ನವದೆಹಲಿ: ವಿಶ್ವದ ಪ್ರಮುಖ ಇ-ಕಾಮರ್ಸ್ ಮತ್ತು ತಂತ್ರಜ್ಞಾನ ಸಂಸ್ಥೆಯಾದ ಅಮೆಜಾನ್ ಜಾಗತಿಕವಾಗಿ ಸುಮಾರು 16,000 ಉದ್ಯೋಗಿಗಳನ್ನು ವಜಾಗೊಳಿಸಲಿದೆ ಎಂದು ವರದಿಯಾಗಿದೆ. ಕಳೆದ ಮೂರು ತಿಂಗಳ ಅವಧಿಯಲ್ಲಿ ಕಂಪನಿಯು ಕೈಗೊಂಡ ಎರಡನೇ ಅತಿದೊಡ್ಡ ಉದ್ಯೋಗ ಕಡಿತ ಪ್ರಕ್ರಿಯೆ ಇದಾಗಿದೆ.
ಕೋವಿಡ್ ಸಾಂಕ್ರಾಮಿಕದ ಅವಧಿಯಲ್ಲಿ ಮಾಡಿಕೊಂಡಿದ್ದ ಅತಿಯಾದ ನೇಮಕಾತಿ ಮತ್ತು ಪ್ರಸ್ತುತ ಸಂಸ್ಥೆಯ ಕಾರ್ಯಾಚರಣೆಯಲ್ಲಿ ಕೃತಕ ಬುದ್ಧಿಮತ್ತೆ (AI) ತಂತ್ರಜ್ಞಾನದ ಬಳಕೆ ಹೆಚ್ಚಿಸುತ್ತಿರುವುದು ಈ ಬೃಹತ್ ಕಡಿತಕ್ಕೆ ಪ್ರಮುಖ ಕಾರಣ ಎಂದು ವಿಶ್ಲೇಷಿಸಲಾಗಿದೆ.
ಈ ಇತ್ತೀಚಿನ ನಿರ್ಧಾರವು ಅಮೆಜಾನ್ ವೆಬ್ ಸರ್ವಿಸಸ್ (AWS), ಚಿಲ್ಲರೆ ವ್ಯಾಪಾರ (Retail), ಪ್ರೈಮ್ ವೀಡಿಯೊ ಹಾಗೂ ಮಾನವ ಸಂಪನ್ಮೂಲ ವಿಭಾಗಗಳ ಮೇಲೆ ನೇರ ಪರಿಣಾಮ ಬೀರಲಿದೆ. ಕಳೆದ ವರ್ಷದ ಅಕ್ಟೋಬರ್ ಅಂತ್ಯದಲ್ಲಿ ಸಂಸ್ಥೆಯು ಸುಮಾರು 14,000 ಕಾರ್ಪೊರೇಟ್ ಉದ್ಯೋಗಿಗಳನ್ನು ಈಗಾಗಲೇ ವಜಾಗೊಳಿಸಿದೆ. ಪದೇ ಪದೇ ನಡೆಯುತ್ತಿರುವ ಈ ಬೆಳವಣಿಗೆಯಿಂದ ನೌಕರರು ಕಳವಳಗೊಂಡಿದ್ದಾರೆ.
ವಜಾಗೊಳ್ಳಲಿರುವ ಅಮೆರಿಕ ಮೂಲದ ಉದ್ಯೋಗಿಗಳಿಗೆ ಕಂಪನಿಯ ಒಳಗಡೆಯೇ ಬೇರೆ ಹುದ್ದೆಗಳನ್ನು ಹುಡುಕಿಕೊಳ್ಳಲು 90 ದಿನಗಳ ಕಾಲಾವಕಾಶ ನೀಡಲಾಗುತ್ತಿದೆ. ಅಂತಾರಾಷ್ಟ್ರೀಯ ಮಟ್ಟದ ಉದ್ಯೋಗಿಗಳಿಗೆ ಆಯಾ ದೇಶದ ಕಾರ್ಮಿಕ ನಿಯಮಗಳ ಅನ್ವಯ ಕಾಲಾವಕಾಶ ಸಿಗಲಿದೆ. ಒಂದು ವೇಳೆ ಕಂಪನಿಯಲ್ಲಿ ಮರುನೇಮಕ ಸಾಧ್ಯವಾಗದಿದ್ದರೆ, ಅಂತಹವರಿಗೆ ಪರಿಹಾರ ಧನ (Severance Pay), ಆರೋಗ್ಯ ವಿಮೆ ಸೌಲಭ್ಯ ಹಾಗೂ ಉದ್ಯೋಗ ಹುಡುಕಲು ಅಗತ್ಯವಿರುವ ನೆರವು ನೀಡುವುದಾಗಿ ಸಂಸ್ಥೆ ತಿಳಿಸಿದೆ.
ಇಷ್ಟೆಲ್ಲಾ ಕಡಿತಗಳ ನಡುವೆಯೂ ಕಂಪನಿಯ ದೀರ್ಘಕಾಲೀನ ಬೆಳವಣಿಗೆಗೆ ಪೂರಕವಾದ ಆಯಕಟ್ಟಿನ ವಿಭಾಗಗಳಲ್ಲಿ ಹೊಸ ನೇಮಕಾತಿ ಮತ್ತು ಹೂಡಿಕೆ ಮುಂದುವರಿಯಲಿದೆ ಎಂದು ಅಮೆಜಾನ್ನ ಪೀಪಲ್ ಎಕ್ಸ್ಪೀರಿಯೆನ್ಸ್ ಮತ್ತು ಟೆಕ್ನಾಲಜಿಯ ಹಿರಿಯ ಉಪಾಧ್ಯಕ್ಷ ಬೆತ್ ಗ್ಯಾಲೆಟ್ಟಿ ತಿಳಿಸಿದ್ದಾರೆ.
ಕೃತಕ ಬುದ್ಧಿಮತ್ತೆಯ ಅಳವಡಿಕೆಯಿಂದಾಗಿ ಕಾರ್ಪೊರೇಟ್ ಕೆಲಸಗಳು ಸ್ವಯಂಚಾಲಿತಗೊಳ್ಳುತ್ತಿವೆ, ಇದು ನೈಸರ್ಗಿಕವಾಗಿ ಉದ್ಯೋಗ ನಷ್ಟಕ್ಕೆ ದಾರಿ ಮಾಡಿಕೊಡುತ್ತಿದೆ. ಅಮೆಜಾನ್ನ ಒಟ್ಟು 10.58 ಲಕ್ಷ ಉದ್ಯೋಗಿಗಳಲ್ಲಿ ಪ್ರಸ್ತುತ ವಜಾ ಆಗುತ್ತಿರುವವರ ಸಂಖ್ಯೆ ಶೇಕಡಾ 10 ರಷ್ಟು ಮಾತ್ರವಿದ್ದರೂ, ಇದು ಕಾರ್ಪೊರೇಟ್ ವಲಯದ ಮೇಲೆ ದೊಡ್ಡ ಮಟ್ಟದ ಪ್ರಭಾವ ಬೀರಲಿದೆ. ಆದರೆ, ಫುಲ್ಫಿಲ್ಮೆಂಟ್ ಸೆಂಟರ್ ಮತ್ತು ಗೋದಾಮುಗಳಲ್ಲಿ ಕೆಲಸ ಮಾಡುವ ಬಹುಪಾಲು ಸಿಬ್ಬಂದಿಗೆ ಈ ನಿರ್ಧಾರದಿಂದ ಯಾವುದೇ ತೊಂದರೆಯಾಗುವುದಿಲ್ಲ ಎಂದು ವರದಿಯಾಗಿದೆ.
ನಿಮ್ಮ ಕಾಮೆಂಟ್ ಬರೆಯಿರಿ