ಭಾರತದ ಕೋವಿಶೀಲ್ಡ್ ಲಸಿಕೆಯ ಡೋಸ್‌ಗಳ ನಡುವಿನ ಅಂತರವನ್ನು ಹೆಚ್ಚಿಸಿರುವುದಕ್ಕೆ ಸಾಕಷ್ಟು ಆಕ್ಷೇಪಗಳೂ ವ್ಯಕ್ತವಾಗಿವೆ. ಹಲವರು ಇದಕ್ಕೆ ವಿರೋಧವನ್ನೂ ವ್ಯಕ್ತಪಡಿಸಿದ್ದು, ಲಸಿಕೆಯ ಕೊರತೆಯಿಂದ ಕೇಂದ್ರ ಸರ್ಕಾರ ಈ ಕ್ರಮ ಕೈಗೊಂಡಿದೆ. ಇದಕ್ಕೆ ಯಾವುದೇ ವೈಜ್ಞಾನಿಕ ಪುರಾವೆಗಳಿಲ್ಲ ಎಂದು ಹೇಳಿದ್ದಾರೆ. ಆದರೆ, ಕೋವಿಶೀಲ್ಡ್‌ನ ಮೂಲ ಹೆಸರಿನ ಬ್ರಿಟನ್‌ ಲಸಿಕೆ ಆಸ್ಟ್ರಾ ಜೆನಿಕಾದ ಲಸಿಕೆಯ ಡೋಸ್‌ಗಳ ನಡುವಿನ ಅಂತರದ ಬಗ್ಗೆ ಆಕ್ಸ್ಫರ್ಡ್ ಅಧ್ಯಯನ ನಡೆಸಿದ್ದು, ಇದು ಆಸ್ಟ್ರಾಜೆನಿಕಾ ಡೋಸ್ ನಡುವೆ 10 ತಿಂಗಳು ಅಂತರ ಇದ್ದರೆ ಹೆಚ್ಚು ಪ್ರತಿಕಾಯಗಳನ್ನು (ಎಂಟಿಬಾಡಿ) ಬೂಸ್ಟ್‌ ಮಾಡುತ್ತದೆ ಎಂದು ಹೇಳಿದೆ.
ಆಸ್ಟ್ರಾಜೆನಿಕಾ ಲಸಿಕೆಯ ಎರಡು ಪ್ರಮಾಣಗಳನ್ನು 44-45 ವಾರಗಳ ಅಂತರದಲ್ಲಿ ತೆಗೆದುಕೊಂಡರೆ 8-12 ವಾರಗಳ ಅಂತರವನ್ನು ನೀಡಿದ್ದಕ್ಕಿಂತ ನಾಲ್ಕು ಪಟ್ಟು ಹೆಚ್ಚು ಪ್ರತಿಕಾಯಗಳನ್ನು ಉತ್ಪಾದಿಸುತ್ತವೆ ಎಂದು ಲಸಿಕೆ ಅಭಿವೃದ್ಧಿ ಪಡಿಸಿದ ಆಕ್ಸ್ಫರ್ಡ್ ಲಸಿಕೆ ಸಮೂಹವು ಸೋಮವಾರ ವರದಿ ಮಾಡಿದೆ. ಆ್ಯಂಟಿಬಾಡಿ ಮಟ್ಟವು ಸುಮಾರು ಒಂದು ವರ್ಷದವರೆಗೆ ಹೆಚ್ಚಿರುತ್ತದೆ ಎಂದು ವರದಿ ಹೇಳುತ್ತದೆ.
ChAdOx1 nCoV-19 ನ ಒಂದು ಡೋಸ್ ನೀಡಿದ ನಂತರ ದೀರ್ಘಕಾಲದ ಬಳಿಕ ಎರಡನೇ ಡೋಸ್ ತೆಗೆದುಕೊಳ್ಳುವುದು ಅಲ್ಪಾವಧಿಯಲ್ಲಿ ಲಸಿಕೆ ಸರಬರಾಜು ಕೊರತೆಯಿರುವಾಗ ಪರಿಣಾಮಕಾರಿ ತಂತ್ರವಾಗಿದೆ. ಮೂರನೆಯ ಡೋಸ್ ರೋಗನಿರೋಧಕ ಪ್ರತಿಕ್ರಿಯೆಗಳಲ್ಲಿ ಮತ್ತಷ್ಟು ಹೆಚ್ಚಳಕ್ಕೆ ಕಾರಣವಾಗುತ್ತದೆ, ಇದರಲ್ಲಿ SARS-CoV-2 ವೈರಸ್‌ಗಳ ರೂಪಾಂತರದ ಹೆಚ್ಚಿನ ತಟಸ್ಥೀಕರಣವಿದೆ ಮತ್ತು ದುರ್ಬಲ ಜನಸಂಖ್ಯೆಯಲ್ಲಿನ ರೂಪಾಂತರಗಳ ವಿರುದ್ಧ ಲಸಿಕೆ ಪರಿಣಾಮಕಾರಿತ್ವವನ್ನು ಹೆಚ್ಚಿಸಲು ಇದನ್ನು ಬಳಸಬಹುದು ಎಂದು ಲೇಖಕರು ಪೂರ್ವ-ಮುದ್ರಣ ಪ್ರಕಟಣೆಯಲ್ಲಿ ವರದಿ ಮಾಡಿದ್ದಾರೆ. ಆದರೆ, ಈ ಅಧ್ಯಯನವನ್ನು ಇನ್ನೂ ಪೀರ್ – ರಿವ್ಯೂ ಮಾಡಲಾಗಿಲ್ಲ ಎಂದು ಹೇಳಲಾಗಿದೆ.
ಲಸಿಕೆ ಸ್ವಯಂಸೇವಕರ ಗುಂಪಿಗೆ ಮೊದಲನೆಯ ಡೋಸ್ ಪಡೆದ 15-25 ವಾರಗಳ ನಂತರ ಎರಡನೇ ಡೋಸ್ ನೀಡಲಾಗಿತ್ತು. ಈ ಗುಂಪಿಗೆ 8-12 ವಾರಗಳ ಮಧ್ಯಂತರದಲ್ಲಿ ನೀಡಿದ ಎರಡು ಡೋಸ್‌ಗಿಂತ ಪ್ರತಿಕಾಯಗಳ ಮಟ್ಟ ಎರಡು ಪಟ್ಟು ಹೆಚ್ಚಿದೆ ಎಂದು ತಿಳಿದುಬಂದಿದೆ. ಇದು ಪ್ರಮಾಣಗಳ ನಡುವಿನ ಅವಧಿಯನ್ನು ಹೆಚ್ಚಿಸುವುದರಿಂದ ಪ್ರತಿಕಾಯಗಳ ಸಂಖ್ಯೆಯನ್ನು ಹೆಚ್ಚಿಸುತ್ತದೆ ಎಂಬುದನ್ನು ಸೂಚಿಸುತ್ತದೆ.
ಆಸ್ಟ್ರಾಜೆನಿಕಾ ಲಸಿಕೆಯ ಭಾರತದ ಆವೃತ್ತಿಯಾದ ಕೋವಿಶೀಲ್ಡ್ ಭಾರತದ ವ್ಯಾಕ್ಸಿನೇಷನ್ ಕಾರ್ಯಕ್ರಮದ ಮುಖ್ಯ ಆಧಾರವಾಗಿದೆ. ಇದುವರೆಗೆ ನೀಡಲಾದ 32 ಕೋಟಿ ಡೋಸ್‌ಗಳ ಪೈಕಿ ಸುಮಾರು 88% ನಷ್ಟಿದೆ. ಈ ಲಸಿಕೆಯ ಡೋಸ್ ಅಂತರವನ್ನು ಆರಂಭದಲ್ಲಿ 4-6 ವಾರಗಳ ಕಾಲ ಇದ್ದಿದ್ದನ್ನು 8-12 ವಾರಗಳ ಅಂತರವಿದ್ದರೆ ಲಸಿಕೆಯ ಪರಿಣಾಮಕಾರಿತ್ವ ಹೆಚ್ಚು ಎಂದು ಕೇಂದ್ರ ಸರ್ಕಾರ ಹೇಳಿತ್ತು. ನಂತರ ಇದನ್ನು 12-16 ವಾರಗಳ ಅಂತರಕ್ಕೆ ಹೆಚ್ಚಿಸಲಾಗಿತ್ತು.
ಮೊದಲನೆಯ ಡೋಸ್‌ಗೆ ಹೋಲಿಸಿದರೆ ಎರಡನೇ ಡೋಸ್ ನಂತರ ಸಾಮಾನ್ಯ ಪ್ರತಿಕೂಲ ಪರಿಣಾಮಗಳು ಕಡಿಮೆಯಾಗಿವೆ ಎಂದು ಇತ್ತೀಚಿನ ಅಧ್ಯಯನವು ವರದಿ ಮಾಡಿದೆ. ಇನ್ನು, ಕೋವಿಶೀಲ್ಡ್ ಮೊದಲ ಡೋಸ್ ಪಡೆದ ನಂತರ, ಪ್ರತಿಕಾಯದ ಮಟ್ಟವು 28 ದಿನಗಳ ನಂತರ ಹೆಚ್ಚಿರುತ್ತೆ. ಆದರೆ, 180 ದಿನಗಳ ನಂತರ ಗರಿಷ್ಠ ಮಟ್ಟಕ್ಕಿಂತ ಅರ್ಧದಷ್ಟಿರುತ್ತದೆ. ಹಾಗೂ, 320 ದಿನಗಳಲ್ಲಿ, ಗರಿಷ್ಠ ಮಟ್ಟಕ್ಕಿಂತ ಶೇ. 30 ರಷ್ಟು ಮಾತ್ರ ಇರುತ್ತದೆ ಎಂದು ಹೇಳಲಾಗಿದೆ.
ಆಕ್ಸ್ಫರ್ಡ್ ವ್ಯಾಕ್ಸಿನ್‌ ಸಮೂಹಕ್ಕೆ ಸಂಯೋಜಿತವಾದ ವಿಜ್ಞಾನಿಗಳ ತಂಡ, ಈ ಹಿಂದೆ ರೋಗಲಕ್ಷಣದ ಕೋವಿಡ್‌-19 ರ ವಿರುದ್ಧದ ರಕ್ಷಣೆಯು ಮೊದಲ ಡೋಸ್ ಪಡೆದ 22 ದಿನಗಳ ನಂತರ 76% ಇರುತ್ತದೆ ಮತ್ತು ಎರಡನೆಯ ಡೋಸ್ ಅನ್ನು ಮೊದಲ ಡೋಸ್ ಪಡೆದ 12 ವಾರಗಳ ನಂತರ ತೆಗೆದುಕೊಂಡರೆ, ಶೇ. 81 ರಷ್ಟು ರಕ್ಷಣೆ ನೀಡುತ್ತದೆ ಎಂದು ಹೇಳಿದೆ.
ಭಾರತದಲ್ಲಿ ಹೆಚ್ಚು ಪ್ರಚಲಿತದಲ್ಲಿರುವ ಕೊರೊನಾ ವೈರಸ್ ರೂಪಾಂತರಗಳಾದ ಆಲ್ಫಾ (ಬಿ .1.1.7), ಬೀಟಾ (ಬಿ .1.351) ಮತ್ತು ಡೆಲ್ಟಾ (ಬಿ .1.617.2) ವೈರಸ್‌ಗಳ ವಿರುದ್ಧ ಲಸಿಕೆಯಪ್ರತಿಕಾಯದ ಮಟ್ಟ ಅಳೆಯಲಾಗಿದ್ದು, ಮೊದಲ ಡೋಸ್‌ಗಿಂತ ಎರಡನೆ ಡೋಸ್ ಲಸಿಕೆ ಪಡೆದ ಬಳಿಕ ಹೆಚ್ಚಿನ ಪ್ರತಿಕಾಯ ಮಟ್ಟ ಸೃಷ್ಟಿಯಾಗುತ್ತದೆ ಎಂದು ಆಕ್ಸ್ಫರ್ಡ್ ಅಧ್ಯಯನ ವರದಿ ಹೇಳಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ