ಕೊರೊನಾ ಸೋಂಕಿಗೆ ಚಿಪ್ಕೊ ಚಳವಳಿ ಪ್ರವರ್ತಕ, ವೃಕ್ಷಮಿತ್ರ, ಪದ್ಮವಿಭೂಷಣ ಸುಂದರ್‌ಲಾಲ್ ಬಹುಗುಣ ನಿಧನ

ರಿಷಿಕೇಶ: ಚಿಪ್ಕೊ ಚಳವಳಿ ರೂವಾರಿ, ಖ್ಯಾತ ಪರಿಸರವಾದಿ ಮತ್ತು ಪದ್ಮವಿಭೂಷಣ ಸುಂದರಲಾಲ್ ಬಹುಗುಣ ( 94 ವರ್ಷ) ಅವರು ಕೊರೊನಾ ಸೋಂಕಿನಿಂದ ಶುಕ್ರವಾರ ನಿಧನರಾಗಿದ್ದಾರೆ.
ಅವರು ರಿಷಿಕೇಶದ ಏಮ್ಸ್ ಆಸ್ಪತ್ರೆಯಲ್ಲಿ ಕೋವಿಡ್ -19 ಗೆ ಚಿಕಿತ್ಸೆ ಪಡೆಯುತ್ತಿದ್ದ ಬಹುಗುಣ ಶುಕ್ರವಾರ ನಿಧನರಾದರು.ಪರಿಸರ ಉಳಿಸಲು ಚಿಪ್ಕೊ ಚಳವಳಿ ಪ್ರವರ್ತಕರಾದ ಅವರನ್ನು ಮೇ 8 ರಂದು ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ವರದಿಗಳ ಪ್ರಕಾರ, ಅವರು ಆಸ್ಪತ್ರೆಗೆ ದಾಖಲು 10 ದಿನಗಳ ಮೊದಲು ಕೋವಿಡ್ ತರಹದ ರೋಗಲಕ್ಷಣಗಳಿಂದ ಬಳಲುತ್ತಿದ್ದರು.ಅವರು ಶುಕ್ರವಾರ ಮಧ್ಯಾಹ್ನ 12.05 ಕ್ಕೆ ಅವರು ನಿಧನರಾದರು ಎಂದು ಏಮ್ಸ್ ನಿರ್ದೇಶಕ ರವಿಕಾಂತ್ ಹೇಳಿದ್ದಾರೆ.
ಮುಖ್ಯಮಂತ್ರಿ ತಿರಥ್ ​​ಸಿಂಗ್ ರಾವತ್ ಅವರು ಬಹುಗುಣ ಅವರ ನಿಧನಕ್ಕೆ ಸಂತಾಪ ಸೂಚಿಸಿದ್ದಾರೆ. ಇದು ಉತ್ತರಾಖಂಡ ಮತ್ತು ಭಾರತಕ್ಕೆ ಮಾತ್ರವಲ್ಲ ಇಡೀ ಜಗತ್ತಿಗೆ ದೊಡ್ಡ ನಷ್ಟ. ಅವರು ಚಿಪ್ಕೊ ಚಳವಳಿಯನ್ನು ಜನಸಾಮಾನ್ಯರ ಚಳವಳಿಯನ್ನಾಗಿ ಮಾಡಿದರು” ಎಂದು ಮುಖ್ಯಮಂತ್ರಿ ರಾವತ್ ಕಂಬನಿ ಮಿಡಿದಿದ್ದಾರೆ.
ಸುಂದರ್‌ಲಾಲ್ ಬಹುಗುಣ ಅವರು ಜೀವಮಾನದುದ್ದಕ್ಕೂ ಪರಿಸರವಾದಿಯಾಗಿದ್ದರು ಮತ್ತು ಚಿಪ್ಕೊ ಆಂದೋಲನದ ಪ್ರವರ್ತಕರಾಗಿದ್ದರು. 1970 ರ ದಶಕದಲ್ಲಿ ಗರ್ವಾಲ್ ಪ್ರದೇಶದ ಮೂಲಕ ವ್ಯಾಪಿಸಿದ ತಳಮಟ್ಟದ ಚಳವಳಿ ಗ್ರಾಮಸ್ಥರು ಮರಗಳನ್ನು ತಬ್ಬಿಕೊಂಡು ಕೊಡಲಿಯಿಂದ ಮರಗಳನ್ನು ಕಡಿಯವುದನ್ನು ತಡೆಯಲಾಗುತ್ತದೆ. ನಂತರ 1990ರ ದಶಕದಲ್ಲಿ, ಅವರು ತೆಹ್ರಿ ಅಣೆಕಟ್ಟು ವಿರೋಧಿ ಆಂದೋಲನವನ್ನು ಮುನ್ನಡೆಸಿದರು ಮತ್ತು 1995 ರಲ್ಲಿ ಜೈಲಿಗೆ ಹೋದರು.ಅವರನ್ನು ವಿಶ್ವದಾದ್ಯಂತ ವೃಕ್ಷಮಿತ್ರ ಎಂದೇ ಕರೆಯುತ್ತಾರೆ.
ಚಿಪ್ಕೊ ಚಳವಳಿ ಅಂದರೆ ಏನು..?
ಚಿಪ್ಕೊ ಚಳುವಳಿ ಹಿಮಾಲಯನ್ ಪ್ರದೇಶದ ಸ್ಥಳೀಯರು ಅರಣ್ಯನಾಶದ ವಿರುದ್ಧ ಗಾಂಧಿವಾದಿ ಬಹಗುಣರ ಪ್ರತಿಭಟನೆಯಾಗಿತ್ತು. ಅರಣ್ಯನಾಶವನ್ನು ನಿಲ್ಲಿಸಲು, ಸ್ಥಳೀಯರು – ಮುಖ್ಯವಾಗಿ ಮಹಿಳೆಯರು – ಮರಗಳ ಸುತ್ತ ವೃತ್ತಗಳನ್ನು ಮಾಡುತ್ತಾರೆ ಮತ್ತು ಪುರುಷರು ಅವುಗಳನ್ನು ಕತ್ತರಿಸುವುದನ್ನು ತಡೆಯುತ್ತಾರೆ.
ಮೊದಲ ಚಿಪ್ಕೊ ಕ್ರಿಯೆಯು ಏಪ್ರಿಲ್ 1973 ರಲ್ಲಿ ಉತ್ತರಖಂಡದಲ್ಲಿರುವ ಮಂಡಲ್ ಗ್ರಾಮದಲ್ಲಿ ನಡೆಯಿತು ಮತ್ತು ಮುಂದಿನ ಐದು ವರ್ಷಗಳಲ್ಲಿ ಅನೇಕ ಹಿಮಾಲಯದ ಇತರ ಜಿಲ್ಲೆಗಳಿಗೆ ಹರಡಿತು. ನಂತರ ದೇಶಾದ್ಯಂತ ಸದ್ದು ಮಾಡಿತು.
ಅಲಕಾನಂದ ಕಣಿವೆಯಲ್ಲಿರುವ ಅರಣ್ಯ ಪ್ರದೇಶದ ಜಾಗವನ್ನು ಕ್ರೀಡಾ ಸಾಮಗ್ರಿಗಳ ಕಂಪನಿಗೆ ನೀಡಲು ಸರ್ಕಾರ ನಿರ್ಧರಿಸಿದ ನಂತರ ಈ ಚಳವಳಿ ಹುಟ್ಟಿಕೊಂಡಿತು. ಸ್ಥಳೀಯ ಎನ್‌ಜಿಒವೊಂದರ ಸಹಾಯದಿಂದ ಆ ಪ್ರದೇಶದ ಮಹಿಳೆಯರು ಕಾಡಿಗೆ ಹೋಗಿ ಮರಗಳ ಸುತ್ತ ವೃತ್ತವನ್ನು ರಚಿಸಿ, ಮರಗಳನ್ನು ಕಡಿಯಲು ಬಂದ ಪುರುಷರಿಂದ ಮರಗಳನ್ನು ರಕ್ಷಿಸಲಾಯಿತು.
ಮಹಿಳೆಯರು ರಾತ್ರಿಯಿಡೀ ಜಾಗರಣೆ ಮಾಡಿ, ಎಲ್ಲರೂ ಹೊರಡುವ ವರೆಗೂ ತಮ್ಮ ಮರಗಳನ್ನು ಕಾಪಾಡುತ್ತಿದ್ದರು. ಆ ಹೊತ್ತಿಗೆ, ಈ ಚಳವಳಿಯ ಸುದ್ದಿ ಹತ್ತಿರದ ಹಳ್ಳಿಗಳಿಗೆ ಹರಡಿತು ಮತ್ತು ಹೆಚ್ಚಿನ ಜನರು ಸೇರಿಕೊಂಡರು.
ಈ ಪ್ರತಿಭಟನೆಯಿಂದ ಸಾಧಿಸಿದ ಯಶಸ್ಸು ದೇಶದ ಇತರ ಭಾಗಗಳಲ್ಲಿ ಇದೇ ರೀತಿಯ ಪ್ರತಿಭಟನೆಗೆ ಕಾರಣವಾಯಿತು.
ಆಂದೋಲನವನ್ನು ಮುನ್ನಡೆಸುತ್ತಿದ್ದ ಸುಂದರ್‌ಲಾಲ್ ಬಹುಗುಣ, ಆಗಿನ ಪ್ರಧಾನಿ ಇಂದಿರಾ ಗಾಂಧಿಯವರಿಗೆ ಮರಗಳನ್ನು ಕಡಿಯುವುದನ್ನು ನಿಷೇಧಿಸುವಂತೆ ಮನವಿ ಮಾಡಿದರು. ಅವರ ಮನವಿಯ ಪರಿಣಾಮವಾಗಿ 1980 ರಲ್ಲಿ ಹಸಿರು ಮರಗಳನ್ನು ಕಡಿಯುವುದನ್ನು 15 ವರ್ಷಗಳ ಕಾಲ ನಿಷೇಧಿಸಲಾಯಿತು.
ಮುಂದಿನ ವರ್ಷ, ಸರ್ಕಾರವು ಅವರಿಗೆ ಪದ್ಮಶ್ರೀ ಪ್ರಶಸ್ತಿಯನ್ನು ನೀಡುವ ಮೂಲಕ ಗೌರವಿಸಲು ಬಯಸಿತು, ಆದರೆ ಅವರು ಅದನ್ನು ತಿರಸ್ಕರಿಸಿದರು. 2009 ರಲ್ಲಿ ಅವರಿಗೆ ಪದ್ಮವಿಭೂಷಣ ನೀಡಿ ಗೌರವಿಸಲಾಯಿತು.