ನವದೆಹಲಿ: ಆಫ್ರಿಕಾ ಖಂಡದ ಅತೀ ಎತ್ತರದ ಪರ್ವತವಾದ ಮೌಂಟ್ ಕಿಲಿಮಾಂಜರೋ ಪರ್ವತ ಶಿಖರ ಏರುವ ಮೂಲಕ ಕೇಂದ್ರ ಕೈಗಾರಿಕಾ ಭದ್ರತಾ ಪಡೆಯ ಮಹಿಳಾ ಸಿಬ್ಬಂದಿ ಗೀತಾ ಸಮೋಟಾ ಹೊಸ ದಾಖಲೆ ಮಾಡಿದ್ದಾರೆ.
ಆಫ್ರಿಕಾ ಖಂಡದ ತಾಂಜಾನಿಯಾದಲ್ಲಿರುವ ಈ ಶಿಖರವನ್ನು ಅತೀ ವೇಗವಾಗಿ ಏರಿದ ಭಾರತೀಯ ಮಹಿಳೆ ಎಂಬ ದಾಖಲೆಯನ್ನು ಗೀತಾ ಸಮೋಟಾ ನಿರ್ಮಿಸಿದ್ದಾರೆ. ಹಾಗೆಯೇ ಈ ಸಾಧನೆ ಮಾಡಿದ ಕೇಂದ್ರ ಭದ್ರತಾ ಪಡೆಯ ಮೊದಲ ಮಹಿಳೆ ಎಂಬ ಹೆಗ್ಗಳಿಕೆಗೂ ಪಾತ್ರರಾಗಿದ್ದಾರೆ. ಸುಮಾರು 16 ಸಾವಿರ ಅಡಿ ಎತ್ತರಕ್ಕೇರಿದ ಗೀತಾ ಸಮೋಟಾ ಭಾರತದ ತ್ರಿವರ್ಣ ಪಾತಾಕೆ ಹಾರಿಸಿದ್ದಾರೆ.
ಮೌಂಟ್ ಕಿಲಿಮಾಂಜರೋ ಪರ್ವತ ಶಿಖರ ಮೂರು ಜ್ವಾಲಾಮುಖಿ ಶಂಕುಗಳನ್ನು ಹೊಂದಿದೆ. ಇದು ವಿಶ್ವದ ಅತಿ ಎತ್ತರದ ಏಕೈಕ ಮುಕ್ತ ಪರ್ವತ ಎಂಬುದು ವಿಶೇಷ. ಇದರ ಎತ್ತರ ಸಮುದ್ರ ಮಟ್ಟದಿಂದ 5,895 ಮೀಟರ್. ಹಾಗೆಯೇ ಭೂಮಿಯಿಂದ ಇದರ ತುತ್ತ ತುದಿಯನ್ನು ಕ್ರಮಿಸಬೇಕಿದ್ದರೆ 16,100 ಅಡಿ ಏರಬೇಕು.
ಈ ಹಿಂದೆ ಈ ಪರ್ವತವನ್ನು ಆಂಧ್ರಪ್ರದೇಶದ ಒಂಬತ್ತು ವರ್ಷದ ಹುಡುಗಿ ಕಡಪಾಲ ರಿತ್ವಿಕಾ ಶ್ರೀ ಏರಿ ಸಾಹಸ ಮಾಡಿದ್ದರು. ಕಿಲಿಮಂಜಾರೊ ಪರ್ವತವನ್ನು ಏರಿದ ಏಷ್ಯಾದ ಕಿರಿಯ ಹುಡುಗಿ ಎಂಬ ದಾಖಲೆ ರಿತ್ವಿಕಾ ಹೆಸರಿನಲ್ಲಿದೆ. ಕಿಲಿಮಂಜಾರೊ ಶಿಖರವನ್ನು ಭೂಮಿಯ ಮೇಲಿನ ನಾಲ್ಕನೇ ಅತ್ಯಂತ ಪ್ರಮುಖ ಸ್ಥಳ ಎಂದು ಪರಿಗಣಿಸಲಾಗುತ್ತದೆ . ಇದು ಕಿಲಿಮಂಜಾರೊ ರಾಷ್ಟ್ರೀಯ ಉದ್ಯಾನವನದ ಭಾಗವಾಗಿದ್ದು, ವಿಶ್ವ ಚಾರಣ ಪ್ರಿಯರ ಪ್ರಮುಖ ತಾಣವಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ