ಬಿಹಾರ ಚುನಾವಣೆ | ಜೆಡಿಯು, ಬಿಜೆಪಿಗಿಂತ ಹೆಚ್ಚು ಮತ ಪಡೆದ ತೇಜಸ್ವಿ ಯಾದವರ ಆರ್‌ ಜೆಡಿ ; ಆದ್ರೂ ಹೀನಾಯವಾಗಿ ಸೋತಿದ್ದೇಕೆ..?

ಬಿಹಾರ ವಿಧಾನಸಭಾ ಚುನಾವಣೆಯಲ್ಲಿ ರಾಷ್ಟ್ರೀಯ ಜನತಾ ದಳ (RJD) ಕೇವಲ 25 ಸ್ಥಾನಗಳನ್ನು ಗಳಿಸಿ ಸೋಲನುಭವಿಸಿದೆ. ಆರ್‌ಜೆಡಿ ನೇತೃತ್ವದ ಮಹಾಘಟಬಂಧನ ಧೂಳೀಪಟವಾಗಿದೆ. ಆದರೂ ಆರ್‌ಜೆಡಿ ನೇತಾರ ತೇಜಸ್ವಿ ಯಾದವ್ ಅವರಿಗೆ ಒಂದು ಧನಾತ್ಮಕ ಅಂಶವಿದೆ. ಯಾಕೆಂದರೆ ಆರ್‌ಜೆಡಿ ಪಕ್ಷವು ಉಳಿದೆಲ್ಲ ಪಕ್ಷಗಳಿಗಿಂತ ಹೆಚ್ಚು ಮತಗಳನ್ನು ಪಡೆದುಕೊಂಡಿದೆ.
ಚುನಾವಣಾ ಆಯೋಗದ ಪ್ರಕಾರ, ಆರ್‌ಜೆಡಿ (RJD)ಯು ಸ್ಪರ್ಧಿಸಿದ 143 ಸ್ಥಾನಗಳಲ್ಲಿ 25 ರಲ್ಲಿ ಗೆದ್ದಿದೆ. 23%ರಷ್ಟು ಮತಗಳನ್ನು ಪಡೆದುಕೊಂಡಿದೆ. ಇದು ಈ ಚುನಾವಣೆಯಲ್ಲಿ ಯಾವುದೇ ಪಕ್ಷ ಪಡೆದ ಅತ್ಯಧಿಕ ಮತದ ಪ್ರಮಾಣವಾಗಿದೆ. 2020 ರ ಚುನಾವಣೆಯಲ್ಲಿ ಪಕ್ಷವು 75 ಸ್ಥಾನಗಳನ್ನು ಗೆದ್ದು ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿದಾಗ, ಅದು ಶೇ. 23.11 ರಷ್ಟು ಮತಗಳನ್ನು ಪಡೆದಿತ್ತು. ಈ ಬಾರಿಯ ಮತ ಹಂಚಿಕೆ ಅದಕ್ಕಿಂತ ಸ್ವಲ್ಪ ಕಡಿಮೆಯಾಗಿದೆ.ಈ ಬಾರಿ ಕಳಪೆ ಪ್ರದರ್ಶನದ ಹೊರತಾಗಿಯೂ, ಆರ್‌ಜೆಡಿ ಪಡೆದ ಒಟ್ಟು ಮತಗಳ ವಿಷಯದಲ್ಲಿ ಕೋಟ್ಯಧಿಪತಿಯಾಗಿದೆ. 2025 ರ ವಿಧಾನಸಭಾ ಚುನಾವಣೆಯಲ್ಲಿ ಸುಮಾರು 1.15 ಕೋಟಿ (1,15,46,055) ಜನರು ಈ ಪಕ್ಷದ ಪರ ಮತ ಹಾಕಿದ್ದಾರೆ.
89 ಸ್ಥಾನಗಳನ್ನು ಗೆಲ್ಲುವ ಮೂಲಕ ಏಕೈಕ ಅತಿದೊಡ್ಡ ಪಕ್ಷವಾಗಿ ಹೊರಹೊಮ್ಮಿದ ಬಿಜೆಪಿ, ಶೇ. 20.08 ರಷ್ಟು ಮತಗಳನ್ನು ಪಡೆದಿದೆ (2020 ರಲ್ಲಿ ಶೇ. 19.46 ಇತ್ತು). ಚುನಾವಣಾ ಆಯೋಗದ ಪ್ರಕಾರ, 1,00,81,143 ಜನರು ಬಿಜೆಪಿಗೆ ಮತ ಹಾಕಿದ್ದಾರೆ. ಬಿಜೆಪಿಯ ಮಿತ್ರಪಕ್ಷ, ನಿತೀಶಕುಮಾರ ಅವರ ಜೆಡಿ(ಯು) ಸ್ಪರ್ಧಿಸಿದ 101 ಸ್ಥಾನಗಳಲ್ಲಿ 85 ಸ್ಥಾನಗಳನ್ನು ಗೆದ್ದುಕೊಂಡಿದ್ದು, ಶೇ. 19.25 ರಷ್ಟು ಮತಗಳನ್ನು ಪಡೆದಿದೆ (ಒಟ್ಟು ಮತಗಳು – 96,67,118). ಅವರ ಮತ ಹಂಚಿಕೆಯು 2020ರಲ್ಲಿ ಶೇ. 15.39 ಇದ್ದಿದ್ದು ಈ ಬಾರಿ ಗಣನೀಯವಾಗಿ ಏರಿಕೆಯಾಗಿದೆ.
ಚಿರಾಗ್ ಪಾಸ್ವಾನ್ ಅವರ ಲೋಕ ಜನಶಕ್ತಿ ಪಾರ್ಟಿ, ಹಿಂದೂಸ್ತಾನಿ ಅವಾಮ್ ಮೋರ್ಚಾ (ಸೆಕ್ಯುಲರ್), ಮತ್ತು ರಾಷ್ಟ್ರೀಯ ಲೋಕ ಮೋರ್ಚಾವನ್ನು ಒಳಗೊಂಡಿರುವ ಎನ್‌ಡಿಎ (NDA) ಮೈತ್ರಿಕೂಟದ ಒಟ್ಟು ಮತ ಹಂಚಿಕೆಯು ಸುಮಾರು ಶೇ. 46-47 ರಷ್ಟಿದೆ. ಆದರೆ ಮಹಾಘಟಬಂಧನವು ಶೇ. 35.89 ರಷ್ಟು ಮತಗಳನ್ನು ಪಡೆದಿದೆ.
ಚುನಾವಣಾ ಆಯೋಗದ (ECI) ದತ್ತಾಂಶದ ಪ್ರಕಾರ, ಕಳೆದ ಚುನಾವಣೆಯಲ್ಲಿ 110 ಕ್ಷೇತ್ರಗಳಿಗೆ ಹೋಲಿಸಿದರೆ ಈ ಚುನಾವಣೆಯಲ್ಲಿ 101 ಸ್ಥಾನಗಳಲ್ಲಿ ಸ್ಪರ್ಧಿಸಿದ್ದರೂ, ಬಿಜೆಪಿಯ ಮತ ಹಂಚಿಕೆ 2020 ರಲ್ಲಿ ಶೇ. 19.46 ರಿಂದ ಶೇ. 20.07 ಕ್ಕೆ ಏರಿದೆ.

ಹೆಚ್ಚಿನ ಮತ ಪಡೆದ ಹೊರತಾಗಿಯೂ ಆರ್‌ಜೆಡಿ ಏಕೆ ಸೋತಿತು?
ಆರ್‌ಜೆಡಿ 25 ಸ್ಥಾನಗಳಲ್ಲಿ ಗೆದ್ದಿದೆ (2010 ರ ಚುನಾವಣೆಯಲ್ಲಿ ಅದು 22 ಸ್ಥಾನಗಳನ್ನು ಗೆದ್ದಿತ್ತು). ಆರ್‌ಜೆಡಿ ಅತ್ಯಧಿಕ ಮತ ಹಂಚಿಕೆಯನ್ನು ಪಡೆಯುವುದು ಎಂದರೆ ಕೆಲವು ಕ್ಷೇತ್ರಗಳಲ್ಲಿ, ಅದು ಎರಡನೇ (ಅಥವಾ ಮೂರನೇ) ಆಗಿರಬಹುದು, ಅನೇಕ ಮತಗಳನ್ನು ಸಂಗ್ರಹಿಸಬಹುದು ಆದರೆ ಅಂತಿಮ ಗೆರೆಯನ್ನು ದಾಟಲು ಸಾಕಾಗುವುದಿಲ್ಲ. ಅದು ಅವರ ಒಟ್ಟು ಮತ ಹಂಚಿಕೆಗೆ ಸೇರಿಸುತ್ತದೆ, ಆದರೆ ಅವರ ಸ್ಥಾನ ಎಣಿಕೆಗೆ ಅಲ್ಲ ಎಂಬುದು ಮುಖ್ಯವಾಗುತ್ತದೆ.
ಆರ್‌ಜೆಡಿ ಪಕ್ಷವು ಒಟ್ಟಾರೆಯಾಗಿ ಅವರು ಹೆಚ್ಚಿನ ಮತಗಳನ್ನು ಪಡೆದರೂ ಸಹ, ಅದು ಗೆಲ್ಲದ, ಅಥವಾ ಕಡಿಮೆ ಅಂತರದಿಂದ ಗೆದ್ದ ಅಥವಾ ಕಡಿಮೆ ಅಂತರದಿಂದ ಸೋತ ಕ್ಷೇತ್ರಗಳಲ್ಲಿ ಆ ಮತಗಳು ವ್ಯರ್ಥವಾಗಿರಬಹುದು ಎಂದು ಇದು ಸೂಚಿಸುತ್ತದೆ.
ಹೆಚ್ಚಿನ ಮತ ಹಂಚಿಕೆಗೆ ಮತ್ತೊಂದು ಕಾರಣವೆಂದರೆ ಮಹಾಘಟಬಂಧನದ ನೇತೃತ್ವ ವಹಿಸಿರುವ ಆರ್‌ಜೆಡಿ ಪಕ್ಷವು ಎನ್‌ಡಿಎ ಅಂಗಪಕ್ಷಗಳಾದ ಬಿಜೆಪಿ ಹಾಗೂ ಜೆಡಿಯುವಿಗಿಂತ ಹೆಚ್ಚಿನ ಸ್ಥಾನಗಳಲ್ಲಿ ಸ್ಪರ್ಧಿಸಿದ್ದು. ಬಿಜೆಪಿ ಹಾಗೂ ಜೆಡಯು ತಲಾ 101 ಸ್ಥಾನಗಳಲ್ಲಿ ಸ್ಪರ್ಧಿಸಿದ್ದವು. ಆರ್‌ಜೆಡಿ ಈ ಬಾರಿ 143 ಸ್ಥಾನಗಳಲ್ಲಿ ತನ್ನ ಅಭ್ಯರ್ಥಿಗಳನ್ನು ಕಣಕ್ಕಿಳಿಸಿತು, ಇದು ಯಾವುದೇ ಪಕ್ಷಗಗಳಿಗಿಂತ ಅತ್ಯಧಿಕವಾಗಿದೆ. ಅಂದರೆ ಬಿಜೆಪಿ ಹಾಗೂ ಜೆಡಿಯು ಈ ಎರಡು ಪಕ್ಷಗಳಿಗಿಂತ ಆರ್‌ಜೆಡಿ ಹೆಚ್ಚುವರಿ 42 ಕ್ಷೇತ್ರಗಳಲ್ಲಿ ಮತಗಳನ್ನು ಪಡೆಯಿತು. ಹೀಗಾಗಿ ಆರ್‌ಜೆಡಿ ಹೆಚ್ಚು ಮತಗಳನ್ನು ಪಡೆದಯುವಂತಾದರೂ ಅದರ ಗೆಲ್ಲುವ ಸ್ಟ್ರೈಕ್‌ ರೇಟ್‌ ಬಿಜೆಪಿ ಹಾಗೂ ಜೆಡಿಯು ಅಷ್ಟು ಉತ್ತಮವಾಗಿಲ್ಲದ ಕಾರಣ ಕಳಪೆ ಪ್ರದರ್ಶನ ನೀಡಿತು. ಆರ್‌ಜೆಡಿ ಪಡೆದ ಮತಗಳ ಸಂಖ್ಯೆ 1,15,46,055 ಆಗಿದ್ದರೆ, ಬಿಜೆಪಿಗೆ 1,00,81,143 ಜನರು ಮತ ಹಾಕಿದ್ದಾರೆ.

ಮಹಾಘಟಬಂಧನದಲ್ಲಿ ಆರ್‌ಜೆಡಿಯ ಮಿತ್ರಪಕ್ಷಗಳು ಸಹ ವಿಫಲ ಪ್ರದರ್ಶನ ನೀಡಿದ್ದು, ಸಹ ಕಳಪೆ ಪ್ರದರ್ಶನಕ್ಕೆ ಧೊಡ್ಡ ಕೊಡುಗೆ ನೀಡಿವೆ. ಕಾಂಗ್ರೆಸ್ ಸ್ಪರ್ಧಿಸಿದ್ದ 61 ಸ್ಥಾನಗಳಲ್ಲಿ ಕೇವಲ ಆರು ಸ್ಥಾನಗಳನ್ನು ಮಾತ್ರ ಗೆದ್ದಿದೆ. ಸಿಪಿಐ(ಎಂಎಲ್) ಎರಡು ಸ್ಥಾನಗಳನ್ನು ಗೆದ್ದರೆ, ಸಿಪಿಐ(ಎಂ) ಒಂದು ಮತ್ತು ಸಿಪಿಐ ಯಾವುದೂ ಗೆಲ್ಲದೆ, ಮಹಾಘಟಬಂಧನದ ಒಟ್ಟು ಸ್ಥಾನಗಳ ಸಂಖ್ಯೆಯನ್ನು 35ಕ್ಕೆ ಸೀಮಿತಗೊಳಿಸಿತು.
ಎನ್‌ಡಿಎ 202 ಸ್ಥಾನಗಳನ್ನು ಗಳಿಸಿತು, ಇದರಲ್ಲಿ ಬಿಜೆಪಿ-89, ಜೆಡಿಯು-85, ಕೇಂದ್ರ ಸಚಿವ ಚಿರಾಗ್ ಪಾಸ್ವಾನ್ ಅವರ ಲೋಕ ಜನಶಕ್ತಿ ಪಕ್ಷ (ರಾಮ್ ವಿಲಾಸ್) 19, ಕೇಂದ್ರ ಸಚಿವ ಜಿತನ್ ರಾಮ್ ಮಾಂಝಿ ಅವರ ಹಿಂದೂಸ್ತಾನಿ ಅವಾಮ್ ಮೋರ್ಚಾ (ಎಚ್‌ಎಎಂ)-5 ಮತ್ತು ರಾಜ್ಯಸಭಾ ಸಂಸದ ಉಪೇಂದ್ರ ಕುಶ್ವಾಹ ಅವರ ರಾಷ್ಟ್ರೀಯ ಲೋಕ ಮೋರ್ಚಾ-4 ಸ್ಥಾನಗಳನ್ನು ಗೆದ್ದವು.
ಮತ ಹಂಚಿಕೆಯಲ್ಲಿನ ಈ ಏರಿಕೆಯು, ವರ್ಷಗಳ ಕಾಲ ಆಡಳಿತ ವಿರೋಧಿ ಅಲೆಯನ್ನು ಎದುರಿಸುತ್ತಿದ್ದ ಮತ್ತು ತಮ್ಮ ರಾಜಕೀಯದ “ಪಲ್ಟಿಗಳ” (Flip-flops) ಬಗ್ಗೆ ಟೀಕೆಗೆ ಗುರಿಯಾಗಿದ್ದ ನಿತೀಶಕುಮಾರ ಅವರು ಇನ್ನೂ ಗಟ್ಟಿಯಾದ, ನಿಷ್ಠಾವಂತ ಮತದಾರರ ನೆಲೆಯನ್ನು ಹೊಂದಿದ್ದಾರೆ ಎಂಬುದನ್ನು ಇದು ತೋರಿಸುತ್ತದೆ.