ನೆರೆಯ ರಾಷ್ಟ್ರಗಳಾದ ಪಾಕಿಸ್ತಾನ ಹಾಗೂ ಅಪ್ಘಾನಿಸ್ತಾನ ದೇಶಗಳು ಭೀಕರ ಸಂಘರ್ಷಕ್ಕೆ ಇಳಿದಿದ್ದು, ದೇಶದ ಗಡಿ ಔಟ್ಪೋಸ್ಟ್ಗಳ ಮೇಲೆ ನಡೆಸಲಾದ ಡ್ರೋನ್ ದಾಳಿಯ ದೃಶ್ಯಾವಳಿಗಳನ್ನು ಅಫ್ಘಾನ್ ತಾಲಿಬಾನ್ ಆಡಳಿತ ಬಿಡುಗಡೆ ಮಾಡಿದೆ. ಈ ಸಂಘರ್ಷದಲ್ಲಿ ಪಾಕಿಸ್ತಾನದ ಡಜನ್ಗಟ್ಟಲೆ ಸೈನಿಕರು ಸಾವಿಗೀಡಾಗಿದೆ, ಹಲವರು ಕಾಣೆಯಾಗಿದ್ದಾರೆ. ಅಫ್ಘಾನ್ ತಾಲಿಬಾನ್ ಪಡೆಗಳಿಗೂ ನಷ್ಟ ಉಂಟಾಗಿದೆ.
ಅಫ್ಘಾನ್ ತಾಲಿಬಾನ್ ಬಿಡುಗಡೆ ಮಾಡಿದ ಕಪ್ಪು-ಬಿಳುಪು ದೃಶ್ಯದಲ್ಲಿ, ಡ್ರೋನ್ ಒಂದು ಚಿಕ್ಕ ಸ್ಫೋಟಕವನ್ನು (ಸಂಭವನೀಯವಾಗಿ ಮಾರ್ಟರ್ ಶೆಲ್) ಆಯತಾಕಾರದ ಕಟ್ಟಡದ ಮೇಲೆ ಬೀಳಿಸುವುದು ಕಂಡುಬಂದಿದೆ. ಇದು ಪಾಕಿಸ್ತಾನದ ಸೇನೆಯ ಔಟ್ಪೋಸ್ಟ್ ಎಂದು ತಾಲಿಬಾನ್ ಹೇಳಿಕೊಂಡಿದೆ. ಸ್ಫೋಟದ ತಕ್ಷಣವೇ ಕಟ್ಟಡದ ಛಾವಣಿ ಛಿದ್ರಗೊಂಡಿದೆ.
ಅಫ್ಘಾನಿಸ್ತಾನದ ಟ್ಯಾಂಕ್ಗಳ ಸಾಲು ಪಾಕಿಸ್ತಾನದ ಗಡಿಯ ಯುದ್ಧಭೂಮಿಯತ್ತ ಸಾಗುತ್ತಿರುವುದರಿಂದ ಪರಿಸ್ಥಿತಿ ಮತ್ತಷ್ಟು ಉಲ್ಬಣಗೊಳ್ಳುವ ಸಾಧ್ಯತೆ ಇದೆ. ಕಳೆದ ವಾರ ಅಫ್ಘಾನಿಸ್ತಾನದ ರಾಜಧಾನಿ ಕಾಬೂಲ್ನಲ್ಲಿ ನಡೆದ ಎರಡು ಸ್ಫೋಟಗಳು ಸೇರಿದಂತೆ ಹಲವು ಸ್ಫೋಟಗಳಿಗೆ ಪಾಕಿಸ್ತಾನವೇ ಕಾರಣ ಎಂದು ತಾಲಿಬಾನ್ ಆರೋಪಿಸಿದ್ದು, ಅಂದಿನಿಂದ ಈ ಎರಡೂ ನೆರೆಯ ರಾಷ್ಟ್ರಗಳ ನಡುವಿನ ಹಿಂಸಾಚಾರ ಹೆಚ್ಚಿದೆ.
ಇದಕ್ಕೆ ಪ್ರತೀಕಾರವಾಗಿ ಅಫ್ಘಾನ್ ತಾಲಿಬಾನ್ ಸರ್ಕಾರವು ತನ್ನ ದಕ್ಷಿಣ ಗಡಿಯ ಕೆಲವು ಭಾಗಗಳಲ್ಲಿ ಪಾಕಿಸ್ತಾನದ ಸೇನೆಯ ಔಟ್ಪೋಸ್ಟ್ಗಳ ಮೇಲೆ ಆಕ್ರಮಣವನ್ನು ಪ್ರಾರಂಭಿಸಿದ್ದು, ಇದಕ್ಕೆ ಪ್ರತಿಯಾಗಿ ಪಾಕಿಸ್ತಾನ ಕೂಡ ಪ್ರಬಲ ಪ್ರತಿಕ್ರಿಯೆ ನೀಡುವುದಾಗಿ ಹೇಳಿದೆ.
ತಮ್ಮ ನೆಲದಲ್ಲಿ ಪಾಕಿಸ್ತಾನಿ ತಾಲಿಬಾನ್ ತೆಹ್ರೀಕ್-ಇ-ತಾಲಿಬಾನ್ (TTP) ನೇತೃತ್ವದ ಉಗ್ರಗಾಮಿ ಗುಂಪುಗಳಿಗೆ ಅಫ್ಘಾನಿಸ್ತಾನವು ಆಶ್ರಯ ನೀಡುತ್ತಿದೆ ಎಂದು ಪಾಕಿಸ್ತಾನ ಆರೋಪಿಸಿದೆ, ಆದರೆ ಅಪ್ಘಾನಿಸ್ತಾನ ಈ ಆರೋಪವನ್ನು ನಿರಾಕರಿಸಿದೆ.
ಇತ್ತೀಚಿನ ಹಿಂಸಾಚಾರದಲ್ಲಿ, ಪಾಕಿಸ್ತಾನದ ಮಿಲಿಟರಿ, ನೈಋತ್ಯ ಮತ್ತು ವಾಯುವ್ಯದಲ್ಲಿರುವ ಎರಡು ಪ್ರಮುಖ ಗಡಿ ಪೋಸ್ಟ್ಗಳ ಮೇಲೆ ಅಫ್ಘಾನ್ ತಾಲಿಬಾನ್ ದಾಳಿ ನಡೆಸಿದೆ ಎಂದು ಆರೋಪಿಸಿದೆ. ಡ್ರೋನ್ ದೃಶ್ಯಾವಳಿಗಳು ಈ ದಾಳಿಗಳಲ್ಲಿ ಒಂದರಿಂದ ಬಂದಿರುವ ಸಾಧ್ಯತೆಯಿದೆ.
ಎರಡೂ ದಾಳಿಗಳನ್ನು ಹಿಮ್ಮೆಟ್ಟಿಸಲಾಗಿದೆ ಎಂದು ಪಾಕಿಸ್ತಾನ ಹೇಳಿದೆ. ಬುಧವಾರ ಮುಂಜಾನೆ ದಕ್ಷಿಣ ಕಂದಹಾರ್ ಪ್ರಾಂತ್ಯದ ಅಫ್ಘಾನ್ ಭಾಗದಲ್ಲಿರುವ ಸ್ಪಿನ್ ಬೋಲ್ಡಾಕ್ ಬಳಿ ನಡೆಸಿದ ದಾಳಿಯಲ್ಲಿ ಸುಮಾರು 20 ತಾಲಿಬಾನ್ ಹೋರಾಟಗಾರರು ಹತರಾಗಿದ್ದಾರೆ ಎಂದು ಸುದ್ದಿ ಸಂಸ್ಥೆ ಎಎಫ್ಪಿ ವರದಿ ಮಾಡಿದೆ. ಸ್ಪಿನ್ ಬೋಲ್ಡಾಕ್ ಬಳಿಯ ಘರ್ಷಣೆಗಳಲ್ಲಿ 15 ನಾಗರಿಕರು ಸಾವಿಗೀಡಾಗಿದ್ದಾರೆ ಮತ್ತು ಡಜನ್ಗಟ್ಟಲೆ ಜನರು ಗಾಯಗೊಂಡಿದ್ದಾರೆ ಹಾಗೂ ತನ್ನ ‘ಎರಡರಿಂದ ಮೂವರು’ ಹೋರಾಟಗಾರರೂ ಸಹ ಸಾವಿಗೀಡಾಗಿದ್ದಾರೆ ಎಂದು ಅಫ್ಘಾನ್ ತಾಲಿಬಾನ್ ಹೇಳಿದೆ.
ಮಾರ್ಟರ್ ಶೆಲ್ ದಾಳಿಯಿಂದ ನಾಗರಿಕರು ಸಾವಿಗೀಡಾಗಿದ್ದಾರೆ ಎಂದು ಸ್ಪಿನ್ ಬೋಲ್ಡಾಕ್ ಪ್ರದೇಶದ ಮಾಹಿತಿ ಇಲಾಖೆಯ ಅಫ್ಘಾನ್ ವಕ್ತಾರ ಅಲಿ ಮೊಹಮ್ಮದ್ ಹಕ್ಮಲ್ ತಿಳಿಸಿದ್ದಾರೆ. ಪಾಕಿಸ್ತಾನದ ಪಡೆಗಳು “ಮತ್ತೊಮ್ಮೆ” ಲಘು ಮತ್ತು ಭಾರೀ ಶಸ್ತ್ರಾಸ್ತ್ರಗಳೊಂದಿಗೆ ದಾಳಿಗಳನ್ನು ನಡೆಸಿವೆ ಎಂದು ತಾಲಿಬಾನ್ ಸರ್ಕಾರದ ವಕ್ತಾರ ಝಬಿಹುಲ್ಲಾ ಮುಜಾಹಿದ್ ಆರೋಪಿಸಿದ್ದಾರೆ.
ಟಿಟಿಪಿ (TTP)ಗೆ ಬೆಂಬಲ ನೀಡುವುದನ್ನು ನಿಲ್ಲಿಸುವಂತೆ ಅಫ್ಘಾನ್ ತಾಲಿಬಾನ್ ಅನ್ನು ಒಪ್ಪಿಸಲು ಮಾಡಿದ ಹಲವಾರು ಪ್ರಯತ್ನಗಳು ವಿಫಲವಾಗಿವೆ ಎಂದು ಪಾಕಿಸ್ತಾನದ ರಕ್ಷಣಾ ಸಚಿವ ಖವಾಜಾ ಮುಹಮ್ಮದ್ ಆಸಿಫ್ ಕಳೆದ ವಾರ ಸಂಸತ್ತಿಗೆ ತಿಳಿಸಿದ್ದರು. ಟಿಟಿಪಿ – ಇದು ಅಫ್ಘಾನಿಸ್ತಾನದಲ್ಲಿ ಯುದ್ಧ ತರಬೇತಿ ಪಡೆದಿದ್ದು ಮತ್ತು ಅಲ್ಲಿನ ತಾಲಿಬಾನ್ನ ಸಿದ್ಧಾಂತವನ್ನು ಹಂಚಿಕೊಳ್ಳುತ್ತದೆ ಎಂದು ಹೇಳಿಕೊಂಡಿದೆ.2021 ರಲ್ಲಿ ತಾಲಿಬಾನ್ ಕಾಬೂಲ್ನಲ್ಲಿ ಅಧಿಕಾರಕ್ಕೆ ಬಂದಾಗಿನಿಂದ ನೂರಾರು ಪಾಕಿಸ್ತಾನಿ ಸೈನಿಕರನ್ನು ಕೊಂದಿದೆ ಎಂದು ಪಾಕಿಸ್ತಾನ ಆರೋಪಿಸಿದೆ.
ಕಳೆದ ವಾರ ಅಫ್ಘಾನಿಸ್ತಾನದಲ್ಲಿ ಸ್ಫೋಟಗಳು ನಡೆದಾಗ, ತಾಲಿಬಾನ್ನ ಉನ್ನತ ರಾಜತಾಂತ್ರಿಕರು ಭಾರತಕ್ಕೆ ಭೇಟಿ ನೀಡಿದ್ದರು. ಈ ಸ್ಫೋಟಗಳ ಜವಾಬ್ದಾರಿಯನ್ನು ಇದುವರೆಗೆ ಯಾವುದೇ ಗುಂಪು ಹೊತ್ತುಕೊಂಡಿಲ್ಲ.
ನಿಮ್ಮ ಕಾಮೆಂಟ್ ಬರೆಯಿರಿ