೆಯಾಗಿದ್ದು, ಟಿ. ರೆಕ್ಸ್ ಹೇಗೆ ನಡೆಯುತ್ತಿತ್ತು ಎಂಬುದನ್ನು ತಿಳಿಯಲು ಇದು ಅತ್ಯಂತ ಮಹತ್ವದ ಆವಿಷ್ಕಾರವಾಗಿದೆ ಎಂದು ವಿಜ್ಞಾನಿಗಳು ಹೇಳಿದ್ದಾರೆ.
ಈ ಸಂಶೋಧನೆಯ ವಿವರಗಳು ಜರ್ನಲ್ ಆಫ್ ವರ್ಟಿಬ್ರೇಟ್ ಪ್ಯಾಲಿಯಾಂಟಾಲಜಿ (Journal of Vertebrate Paleontology) ಪತ್ರಿಕೆಯಲ್ಲಿ ಪ್ರಕಟವಾಗಿವೆ. ಇದುವರೆಗೆ ವಿಶ್ವದಲ್ಲಿ ಪೂರ್ಣವಯಸ್ಕ ಟಿ. ರೆಕ್ಸ್ಗೆ ಸೇರಿವೆ ಎಂದು ಖಚಿತಪಡಿಸಲ್ಪಟ್ಟ ಕೇವಲ ಎರಡು ಹೆಜ್ಜೆಗುರುತುಗಳು ಮಾತ್ರ ಪತ್ತೆಯಾಗಿದ್ದವು. ಒಂದು ನ್ಯೂ ಮೆಕ್ಸಿಕೊದಲ್ಲಿ ಹಾಗೂ ಇನ್ನೊಂದು ಮೊಂಟಾನಾದಲ್ಲಿ ಕಂಡುಬಂದಿದ್ದರೂ, ಅವು ಪ್ರತ್ಯೇಕ ಹೆಜ್ಜೆಗುರುತುಗಳಾಗಿದ್ದ ಕಾರಣ ಡೈನೊಸಾರ್ನ ಚಲನೆಯ ಬಗ್ಗೆ ಹೆಚ್ಚಿನ ಮಾಹಿತಿ ಸಿಕ್ಕಿರಲಿಲ್ಲ.
ಡೆನ್ವರ್ ಮ್ಯೂಸಿಯಂನ ಕಶೇರುಕ ಪ್ರಾಣಿಗಳ ಪ್ಯಾಲಿಯಾಂಟಾಲಜಿ ವಿಭಾಗದ ಹಿರಿಯ ಕ್ಯುರೇಟರ್ ಟೈಲರ್ ಲೈಸನ್ ಮಾತನಾಡಿ, “ಎಲುಬುಗಳು ಈ ಪ್ರಾಣಿಗಳ ಬಗ್ಗೆ ಸಾಕಷ್ಟು ಮಾಹಿತಿಯನ್ನು ನೀಡುತ್ತವೆ. ಆದರೆ ಹೆಜ್ಜೆಗುರುತುಗಳು ಅವುಗಳ ನಡವಳಿಕೆಯ ಒಂದು ನಿರ್ದಿಷ್ಟ ಕ್ಷಣವನ್ನು ದಾಖಲಿಸುತ್ತವೆ. ಹೆಜ್ಜೆಗುರುತುಗಳ ಸರಣಿ ಸಿಕ್ಕರೆ, ಆ ಪ್ರಾಣಿ ಭೂಮಿಯ ಮೇಲೆ ಹೇಗೆ ಚಲಿಸುತ್ತಿತ್ತು ಎಂಬುದನ್ನು ನೇರವಾಗಿ ಅರ್ಥಮಾಡಿಕೊಳ್ಳಬಹುದು. ಟಿ. ರೆಕ್ಸ್ಗೆ ಸಂಬಂಧಿಸಿದ ಇಂತಹ ಸಾಕ್ಷ್ಯಗಳು ಅತ್ಯಂತ ಅಪರೂಪ” ಎಂದು ಹೇಳಿದ್ದಾರೆ.
ಹೊಸದಾಗಿ ಪತ್ತೆಯಾದ ಈ ಹೆಜ್ಜೆಗುರುತುಗಳು ಸುಮಾರು 6.65 ಕೋಟಿ ವರ್ಷಗಳಷ್ಟು ಹಳೆಯವು ಎಂದು ಸಂಶೋಧಕರು ಅಂದಾಜಿಸಿದ್ದಾರೆ. ಇವು ಕಳೆದ ವರ್ಷ ನಾರ್ತ್ ಡಕೊಟಾದ ದಕ್ಷಿಣ-ಪಶ್ಚಿಮ ಗಡಿಯ ಸಮೀಪದ ಮಾರ್ಮಾರ್ಥ್ (Marmarth) ಪ್ರದೇಶದಲ್ಲಿರುವ ಫೆಡರಲ್ ಭೂಮಿಯಲ್ಲಿ ಪತ್ತೆಯಾಗಿದ್ದವು.
ಪ್ರತಿಯೊಂದು ಹೆಜ್ಜೆಗುರುತು ಸುಮಾರು 3 ಅಡಿ (0.9 ಮೀಟರ್) ಉದ್ದ ಹೊಂದಿದ್ದು, ಒಂದು ಹೆಜ್ಜೆಯಿಂದ ಮತ್ತೊಂದು ಹೆಜ್ಜೆಯವರೆಗೆ ಸುಮಾರು 13 ಅಡಿ (4 ಮೀಟರ್) ಅಂತರ ಇದೆ. ಹೆಜ್ಜೆಗುರುತುಗಳ ಗಾತ್ರ ಮತ್ತು ಆಕಾರದ ಆಧಾರದ ಮೇಲೆ ಅವು ಪೂರ್ಣವಯಸ್ಕ ಟಿ. ರೆಕ್ಸ್ಗೆ ಸೇರಿವೆ ಎಂದು ವಿಜ್ಞಾನಿಗಳು ಗುರುತಿಸಿದ್ದಾರೆ.
ಈ ಹೆಜ್ಜೆಗುರುತುಗಳನ್ನು ಯಾವುದೇ ಹಾನಿಯಾಗದಂತೆ ಅಧ್ಯಯನ ಮಾಡಲು ವಿಜ್ಞಾನಿಗಳ ತಂಡ ಅತ್ಯಾಧುನಿಕ ಹೈ-ರೆಸಲ್ಯೂಶನ್ 3ಡಿ ಸ್ಕ್ಯಾನಿಂಗ್ ತಂತ್ರಜ್ಞಾನವನ್ನು ಬಳಸಿದೆ. ಇದರ ಮೂಲಕ ಹೆಜ್ಜೆಗುರುತುಗಳನ್ನು ಡಿಜಿಟಲ್ ರೂಪದಲ್ಲಿ ದಾಖಲಿಸಿ ಸೂಕ್ಷ್ಮವಾಗಿ ಅಧ್ಯಯನ ಮಾಡುವುದರ ಜೊತೆಗೆ, ಮೂಲ ಸ್ಥಳಕ್ಕೆ ತೊಂದರೆ ಆಗದಂತೆ ಅವುಗಳ ಪ್ರತಿರೂಪಗಳನ್ನೂ ಸೃಷ್ಟಿಸಲಾಗಿದೆ.
ಲಿವರ್ಪೂಲ್ ಜಾನ್ ಮೂರ್ಸ್ ವಿಶ್ವವಿದ್ಯಾಲಯದ ಪ್ಯಾಲಿಯೊಬಯಾಲಜಿ (Paleobiology) ಪ್ರಾಧ್ಯಾಪಕ ಹಾಗೂ ಅಧ್ಯಯನದ ಪ್ರಮುಖ ಲೇಖಕ ಪೀಟರ್ ಫಾಲ್ಕಿಂಗ್ಹ್ಯಾಮ್, “ನಮ್ಮ ಸಹೋದ್ಯೋಗಿಗಳು ಸ್ಥಳದಲ್ಲೇ ಹೆಜ್ಜೆಗುರುತುಗಳನ್ನು ಸ್ಕ್ಯಾನ್ ಮಾಡಿ ಅದರ 3ಡಿ ಮಾಹಿತಿಯನ್ನು ನನಗೆ ಕಳುಹಿಸಿದರು. ನಾನು ಅದನ್ನು ಕಂಪ್ಯೂಟರ್ ಹಾಗೂ ವರ್ಚುವಲ್ ರಿಯಾಲಿಟಿ (VR) ಮೂಲಕ ವೀಕ್ಷಿಸಿ, ಅವರು ಸ್ಥಳದಲ್ಲಿ ನೋಡಿದಷ್ಟೇ ಸಮೀಪದಿಂದ ಅಧ್ಯಯನ ಮಾಡಲು ಸಾಧ್ಯವಾಯಿತು” ಎಂದು ತಿಳಿಸಿದ್ದಾರೆ.
ಈ ಹೆಜ್ಜೆಗುರುತುಗಳು ಟಿ. ರೆಕ್ಸ್ ಎಷ್ಟು ವೇಗದಲ್ಲಿ ನಡೆಯುತ್ತಿತ್ತು ಎಂಬುದರ ಬಗ್ಗೆ ಕೂಡ ಮಾಹಿತಿ ನೀಡಿವೆ. ಹೆಜ್ಜೆಗಳ ನಡುವಿನ ಅಂತರ ಮತ್ತು ಅದರ ಹೆಜ್ಜೆ ಉದ್ದದ ಆಧಾರದ ಮೇಲೆ, ಅದು ಗಂಟೆಗೆ ಸುಮಾರು 3.5ರಿಂದ 4.5 ಮೈಲುಗಳಷ್ಟು (5.6ರಿಂದ 7.2 ಕಿಲೋಮೀಟರ್) ವೇಗದಲ್ಲಿ ಚಲಿಸುತ್ತಿತ್ತು ಎಂದು ಸಂಶೋಧಕರು ಅಂದಾಜಿಸಿದ್ದಾರೆ. ಇದು ಒಬ್ಬ ವ್ಯಕ್ತಿ ಚುರುಕಾಗಿ ನಡೆಯುವ ವೇಗಕ್ಕೆ ಸಮಾನವಾಗಿದೆ.
ಆದರೆ ಲಕ್ಷಾಂತರ ವರ್ಷಗಳ ಕಾಲ ಮಳೆ, ಗಾಳಿ, ಸವೆತ ಹಾಗೂ ಭೂಗರ್ಭೀಯ ಬದಲಾವಣೆಗಳಿಂದ ಹೆಜ್ಜೆಗುರುತುಗಳ ಮೂಲ ರೂಪದಲ್ಲಿ ಸ್ವಲ್ಪ ಬದಲಾವಣೆಗಳಾಗಿರಬಹುದಾದ ಕಾರಣ ಈ ಅಂದಾಜು ಸಂಪೂರ್ಣ ನಿಖರವಾಗಿಲ್ಲ ಎಂದು ವಿಜ್ಞಾನಿಗಳು ತಿಳಿಸಿದ್ದಾರೆ. ಆದರೂ, ಈ ಹೆಜ್ಜೆಗುರುತುಗಳು ಟಿ. ರೆಕ್ಸ್ ಓಡುತ್ತಿರಲಿಲ್ಲ, ಬದಲಾಗಿ ಸಾಮಾನ್ಯವಾಗಿ ನಡೆದುಕೊಂಡು ಹೋಗುತ್ತಿದ್ದಾಗ ಮೂಡಿದ್ದವು ಎಂಬುದನ್ನು ಸೂಚಿಸುತ್ತವೆ.
ಸಂಶೋಧಕರು ಈ ವರ್ಷದ ಅಂತ್ಯದೊಳಗೆ ನಾಲ್ಕು ಹೆಜ್ಜೆಗುರುತುಗಳಲ್ಲಿ ಮೂರನ್ನು ಸುರಕ್ಷಿತವಾಗಿ ಹೊರತೆಗೆದು, ಹೆಲಿಕಾಪ್ಟರ್ ಮೂಲಕ ಡೆನ್ವರ್ ಮ್ಯೂಸಿಯಂ ಆಫ್ ನೇಚರ್ ಅಂಡ್ ಸೈನ್ಸ್ಗೆ ಸಾಗಿಸಲು ಯೋಜಿಸಿದ್ದಾರೆ. ಅಲ್ಲಿ ಅವುಗಳನ್ನು ಸಂರಕ್ಷಿಸಿ ಮುಂದಿನ ಅಧ್ಯಯನಗಳಿಗೆ ಬಳಸಲಾಗುತ್ತದೆ.
ಟಿ. ರೆಕ್ಸ್ ಸುಮಾರು 6.6ರಿಂದ 6.8 ಕೋಟಿ ವರ್ಷಗಳ ಹಿಂದೆ, ಕ್ರಿಟೇಷಿಯಸ್ ಯುಗದ (Late Cretaceous Period) ಅಂತ್ಯಭಾಗದಲ್ಲಿ ಜೀವಿಸಿತ್ತು. ಡೈನೊಸಾರ್ಗಳ ಯುಗಕ್ಕೆ ಅಂತ್ಯ ಹಾಡಿದ ಸಾಮೂಹಿಕ ವಿನಾಶದ (Mass Extinction) ಮೊದಲು ಭೂಮಿಯ ಮೇಲೆ ಸಂಚರಿಸಿದ ಕೊನೆಯ ಡೈನೊಸಾರ್ಗಳಲ್ಲಿ ಇದು ಒಂದಾಗಿತ್ತು. ಪೂರ್ಣವಯಸ್ಕ ಟಿ. ರೆಕ್ಸ್ ತನ್ನ ಸೊಂಟದ ಮಟ್ಟದ ವರೆಗೆ ಸುಮಾರು 12ರಿಂದ 13 ಅಡಿ ಎತ್ತರ ಇರಬಹುದು ಎಂದು ವಿಜ್ಞಾನಿಗಳು ತಿಳಿಸಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ