ಕಾನೂನುಬಾಹಿರ ಬೆಟ್ಟಿಂಗ್ ಜಾಲಕ್ಕೆ ಸಂಬಂಧಿಸಿದ ತನಿಖೆಯ ಭಾಗವಾಗಿ ಜಾರಿ ನಿರ್ದೇಶನಾಲಯ (ED) ಒಂದು ಆಘಾತಕಾರಿ ಹಣಕಾಸು ಮಾರ್ಗವನ್ನು ಪತ್ತೆಹಚ್ಚಿದೆ. ರ್ಯಾಪಿಡೋ ಬೈಕ್ ಚಾಲಕನೊಬ್ಬನ ಬ್ಯಾಂಕ್ ಖಾತೆಗೆ ಜಮೆಯಾಗಿದ್ದ ಹಣವು ಉದಯಪುರದ ತಾಜ್ ಅರಾವಳಿ ರೆಸಾರ್ಟ್ನಲ್ಲಿ ನಡೆದ ಐಷಾರಾಮಿ ವಿವಾಹಕ್ಕೆ ಸಂಪರ್ಕ ಹೊಂದಿರುವುದು ತನಿಖೆಯಲ್ಲಿ ಬಯಲಾಗಿದೆ.
ಈ ವಿವಾಹವು ಗುಜರಾತ್ ಯುವ ನಾಯಕನಿಗೆ ಸಂಬಂಧಿಸಿದ್ದಾಗಿದೆ ಎಂದು ಹೇಳಲಾಗಿದ್ದು, ಕಳೆದ ವರ್ಷ ನವೆಂಬರ್ನಲ್ಲಿ ನಡೆದಿತ್ತು. ಆದರೆ, ಇತ್ತೀಚಿನ ತನಿಖೆಗಳ ನಂತರ, ಈ ವಿವಾಹಕ್ಕೆ ಹಣದ ಮೂಲ ಯಾವುದು ಎಂಬ ಬಗ್ಗೆ ತೀವ್ರ ತನಿಖೆ ಶುರುವಾಗಿದೆ.
1xBet ಅಕ್ರಮ ಬೆಟ್ಟಿಂಗ್ ಜಾಲದ ತನಿಖೆ ನಡೆಸುತ್ತಿರುವ ಇ.ಡಿ. ಅಧಿಕಾರಿಗಳು, ಆ ಬೈಕ್ ಚಾಲಕನ ಖಾತೆಗೆ ಆಗಸ್ಟ್ 2024 ಮತ್ತು ಏಪ್ರಿಲ್ 2025 ರ ನಡುವೆ ಬರೋಬ್ಬರಿ ₹ 331.36 ಕೋಟಿ ಜಮಾ ಆಗಿರುವುದನ್ನು ಪತ್ತೆಹಚ್ಚಿದ್ದಾರೆ.2 ಕೋಣೆಯ ಗುಡಿಸಲಿನಲ್ಲಿ ವಾಸಿಸುತ್ತಿದ್ದ ರ್ಯಾಪಿಡೋ ಚಾಲಕನ ಬ್ಯಾಂಕ್ ಖಾತೆಯಲ್ಲಿ ನಡೆದ ವಹಿವಾಟು ನೋಡಿ ಇಡಿ (Enforcement Directorate) ಅಧಿಕಾರಿಗಳೇ ದಂಗಾಗಿದ್ದಾರೆ.
ಇತ್ತೀಚೆಗೆ ರಾಜಸ್ತಾನದ ಉದಯಪುರದ ತಾಜ್ ಅರಾವಳಿ ರೆಸಾರ್ಟ್ನಲ್ಲಿ ನಡೆದ ಗುಜರಾತ್ನ ಯುವ ರಾಜಕೀಯ ನಾಯಕನ ಮದುವೆಗೆ ಇದೇ ರ್ಯಾಪಿಡೋ ಚಾಲಕ 1 ಕೋಟಿ ರೂಪಾಯಿ ಖರ್ಚು ಮಾಡಿದ್ದಾನೆ. ಮದುವೆಯಾದ ವ್ಯಕ್ತಿಗೂ ಈ ಉಬರ್ ಚಾಲಕನಿಗೂ ಯಾವುದೇ ಸಂಪರ್ಕವಿಲ್ಲ. ಒಂದೇ ಒಂದು ಬಾರಿ ಫೋನ್ ಮಾಡಿಲ್ಲ. ಆದ್ರೆ ಮದ್ವೆಯ ಹಲವು ಬಿಲ್ಗಳನ್ನ ಪಾವತಿ ಮಾಡಿದ್ದಾನೆ ಚಾಲಕ, ಇದರ ಖರ್ಚು ವೆಚ್ಚ ಒಟ್ಟು 1 ಕೋಟಿ ರೂ.ಗಳಷ್ಟಾಗಿದೆ ಎಂದು ಇ.ಡಿ ತನಿಖಾ ಮೂಲ ಹೇಳಿವೆ.
‘ಮ್ಯೂಲ್’ ಆಗಿ ಬಳಕೆಯಾದ ಖಾತೆ
ಅಧಿಕಾರಿಗಳ ಪ್ರಕಾರ, ಈ ಖಾತೆಯನ್ನು “ಮ್ಯೂಲ್” (ಹಣ ಸಾಗಿಸುವ ಸಾಧನ) ಆಗಿ ಬಳಸಲಾಗಿದೆ ಎಂದು ತಿಳಿದುಬಂದಿದೆ. ಈ ಖಾತೆಗೆ ಹಲವಾರು ಅಪರಿಚಿತ ಮೂಲಗಳಿಂದ ಹಣ ವರ್ಗಾವಣೆಯಾಗಿದೆ ಮತ್ತು ತಕ್ಷಣವೇ ಅದನ್ನು ಇತರ ಸಂದೇಹಾಸ್ಪದ ಖಾತೆಗಳಿಗೆ ರವಾನಿಸಲಾಗಿದೆ.
ಇದೇ ರೀತಿಯ ಒಂದು ವ್ಯವಹಾರದ ಸರಣಿಯು ಅಕ್ರಮ ಬೆಟ್ಟಿಂಗ್ ಕಾರ್ಯಾಚರಣೆಗಳೊಂದಿಗೆ ಸಂಪರ್ಕ ಹೊಂದಿರುವ ಖಾತೆಗೆ ಹಣ ವರ್ಗಾಯಿಸಿದೆ. ಈ ಹಣದ ಸಂಪೂರ್ಣ ಮೂಲ ಮತ್ತು ಗಮ್ಯಸ್ಥಾನವನ್ನು ನಿರ್ಧರಿಸಲು ಇ.ಡಿ. ಈಗ ಈ ಜಾಲವನ್ನು ಪರಿಶೀಲಿಸುತ್ತಿದೆ.
ಹಣದ ಮೂಲವನ್ನು ಮರೆಮಾಚಲು ಮತ್ತು ಪತ್ತೆಯಿಂದ ತಪ್ಪಿಸಿಕೊಳ್ಳಲು ಮೂರನೇ ವ್ಯಕ್ತಿಯ ಖಾತೆಯನ್ನು ಉದ್ದೇಶಪೂರ್ವಕವಾಗಿ ಬಳಸಲಾಗಿದೆ ಎಂದು ತನಿಖಾಧಿಕಾರಿಗಳು ನಂಬಿದ್ದಾರೆ.
ಅಕ್ರಮ ಬೆಟ್ಟಿಂಗ್ ಜಾಲಕ್ಕೆ ನೇರ ಸಂಪರ್ಕ
ಚಾಲಕನ ಖಾತೆಗೆ ವರ್ಗಾವಣೆಯಾದ ಹಣದ ದೊಡ್ಡ ಭಾಗವು 1xBet ಸೇರಿದಂತೆ ಅಕ್ರಮ ಬೆಟ್ಟಿಂಗ್ ವೇದಿಕೆಗಳಿಂದ ಬಂದಿದೆ ಎಂದು ವರದಿಯಾಗಿದೆ.
ಹಣದ ಮೂಲವನ್ನು ಮರೆಮಾಚಲು, ಹಣವನ್ನು ವ್ಯವಸ್ಥಿತವಾಗಿ ಅನೇಕ ಖಾತೆಗಳ ಮೂಲಕ ವರ್ಗಾಯಿಸಲಾಗಿದ್ದು, ಇದು ಡಿಜಿಟಲ್ ಬೆಟ್ಟಿಂಗ್ ಪರಿಸರ ವ್ಯವಸ್ಥೆಯಲ್ಲಿನ ಹಣ ಅಕ್ರಮ ವರ್ಗಾವಣೆಯ (Money Laundering) ಸಂಕೀರ್ಣ ಜಾಲವನ್ನು ಬಿಂಬಿಸುತ್ತದೆ.
ಖಾತೆಗಳನ್ನು ನೀಡುವ ವ್ಯಕ್ತಿಗಳು ಕಾನೂನು ಅಪಾಯಗಳನ್ನು ಕಡಿಮೆ ಅಂದಾಜು ಮಾಡುತ್ತಾರೆ. ಇಂತಹ ತಂತ್ರಗಳು ಹೆಚ್ಚುತ್ತಿವೆ ಎಂದು ಹಿರಿಯ ಇ.ಡಿ. ಅಧಿಕಾರಿಯೊಬ್ಬರು ಎಚ್ಚರಿಸಿದ್ದಾರೆ.
ಈ ಭಾರಿ ಮೊತ್ತದ ಠೇವಣಿಗಳು ಮತ್ತು ಅವುಗಳನ್ನು ಐಷಾರಾಮಿ ಉದ್ದೇಶಗಳಿಗಾಗಿ ಬಳಸಿದ್ದು ಅಧಿಕಾರಿಗಳಿಗೆ ಆಘಾತವನ್ನುಂಟು ಮಾಡಿದೆ. ಶೀಘ್ರದಲ್ಲೇ ಯುವ ನಾಯಕನನ್ನು ವಿಚಾರಣೆಗಾಗಿ ಕರೆಸುವ ಸಾಧ್ಯತೆ ಇದೆ ಎಂದು ಹೇಳಲಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ