ಕೀವ್: ರಷ್ಯಾ ವಿರುದ್ಧದ ಯುದ್ಧಕ್ಕೆ ಹೆಚ್ಚುವರಿ ಹಣ ಸಂಗ್ರಹಿಸುವ ಉದ್ದೇಶದಿಂದ ಉಕ್ರೇನ್ ತನ್ನ ಬಹುತೇಕ ಭೂಗತವಾಗಿ ಕಾರ್ಯನಿರ್ವಹಿಸುತ್ತಿರುವ ಅಶ್ಲೀಲ (Pornography) ಚಿತ್ರೋದ್ಯಮಕ್ಕೆ ಕಾನೂನು ಮಾನ್ಯತೆ ನೀಡಿ ತೆರಿಗೆ ವಿಧಿಸುವ ಸಾಧ್ಯತೆಯನ್ನು ಪರಿಶೀಲಿಸುತ್ತಿದೆ. ಈ ಕ್ರಮದಿಂದ ವರ್ಷಕ್ಕೆ ದೊರೆಯಬಹುದಾದ ಆದಾಯವು ಸುಮಾರು 30,000 ಡ್ರೋನ್ಗಳ ಖರೀದಿಗೆ ನೆರವಾಗಬಹುದು ಎಂದು ದಿ ವಾಲ್ ಸ್ಟ್ರೀಟ್ ಜರ್ನಲ್ ವರದಿ ಮಾಡಿದೆ.
ಅಶ್ಲೀಲ ಚಿತ್ರಗಳ ನಿರ್ಮಾಣ ಮತ್ತು ವಿತರಣೆಯನ್ನು ಕಾನೂನುಬದ್ಧಗೊಳಿಸುವ ಮಸೂದೆ ಈಗಾಗಲೇ ಉಕ್ರೇನ್ ಸಂಸತ್ತಿನಲ್ಲಿ ಮೊದಲ ಹಂತದ ಅನುಮೋದನೆ ಪಡೆದಿದ್ದು, ಎರಡನೇ ಹಂತದ ಅನುಮೋದನೆಯ ನಿರೀಕ್ಷೆಯಲ್ಲಿದೆ. ಸಂಸತ್ತಿನ ಹಣಕಾಸು ಸಮಿತಿಯ ಅಧ್ಯಕ್ಷ ಹಾಗೂ ಮಸೂದೆಯ ಸಹ-ರಚಯಿತರಾದ ಸಂಸದ ಯಾರೋಸ್ಲಾವ್ ಝೆಲೆಝ್ನಿಯಾಕ್ ಅವರ ಅಂದಾಜಿನ ಪ್ರಕಾರ, ಈ ಉದ್ಯಮದ ಮೇಲೆ ತೆರಿಗೆ ವಿಧಿಸಿದರೆ ವರ್ಷಕ್ಕೆ ಸುಮಾರು 25 ಮಿಲಿಯನ್ ಡಾಲರ್ ಆದಾಯ ಸರ್ಕಾರಕ್ಕೆ ಲಭಿಸಬಹುದು.
ಉಕ್ರೇನ್ನ ಒಟ್ಟಾರೆ ಯುದ್ಧ ವೆಚ್ಚಕ್ಕೆ ಹೋಲಿಸಿದರೆ ಈ ಮೊತ್ತ ದೊಡ್ಡದಾಗದಿದ್ದರೂ, ದೇಶದ ರಕ್ಷಣಾ ಅಗತ್ಯಗಳಿಗೆ ಇದು ನೆರವಾಗಲಿದೆ ಎಂದು ಮಸೂದೆ ಬೆಂಬಲಿಗರು ವಾದಿಸುತ್ತಾರೆ. ಉಕ್ರೇನ್ ಸರ್ಕಾರವು ದೇಶದ ರಕ್ಷಣೆಗೆ ವಾರ್ಷಿಕ ಸುಮಾರು 120 ಬಿಲಿಯನ್ ಡಾಲರ್ ಅಗತ್ಯವಿದೆ ಎಂದು ಅಂದಾಜಿಸಿದೆ. ಆದಾಗ್ಯೂ, ಹೆಚ್ಚುವರಿ ಆದಾಯದ ಈ ಮೂಲವು ಸೇನೆಗೆ ಅಗತ್ಯವಿರುವ ಪ್ರಮುಖ ಉಪಕರಣಗಳ ಖರೀದಿಗೆ ಸಹಕಾರಿಯಾಗಬಹುದು ಎಂದು ಅವರು ಹೇಳಿದ್ದಾರೆ. ಸಂಸದ ಯಾರೋಸ್ಲಾವ್ ಝೆಲೆಝ್ನಿಯಾಕ್ ಅವರ ಪ್ರಕಾರ, ತೆರಿಗೆಯಿಂದ ಬರಬಹುದಾದ 25 ಮಿಲಿಯನ್ ಡಾಲರ್ ಆದಾಯವು ಸುಮಾರು 30,000 ಡ್ರೋನ್ಗಳ ಖರೀದಿಗೆ ಸಾಕಾಗಬಹುದು.
ಉಕ್ರೇನ್ನಲ್ಲಿ ವಯಸ್ಕರಿಗಾಗಿ ಇರುವ ಆನ್ಲೈನ್ ಕಂಟೆಂಟ್ ಉದ್ಯಮವು ವೇಗವಾಗಿ ಬೆಳೆಯುತ್ತಿದ್ದರೂ, ಅಶ್ಲೀಲ ಕಂಟೆಂಟ್ ನಿರ್ಮಾಣ ಮತ್ತು ವಿತರಣೆ ಇನ್ನೂ ಕಾನೂನುಬಾಹಿರವಾಗಿದೆ. ಇದರಿಂದ ತಮ್ಮ ಆದಾಯವನ್ನು ತೆರಿಗೆ ಇಲಾಖೆಗೆ ಘೋಷಿಸುವ ಕಂಟೆಂಟ್ ಸೃಷ್ಟಿಕರ್ತರು ಒಂದು ಕಡೆ ತೆರಿಗೆ ಪಾವತಿಸುತ್ತಿದ್ದರೆ, ಮತ್ತೊಂದು ಕಡೆ ಅಶ್ಲೀಲ ಕಂಟೆಂಟ್ ನಿರ್ಮಾಣದ ಆರೋಪದಡಿ ಕ್ರಿಮಿನಲ್ ಪ್ರಕರಣಗಳನ್ನು ಎದುರಿಸುವ ಅಪಾಯದಲ್ಲಿದ್ದಾರೆ.
ಕಾನೂನು ನಿರ್ಬಂಧಗಳ ನಡುವೆಯೂ ಈ ಉದ್ಯಮದ ವ್ಯಾಪ್ತಿಯನ್ನು ನಿರ್ಲಕ್ಷಿಸುವುದು ಕಷ್ಟವಾಗಿದೆ. ವಾಲ್ ಸ್ಟ್ರೀಟ್ ಜರ್ನಲ್ ಉಲ್ಲೇಖಿಸಿದ ಅಂಕಿಅಂಶಗಳ ಪ್ರಕಾರ, 2023ರಲ್ಲಿ ಸುಮಾರು 7,900 ಉಕ್ರೇನಿಯನ್ನರು ‘ಒನ್ಲಿಫ್ಯಾನ್ಸ್’ (OnlyFans) ಮೂಲಕ 131 ಮಿಲಿಯನ್ ಡಾಲರ್ಗಿಂತ ಹೆಚ್ಚು ಆದಾಯ ಗಳಿಸಿದ್ದಾರೆ. ಈ ಅಂಕಿಅಂಶಗಳು ಸರ್ಕಾರಕ್ಕೆ ಲಭ್ಯವಾಗಬಹುದಾದ ತೆರಿಗೆ ಮೂಲದ ಪ್ರಮಾಣವನ್ನು ತೋರಿಸುತ್ತವೆ.
ಆದರೆ, ಆದಾಯ ಘೋಷಿಸಿ ತೆರಿಗೆ ಪಾವತಿಸಿದ ಕೆಲವು ಕಂಟೆಂಟ್ ಸೃಷ್ಟಿಕರ್ತರು ನಂತರ ತೆರಿಗೆ ಸಂಬಂಧಿತ ವಿಚಾರಣೆಗಳ ಜೊತೆಗೆ ಅಶ್ಲೀಲ ಕಂಟೆಂಟ್ ಕಾನೂನು ಉಲ್ಲಂಘನೆ ಆರೋಪಗಳಿಗೂ ಒಳಗಾಗಿದ್ದಾರೆ ಎಂದು ವರದಿ ತಿಳಿಸಿದೆ. ಇದರಿಂದ ತೆರಿಗೆ ಸಂಗ್ರಹ ಪ್ರಕ್ರಿಯೆಯೇ ಕಾನೂನು ಸಂಕಷ್ಟಕ್ಕೆ ಕಾರಣವಾಗಿರುವುದು ಬೆಳಕಿಗೆ ಬಂದಿದೆ.
ಕಾನೂನು ಮಾನ್ಯತೆಯಿಂದ ಏನಾಗುತ್ತದೆ?
ಮಸೂದೆ ಬೆಂಬಲಿಗರ ಅಭಿಪ್ರಾಯದಂತೆ, ಉದ್ಯಮವನ್ನು ನಿಯಂತ್ರಣದ ವ್ಯಾಪ್ತಿಗೆ ತಂದರೆ ಸರ್ಕಾರಕ್ಕೆ ತೆರಿಗೆ ಆದಾಯ ಸಿಗಲಿದೆ. ಜೊತೆಗೆ ಭ್ರಷ್ಟಾಚಾರದ ಅವಕಾಶಗಳು ಕಡಿಮೆಯಾಗಲಿದ್ದು, ಯುದ್ಧಕಾಲದಲ್ಲಿ ಕಾನೂನು ಜಾರಿ ಸಂಸ್ಥೆಗಳು ತಮ್ಮ ಸಮಯ ಮತ್ತು ಸಂಪನ್ಮೂಲಗಳನ್ನು ಹೆಚ್ಚು ಮಹತ್ವದ ಭದ್ರತಾ ಕಾರ್ಯಗಳಿಗೆ ಬಳಸಲು ಸಾಧ್ಯವಾಗಲಿದೆ.
ವರದಿಯಲ್ಲಿ ಉಲ್ಲೇಖಿಸಲಾದ ಕಂಟೆಂಟ್ ಸೃಷ್ಟಿಕರ್ತೆ ಸ್ವಿಟ್ಲಾನಾ ದ್ವೋರ್ನಿಕೋವಾ ಅವರು ತಾವು ಈಗಾಗಲೇ ಸುಮಾರು 9 ಲಕ್ಷ ಡಾಲರ್ ತೆರಿಗೆ ಪಾವತಿಸಿದ್ದಾಗಿ ತಿಳಿಸಿದ್ದಾರೆ. ಈ ಮೊತ್ತವು ಸಾವಿರಾರು ಡ್ರೋನ್ಗಳು ಅಥವಾ ಸೇನಾ ವಾಹನಗಳ ಖರೀದಿ ವೆಚ್ಚಕ್ಕೆ ಸಮನಾಗಿದೆ ಎಂದು ಅವರು ಹೇಳಿದ್ದಾರೆ.
ಅವರು ಈ ಹಿಂದೆ ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ಅವರ ವೆಬ್ಸೈಟ್ನಲ್ಲಿ ಅರ್ಜಿ ಸಲ್ಲಿಸಿ, ವಯಸ್ಕರ ಕಂಟೆಂಟ್ ಸೃಷ್ಟಿಕರ್ತರ ವಿರುದ್ಧದ ಕಾನೂನು ಕ್ರಮಗಳನ್ನು ಪ್ರಶ್ನಿಸಿದ್ದರು. ಆ ಅರ್ಜಿಗೆ ಕೇವಲ ಒಂದು ವಾರದಲ್ಲೇ 25,000ಕ್ಕೂ ಹೆಚ್ಚು ಜನರ ಬೆಂಬಲ ದೊರೆತಿತ್ತು. ಬಳಿಕ ಝೆಲೆನ್ಸ್ಕಿ ಅವರು ಈ ಪ್ರಸ್ತಾವನೆಯನ್ನು ಸಂಸತ್ತಿನಲ್ಲಿ ಪರಿಗಣಿಸಲಾಗುವುದು ಎಂದು ತಿಳಿಸಿದ್ದರು.
ಎರಡನೇ ಹಂತದ ನಿರೀಕ್ಷೆಯಲ್ಲಿ ಮಸೂದೆ
ಈ ಮಸೂದೆ ಜುಲೈ ತಿಂಗಳಲ್ಲಿ ಮೊದಲ ಹಂತದ ಅನುಮೋದನೆ ಪಡೆದಿದ್ದು, ಈಗ ಎರಡನೇ ಹಂತದ ಅನುಮೋದನೆಗಾಗಿ ಕಾಯುತ್ತಿದೆ. ಉಕ್ರೇನ್ ಸರ್ಕಾರವು ಯುದ್ಧದ ನಡುವೆಯೇ ಹೆಚ್ಚುವರಿ ದೇಶೀಯ ಆದಾಯದ ಮೂಲಗಳನ್ನು ಹುಡುಕುತ್ತಿರುವ ಸಂದರ್ಭದಲ್ಲಿ ಈ ಪ್ರಸ್ತಾವನೆ ಮಹತ್ವ ಪಡೆದುಕೊಂಡಿದೆ. ದೇಶವು ಈಗಲೂ ವಿದೇಶಿ ಸೇನಾ ಮತ್ತು ಆರ್ಥಿಕ ನೆರವಿನ ಮೇಲೆ ಹೆಚ್ಚಿನ ಅವಲಂಬನೆ ಹೊಂದಿದೆ. ವಾರ್ಷಿಕ 25 ಮಿಲಿಯನ್ ಡಾಲರ್ ಆದಾಯವು ದೇಶದ ಒಟ್ಟು ರಕ್ಷಣಾ ಅಗತ್ಯಗಳಿಗೆ ಹೋಲಿಸಿದರೆ ಅಲ್ಪ ಪ್ರಮಾಣದ್ದಾಗಿದ್ದರೂ, ಈಗಾಗಲೇ ವ್ಯಾಪಕವಾಗಿ ಅಸ್ತಿತ್ವದಲ್ಲಿರುವ ಭೂಗತ ಉದ್ಯಮವನ್ನು ಕಾನೂನುಬದ್ಧಗೊಳಿಸಿ ಯುದ್ಧ ನಿಧಿಗೆ ಪರಿವರ್ತಿಸುವ ಪ್ರಯತ್ನವಾಗಿ ಇದನ್ನು ಬೆಂಬಲಿಗರು ನೋಡುತ್ತಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ