ನವದೆಹಲಿ: ಬಾಂಗ್ಲಾದೇಶದಲ್ಲಿ ತೀವ್ರವಾದ ವಿದ್ಯುತ್ ಸಮಸ್ಯೆಗೆ ಕಾರಣವಾಗಬಹುದಾದ ಪ್ರಮುಖ ಕ್ರಮದಲ್ಲಿ, ಬಿಲಿಯನೇರ್ ಅದಾನಿ ಪವರ್ ಕಂಪನಿಯು ಬಾಕಿ ಇರುವ ಬಿಲ್‌ಗಳ ಕಾರಣಕ್ಕೆ ಬಾಂಗ್ಲಾದೇಶಕ್ಕೆ ತನ್ನ ವಿದ್ಯುತ್ ಪೂರೈಕೆಯ 50 ಪ್ರತಿಶತವನ್ನು ಕಡಿತಗೊಳಿಸಿದೆ. ಮಾಧ್ಯಮ ವರದಿಯ ಪ್ರಕಾರ, ಬಾಂಗ್ಲಾದೇಶವು ಅದಾನಿ ಪವರ್‌ನ ಸಂಪೂರ್ಣ ಸ್ವಾಮ್ಯದ ಅಂಗಸಂಸ್ಥೆಯಾದ ಅದಾನಿ ಪವರ್ ಜಾರ್ಖಂಡ್ ಲಿಮಿಟೆಡ್‌ಗೆ (ಎಪಿಜೆಎಲ್) $846 ಮಿಲಿಯನ್ ಬಾಕಿ ಕೊಡಬೇಕಿದೆ.
ಬಾಂಗ್ಲಾದೇಶ ಪಿಎಲ್‌ಸಿಯ ಪವರ್ ಗ್ರಿಡ್ ಡೇಟಾ ಉಲ್ಲೇಖಿಸಿ, ದಿ ಡೈಲಿ ಸ್ಟಾರ್ ಪತ್ರಿಕೆಯ ವರದಿಯು ಗುರುವಾರ ರಾತ್ರಿ ಅದಾನಿ ಸ್ಥಾವರವು ಪೂರೈಕೆಯನ್ನು ಕಡಿಮೆ ಮಾಡಿದೆ ಎಂದು ಹೇಳಿದೆ. ಬಾಂಗ್ಲಾದೇಶವು ಗುರುವಾರ ಮತ್ತು ಶುಕ್ರವಾರದ ಮಧ್ಯಂತರ ರಾತ್ರಿ 1,600 ಮೆಗಾವ್ಯಾಟ್ (MW) ಗಿಂತ ಹೆಚ್ಚಿನ ವಿದ್ಯುತ್ ಕೊರತೆಯನ್ನು ವರದಿ ಮಾಡಿದೆ.
ಈ ಹಿಂದೆ, ಬಾಂಗ್ಲಾದೇಶ ಪವರ್ ಡೆವಲಪ್‌ಮೆಂಟ್ ಬೋರ್ಡ್ (ಪಿಡಿಬಿ) ಬಾಕಿ ಉಳಿಸಿಕೊಂಡಿರುವ ವಿದ್ಯುತ್ ಶುಲ್ಕದ ಮೊತ್ತವನ್ನು ಅಕ್ಟೋಬರ್ 30 ರೊಳಗೆ ಪಾವತಿಸುವಂತೆ ವಿದ್ಯುತ್ ಕಾರ್ಯದರ್ಶಿಗೆ ಅದಾನಿ ಪವರ್ ಕಂಪನಿಯು ಪತ್ರ ಬರೆದಿತ್ತು. ಅಕ್ಟೋಬರ್ 27 ರ ಪತ್ರದಲ್ಲಿ ಅದಾನಿ ಗ್ರೂಪ್ ಕಂಪನಿಯು ಬಿಲ್‌ಗಳನ್ನು ಪಾವತಿಸದಿದ್ದರೆ, ಅಕ್ಟೋಬರ್ 31 ರಂದು ವಿದ್ಯುತ್ ಸರಬರಾಜನ್ನು ಸ್ಥಗಿತಗೊಳಿಸುವ ಮೂಲಕ ವಿದ್ಯುತ್ ಖರೀದಿ ಒಪ್ಪಂದದ (ಪಿಪಿಎ) ಅಡಿಯಲ್ಲಿ ಪರಿಹಾರ ಕ್ರಮಗಳನ್ನು ಕೈಗೊಳ್ಳಲು ಕಂಪನಿಯನ್ನು ನಿರ್ಬಂಧಿಸಲಾಗುತ್ತದೆ ಎಂದು ತಿಳಿಸಿತ್ತು.
ಬಾಂಗ್ಲಾದೇಶ ಕೃಷಿ ಬ್ಯಾಂಕ್‌ನಿಂದ USD 170.03 ಮಿಲಿಯನ್ ಮೊತ್ತಕ್ಕೆ ಪಿಡಿಬಿ (PDB) ಸಾಲದ ಪತ್ರವನ್ನು (LC) ಒದಗಿಸಿಲ್ಲ ಅಥವಾ $846 ಮಿಲಿಯನ್ ಬಾಕಿ ಮೊತ್ತವನ್ನು ಪಾವತಿಸಿಲ್ಲ ಎಂದು ಕಂಪನಿ ಹೇಳಿದೆ.
ಅದಾನಿ ಪವರ್ ಬೆಲೆ ಏರಿಸಿದೆ
ಹಿಂದಿನ ಬಾಕಿಗಳ ಒಂದು ಭಾಗವನ್ನು ಮೊದಲು ಪಾವತಿಸಿದ್ದರೂ, ಆದರೆ ಜುಲೈನಿಂದ, ಅದಾನಿ ಪವರ್ ಹೆಚ್ಚು ಶುಲ್ಕ ವಿಧಿಸುತ್ತಿದೆ ಎಂದು ಪಿಡಿಬಿ (PDB) ಅಧಿಕಾರಿ ಹೇಳಿದ್ದಾರೆ ಎಂದು ಡೈಲಿ ಸ್ಟಾರ್ ವರದಿ ಹೇಳಿದೆ.
ಪಿಡಿಬಿ (PDB)ವಾರಕ್ಕೆ ಸುಮಾರು $18 ಮಿಲಿಯನ್ ಶುಲ್ಕ ಪಾವತಿಸುತ್ತಿದೆ, ಆದರೆ ಶುಲ್ಕ $22 ಮಿಲಿಯನ್‌ಗಿಂತ ಹೆಚ್ಚಾಗಿದೆ ಎಂದು ಅಧಿಕಾರಿ ಹೇಳಿದ್ದಾರೆ. “ಇದಕ್ಕಾಗಿಯೇ ಬಾಕಿ ಪಾವತಿಗಳು ಮತ್ತೆ ಹೆಚ್ಚಾದವು. ಕಳೆದ ವಾರದ ಶುಲ್ಕದ ಪಾವತಿಯನ್ನು ಕೃಷಿ ಬ್ಯಾಂಕ್‌ಗೆ ಸಲ್ಲಿಸಿದ್ದಾರೆ, ಆದರೆ ಡಾಲರ್ ಕೊರತೆಯಿಂದಾಗಿ, ಪಾವತಿಯ ವಿರುದ್ಧ ಸಾಲದ ಪತ್ರವನ್ನು ತೆರೆಯಲು ಬ್ಯಾಂಕಿಗೆ ಸಾಧ್ಯವಾಗಿಲ್ಲ ಎಂದು ಅವರು ಹೇಳಿದ್ದಾರೆ.
ಕಳೆದ ವರ್ಷ ಫೆಬ್ರವರಿಯಲ್ಲಿ ಕಲ್ಲಿದ್ದಲು ಬೆಲೆಯ ಕುರಿತು ಪಿಡಿಬಿ ಪ್ರಶ್ನೆ ಎತ್ತಿದ ನಂತರ ಪೂರಕ ಒಪ್ಪಂದಕ್ಕೆ ಸಹಿ ಹಾಕಲಾಯಿತು, ಅದು ಇತರ ಕಲ್ಲಿದ್ದಲು ಆಧಾರಿತ ವಿದ್ಯುತ್ ಸ್ಥಾವರಗಳು ವಿಧಿಸುವ ದರಕ್ಕಿಂತ ಕಡಿಮೆ ಕಲ್ಲಿದ್ದಲು ಬೆಲೆಗಳನ್ನು ಉಲ್ಲೇಖಿಸಲು ಅದಾನಿಯನ್ನು ನಿರ್ಬಂಧಿಸಿತು. ಒಂದು ವರ್ಷದ ಪೂರಕ ಒಪ್ಪಂದದ ಅವಧಿಯ ನಂತರ, ಅದಾನಿ ಮತ್ತೆ ಪಿಪಿಎ ಪ್ರಕಾರ ಶುಲ್ಕ ವಿಧಿಸಲು ಪ್ರಾರಂಭಿಸಿದೆ ಎಂದು ವರದಿ ತಿಳಿಸಿದೆ.
ಪಿಪಿಎ (PPA) ಪ್ರಕಾರ, ಕಲ್ಲಿದ್ದಲು ಬೆಲೆಗಳನ್ನು ಇಂಡೋನೇಷಿಯನ್ ಕಲ್ಲಿದ್ದಲು ಸೂಚ್ಯಂಕ ಮತ್ತು ಆಸ್ಟ್ರೇಲಿಯನ್ ನ್ಯೂಕ್ಯಾಸಲ್ ಸೂಚ್ಯಂಕ ಈ ಎರಡು ಕಲ್ಲಿದ್ದಲು ಸೂಚ್ಯಂಕಗಳ ಸರಾಸರಿ ಬೆಲೆಯ ಆಧಾರದ ಮೇಲೆ ಲೆಕ್ಕಹಾಕಲಾಗುತ್ತದೆ.
ಪೂರೈಕೆಯನ್ನು ಅಮಾನತುಗೊಳಿಸಿದ ಅವಧಿಯಲ್ಲಿ, ಪಿಪಿಎ (PPA) ಯ ಸೆಕ್ಷನ್ 13.2(1) ಅಡಿಯಲ್ಲಿ ಸಾಮರ್ಥ್ಯದ ಪಾವತಿಗಳನ್ನು ಮರುಪಡೆಯಲು ಕಂಪನಿಯು ತನ್ನ ಹಕ್ಕನ್ನು ಕಾಯ್ದಿರಿಸಿಕೊಂಡಿದೆ ಎಂದು ಅದಾನಿ ಪವರ್ ಹೇಳಿದೆ. ಆಗಿನ ಪ್ರಧಾನಿ ಶೇಖ್ ಹಸೀನಾ ಅವರನ್ನು ಪದಚ್ಯುತಗೊಳಿಸಿದ ನಂತರ ಮಧ್ಯಂತರ ಸರ್ಕಾರ ಅಧಿಕಾರ ವಹಿಸಿಕೊಂಡ ನಂತರ ಕಂಪನಿಯು ಬಾಕಿ ಪಾವತಿಸಲು ಮಧ್ಯಂತರ ಸರ್ಕಾರವನ್ನು ಒತ್ತಾಯಿಸುತ್ತಿದೆ.
ನೊಬೆಲ್ ಪ್ರಶಸ್ತಿ ಪುರಸ್ಕೃತ ಪ್ರೊಫೆಸರ್ ಮುಹಮ್ಮದ್ ಯೂನಸ್ ನೇತೃತ್ವದ ಮಧ್ಯಂತರ ಸರ್ಕಾರವನ್ನು ಬಾಂಗ್ಲಾದೇಶದಲ್ಲಿ ಆಗಸ್ಟ್ 8 ರಂದು ಸ್ಥಾಪಿಸಲಾಯಿತು. ಅದಾನಿ ಗ್ರೂಪ್‌ನ ಅಧ್ಯಕ್ಷ ಗೌತಮ್ ಅದಾನಿ ಸಹ ಯೂನಸ್‌ಗೆ ಪತ್ರ ಬರೆದಿದ್ದಾರೆ.
ನಿಮ್ಮ ಕಾಮೆಂಟ್ ಬರೆಯಿರಿ