ನವದೆಹಲಿ: ಭಾರತದ ಸ್ವದೇಶಿ ವಾಯು ರಕ್ಷಣಾ ಕ್ಷಿಪಣಿ ವ್ಯವಸ್ಥೆಯಾದ ‘ಆಕಾಶ್’ (Akash) ಅನ್ನು ಈಗಾಗಲೇ ಅರ್ಮೇನಿಯಾ, ತಜಿಕಿಸ್ತಾನ್ ಮತ್ತು ತುರ್ಕ್‌ಮೆನಿಸ್ತಾನ್ ದೇಶಗಳಿಗೆ ರಫ್ತು ಮಾಡಲಾಗಿದೆ ಎಂದು ರಕ್ಷಣಾ ಕಾರ್ಯದರ್ಶಿ ರಾಜೇಶಕುಮಾರ ಸಿಂಗ್ ತಿಳಿಸಿದ್ದಾರೆ.
ಭಾರತೀಯ ನಿರ್ಮಿತ ರಕ್ಷಣಾ ಸಾಧನಗಳಿಗೆ ಜಾಗತಿಕ ಮಟ್ಟದಲ್ಲಿ ಹೆಚ್ಚುತ್ತಿರುವ ಬೇಡಿಕೆಗೆ ಇದು ಸಾಕ್ಷಿಯಾಗಿದೆ ಎಂದು ಅವರು ಹೇಳಿದ್ದಾರೆ. ಎಎನ್‌ಐಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ ಮಾತನಾಡಿದ ಅವರು, “ಆಕಾಶ್ ವ್ಯವಸ್ಥೆಯ ಮೊದಲ ವಿದೇಶಿ ಗ್ರಾಹಕ ಅರ್ಮೇನಿಯಾ. ಆ ದೇಶವು ಹಲವು ಬ್ಯಾಟರಿಗಳನ್ನು ಖರೀದಿಸಿದೆ. ನಂತರ ತಜಿಕಿಸ್ತಾನ್ ಮತ್ತು ತುರ್ಕ್‌ಮೆನಿಸ್ತಾನ್‌ಕ್ಕೂ ಇದನ್ನು ರಫ್ತು ಮಾಡಲಾಗಿದೆ. ಈಗ ಉತ್ಪಾದನೆ ಸ್ಥಿರಗೊಂಡಿದೆ. ನಮ್ಮ ಸಶಸ್ತ್ರ ಪಡೆಗಳಿಗೂ ಹೆಚ್ಚುವರಿ ಆರ್ಡರ್‌ಗಳು ಲಭ್ಯವಾಗಿವೆ. ವಿಶ್ವದ ವಿವಿಧ ಭಾಗಗಳಿಂದ ಇನ್ನೂ ಅನೇಕ ಆರ್ಡರ್‌ಗಳು ಬರುವ ವಿಶ್ವಾಸವಿದೆ” ಎಂದು ಹೇಳಿದರು.
ಆಕಾಶ್ ವ್ಯವಸ್ಥೆಯನ್ನು ಭಾರತದ ರಕ್ಷಣಾ ಕ್ಷೇತ್ರದ ಪ್ರಮುಖ ಯಶೋಗಾಥೆಗಳಲ್ಲಿ ಒಂದೆಂದು ಬಣ್ಣಿಸಿದ ರಾಜೇಶಕುಮಾರ ಸಿಂಗ್, ಇದು ದೇಶದ ಸ್ವದೇಶಿ ಕ್ಷಿಪಣಿ ವಿನ್ಯಾಸ ಮತ್ತು ಉತ್ಪಾದನಾ ಸಾಮರ್ಥ್ಯವು ಪರಿಪಕ್ವ ಹಂತ ತಲುಪಿರುವುದನ್ನು ತೋರಿಸುತ್ತದೆ ಎಂದು ಹೇಳಿದರು.
“ಆಕಾಶ್ ನಮ್ಮ ಯಶಸ್ಸಿನ ಕಥೆಗಳಲ್ಲಿ ಒಂದಾಗಿದೆ. ಇದು ಸ್ವದೇಶಿ ಕ್ಷಿಪಣಿ ವಿನ್ಯಾಸ ಮತ್ತು ಉತ್ಪಾದನಾ ವ್ಯವಸ್ಥೆಯ ಬೆಳವಣಿಗೆಯನ್ನು ಪ್ರತಿಬಿಂಬಿಸುತ್ತದೆ. ಹೆಚ್ಚಿನ ವೇಗದಲ್ಲಿ ಸಂಚರಿಸುವ ವೈಮಾನಿಕ ಗುರಿಗಳನ್ನು ಪರಿಣಾಮಕಾರಿಯಾಗಿ ಹೊಡೆದುರುಳಿಸುವ ಸಾಮರ್ಥ್ಯ ಇದಕ್ಕಿದೆ” ಎಂದು ಅವರು ತಿಳಿಸಿದರು.
ಆಪರೇಷನ್ ಸಿಂಧೂರದಲ್ಲಿ ಗಮನ ಸೆಳೆದ ‘ಆಕಾಶ್’
2025ರ ಮೇ ತಿಂಗಳಲ್ಲಿ ಭಾರತ ಮತ್ತು ಪಾಕಿಸ್ತಾನ ನಡುವಿನ ಉದ್ವಿಗ್ನತೆಯ ಸಂದರ್ಭದಲ್ಲಿ ನಡೆದ ‘ಆಪರೇಷನ್ ಸಿಂಧೂರ’ ವೇಳೆ ಪಾಕಿಸ್ತಾನದಿಂದ ಡ್ರೋನ್ ಹಾಗೂ ಕ್ಷಿಪಣಿ ದಾಳಿಗಳು ನಡೆದಿದ್ದವು. ಈ ಸಂದರ್ಭದಲ್ಲಿ ಭಾರತದ ಬಹುಪದರದ ವಾಯು ರಕ್ಷಣಾ ಜಾಲದ ಭಾಗವಾಗಿ ಆಕಾಶ್ ಸೇರಿದಂತೆ ಸ್ವದೇಶಿ ವ್ಯವಸ್ಥೆಗಳನ್ನು ನಿಯೋಜಿಸಲಾಗಿತ್ತು.
ರಕ್ಷಣಾ ಸಚಿವಾಲಯದ ಪ್ರಕಾರ, ಕಾರ್ಯಾಚರಣೆಯ ವೇಳೆ ಆಕಾಶ್ ವ್ಯವಸ್ಥೆಯು ಉತ್ತಮ ಕಾರ್ಯಕ್ಷಮತೆಯನ್ನು ಪ್ರದರ್ಶಿಸಿತ್ತು. ಆದರೆ ಭಾರತದ ವಾಯು ರಕ್ಷಣಾ ಪ್ರತಿಕ್ರಿಯೆಯಲ್ಲಿ ಹಲವು ರಕ್ಷಣಾ ವ್ಯವಸ್ಥೆಗಳು ಒಟ್ಟಾಗಿ ಕಾರ್ಯನಿರ್ವಹಿಸಿದ್ದವು ಎಂಬುದನ್ನೂ ಸರ್ಕಾರ ಸ್ಪಷ್ಟಪಡಿಸಿದೆ.
ಏಕಕಾಲದಲ್ಲಿ ಹಲವು ಗುರಿಗಳನ್ನು ಹೊಡೆದುರುಳಿಸುವ ಸಾಮರ್ಥ್ಯ
ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ ಡಿಆರ್‌ಡಿಒ (DRDO) ವಿವರಿಸುವಂತೆ, ಆಕಾಶ್ ಒಂದು ಅಲ್ಪ-ದೂರದ ಭೂಮಿಯಿಂದ ಆಕಾಶಕ್ಕೆ ನೆಗೆದು ದಾಳಿ ಮಾಡುವ ಕ್ಷಿಪಣಿ ವ್ಯವಸ್ಥೆಯಾಗಿದ್ದು, ಒಂದೇ ಸಮಯದಲ್ಲಿ ಹಲವು ಗುರಿಗಳನ್ನು ಗುರಿಯಾಗಿಸಿ ದಾಳಿ ನಡೆಸುವ ಸಾಮರ್ಥ್ಯ ಹೊಂದಿದೆ.
ಈ ವ್ಯವಸ್ಥೆ ಭಾರತೀಯ ವಾಯುಪಡೆ ಹಾಗೂ ಭೂಸೇನೆಯಲ್ಲಿ ಕಾರ್ಯಾಚರಣೆಯಲ್ಲಿದ್ದು, ಯುದ್ಧಸನ್ನದ್ಧ ಪ್ರದೇಶಗಳಲ್ಲಿಯೂ ನಿಯೋಜಿಸಲಾಗಿದೆ.
ಲಡಾಖ್‌ನಲ್ಲಿ ‘ಆಕಾಶ್ ಪ್ರೈಮ್’ ಯಶಸ್ವಿ ಪರೀಕ್ಷೆ
ಆಕಾಶ್ ವ್ಯವಸ್ಥೆಯ ಸುಧಾರಿತ ಆವೃತ್ತಿಯಾದ ‘ಆಕಾಶ್ ಪ್ರೈಮ್’ ಇದರ ಸಾಮರ್ಥ್ಯವನ್ನು ಇನ್ನಷ್ಟು ವಿಸ್ತರಿಸಿದೆ. 2025ರ ಜುಲೈನಲ್ಲಿ ಲಡಾಖ್‌ನಲ್ಲಿ ನಡೆದ ಎತ್ತರದ ಪ್ರದೇಶದ ಪರೀಕ್ಷೆಯಲ್ಲಿ, ಆಕಾಶ್ ಪ್ರೈಮ್ ಎರಡು ಅತಿ ವೇಗದ ಮಾನವರಹಿತ ವೈಮಾನಿಕ ಗುರಿಗಳನ್ನು ಯಶಸ್ವಿಯಾಗಿ ನಾಶಪಡಿಸಿತ್ತು.
4,500 ಮೀಟರ್‌ಗಿಂತ ಹೆಚ್ಚಿನ ಎತ್ತರದಲ್ಲಿಯೂ ಪರಿಣಾಮಕಾರಿಯಾಗಿ ಕಾರ್ಯನಿರ್ವಹಿಸುವ ಸಾಮರ್ಥ್ಯವನ್ನು ಈ ಪರೀಕ್ಷೆ ಪ್ರದರ್ಶಿಸಿತ್ತು.
ಡಿಆರ್‌ಡಿಒ ಅಭಿವೃದ್ಧಿ, ಬಿಎಡಿಎಲ್-ಬಿಇಎಲ್ ಉತ್ಪಾದನೆ
ಆಕಾಶ್ ಕ್ಷಿಪಣಿ ವ್ಯವಸ್ಥೆಯನ್ನು ಡಿಆರ್‌ಡಿಒ (DRDO) ಅಭಿವೃದ್ಧಿಪಡಿಸಿದ್ದು, ಭಾರತ್ ಡೈನಾಮಿಕ್ಸ್ ಲಿಮಿಟೆಡ್ (BDL) ಮತ್ತು ಭಾರತ್ ಎಲೆಕ್ಟ್ರಾನಿಕ್ಸ್ ಲಿಮಿಟೆಡ್ (BEL) ಸಂಸ್ಥೆಗಳು ಉತ್ಪಾದಿಸುತ್ತಿವೆ.
ಎರಡು ವರ್ಷಗಳಲ್ಲಿ ₹50,000 ಕೋಟಿ ರಕ್ಷಣಾ ರಫ್ತು ಗುರಿ
ಈ ವರ್ಷದ ಸೆಪ್ಟೆಂಬರ್‌ನಲ್ಲಿ ನಡೆದ 13ನೇ ಪಿಎಎಫ್‌ಐ (PAFI) ವಾರ್ಷಿಕ ವೇದಿಕೆ-2026ರ “ಭಾರತದ ಸ್ಪರ್ಧಾತ್ಮಕ ಮುನ್ನಡೆ ನಿರ್ಮಾಣ” ಕುರಿತ ಚರ್ಚೆಯಲ್ಲಿ ಮಾತನಾಡಿದ್ದ ರಾಜೇಶಕುಮಾರ ಸಿಂಗ್, ಜಾಗತಿಕ ರಕ್ಷಣಾ ರಫ್ತು ಮಾರುಕಟ್ಟೆಯಲ್ಲಿ ಭಾರತದ ಪ್ರಮುಖ ಬಲವೆಂದರೆ ಅದರ ವೆಚ್ಚದ ಸ್ಪರ್ಧಾತ್ಮಕತೆ ಎಂದು ಹೇಳಿದ್ದರು.
ಮುಂದಿನ ಎರಡು ವರ್ಷಗಳಲ್ಲಿ ಭಾರತದ ರಕ್ಷಣಾ ರಫ್ತು ಮೌಲ್ಯವನ್ನು ₹50,000 ಕೋಟಿ ಮಟ್ಟಕ್ಕೆ ಏರಿಸುವ ನಿರೀಕ್ಷೆ ಸರ್ಕಾರಕ್ಕಿದೆ ಎಂದು ಅವರು ತಿಳಿಸಿದ್ದರು.
ನಿಮ್ಮ ಕಾಮೆಂಟ್ ಬರೆಯಿರಿ