ಪಶ್ಚಿಮ ಘಟ್ಟದಲ್ಲಿ ನೆಲದಡಿ ವಾಸಿಸುವ ಕಾಲುಗಳಿಲ್ಲದ ಹೊಸ ಉಬಯಚರ ಜೀವಿ ಪತ್ತೆ

ಮಹಾರಾಷ್ಟ್ರದ ಪಶ್ಚಿಮ ಘಟ್ಟ ಪ್ರದೇಶದಲ್ಲಿ ವಿಜ್ಞಾನಿಗಳು ಹೊಸ ಉಭಯಚರ ಜೀವಿಯೊಂದನ್ನು ಪತ್ತೆಹಚ್ಚಿದ್ದಾರೆ. ನೆಲದಡಿಯಲ್ಲೇ ವಾಸಿಸುವ ಈ ಕಾಲಿಲ್ಲದ ಜೀವಿಯನ್ನು ಸಾಮಾನ್ಯವಾಗಿ ‘ಸಿಸಿಲಿಯನ್’ (Caecilian) ಎಂದು ಕರೆಯಲಾಗುತ್ತದೆ. ಹೊಸದಾಗಿ ಪತ್ತೆಯಾದ ಈ ಪ್ರಭೇದಕ್ಕೆ ‘ಗೆಗೆನಿಯೋಫಿಸ್ ಚಾಂದ್‌ಗಡಿ’ (Gegeneophis chandgadi) ಎಂದು ಹೆಸರಿಡಲಾಗಿದೆ.
ಭಾರತೀಯ ಪ್ರಾಣಿಶಾಸ್ತ್ರ ಸಮೀಕ್ಷೆ (ಝೆಡ್‌ಎಸ್‌ಐ), ಪುಣೆ ಮತ್ತು ಗೋವಾದ ವಿವಿಧ ಶಿಕ್ಷಣ ಹಾಗೂ ಸಂಶೋಧನಾ ಸಂಸ್ಥೆಗಳ ವಿಜ್ಞಾನಿಗಳ ತಂಡ ಈ ಆವಿಷ್ಕಾರ ಮಾಡಿದೆ. ಈ ಸಂಶೋಧನೆಯ ವಿವರಗಳನ್ನು ‘ಎಕ್ಸ್‌ಪ್ಲೋರಿಂಗ್ ಕ್ರಿಪ್ಟಿಕ್ ಡೈವರ್ಸಿಟಿ ಇನ್ ಗೆಗೆನಿಯೋಫಿಸ್ ಪೀಟರ್ಸ್ (ಆಂಫಿಬಿಯಾ: ಜಿಮ್ನೋಫಿಯೋನಾ: ಗ್ರ್ಯಾಂಡಿಸೋನಿಡೇ) ವಿತ್ ಎ ನೋವೆಲ್ ಸ್ಪೀಷೀಸ್ ಫ್ರಂ ದ ನಾರ್ದರ್ನ್ ವೆಸ್ಟರ್ನ್ ಘಾಟ್ಸ್, ಮಹಾರಾಷ್ಟ್ರ, ಇಂಡಿಯಾ’ ((Exploring cryptic diversity in Gegeneophis Peters (Amphibia: Gymnophiona: Grandisoniidae) with a novel species from the northern Western Ghats, Maharashtra, India)) ಎಂಬ ಸಂಶೋಧನಾ ಪ್ರಬಂಧದಲ್ಲಿ ಪ್ರಕಟಿಸಲಾಗಿದೆ.

ಕೊಲ್ಲಾಪುರ ಜಿಲ್ಲೆಯ ಚಾಂದಗಡ ಪ್ರದೇಶದಲ್ಲಿ ಈ ಜೀವಿ ಪತ್ತೆಯಾಗಿದೆ. ಇದರ ದೇಹದ ರಚನೆ ಮತ್ತು ಇತರ ಲಕ್ಷಣಗಳನ್ನು ಪರಿಶೀಲಿಸಿದ ವಿಜ್ಞಾನಿಗಳು, ಇದು ಇದುವರೆಗೆ ದಾಖಲಾಗಿರುವ ಯಾವುದೇ ಪ್ರಭೇದಕ್ಕೆ ಹೊಂದಿಕೆಯಾಗುವುದಿಲ್ಲ ಎಂದು ಕಂಡುಹಿಡಿದಿದ್ದಾರೆ. ಹೀಗಾಗಿ ಇದನ್ನು ಹೊಸ ಪ್ರಭೇದವಾಗಿ ಗುರುತಿಸಲಾಗಿದೆ.
ಈ ಜೀವಿಗೆ ‘ಚಾಂದ್‌ಗಡಿ’ ಎಂಬ ಹೆಸರನ್ನು ನೀಡಿರುವುದು ಚಾಂದಗಡ ಪ್ರದೇಶದ ಸ್ಥಳೀಯ ಭಾಷೆ ಮತ್ತು ಸಂಸ್ಕೃತಿಗೆ ಗೌರವ ಸೂಚಿಸುವ ಉದ್ದೇಶದಿಂದಾಗಿದೆ. ಅಲ್ಲದೆ, ಈ ಜೀವಿಯನ್ನು ಪತ್ತೆಹಚ್ಚಲು ನೆರವಾದ ಸ್ಥಳೀಯ ಜನರ ಜ್ಞಾನ ಮತ್ತು ಸಹಕಾರವನ್ನೂ ಇದು ಗೌರವಿಸುತ್ತದೆ ಎಂದು ಸಂಶೋಧಕರು ತಿಳಿಸಿದ್ದಾರೆ.
ವಿಶೇಷವೆಂದರೆ, ಈ ಜೀವಿ ಅರಣ್ಯ ಪ್ರದೇಶಗಳಲ್ಲಿ ಮಾತ್ರವಲ್ಲದೆ ಜನವಸತಿ ಪ್ರದೇಶಗಳು ಮತ್ತು ಕೃಷಿ ಭೂಮಿಗಳಲ್ಲಿಯೂ ನೆಲದಡಿಯಲ್ಲಿ ವಾಸಿಸುತ್ತಿರುವುದು ಕಂಡುಬಂದಿದೆ. ಇದರಿಂದ ಸಂರಕ್ಷಿತ ಅರಣ್ಯಗಳ ಹೊರಗೂ ಅಪರೂಪದ ಜೀವವೈವಿಧ್ಯ ಅಸ್ತಿತ್ವದಲ್ಲಿದೆ ಎಂಬುದು ಸ್ಪಷ್ಟವಾಗಿದೆ.

ಸಿಸಿಲಿಯನ್‌ಗಳು ನೋಡಲು ಎರೆಹುಳು ಅಥವಾ ಕುರುಡು ಹಾವಿನಂತಿರುವುದರಿಂದ ಅವುಗಳನ್ನು ಗುರುತಿಸುವುದು ಸುಲಭವಲ್ಲ. ಆದ್ದರಿಂದ ವಿಜ್ಞಾನಿಗಳು ಡಿಎನ್‌ಎ ಪರೀಕ್ಷೆ ಹಾಗೂ ದೇಹದ ವಿವಿಧ ಲಕ್ಷಣಗಳ ಅಧ್ಯಯನದ ಮೂಲಕ ಇದು ಹೊಸ ಪ್ರಭೇದ ಎಂಬುದನ್ನು ಖಚಿತಪಡಿಸಿದ್ದಾರೆ.
ಭಾರತದಲ್ಲಿ ಒಟ್ಟು 458 ಉಭಯಚರ ಪ್ರಭೇದಗಳು ದಾಖಲಾಗಿದ್ದು, ಅವುಗಳಲ್ಲಿ 41 ಸಿಸಿಲಿಯನ್ ಪ್ರಭೇದಗಳಾಗಿವೆ. ‘ಗೆಗೆನಿಯೋಫಿಸ್ ಚಾಂದ್‌ಗಡಿ’ ಪತ್ತೆಯೊಂದಿಗೆ ಭಾರತದಲ್ಲಿ ಗೆಗೆನಿಯೋಫಿಸ್ ಪ್ರಭೇದಗಳ ಸಂಖ್ಯೆ 12ಕ್ಕೆ ಏರಿಕೆಯಾಗಿದೆ. ಅವುಗಳಲ್ಲಿ 11 ಪ್ರಭೇದಗಳು ಪಶ್ಚಿಮ ಘಟ್ಟದಲ್ಲೇ ಕಂಡುಬರುವ ಸ್ಥಳೀಯ ಜೀವಿಗಳಾಗಿವೆ.
ಈ ಹೊಸ ಪ್ರಭೇದದ ಪತ್ತೆ ಪಶ್ಚಿಮ ಘಟ್ಟದ ಸಮೃದ್ಧ ಜೀವವೈವಿಧ್ಯವನ್ನು ಮತ್ತೊಮ್ಮೆ ಎತ್ತಿಹಿಡಿದಿದ್ದು, ನೆಲದಡಿಯಲ್ಲಿರುವ ಇನ್ನೂ ಅನೇಕ ಅಪರೂಪದ ಜೀವಿಗಳ ಬಗ್ಗೆ ಹೆಚ್ಚಿನ ಸಂಶೋಧನೆ ಅಗತ್ಯವಿದೆ ಎಂಬುದನ್ನು ತೋರಿಸಿದೆ.