ನವದೆಹಲಿ: ಜಾಗತಿಕ ಸವಾಲುಗಳು ಮತ್ತು ಅಮೆರಿಕದ ಸುಂಕದ ಸಮರದ (Tariff War) ನಡುವೆಯೂ ಭಾರತದ ಆರ್ಥಿಕತೆಯು ಸದೃಢವಾಗಿ ಬೆಳೆಯುತ್ತಿದೆ. ಜನವರಿ 7 ರಂದು ಸರ್ಕಾರ ಬಿಡುಗಡೆ ಮಾಡಿದ ಮೊದಲ ಮುಂಗಡ ಅಂದಾಜಿನ ಪ್ರಕಾರ, 2025-26ರ ಹಣಕಾಸು ವರ್ಷದಲ್ಲಿ ಭಾರತದ ನೈಜ ಒಟ್ಟು ದೇಶೀಯ ಉತ್ಪನ್ನ (GDP) ಶೇ. 7.4 ರಷ್ಟು ಪ್ರಗತಿ ಸಾಧಿಸುವ ನಿರೀಕ್ಷೆಯಿದೆ. ಇದು ಕಳೆದ ವರ್ಷದ ಶೇ. 6.5 ಕ್ಕಿಂತ ಅಧಿಕವಾಗಿದೆ.
ಕೇಂದ್ರ ಸಾಂಖ್ಯಿಕ ಮತ್ತು ಕಾರ್ಯಕ್ರಮ ಅನುಷ್ಠಾನ ಸಚಿವಾಲಯದ (MoSPI) ಹೇಳಿಕೆಯ ಪ್ರಕಾರ 2025-26ರಲ್ಲಿ ಜಿಡಿಪಿಯು 201.90 ಲಕ್ಷ ಕೋಟಿ ರೂ. ತಲುಪುವ ಅಂದಾಜಿದೆ (2024-25ರಲ್ಲಿ ಇದು 187.97 ಲಕ್ಷ ಕೋಟಿ ರೂ. ಇತ್ತು).
ನಾಮಮಾತ್ರದ ಜಿಡಿಪಿ (Nominal GDP) ಅಥವಾ ಪ್ರಸಕ್ತ ಬೆಲೆಗಳಲ್ಲಿ ಜಿಡಿಪಿ ಮೌಲ್ಯವು 357.14 ಲಕ್ಷ ಕೋಟಿ ರೂ. ತಲುಪಲಿದ್ದು, ಶೇ. 8.0 ರಷ್ಟು ಬೆಳವಣಿಗೆಯನ್ನು ದಾಖಲಿಸಲಿದೆ ಎಂದು ಅಂದಾಜಿಸಲಾಗಿದೆ.
ಬೆಳವಣಿಗೆಗೆ ಪ್ರೇರಕ ಅಂಶಗಳು:
ದೇಶದ ಆರ್ಥಿಕ ಪ್ರಗತಿಗೆ ಕೆಲವು ಸುಧಾರಣೆಗಳು ವೇಗವರ್ಧಕವಾಗಿ ಕೆಲಸ ಮಾಡಲಿವೆ ಎಂದು ವರದಿ ತಿಳಿಸಿದೆ.
2025-26ರ ಬಜೆಟ್ನಲ್ಲಿ ಘೋಷಿಸಲಾದ ವ್ಯೂಹಾತ್ಮಕ ಆದಾಯ ತೆರಿಗೆ ಕಡಿತ
ಜಿಎಸ್ಟಿ ವ್ಯವಸ್ಥೆಯ ತರ್ಕಬದ್ಧಗೊಳಿಸುವಿಕೆ (Rationalisation).
ಓಮನ್, ಯುಕೆ (UK) ಮತ್ತು ನ್ಯೂಜಿಲೆಂಡ್ ರಾಷ್ಟ್ರಗಳೊಂದಿಗೆ ಮಾಡಿಕೊಂಡಿರುವ ಪ್ರಮುಖ ವ್ಯಾಪಾರ ಒಪ್ಪಂದಗಳು ಎಂದು ಜಿಡಿಪಿ ಬೆಳವಣಿಗೆಗೆ ಪ್ರೇರಕ ಅಂಶಗಳು ಎಂದು ವರದಿ ತಿಳಿಸಿದೆ.
ವಲಯವಾರು ಪ್ರಗತಿ:
ಉತ್ಪಾದನೆ ಮತ್ತು ನಿರ್ಮಾಣ ವಲಯಗಳು ಶೇ. 7 ರಷ್ಟು ಪ್ರಗತಿ ಸಾಧಿಸುವ ಅಂದಾಜಿದೆ.
ಸೇವಾ ವಲಯವು ಆರ್ಥಿಕತೆಯ ಪ್ರಮುಖ ಚಾಲಕಶಕ್ತಿಯಾಗಿದ್ದು, ಒಟ್ಟು ಮೌಲ್ಯವರ್ಧನೆ (GVA) ಶೇ. 7.3 ರಷ್ಟು ದಾಖಲಾಗುವ ನಿರೀಕ್ಷೆಯಿದೆ.
ಕೃಷಿ, ಅನಿಲ ಮತ್ತು ನೀರು ಸರಬರಾಜಿನಂತಹ ಉಪಯುಕ್ತ ಸೇವಾ ವಲಯಗಳಲ್ಲಿ ಈ ಬಾರಿ ಸಾಧಾರಣ ಮಟ್ಟದ ಬೆಳವಣಿಗೆ ಕಂಡುಬಂದಿದೆ.
ಈ ಮುಂಗಡ ಅಂದಾಜುಗಳನ್ನು ಫೆಬ್ರವರಿ 1 ರಂದು ಮಂಡನೆಯಾಗಲಿರುವ ಕೇಂದ್ರ ಬಜೆಟ್ ಸಿದ್ಧಪಡಿಸಲು ಆಧಾರವಾಗಿ ಬಳಸಲಾಗುತ್ತದೆ. ಭಾರತದ ಆರ್ಥಿಕತೆಯು 2023-24ರಲ್ಲಿ ಶೇ. 8.2 ರಷ್ಟು ಮತ್ತು 2024-25ರಲ್ಲಿ ಶೇ. 6.5 ರಷ್ಟು ಬೆಳವಣಿಗೆ ಕಂಡಿತ್ತು.
ನಿಮ್ಮ ಕಾಮೆಂಟ್ ಬರೆಯಿರಿ