ಇರಾನ್ ಮೇಲೆ ಅಮೆರಿಕ ಮತ್ತು ಇಸ್ರೇಲ್ ಜಂಟಿ ಸೇನಾ ಕಾರ್ಯಾಚರಣೆ ಆರಂಭಿಸಿ ಒಂಬತ್ತು ದಿನಗಳು ಕಳೆದಿದ್ದರೂ, ಇರಾನ್ನ ಪ್ರತಿದಾಳಿಗಳು ನಿಲ್ಲುವ ಲಕ್ಷಣಗಳು ಕಾಣುತ್ತಿಲ್ಲ. ಈ ಮಧ್ಯೆ, ಅಮೆರಿಕದ ಸೇನಾ ನೆಲೆಗಳಿರುವ ಕತಾರ್ ಅಂತಹ ದೇಶಗಳಲ್ಲಿ ಯುದ್ಧದ ಭೀಕರತೆ ಹೇಗಿದೆ ಎಂಬುದನ್ನು ತೋರಿಸುವ ವಿಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.
ಸ್ವತಂತ್ರವಾಗಿ ಖಚಿತಪಡಿಸದ ಈ ವಿಡಿಯೋದಲ್ಲಿ, ಹಿನ್ನೆಲೆಯಲ್ಲಿ ಸ್ಫೋಟದ ಶಬ್ದಗಳು ಕೇಳಿಸುತ್ತಿದ್ದು, ಆಕಾಶದಲ್ಲಿ ಕ್ಷಿಪಣಿಗಳು ಹಾರುತ್ತಿರುವುದು ಕಂಡುಬಂದಿದೆ. ಈ ವೇಳೆ ಹಿಂದಿಯಲ್ಲಿ ಮಾತನಾಡುತ್ತಿರುವ ವ್ಯಕ್ತಿಯೊಬ್ಬರು, “ಇಲ್ಲಿ ನೋಡಿ, ಪಕ್ಕದಲ್ಲೇ ಅಮೆರಿಕದ ಬೇಸ್ ಇದೆ, ನಾವು ಅದರ ಹತ್ತಿರವೇ ವಾಸಿಸುತ್ತಿದ್ದೇವೆ. ಇರಾನ್ ಎಷ್ಟು ಭೀಕರವಾಗಿ ದಾಳಿ ನಡೆಸುತ್ತಿದೆ ಎಂದರೆ, ಒಂದು ವೇಳೆ ಒಂದು ಕ್ಷಿಪಣಿ ಇಲ್ಲಿ ಬಿದ್ದರೆ ನಮ್ಮ ರೂಮ್ ಹಾರಿಹೋಗುತ್ತದೆ” (ಯೇ ದೇಖೋ, ಅಭಿ ಅಮೇರಿಕಾ ಕಾ ಬೇಸ್ ಹೈ, ಹಮ್ ಪಾಸ್ ಮೇ ಹೈ ರೆಹತಾ ಹೈ, ಯೇ ದೇಖೋ, ಅಭಿ ಇರಾನ್ ಜೋ ಅಟ್ಯಾಕ್ ಕರ್ ರಹಾ ಹೈ ನಾ, ಐಸಾ ಮಾರ್ ರಹಾ ಹೈ, ಕಿ ಅಭಿ ಅಗರ್ ಗಿರ್ ಗಯಾ ಇಧರ್ ಏಕ್ ಭೀ ತೋ ಜಾಯೇ ರೂಮ್) ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ.
“ಇಡೀ ರೂಮ್ ಅಲುಗಾಡುತ್ತಿದೆ, ನಮ್ಮ ಜೀವ ಅಪಾಯದಲ್ಲಿದೆ. ನಾವು ಬದುಕುತ್ತೇವೋ ಇಲ್ಲವೋ ತಿಳಿಯುತ್ತಿಲ್ಲ” (ಪೂರಾ ರೂಮ್ ಹಿಲ್ ರಹಾ ಹೈ, ಹುಮಾರಿ ಜಾನ್ ಖತ್ರೆ ಮೇ ಹೈ, ಪತಾ ನಹೀಂ ಬಚ್ ಪಾಯೇಂಗೆ ಯಾ ನಹೀಂ) ಎಂದು ಹೇಳುತ್ತಾ, ಕೊನೆಯಲ್ಲಿ “ಇಲ್ಲಿಂದ ಓಡಿ ಹೋಗೋಣ” ಎಂದು ಕೂಗುವುದು ವಿಡಿಯೋದಲ್ಲಿ ದಾಖಲಾಗಿದೆ. ಕೊನೆಯಲ್ಲಿ, ಅವರು ಹೇಳುತ್ತಾರೆ, “ಏ ಚಾಚಾ ಇಧರ್ ಧ್ಯಾನ್ ದೇನಾ, ಇಧರ್ ತೋ ನಹೀಂ ಗಿರ್ ಜಾಯೇಗಾ.” [ಹೇ, ಚಾಚಾ, ಇಲ್ಲಿ ಗಮನ ಕೊಡಿ, ಅದು ಇಲ್ಲಿ ಬೀಳುವುದಿಲ್ಲ, ಅಲ್ಲವೇ?] ಇಲ್ಲಿಂದ ಓಡಿ ಚಾಚಾ (“ಭಾಗೋ ಯಹಾಂ ಸೆ ಚಾಚಾ”) ಎಂದು ಕೂಗುವುದರೊಂದಿಗೆ ವಿಡಿಯೋ ಥಟ್ಟನೆ ಕೊನೆಗೊಳ್ಳುತ್ತದೆ
ಗಲ್ಫ್ ರಾಷ್ಟ್ರಗಳ ಮೇಲೆ ಇರಾನ್ ದಾಳಿ
ಫೆಬ್ರವರಿ 28 ರಂದು ಇಸ್ರೇಲ್ ಮತ್ತು ಅಮೆರಿಕ ಇರಾನ್ ಮೇಲೆ ದಾಳಿ ಆರಂಭಿಸಿದ್ದವು. ಈ ದಾಳಿಯ ಮೊದಲ ದಿನವೇ ಇರಾನ್ನ ಸರ್ವೋಚ್ಚ ನಾಯಕ ಆಯತೊಲ್ಲಾ ಅಲಿ ಖಮೇನಿ ಸಾವಿಗೀಡಾಗಿದ್ದರು. ಇದಕ್ಕೆ ಪ್ರತಿಯಾಗಿ ಇರಾನ್ ಕೇವಲ ಇಸ್ರೇಲ್ ಮಾತ್ರವಲ್ಲದೆ, ಅಮೆರಿಕದ ಸೇನಾ ನೆಲೆಗಳಿರುವ ಸೌದಿ ಅರೇಬಿಯಾ, ಕತಾರ್, ಯುಎಇ, ಕುವೈತ್, ಬಹ್ರೇನ್, ಇರಾಕ್, ಜೋರ್ಡಾನ್ ಮತ್ತು ಅಜೆರ್ಬೈಜಾನ್ ಮೇಲೆಯೂ ಕ್ಷಿಪಣಿ ದಾಳಿ ನಡೆಸುತ್ತಿದೆ. ಇದರಿಂದಾಗಿ ಇಡೀ ಗಲ್ಫ್ ಪ್ರದೇಶ ಯುದ್ಧ ಭೂಮಿಯಾಗಿ ಮಾರ್ಪಟ್ಟಿದೆ.
ಶರಣಾಗತಿಯಿಲ್ಲ ಎಂದ ಇರಾನ್ ಅಧ್ಯಕ್ಷ
ಶನಿವಾರ ಮಾತನಾಡಿದ ಇರಾನ್ ಅಧ್ಯಕ್ಷ ಮಸೂದ್ ಪೆಜೆಶ್ಕಿಯಾನ್, ನೆರೆಹೊರೆಯ ದೇಶಗಳ ಮೇಲೆ ನಡೆದ ದಾಳಿಗಾಗಿ ಕ್ಷಮೆಯಾಚಿಸಿದ್ದಾರೆ. “ನೆರೆಹೊರೆಯ ರಾಷ್ಟ್ರಗಳ ಮೇಲೆ ದಾಳಿಯಾಗಿದ್ದಕ್ಕೆ ನಾನು ಇರಾನ್ ಪರವಾಗಿ ಕ್ಷಮೆ ಕೇಳುತ್ತೇನೆ. ಆದರೆ ಇರಾನ್ ಮೇಲೆ ದಾಳಿ ನಡೆಸಲು ಅವಕಾಶ ನೀಡದ ಹೊರತು ನಾವು ಯಾವುದೇ ದೇಶದ ಮೇಲೆ ಕ್ಷಿಪಣಿ ಉಡಾಯಿಸುವುದಿಲ್ಲ” ಎಂದು ಸ್ಪಷ್ಟಪಡಿಸಿದರು.
ಇದೇ ವೇಳೆ, “ಬೇಷರತ್ತಾಗಿ ಶರಣಾಗಬೇಕು” ಎಂಬ ಡೊನಾಲ್ಡ್ ಟ್ರಂಪ್ ಅವರ ಬೇಡಿಕೆಯನ್ನು ತಳ್ಳಿಹಾಕಿದ ಪೆಜೆಶ್ಕಿಯಾನ್, “ಇರಾನ್ ಜನರು ಶರಣಾಗಬೇಕೆಂಬ ಶತ್ರುಗಳ ಆಸೆ ಅವರ ಸಮಾಧಿಯವರೆಗೂ ಹೋಗಲಿ, ನಾವು ಶರಣಾಗುವುದಿಲ್ಲ” ಎಂದು ಗುಡುಗಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ